Lix Hu laj Mormon: K’a’ru raj xjalanil laa yu’am chi maak’a’ li hu a’an?

Octubre 2017

2:3

Lix Hu laj Mormon: K’a’ru raj xjalanil laa yu’am chi maak’a’ li hu a’an?

Xb’aan li Awa’b’ej Russell M. Nelson

Awa’b’ej re lix Molameb’ li Kab’laju chi Apostol

Rik’in sachb’a-ch’oolej ut jo’ maajun chik naru, lix Hu laj Mormon naxk’ut chiqu li Jesukristo ut lix evangelio.

Sa’ 1986, kinb’oqe’ chixk’eeb’al jun tzolok sa’ jun tzoleb’aal sa’ Accra, Ghana. Aran kinnaweb’ ru junjunqeb’ li kristiaan ninqeb’ xwankil, jo’ jun rey re jun teep sa’ Africa. Naq koo’aatinak chi rub’elaj li tzolok tink’e, li rey ki’aatinak wik’in rik’in xtenq’ankil jun aj jalol ru aatin li kixjaltesi ru li yoo chixyeeb’al we. Kinsume laj jalol ru aatin, toja’ naq a’an kixjaltesi ru li kinye re li rey.

Chirix lin tzolok, li rey kijilok wik’in, a’ut chi maak’a’ laj jalol ru aatin. Kisach inch’ool naq kink’e reetal naq q’axal chaab’il ki’aatinak sa’ Ingles—a’ li Ingles re Inglaterra ninye ajwi’!

Sachso chaq xch’ool li rey. “Anihat laa’at?” kixpatz’ we.

Kinsume, “Laa’in jun lix k’ojob’anb’il Apostol li Jesukristo.”

Li rey kixpatz’ we, “K’a’ru naru taak’ut chiwu chirix li Jesukristo?”

Kinsume rik’in jun patz’om: “Ma naru tinpatz’ k’a’ru ak nakanaw chirix a’an?”

Lix sumehom li rey kixk’ut naq a’an naxnaw chi us li Santil Hu ut naq kixra li Qaawa’.

Toja’ naq kinpatz’ re ma naxnaw chirix lix k’anjel li Jesukristo sa’ xyanqeb’ li tenamit ke’wan najter sa’ li ch’och’ America.

Jo’ kink’oxla, ink’a’ kixnaw.

Kinch’olob’ naq chirix lix kamik chiru krus ut lix waklijik chi yo’yo li Kolonel, a’an kik’ulun sa’ xyanqeb’ li najteril tenamit sa’ li ch’och’ America, b’ar wi’ kixk’ut lix evangelio. Kixk’uub’ lix Iglees ut kixpatz’ reheb’ lix tzolom naq te’xtz’iib’a resil lix k’anjel sa’ xyanqeb’.

“Li esil a’an,” kinye, “a’an li naqanaw ru jo’ lix Hu laj Mormon. A’an jun chik ch’olob’anb’il esil chirix li Jesukristo. A’an jun loq’laj hu rochb’een li Santil Hu.”

Sa’ li hoonal a’an li rey ki’ok chiwab’inkil chi anchal xk’a’uxl. Kinsutq’isi wib’ rik’in li awa’b’ej re li mision li yoo chiwochb’eeninkil ut kinpatz’ re ma wan jun lix hu laj Mormon rik’in. Kirisi chaq jun sa’ xkoxtal.

Kinte toj sa’ li xjunlaju xch’ol li 3 Nefi, ut sa’ xkab’ichal li rey ut laa’in kiqil ru li raatin li Kolonel reheb’ laj Nefita. Chirix a’an kinsi li hu a’an re. Lix sumehom kinaq sa’ ink’a’uxl ut inch’ool chi junelik: “Tatruuq raj chixk’eeb’al we li diamante malaj li lemtz’il q’ol, a’b’anan choq’ we maak’a’ chik naxq’ax ru xchaq’alil ru xk’ulb’al li nawom a’in chirix li Qaawa’ Jesukristo.”

Chirix naq kireek’a lix wankil li raatin li Kolonel sa’ 3 Nefi, li rey kixye, “Wi taajale’q inch’ool ut tin’ok choq’ komon sa’ li Iglees, tink’am chaq chixjunil lin teep chiwix.”

“At Rey,” kinye re, “maawa’in jo’ nab’aanuman. Li jalok ch’oolej wan re li junjunq. Li Kolonel kik’anjelak chiruheb’ chixjunjunqaleb’. Li junjunq chi kristiaan naxk’ul jun k’utb’esink ut xnawom xch’ool chirix lix evangelio li Jesukristo.”¹

Li Jesukristo nak’anjelak chiruheb’ laj Nefita

Ex was wiitz’in, k’a’ru lix tz’aq lix Hu laj Mormon choq’ eere? Wi k’eeb’ileb’ raj eere li diamante malaj li lemtz’il q’ol malaj keeb’il eere lix Hu laj Mormon, b’arwan li texsik’? Relik chi yaal, b’arwan li nim wi’chik lix tz’aq choq’ eere?

Qajultikaq qe, sa’ li ch’utam re domingo eq’la re li jolomil ch’utub’aj-ib’ re abril 2017, li Awa’b’ej Thomas S. Monson kixtz’aama re “li junjunq qe naq rajlal kutan taqatzol ut taqatz’il rix lix Hu Laj Mormon rik’in jun tij sa’ qach’ool.”² Naab’aleb’ ak ke’xsume lix tz’aam li qaprofeet.

Tento tinye naq laj Riley li waqxaqib’ chihab’ xyu’am ut laa’in ink’a’ xqanaw naq wan li ani yoo chirisinkil li qafoot. Q’ehomak reetal naq laj Riley yoo chirilb’al ru lix Hu laj Mormon rik’in xtenq’ankil jun ch’ina marcador li naxye “Laa’in jun ralal li Dios.”

Li Awa’b’ej Nelson ut laj Riley neke’xtz’il rixeb’ li loq’laj hu

Jwal nim xwankil li nak’ulman naq jun ralal li Dios naxsik’ xnawb’al xkomon chik chirix a’an ut lix Raarookil Alal. Maab’ar chik k’utb’esinb’ileb’ chi saqen ru li yaal a’in jo’ k’utb’esinb’ileb’ sa’ lix Hu laj Mormon.

Chalen chaq li raatin li Awa’b’ej Monson waqib’ po chaq anajwan, inyalom chixtaaqenkil li raatin. Sa’ xyanqeb’ junjunqeb’ chik li k’anjel, intz’iib’ahom chirix k’a’ru a’an lix Hu laj Mormon, li k’a’ru naxch’olob’ wi’ xyaalal, li k’a’ru naxtz’eqtaana, li k’a’ru naxtz’aqob’resi ru, li k’a’ru naxch’olob’ chi saqen ru, ut li k’a’ru naxk’utb’esi. Chirilb’al lix Hu laj Mormon rik’ineb’ li na’leb’ a’in, a’an jun k’anjel li xk’ehom inna’leb’ ut xinixmusiq’a. Ninye naq chaab’ilaq choq’ eere chejunjunqal.

Chiruheb’ li waqib’ po a’in, xinb’oqeb’ ajwi’ junjunqeb’ li ch’uut—jo’ lin komon sa’ lix Molameb’ li Kab’laju, eb’ li misioneer sa’ li Chile, ut eb’ li awa’b’ej re li mision ut li rixaqileb’ li xe’xch’utub’ rib’ sa’ Argentina—chixk’oxlankil oxib’ chi patz’om li tin’elajinq eere naq teek’oxla anjwan:

Xb’een, chan raj ru taawanq lee yu’am wi ta maak’a’ lix Hu laj Mormon? Xkab’, k’a’ru li ink’a’ raj teenaw? Ut rox, k’a’ru raj taasache’q cheru?

Li chaab’il sumehom xe’xk’e li ch’uut a’in xe’chal tz’aqal sa’ xch’ooleb’. Arin wan yal junjunqeb’ li raatin:

“Wi ta maak’a’ lix Hu laj Mormon, taasache’q raj inch’ool chirix li k’iila tzol’leb’ ut na’leb’ chirix naab’aleb’ li k’a’aq re ru. Tinwanq raj jo’ ak xinwan naq maji’ xintaw li Iglees, naq yookin chaq chixsik’b’al li nawom, li paab’aal, ut li yo’onihom.”

Jun chik xye: “Ink’a’ raj taawanq innawom chirix li k’anjel taaruuq tixb’aanu li Santil Musiq’ej sa’ inyu’am.”

Jun chik: “Ink’a’ raj tintaw ru chi saqen ru li rajb’al inwanjik arin sa’ ruchich’och’!”

Jun chik xye: “Ink’a’ raj tinnaw naq tooruuq chi xik chi uub’ej chirix li yu’amej a’in. Xb’aan lix Hu laj Mormon, ninnaw naq chi yaal wan li yu’amej chirix li kamk. A’an li tz’aqal jayalihom yooko chixsik’b’al.”

Li roso’jik aatin a’in xinixk’e chixk’oxlankil inyu’am naab’aleb’ chihab’ chaq anajwan naq laa’in jun saaj aj b’anonel. Jun reheb’ li teneb’ahom jwal ch’a’aj li wan sa’ xb’een jun aj b’anonel, a’an naq tento tixye re jun junkab’al naq xkam jun reheb’ lix komon. Sa’ jun li b’anleb’aal kink’anjelak wi’, kiwan jun na’ajej li pim ru lix tz’akil b’ar wi’ jun junkab’al ke’ru chixk’ulb’al li esil jo’ a’an. Aran, ke’wan li ke’xk’ut xrahilal xch’ooleb’ rik’in xketb’al li pim ruhil tz’ak rik’in xjolomeb’. K’a’jo’ naq kiwaj xk’utb’al chiruheb’ naq li kamk, us ta ch’a’aj choq’ re li ani toje’ xsach jun li raab’il xb’aan, a’an aajel ru sa’ li qayu’am sa’ ruchich’och’. Li kamk naxk’e qawankil chi xik chi uub’ej sa’ li yu’am chalel.³

Jun chik li xsume inpatz’om xye: “Maak’a’ inyu’am toj reetal naq xwil ru lix Hu laj Mormon. Us ta nintijok ut ninwulak sa’ lin iglees chiru chixjunil inyu’am, lix Hu laj Mormon xinixtenq’a chi aatinak chi yaal xb’een sut rik’in inChoxahil Yuwa’.

Jun chik xye: “Wi ta maak’a’ lix Hu laj Mormon, ink’a’ raj tinntaw ru naq moko ka’aj ta wi’ kixk’ul rahilal li Kolonel choq’ reheb’ inmaak, a’an naru aj b’an wi’ tixk’irtesi lin rahilal ut xrahil inch’ool.”⁴

Ut jun chik: “Ink’a’ raj tinnaw naq wan jun qaprofeet re qab’eresinkil.”

Xtz’ilb’aleb’ rix chi kok’ aj xsa’ li yaal re lix Hu laj Mormon naru tixjal li qayu’am. Jun reheb’ li qimam ixq li wan sa’ xmision, li Hermana Olivia Nelson, xyeechi’i re jun aj tz’ilol rix li Iglees naq wi a’an taaril ru lix Hu laj Mormon wulaj wulaj, te’chaab’ilo’q lix notas re li examen sa’ tzoleb’aal. Chi jo’kan xb’aanu, ut xe’chaab’ilo’ chi jo’kan.

Ex was wiitz’in raarookex inb’aan, ninch’olob’ xyaalal naq lix Hu laj Mormon a’an li raatin li Dios chi yaal. Chixsa’ wankeb’ lix sumehomeb’ li patz’om jwal aajeleb’ ru sa’ li qayu’am. Naxk’ut lix tzol’leb’ li Kristo.⁵ Naxnimob’resi ut naxch’olob’ chi saqen ru li yaalil na’leb’ “saqen ru ut loq’ ”⁶ li kisachman chiru k’iila tasal tenamit ut sa’ naab’aleb’ xjaltesinkil ru li Santil Hu.

Lix Hu laj Mormon naxk’e jun nawom nimaq wi’chik xtz’aqalil ut xyaalalil chiru yalaq chik nawom chirix lix tojb’al rix li maak xb’aan li Jesukristo. Naxk’ut k’a’ru naraj naxye li yo’laak wi’chik. Sa’ lix Hu laj Mormon nokotzolok chirix lix ch’utub’ankileb’ laj Israel li jek’inb’ileb’. Naqanaw k’a’ut naq wanko arin sa’ ruchich’och’. Eb’ a’in ut xkomoneb’ chik li yaal k’utb’ileb’ rik’in xnimal chik li wankilal ut q’unb’esink ch’oolej sa’ lix Hu laj Mormon chiru yalaq chik chi hu. Lix tz’aqalil lix evangelio li Jesukristo natawman sa’ lix Hu laj Mormon. Jo’kan ut.

Lix Hu laj Mormon naxsaqenob’resi lix tzol’leb’ li Qaawa’ ut naxk’utb’esiheb’ lix ra’al laj tza.⁷ Lix Hu laj Mormon naxk’ut li tzol’leb’ tz’aqal yaal re risinkil li b’alaq’il na’leb’ chirix li paab’ank—jo’ li k’anjel moko yaal ta re xk’ub’sinkileb’ xha’ li k’uula’al.⁸ Lix Hu laj Mormon naxk’e rajb’al li qayu’am rik’in qelajinkil chixk’oxlankil li taaruuq taqak’ul sa’ li junelik yu’am ut chixk’oxlankil li “sahil ch’oolejil li maajo’q’e na’oso’.”⁹ Lix hu laj Mormon naxsach li b’alaq’il na’leb’ naq li sahil ch’oolejil taaruuq taatawmanq sa’ li maa’usilal¹⁰ ut naq rik’in ka’ajwi’ li qusilal qajunes qib’ tooruuq chi sutq’iik rik’in li qaChoxahil Yuwa’.¹¹ Narisi chi junelik li b’alaq’il na’leb’ naq kiraqe’ li musiq’anb’il na’leb’ rik’in li Santil Hu ut naq tz’aptz’o li choxa sa’ li qakutan.

Naq nink’oxla lix Hu laj Mormon, nink’oxla li aatin wankilal. Eb’ li yaal sa’ lix hu laj Mormon wankeb’ xwankil chi k’irtesink, chi k’ojob’ank ch’oolej, chi tenq’ank, chi kawob’resink, ut chi sahob’resink re li qaam.

Ex was wiitz’in, ninyeechi’i eere naq wi teetzol lix Hu laj Mormon wulaj wulaj rik’in jun tij sa’ eech’ool, chaab’ilaq chiq li teesik’ sa’ lee yu’am—wulaj wulaj. Ninyeechi’i naq wi teek’oxla sa’ eech’ool li k’a’ru neketzol, te’tehe’q li rilob’aal li choxa, ut teek’ul xsumehomeb’ lee patz’om ut xb’eresinkil lee yu’am. Ninyeechi’i naq wi teetz’il rix lix Hu laj Mormon wulaj wulaj, taaruuq teekawob’resiiq re xtz’eqtaanankil li maa’usilal re li kutan a’in, jo’ li yajel re pornografia ut xkomon chik li xuwajel k’aytesink-ib’.

Rajlal sut nawab’i junaq xyeeb’al, ut naq laa’in ajwi’ ninye, “Ninnaw naq tz’aqal yaal lix Hu laj Mormon,” nawaj xyeeb’al, “Us ajwi’, a’b’an moko tz’aqal ta yal xyeeb’al!” Tento taqeek’a , sa’ “xchamal” li qaam,¹² naq chi maak’a’ nawiib’an qach’ool, lix Hu laj Mormon a’an li raatin li Dios. Tento naq jwal nim xchamal li qeek’ahom naq maajaruj taqaj xyu’aminkil yal ta jun kutan chi maak’a’ lix Hu laj Mormon. Tinwaj raj xyeeb’al jo’ chanchan kixye li Awa’b’ej Brigham Young (1801–77) rik’in xyeeb’al: “Nawaj raj naq wan xyaab’ inkux jo’ chanchan wuqub’ chi kaaq re rajsinkileb’ ru li tenamit”¹³ re te’xnaw lix yaalalil ut lix wankilal lix Hu laj Mormon.

Choowanq raj jo’ li saaj misioneer a’in li nak’anjelak sa’ Europa li nanumta xchamal li reek’ahom chirix lix yaalalil lix Hu laj Mormon, jo’kan naq chi yaal ki’alinak rik’in li loq’laj esil a’in toj sa’ jun winq li toje’ xe’xtaw, a’an ut li rochb’een.

Ninch’olob’ xyaalal naq laj Jose Smith, chalen chaq junxil toj anajwan, a’an li profeet re li k’ojlajik a’in. A’an, rik’in lix maatan ut xwankilal li Dios, kixjaltesi ru li loq’laj hu a’in. A’an a’in li hu li tixtenq’a xkawresinkil li ruchich’och’ choq’ re li Xkab’ Xk’ulunik li Qaawa’.

Ninch’olob’ xyaalal naq li Jesukristo a’an tz’aqal li yo’yookil Ralal li qayo’yookil Dios. A’an aj Kolol qe, aj Tojol qix, aj nimla K’amol qab’e, ut aj Aatinanel chiqix rik’in li Yuwa’b’ej. A’an chaq li yeechi’inb’il Mesias, li Mesias sa’ ruchich’och’, ut a’anaq li Mesias chiru li Jun Mil Chihab’. Ninch’olob’ chi anchal li waam naq rik’in sachb’a-ch’oolej ut jo’ maajun chik naru, lix Hu laj Mormon naxk’ut chiqu li Jesukristo ut lix evangelio.

Ninnaw naq li Awa’b’ej Thomas S. Monson a’an lix profeet li Dios sa’ xb’een li ruchich’och’ anajwan. Ninra ut ninxaqab’ xwankil chi anchal inch’ool. Jo’kan ninch’olob’ xyaalal sa’ lix loq’laj k’ab’a’ li Jesukristo, amen.

Lix tz’iib’ahom li Awa’b’ej Nelson chirix lix Hu laj Mormon

Lix Hu laj Mormon a’an:

Jun chik ch’olob’anb’il esil chirix li Jesukristo. Eb’ li ke’tz’iib’ank re—laj Nefi, laj Jakob, laj Mormon, laj Moroni—ut aj jaltesinel ru, laj Jose Smith, chixjunileb’ ke’ril li Qaawa’.
Jun esil chirix li k’anjel sa’ xyanqeb’ li tenamit li najter ke’wan sa’ li ch’och’ America.
Tz’aqal yaal, jo’ yeeb’il xb’aan ajwi’ li Qaawa’.

Lix Hu laj Mormon naxch’olob’ xyaalal:

Naq jalan wi’ li jun rik’in li jun chik li qaChoxahil Yuwa’ ut lix Raarookil Alal, Jesukristo.
Lix aajelil ru lix T’anik laj Adan ut lix chaab’il na’leb’ li xEva, naq chixjunileb’ te’wanq xsahileb’ xch’ool.

Lix Hu laj Mormon naxtz’eqtaanaheb’ li na’leb’:

Li musiq’anb’il na’leb’ kiraqe’ rik’in li Santil Hu.
Eb’ li k’uula’al tento te’kub’eeq xha’.
Li sahil ch’oolejil taaruuq taatawmanq sa’ li maa’usilal.
Rik’in ka’ajwi’ li qusilal qajunes qib’ tooruuq chixk’ulb’al li taqenaqil loq’al. Neka’ajman ru li k’ojob’anb’il k’anjel ut li sumwank.
Lix T’anik laj Adan kixtz’ajni chixjunil li winqilal rik’in li “xb’eenil maak.”

Lix Hu laj Mormon naxtz’aqob’resi ru li profeetil aatin sa’ li Santil Hu naq:

“Jalan chik karneer” te’rab’i lix yaab’ xkux.
Li Dios tixb’aanu “jun li sachb’a-ch’oolejil k’anjel ut eetalil, “ rik’in aatinak chaq “sa’ li poqs.”
Te’junajiiq li “perel che’ re Juda” ut li “perel che’ re Jose.”
Te’ch’utub’aaq laj Israel li jek’inb’ileb’ “sa’ roso’jikeb’ li kutan” ut chanru taak’ulmanq a’an.
Lix ch’och’il reechanihomeb’ lix xe’toonil laj Jose wan sa’ li hemisferio re America.

Lix hu laj Mormon naxch’olob’ chi saqen ru li nawom chirix:

Li qawanjik naq maji’ nokoyo’la sa’ ruchich’och’.
Li kamk. Aajel ru a’an sa’ lix nimla k’uub’anb’il na’leb’ li Dios re sahil ch’oolejil.
Li yu’amej chirix li kamk natikla sa’ li hilob’aal na’ajej.
Lix waklijik chi yo’yo li tib’elej, junajinb’ilaq chik rik’in lix musiq’, na’ok choq’ aamej li ink’a’ nakam.
Li raqok-aatin chiqix xb’aan li Qaawa’ taa’uxmanq a’ yaal jo’ chanru li qab’aanuhom ut li rajom li qach’ool.
Chanru neke’k’anjelaman li k’ojob’anb’il k’anjel: jo’ eetalil, li kub’iha’, li loq’laj wa’ak, xk’ojob’ankil li Santil Musiq’ej.
Lix tojb’al rix li maak xb’aan li Jesukristo.
Li waklijik chi yo’yo.
Lix aajelileb’ ru li anjel.
Naq junelik taawanq li tijonelil.
Chanru naq k’a’jo’ naxk’ameb’ xch’ool li winqilal lix wankil li raatin chiru li yok’leb’ ch’iich’.

Lix Hu laj Mormon naxk’utb’esi li na’leb’ li ink’a’ nawb’il chi rub’elaj:

Eb’ li kub’iha’ ke’b’aanuman rub’elaj lix yo’lajik li Jesukristo.
Eb’ li santil ochoch ke’kab’laaq ut ke’oksiik xb’aan li najteril tenamit sa’ li ch’och’ America.
Laj Jose, lix junlajuhil ralal laj Israel, kiril chi rub’elaj lix profeetil k’anjel laj Jose Smith.
Laj Nefi (600–592 ma nayo’la li Kristo) kiril chi rub’elaj li tenamit chixtawb’al ut chi wulak sa’ li ch’och’ America.
Ke’sachman raqal sa’ li Santil Hu li saqeneb’ ru ut loq’eb’.
Lix Saqen li Kristo k’eeb’il re chixjunjunqal.
Lix aajelil ru li xtaql ch’oolej re li junjunq ut lix aajelil ru lix yalb’al qix sa’ chixjunil li k’a’aq re ru.
Eb’ li tijom chirixeb’ li “muqmuukil molam.”