Lix wankilal lix Hu laj Mormon
Nintz’aama re li junjunq qe naq rajlal kutan taqatzol ut taqatz’il rix lix Hu Laj Mormon rik’in jun tij sa’ qach’ool.
Ex was wiitz’in raarookex inb’aan, nink’e xsahil eek’ulunik naq jun sut chik ch’utch’uuko sa’ jun jolomil ch’utub’aj-ib’ re Lix Iglees Li Jesukristo rehebʼ laj Santil Paabʼanel saʼ Rosoʼjikebʼ li Kutan. Rub’elaj naq tinq’axtesi lin kawresinb’il aatin anajwan, nawaj raj xyeeb’al resil oob’ li ak’ santil ochoch li te’kab’laq sa’eb’ li na’ajej a’in: Brasília, Brasil; Manila, Filipinas; Nairobi, Kenia; Pocatello, Idaho, EE.UU.; ut Sarago Springs, Utah, EE.UU.
Sa’ li eq’la a’in tin’aatinaq chirix lix wankilal lix Hu Laj Mormon ut lix aajelil ru choq’ qe, jo’ komon re li Iglees a’in, xtzolb’al, xtz’ilb’al rix, ut roksinkil lix k’utum sa’ li qayu’am. K’a’jo’ xnimal lix aajelil ru xk’ulb’al jun xnawom qach’ool kaw rib’ ut tz’aqal chirix lix Hu Laj Mormon.
Wanko sa’ jun q’e kutan jwal ninqeb’ lix yalb’a-ix ut lix maa’usilal. K’a’ru tixkol qix chiru li maak ut li maa’usilal li puktesinb’ileb’ sa’ li ruchich’och’ anajwan? Ninnaw chi tz’aqal naq jun kawil xnawom qach’ool chirix laj Kolol qe, li Jesukristo, ut chirix lix evangelio tooxtenq’a rik’in xkolb’al qix. Wi ink’a’ yookat chirilb’al ru lix Hu Laj Mormon wulaj wulaj, chab’aanuhaq taxaq. Wi taawil ru rik’in tijok ut rik’in x’anchalil aawatawom re xnawb’al li yaal, li Santil Musiq’ej tixk’ut chawu naq yaal. Wi yaal—ut ninch’olob’ xyaalal naq yaal a’an—jo’kan b’i’ laj Jose Smith kiwan choq’ jun profeet li kiril ru li Dios li Yuwa’b’ej ut li Ralal, li Jesukristo.
Rik’in naq yaal lix hu Laj Mornon, Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an xIglees li Qaawa’ arin sa’ ruchich’och’, ut li santil tijonelil re li Dios k’ojob’anb’il wi’chik choq’ re xchaab’ilal ut rosob’tesinkileb’ li ralal xk’ajol.
Wi maak’a’ lix kawil nawom aach’ool chirix li k’a’aq re ru a’in, chab’aanu li na’ajman ru re xk’ulb’al. Jwal aajel ru naq taawanq xnawom aach’ool aajunes awib’ sa’eb’ li ch’a’ajkil q’e kutan a’in, xb’aan naq lix nawomeb’ xch’ool li jun ch’ol chik ink’a’ naru chak’amb’al toj sa’ roso’jik. A’b’anan, chirix xk’ulb’al, jun xnawom ch’oolej tento’ naq eek’asinb’ilaq ut k’eeb’ilaq xyu’am rik’in xpaab’ankileb’ junelik lix taqlahom li Dios ut rik’in li tijok ut xtzolb’aleb’ li loq’laj hu wulaj wulaj.
Ex inraarookil komon sa’ xk’anjel li Qaawa’, nintz’aama re li junjunq qe naq rajlal kutan taqatzol ut taqatz’il rix lix Hu Laj Mormon rik’in jun tij sa’ qach’ool. Rik’in xb’aanunkil a’an, tooruuq chirab’inkil lix yaab’ xkux li Musiq’ej, chixkuyb’al li aaleek, chi numtaak sa’ xb’een li wiib’ank ch’oolej ut li xuwak, ut chixk’ulb’al xtenq’ li choxa sa’ li qayu’am. Jo’kan ninch’olob’ xyaalal chi anchal inch’ool, sa’ xk’ab’a’ li Jesukristo, amen.