Meexuwa xb’aanunkil li chaab’il
Li Qaawa’ naxye qe naq jo’q’e xaqxooko rik’in paab’aal sa’ xb’een lix saqoonaq, ink’a’ taawiib’anq qach’ool chi moko tooxuwaq; taanimanq b’an li qajom chixb’aanunkil li chaab’il.
Ex was wiitz’in raarookex inb’aan, nintz’aama chi tuulan inch’ool naq lix Musiq’ li Qaawa’ chiwanq qik’in naq nin’aatinak anajwan. Nujenaq inch’ool rik’in b’antioxink choq’ re li Qaawa’, aj jolominel re li Iglees a’in, xb’aan li musiq’anb’il na’leb’ ak xqeek’a xb’aan li tijok k’eeb’il rik’in x’anchalil li ch’oolej, li musiq’anb’il aatin, ut li b’ichank jo’eb’ li anjel sa’ li ch’utub’aj-ib’ a’in.
Sa’ li abril xnume’, li Awa’b’ej Thomas S. Monson xk’e li raatin li xreek’asi xch’ooleb’ naab’aleb’ chiru chixjunil li ruchich’och’, jo’ ajwi’ li we. A’an x’aatinak chirix lix wankilal lix Hu laj Mormon. A’an xrelaji qu chixtzolb’al, chixtz’ilb’al rix sa’ qach’ool, ut chixyu’aminkil lix tzol’leb’. A’an xyeechi’i naq wi taqajach raj ru li hoonal wulaj wulaj re xtzolb’al ut xtz’ilb’al rix sa’ qach’ool jo’ ajwi’ xpaab’ankileb’ li taqlahom neke’tawman sa’ lix Hu laj Mormon, taqak’ul xnawom qach’ool aajel ru chirix lix yaalalil, ut li xnawom ch’oolej a’an chirix li yo’yookil Kristo tixk’am qab’e chiruheb’ li hoonal re ch’a’ajkilal. (Chi’ilmanq “Lix wankilal lix Hu laj Mormon,” Liahona, Mayo 2017, 86–87.)
Jo’ naab’al eere, xwab’i li raatin li profeet jo’ lix yaab’ xkux li Qaawa’ choq’ we. Ut, jo’ ajwi’ naab’al eere, xink’ulub’a naq tinpaab’ li raatin. Anajawan ut, chalen chaq inch’ajomil, week’ahom chaq’ li ch’olob’ahom naq lix Hu laj Mormon a’an li raatin li Dios, naq li Yuwa’b’ej ut li K’ajolb’ej ke’xk’utb’esi rib’ chiru ut ke’aatinak rik’in laj Jose Smith, ut naq eb’ li najter Apostol ke’chal rik’in li Profeet aj Jose re xk’ojob’ankil wi’chik lix laawil li tijonelil re lix Iglees li Qaawa’.
Rik’in lix nawom ch’oolej a’an, wilom ru lix Hu laj Mormon rajlal kutan chiru numenaq 50 chihab’ anajwan. Jo’kan ut, maare xinru chixk’oxlankil naq li raatin li Awa’b’ej Monson k’eeb’il re jalaneb’ chik. A’b’anan, jo’ naab’al eere, xweek’a naq lix kawresihom ch’oolej ut lix yeechi’ihom li profeet xe’b’oqok we chixk’eeb’al inch’ool b’ayaq chik. Naab’al eere ak xeb’aanu li xinb’aanu laa’in; tijok chi nimob’resinb’il lix anchalil lin ch’ool, tz’ilok-ix chi nimob’resinb’il wajom, ut k’anjelak chi nimob’resinb’il inmetz’ew chiru li Qaawa’ ut chiruheb’ li was wiitz’in choq’ re a’an.
Jwal chaab’il li xk’ulman choq’ we, ut choq’ eere naab’alex, a’an li k’a’ru xyeechi’i li profeet naq taak’ulmanq. Eb’ li xe’xpaab’ chi yaal lix musiq’anb’il na’leb’ xe’rab’i chi saqen chik ru li Musiq’ej. Xe’xtaw jun kawilal nim chik re xtz’eqtaanankil li aaleek ut xe’reek’a jun paab’aal nim chik chirix li Jesukristo waklesinb’il chi yo’yo, chirix lix evangelio, ut chirix lix yo’yookil Iglees.
Sa’ jun xq’ehil li nimla choqink sa’ ruchich’och’, lix nimob’resinkileb’ li xnawom ch’oolej a’in xe’risi chaq li wiib’ank ch’oolej ut li xiw ut xe’xk’am li tuqtuukilal reeqajeb’ a’an. Rik’in xpaab’ankil li raatin li Awa’b’ej Monson xe’k’ulman wiib’ chik chaab’ilal choq’ we: Xb’een, li Musiq’ej li xyeechi’i, a’an xk’e we li sahil ch’oolejil chirix li taachalq chalel, us ta yoo chi nimank li choqink sa’ ruchich’och’. Ut, xkab’, li Qaawa’ xk’e we—ut eere laa’ex—jun eek’ahom nim chik re lix rahom choq’ reheb’ li ani wankeb’ sa’ rahilal. Xqeek’a chi nimob’resiik li qajom chi xik re xteq’ankileb’ li jun ch’ol chik. Li ajom a’an wan tz’aqal sa’ xyi lix k’anjel ut lix tzol’leb’ li Awa’b’ej Monson.
Li Qaawa’ kixyeechi’i naq te’xraheb’ jalaneb’ ut naq te’wanq xkawilal xch’ool li Profeet aj Jose Smith ut laj Oliver Cowdery naq li k’anjel tento te’xb’aanu jwal ch’a’ajaq. Li Qaawa’ kixye naq lix kawilal xch’ooleb’ te’raj ru taachalq xb’aan lix paab’aaleb’ chirix a’an jo’ saqoonaq reheb’:
“Meexuwa xbʼaanunkil li chaabʼil, ex walal, xbʼaan naq joʼ kʼihal li nekeraw, aʼan ajwiʼ teeqʼol; joʼkan ut, wi nekeraw li chaabʼil teeqʼol ajwiʼ li chaabʼil choqʼ eeqʼajkamunkil.
“Joʼkan ut, mexxuwak, ex chʼina teep inkarneer, chebʼaanu li chaabʼil; cheʼxmol ribʼ li ruchichʼochʼ ut li xbʼalbʼa cheru, xbʼaan naq wi kabʼlanbʼilex saʼ xbʼeen insaqoonaq, inkʼaʼ nekeʼru chi numtaak.
“Kʼehomaq reetal, inkʼaʼ nekexinkʼe saʼ tojbʼa-maak; chapomaq eebʼe ut mexmaakobʼ chik; bʼaanuhomaq rikʼin xʼanchalil eekʼaʼuxl li kʼanjel li kexintaqla wiʼ.
“Chexʼiloq wankin wiʼ saʼ li junjunq eekʼoxlahom; miwiibʼan eechʼool, mexxuwak.
“Kʼehomaq reetal li kʼobʼolal kikʼobʼeʼ wiʼ xkʼatq insaʼ, ut joʼkan ajwiʼ li reetalil li klawx saʼ li wuqʼ ut saʼ li woq; tiikaqex chi paabʼank, chepaabʼ lin taqlahom, ut laaʼex teereechani li awaʼbʼejihom re choxa” (Tz. ut S. 6:33–37).
Li Qaawa’ kixye reheb’ lix jolominel re li K’ojob’ank wi’chik, ut naxye ajwi’ qe, naq jo’q’e xaqxooko rik’in paab’aal sa’ xb’een lix saqoonaq, ink’a’ taawiib’anq qach’ool chi moko tooxuwaq; taanimanq b’an li qajom chixb’aanunkil li chaab’il. Naq naqak’ulub’a lix b’oqom li Awa’b’ej Monson re rawb’al sa’ qach’ool jun xch’olob’ahom li yaal chirix li Jesukristo, naqak’ul li wankilal, li ajom, ut lix kawilal qach’ool re xik chixtenq’ankileb’ jalaneb’ chi maak’a’ qak’oxlahom chirix li naqaj ru laa’o.
Wilom li paab’aal ut xkawilal ch’oolej naab’al sut naq eb’ laj Santil Paab’anel tiikeb’ xch’ool neke’xk’ul li xuwajel yale’k-ix. Jun sut, wankin chaq sa’ Idaho naq kijore’ li represa Teton sa’ li 5 xb’e li po Junio, 1976. Ki’el chaq ha’ rik’xin xnimal xmetz’ew. K’iila mil ke’el chaq sa’ rochocheb’. Ke’sache’ k’iila mil chi kab’l. A’ut b’antiox re jun sachb’a-ch’oolej, ka’ajwi’ ke’kamsiik chi kub’enaq chiru 15 kristiaan.
Li kiwil aran, wilom chaq yalaq b’ar naq eb’ laj Santil Paab’anel neke’xaqli chi kaweb’ xch’ool sa’ xb’een li saqoonaq re jun xnawom ch’oolej chirix li Jesukristo. Xb’aan naq ink’a’ neke’wiib’an xch’ool chirx naq li Kristo naxk’aak’aleheb’, maak’a’ chik lix xiw. Ink’a’ neke’xk’e reetal li yale’k-ix neke’nume’ wi’, neke’xik b’an re xtenq’ankileb’ li jun ch’ol chik. Ut neke’xb’aanu a’in xb’aan lix rahom choq’ re li Qaawa’, chi ink’a’ neke’xpatz’ xq’ajkamunkileb’.
Jo’ reetalil a’an, naq kijore’ li represa Teton, jun sumal aj Santil Paab’anel yookeb’ chi b’eek, k’iila kiloom xnajtileb’ rik’in li rochoch. Tz’aqal sa’ xhoonal naq ke’rab’i resil a’an sa’ li radio, ke’xsutq’isi rib’ sa’ junpaat toj sa’ Rexburg. Ink’a’ xkoheb’ sa’ li rochoch re rilb’al ma sachenaq, xkoheb’ b’an re xtawb’al lix obiisp. A’an wan chaq sa’ jun kab’l b’ar te’k’ule’q li ani neke’raj tenq’aak. A’an yoo chaq chixb’eresinkileb’ li k’iila mil chi aj tenq’anel li yookeb’ chi wulak sa’eb’ li q’ani camion.
Li sumal ke’jilok rik’in li obiisp ut ke’xye, “Toje’ xoosutq’iik. Obiisp, b’ar tooruuq chi xik re tenq’ank?” A’an kixk’e reheb’ lix k’ab’a’ jun junkab’al. Li sumal a’an ke’kana chirisinkil chaq li sulul ut li ha’ sa’ naab’aleb’ li kab’l. Ke’k’anjelak chalen chaq eq’la toj ewu chiru k’iila kutan. Chirix naab’al li k’anjel, ke’hilan b’ayaq re te’ruuq chi xik re rilb’al li rochoch. Maak’a’ chik xb’aan li b’uuti’ha’, jo’kan naq maak’a’ chik wan re te’xchajob’resi. Jo’kan naq ke’xsutq’isi rib’ sa’ junpaat re xik chixtenq’ankil lix obiisp. Ke’xpatz’, “Obiisp. Ma wan ani tooruuq chixtenq’ankil?”
Li sachb’a-ch’oolej a’an re xkawilal li ch’oolej ut li tz’aqal rahok—li tz’aqal rahok narahok wi’ li Kristo—kib’aanuman chi k’iilasutinb’il chiru xnumikeb’ li chihab’ ut chiru chixjunil li ruchich’och’. Kik’ulman sa’eb’ li xuwajel kutan re rahob’tesiik ut yale’k-ix sa’ xkutankil li Profeet aj Jose Smith sa’ Missouri. Kik’ulman sa’ xkutankil naq laj Brigham Young yoo chixb’eresinkileb’ li ke’el chaq Nauvoo ut naq kixb’oqeb’ laj Santil Paab’anel chixkanab’ankil li rochocheb’ sa’ naab’aleb’ chi na’ajej sa’ xjayal li rokeb’aal saq’e re li Estados Unidos re te’xtenq’a rib’ chirib’ileb’ rib’ chixkab’lankil li tenamit Sion choq’ re li Qaawa’.
Wi taawil ru lix tz’iib’ahomeb’ laj tehol b’e a’an, taawil li sachb’a-ch’oolej re paab’aal chiralinasinkil li wiib’ank ch’oolej ut li xiw. Ut taawil ru resileb’ laj Santil Paab’anel chixkanab’ankileb’ li rajomeb’ re xtenq’ankil junaq chik choq’ re li Qaawa’, rub’elaj naq te’sutq’iiq rik’ineb’ lix ketomq a’an malaj lix ch’och’ maji’ k’alenb’il.
Xwil juntaq’eet li sachb’a-ch’oolej junjunqeb’ chaq li kutan anajwan chirix naq xwulak li kaq-sut-iq’ Irma sa’ Puerto Rico, Santo Tomás, ut Florida, b’ar yookeb’ laj Santil Paab’anel chixjunajinkil rib’ rik’in jalaneb’ paab’aal, li ch’uut re li k’aleb’aal, ut li ch’uut re li tenamit re xtikib’ankil li tenq’ank aran.
Jo’eb’ li wamiiw sa’ Rexburg, jun b’eelomej ut ixaqilb’ej moko qakomon ta sa’ li Iglees aran Florida, xe’xsik’ xtenq’ankileb’ jalaneb’ sa’ li tenamit reeqaj xtuqub’ankil li rochocheb’. Naq li rech kab’al, aj Santil Paab’aneleb’, xe’xq’axtesi li tenq’ank reheb’ sa’ risinkil wiib’eb’ li ninqi xtoonal che’ li t’anenaqeb’ chiru li rochoch, eb’ a’an xe’xch’olob’ naq jwal ka’ch’inob’resinb’ileb’ xch’ool rik’in a’an, jo’kan naq xe’xsik’ xtenq’ankileb’ jalaneb’, chi wan xpaab’aaleb’ naq li Qaawa’ tixk’e reheb’ li tenq’ te’raj rik’in tz’aqal li rochocheb’ a’an. Li b’eelomej xwotz naq rub’elaj naq xe’chal li qakomon re tenq’ank, yookeb’ chi tijok. Xe’xk’ul xsumehom naq taachalq li tenq’. Yal junjunqeb’ li hoonal toj reetal naq xk’ulun li tenq’ xe’xpatz’.
Xwab’i naq wankeb’ li ani li neke’xye “Eb’ li Q’ani Anjel” reheb’ li qakomon aj Santil Paab’anel li tiqtookeb’ rik’in li q’ani kamiis rik’in li aatin “Uq’ej aj tenq’anel.” Jun ixq aj Santil Paab’anel kixk’am lix b’eleb’aal ch’iich’ sa’ jun mecánico, ut li winq li natenq’an re xch’olob’ li k’a’ru “xk’ul sa’ musiq’ej” naq eb’ li kristiaan sa’eb’ li q’ani kamiis xe’risiheb’ li che’ t’anenaqeb’ chirix li rochoch. Toj’a naq xye, “xe’xb’icha jun b’ich we chirix naq laa’o ralal xk’ajolo li Dios.”
Jun chik aj Florida—a’an ajwi’ moko qakomon ta—xye naq eb’ laj Santil Paab’anel xe’chal sa’ rochoch naq yoo chi k’anjelak re xtuqub’ankil chixjunil li sachk xk’ulman chirix. Sachso xch’ool, jwal tiik li kutan, ut haye’ na’ok chi yaab’ak. Eb’ laj tenq’anel xe’xb’aanu, sa’ raatin a’an, “jun tz’aqal sachb’a-ch’oolej.” Xe’k’anjelak moko ka’aj ta wi’ chi k’eek’ookeb’ xch’ool, rik’in aj b’an wi’ li se’, ut maak’a’ xe’xpatz’ choq’ re lix tenq’.
Xwil li k’ehok ch’oolej ut li se’ek a’an naq, ewu chaq sa’ jun sabado, xinch’utub’ wib’ rik’in jun ch’uut aj Santil Paab’anel aran Florida. Eb’ laj tenq’anel a’in xe’hilan yal junpaat re xk’eeb’al ruq’eb’ we. Xe’xye naq yal chiru li q’ojyin xnume’, junaq 90 chi komon re li oqech li wankeb’ wi’ sa’ xweent Georgia xe’xk’uub’ jun k’uub’anb’il na’leb’ chirix chanru te’tenq’anq sa’ Florida.
Xe’el chaq Georgia sa’ li kaahib’ hoonal re eq’la, k’iila hoonal li xikik toj sa’ Florida, toja’ naq xe’k’anjelak chiru chixjunil li kutan toj sa’ q’ojyin, ut xe’xk’uub’ naq eweraq chik te’k’anjelaq wi’chik.
Xe’xch’olob’ chiwu chixjunil a’in chi se’se ruheb’. Ka’ajwi’ xweek’a naq maak’a’ li neke’ch’a’ajko’k wi’, ka’ajwi’ naq xe’raj naq tinkanab’ li b’antioxink reheb’ re naq te’ruuq chi ok chi k’anjelak wi’chik. Li awa’b’ej re li oqech ak xloch lix jachleb’ re ch’iich’ ut yoo chixsetb’al jun xtoonal che’ t’anenaq ut jun li obiisp ak yoo chixk’amb’aleb’ chaq ruq’eb’ li che’ naq yooko chi ok sa’ li qab’eleb’aal ch’iich’ re xik chirilb’al jun chik li ch’uut aj tenq’anel.
Eq’la chaq sa’ li kutan a’an, naq elk chaq qe sa’ jalan chik chi na’ajej xqula’ani, jun winq xjilok rik’in li b’eleb’aal ch’iich’, xrisi lix punit, ut xb’antioxi qe xb’aan aj tenq’anel. A’an xye, “Maawa’in komon sa’ laa iglees. Ink’a’ naru ninpaab’ li k’a’ru yookex chixb’aanunil choq’ qe. Chi’osob’tesinq eere li Dios.” Jun aj tenq’anel SUD li xaqxo chixk’atq sa’ lix q’ani kamiis xse’e ut maak’a’ xye, jo’ naq maak’a’ taab’antioxiiq wi’.
Sa’ ajwi’ xhoonal naq laj tenq’anel aj Georgia xe’chal chaq re xtenq’ankil li winq a’in li ink’a’ xru chixpaab’ankil a’an, k’iila cient chik chi aj Santil Paab’anel li wankeb’ sa’ xweent Florida xkoheb’ k’iila cient chi kiloom toj sa’ jalan chik li na’ajej sa’ xtz’e li saq’e aran Florida b’ar xuwajel wi’chik li sachok ke’xk’ul.
Sa’ li kutan a’an, xjultiko’ we, ut xintaw ru chi chaab’il chik, li profeetil raatin li Profeet aj Jose Smith: “Jun winq li nujenaq rik’in lix rahom li Dios, moko sa ta xch’ool rik’in ka’ajwi’ rosob’tesinkil lix junkab’al, a’an naxik b’an chiru chixjunil li ruchich’och’, q’axal anchal lix ch’ool chirosob’tesinkil chixjunil li winqilal” (Enseñanzas de los Presidentes de la Iglesia: Jose Smith [2007], 426).
Naqil li rahom a’in sa’ xyu’ameb’ laj Santil Paab’anel sa’ chixjunil na’ajej. Rajlal sut naq nak’ulman jun nimla rahilal yalaq b’ar sa’ ruchich’och’, eb’ laj Santil Paab’anel neke’k’ehok tumin re ut neke’tenq’an sa’ lix k’anjel li Iglees re tenq’ank. Ink’a’ na’ajman ru naq toopatz’oq. Relik chi yaal, wan naq tento taqapatz’ reheb’ li neke’raj tenq’ank naq te’royb’eni b’ayaq toj reetal naq eb’ li neke’b’eresin re li k’anjel kawresinb’ilaqeb’ re xk’ulb’aleb’.
Li ajom a’an re osob’tesink a’an li ruuchinihom xk’ulb’al jun xnawom ch’oolej chirix li Jesukristo, lix evangelio, lix Iglees k’ojob’anb’il wi’chik, ut chirixeb’ lix profeet. Xb’aan a’an naq lix tenamit li Qaawa’ ink’a’ neke’wiib’an xch’ool ut ink’a’ neke’xuwak. Xb’aan a’an naq eb’ li misioneer neke’ok chi k’anjelak chiru ras riitz’ineb’ sa’ xkaaxukutil li ruchich’och’. Xb’aan a’an naq eb’ li na’b’ej yuwa’b’ej neke’tijok rochb’eeneb’ li ralal xk’ajol choq’ reheb’ li jun ch’ol chik. Xb’aan a’an naq eb’ laj jolominel neke’xpatz’ reheb’ li saaj naq te’xk’ulub’a sa’ xch’ooleb’ naq te’xpaab’ lix tz’aam li Awa’b’ej Monson naq te’xtz’il rix lix Hu laj Mormon. Li ruuchinihom maawa’ re li elajink neke’xb’aanu laj jolominel, re b’an li k’anjelak rik’in paab’aal neke’xb’aanu li saaj ut li komon. Li paab’aal a’an chi k’anjelanb’il, li naraj ru li k’anjelak chi naqakub’si li naqaj laa’o, a’an naxk’am chaq jun lix jalajikeb’ xch’ool li naxk’eheb’ chireek’ankil lix rahom li Dios.
A’b’anan, li qach’ool neke’kana chi jaljookeb’ ka’ajwi’ jo’ najtil naq ink’a’ naqakanab’ chixtaaqenkil lix na’leb’ li profeet. Wi naqakanab’ yal chirix jun ch’ina k’anjel, taamaak’a’o’q li jalajik a’an.
Eb’ laj Santil Paab’anel li tiikeb’ chi paab’ank ak xe’xnimob’resi xpaab’aaleb’ chirix li Jesukristo, lix Hu laj Mormon jo’ li raatin li Dios, ut lix k’ojob’ankil wi’chik lix laawil li tijonelil sa’ lix Iglees tz’aqal yaal. Li xnawom ch’oolej a’in li nimob’resinb’il chik naxk’e qe xnimal lix kawilal qach’ool ut rahom choq’ reheb’ li jun ch’ol chik reheb’ li ralal xk’ajol li Dios. A’b’anan, li ch’a’ajkilal ut li hoonal li te’chalq, jwal mas li te’elajinq qe.
Ink’a’ naru taqil chi rub’elaj tz’aqal chi junjunqil li k’a’ru taak’ulmanq, a’ut wan qana’leb’ chirix li taak’ulmanq. Naqanaw naq sa’ roso’jikeb’ li kutan, taawanaq chi choqinb’il li ruchich’och’. Naqanaw naq sa’ xyi yalaq ch’a’ajkilal li tachalq, li Qaawa’ tixk’ameb’ xb’e laj Santil Paab’anel li tiikeb’ chi paab’ank re xk’amb’al chaq lix evangelio li Jesukristo re chixjunileb’ li tenamit, junkab’al, aatinob’aal, ut teepal. Ut naqanaw naq k’ulub’ejaqeb’ ut kawresinb’ilaqeb’ lix tz’aqal tzolom li Qaawa’ re xk’ulb’al a’an naq taak’ulunq wi’chik. Mooxuwak.
Jo’kan, jo’ k’ihal naq ak xqanimob’resi li qapaab’aal ut xkawilal qach’ool, li Qaawa’ toj naraj xkomon chik li qak’anjel—jo’ ajwi’ re li tasal tenamit te’chalq chiqix. Tento naq kawaqeb’ chik ut nimaq chik xkawilaleb’ xch’ool xb’aan naq te’xb’aanu li k’a’ru jwal wi’chik nim ut ch’a’aj chiqu li qab’aanuhom laa’o. Ut te’xk’ul li pleetik nimaq chik xb’aan li xik na’ilok reheb’ li qaam.
Chanru taawanq qayo’onihom sa’ li qab’eenik chi uub’ej k’eeb’il chaq xb’aan li Qaawa’: “Chexʼiloq wankin wiʼ saʼ li junjunq eekʼoxlahom; miwiibʼan eechʼool, mexxuwak” (Tz. ut S. 6:36). Li Awa’b’ej Monson xye qe chanru taaruuq taqab’aanu a’an. Tento taqatz’il rix sa’ qak’a’uxl ut taqayu’ami lix Hu laj Mormon ut li raatineb’ li profeet. Tento tootijoq chi anchal li qach’ool re xk’ulb’al li maatan re li tz’aqal rahok, li tz’aqal rahok narahok wi’ li Kristo (chi’ilmanq Moroni 7:47–48). Ut sa’ xb’een chixjunil, tento naq junelik ut chi yalb’il qaq’e naqataaqe li profeetil aatin.
Naq ch’a’aj li b’e chiqu, naru tootenq’aaq xb’aan lix yeechi’ihom li Qaawa’—li yeechi’ihom li najultika qe li Awa’b’ej Monson naq rajlal naxye li raatin li Kolonel a’in: “Ut ani nak’uluk eere, aran tinwanq ajwi’ laa’in, xb’aan naq laa’in tinxik chiru lee rilob’aal. Tinwanq sa’ lee nim uq’ ut sa’ lee tz’e, ut lin Musiq’ taawanq sa’ lee ch’ool, ut eb’ lin anjel chesutam re eewaklesinkil” (Tz. ut S. 84:88).
Ninch’olob’ xyaalal naq li Qaawa’ naxik chiru laa wilob’aal yalaq jo’q’e wankat sa’ xtaql a’an. Wan naq laa’aqat li anjel taqlanb’il xb’aan li Qaawa’ re xwaklesinkil jalaneb’. Wan naq laa’aqat li ani sutinb’ilaq xb’aaneb’ li anjel li neke’waklesink aawe. A’ut junelik taawanq aawik’in lix Musiq’ sa’ laa ch’ool, jo’ naq yeechi’inb’il aawe sa’ li loq’laj wa’ak. Ka’ajwi’ tento taapaab’ lix chaq’rab’.
Toj chalel eb’ li kutan li q’axal chaab’ilaqeb’ choq’ re li rawa’b’ejihom li Dios sa’ ruchich’och’. Li k’a’ru naxsik’ qapleetinkil tixkawob’resi li qapaab’aal chirix li Jesukristo, jo’ naq xb’aanuhom chalen chaq xkutankil li Profeet aj Jose Smith. Li paab’aal junelik naxq’ax ru li xiw. Li xaqliik sa’ komonil tooxjunaji. Ut eb’ laa tij choq’ reheb’ li ani wankeb’ sa’ aajel ru , ab’inb’ileb’ ut sumenb’ileb’ xb’aan jun Dios aj rahonel. Ink’a’ nachal xwara chi moko nawar.
Ninch’olob’ xyaalal naq yo’yo li Dios li Yuwa’b’ej ut naq a’an naraj naq tatsutq’iiq rik’in. A’an a’in lix Iglees li Qaawa’ Jesukristo tz’aqal yaal. A’an naxnaw aawu; nakatxra; nakatxk’aak’ale. A’an kixtoj rix laa maak ut lin maak ut lix maakeb’ chixjunileb’ li ralal xk’ajol li qaChoxahil Yuwa’. Xtaaqenkil a’an sa’ laa yu’am ut sa’ laa k’anjel chiru aawas aawiitz’in a’an li junaj chi b’e li naxik sa’ li junelik yu’am.
Jo’kan ninch’olob’ xyaalal ut ninkanab’ li wosob’tesihom ut lin rahom eerik’in. Sa’ lix loq’laj k’ab’a’ li Jesukristo, amen.