Li chaab’il ch’oolej, li tz’aqal rahok, ut li rahok
Chiqatz’il rix li qayu’am ut chiqayal qaq’e chixtaaqenkil li k’a’ru kixk’ut qe rik’in li Kolonel rik’in naq naqak’ut xchaab’ilal qach’ool, li qarahom, ut li tz’aqal rahok.
Ex was wiitz’in raarookex inb’aan, nimanb’il naweek’a rik’in li usilal chi aatinak eerik’in sa’ li ch’utam a’in re chixjunil li ruchich’och’ choq’ reheb’ li ani tiikeb’ xch’ool li neke’k’amok re lix tijonelil li Dios. Sa’ li q’ojyin a’in tin’aatinaq chirix jun na’leb’ kinye chaq resil junxil.
Li profeet aj Mormon kitz’iib’ak chirix jun na’leb’ k’a’jo’ xnimal ru re li Kolonel li tento te’xb’aanu lix tzolom. A’an kixye:
“Ut wi junaq winq tuulan ut kub’enaq xch’ool, ut naxch’olob’ rik’in xwankil li Santil Musiq’ej naq li Jesus a’an li Kristo, tento taawanq ajwi’ li rahok rik’in; xb’aan naq wi maak’a’ li rahok rik’in, a’an maak’a’ na’ok wi’; jo’kan naq tento taawanq rahok rik’in.
“Ut li rahok najt na’oyb’enin, ut chaab’il xch’ool, ut ink’a’ nakaqalin, ut ink’a’ nimob’resinb’il rib’, ink’a’ naxsik’ li k’a’ru re. …
“Jo’kan ut, ex was wiitz’in raarookex inb’aan, wi maak’a’ li rahok eerik’in, maak’a’ nekex’ok wi’, xb’aan naq li rahok maajo’q’e na’oso’. Jo’kan ut, chexjiloq rik’in li rahok, a’an li q’axal nim wi’chik chiru chixjunil, xb’aan naq chixjunil li k’a’aq re ru tento taa’oso’q—
“A’b’anan li tz’aqal rahok a’an li saq ruhil rahok narahok wi’ li Kristo, ut junelik nawan; ut ani natawman chi wank rik’in sa’ roso’jik li kutan, usaq choq’ re a’an.”
Ex was wiitz’in, wi maak’a’ lix ch’aab’ilal qach’ool choq’ reheb’ li jun ch’ol chik, ink’a’ naqaloq’oni ru lix tijonelil li Dios.
Lin raarookil amiiw ut rech aj k’anjel, li Elder Joseph B. Wirthlin, a’an chaq jun winq chaab’il xch’ool chi yaal. A’an kixye:
“Li chaab’il ch’oolej a’an lix xe’ li choxahil yu’am. Jun li winq jo’ li Kristo naxk’ut xchaab’ilal xch’ool reheb’ li jun ch’ol chik. Li chaab’il ch’oolej tento naq taawanq rik’in chixjunil li qaatin ut li qab’aanuhom sa’ qatrab’aaj, sa’ qatzoleb’aal, sa’ Iglees ut, q’axal wi’chik sa’ li qochoch.
“Li Jesus, laj Kolol qe, a’an kiwan jo’ tz’aqal reetalil li chaab’il ch’oolej ut li toq’ob’ank-u.”
Eb’ li loq’laj hu neke’xk’ut qe naq xk’anjelankil chi tiik ru li tijonelil wan chi chapcho chiru chanru naqab’eresi qib’ rik’in lix b’eenil li chaab’il ch’oolej, li tz’aqal rahok, ut li rahok. Sa’ li Tzol’leb’ ut Sumwank naqil:
“Maajun wankilal chi moko teneb’ank naru malaj tento taa’uxmanq sa’ xk’ab’a’ li tijonelil, ka’ajwi’ rik’in li q’unb’esink ch’oolej, rik’in li najtil oyb’enink, rik’in li q’unal ch’oolej ut li tuulanil, ut rik’in li rahok chi moko pak’b’il ta;
“Rik’in chaab’il ch’oolej, ut li saq ruhil nawom, li taanimob’resinq chi naab’al re li aamej chi maak’a’ li ka’pak’alil ut chi maak’a’ li b’alaq’il.”
Ex was wiitz’in, chiqatz’il rix li qayu’am ut chiqayal qaq’e chixtaaqenkil li k’a’ru kixk’ut qe rik’in li Kolonel rik’in naq naqak’ut xchaab’ilal qach’ool, li qarahom, ut li tz’aqal rahok. Naq taqab’aanu, toowanq sa’ jun na’ajej chaab’ilaq chik re xtz’aamankil chi kub’eek lix wankilal li choxa sa’ qab’een, sa’ xb’een li qajunkab’al, ut sa’ xb’eeneb’ qech aj b’eenel sa’ li b’e a’in, wan naq k’a’jo’ xch’a’ajkilal, re sutq’iik sa’ li qachoxahil junkab’al. Jo’kan nintz’aama sa’ xk’ab’a’ li Jesukristo li Qaawa’, amen.