Jachjooko, a’b’an toj junajo
Sa’ li Iglees, us ta wan li qajalanil, li Qaawa’ naroyb’eni naq junaqo ajwi’!
Sa’ li po junio 1994, k’a’jo’ xsahil lin ch’ool naq yookin chaq chi sutq’iik sa’ wochoch sa’ lin b’eleb’aal ch’iich’ xb’aan naq nawaj rilb’al sa’ lin kax mu eb’ laj b’atz’unel re lin tenamit chi b’atz’unq sa’ li Copa Mundial. Tojo’ yookin chaq chi xik, naq xwil chi najt chire li b’e jun li winq chunchu sa’ lix silla de roedas , yoo chi xik chi uub’ej, ut xink’e reetal naq b’onb’il li reetalil li qatenamit Brasil chiru xchunleb’aal. Chi jo’ka’in xinnaw naq a’an ajwi’ yoo chi xik sa’ rochoch re rilb’al li b’atz’unk!
Naq xinnume’ chixk’atq ut xqil qib’ chiru yal jun mutz’uk-uut, xweek’a chi junajinb’ilin rik’in li winq a’an! Sa’ jalan b’e yooko chi xik, ink’a naqanaw qib’, ut nak’utun naq jalan jalanq li qilob’aal ut qatib’el, a’b’an li qarahom chirix li b’atz’unk ut li qatenamit xooxjunaji sa’ li hoonal a’an! Ink’a’ wilom li winq a’an chalen chaq li hoonal a’an, a’ut anajwan, numenaw lajeeb’ chihab’ chaq, toj naru chirilb’al xnaq’ li ru ut chireek’asinkil li kawil junajik rik’in li winq a’an. Chirix chixjunil, xooru chi elk chi uub’ej rik’in li nimla b’atz’unk sa’ li chihab’ a’an!
Sa’ li Iglees, us ta wan li qajalanil, li Qaawa’ naroyb’eni naq junaqo ajwi’! Sa’ li Tzol’leb’ ut Sumwank, a’an kixye, “Junajaqex, ut wi ink’a’ junajex, moko wehex ta.”
Naq chiqajunilo noko’ok sa’ jun ch’utleb’aal kab’l re loq’onink jo’ jun ch’uut, tento naq taqakanab’ chiqix li qajalanil, jo’ li qaxe’toonal, li qab’ihomal, li qana’leb’ chirixeb’ li neke’jolomin qatenamit, ut li k’a’ru qak’ulum sa’ li tzolok ut li trab’ajik, ut, reeqaj a’an, taqak’e qak’a’uxl chirixeb’ li musiq’ejil qajom sa’ komonil. Sa’ komonil naqab’ichaheb’ li b’ich, naqak’oxla sa’ qach’ool chirixeb’ li sumwank chiru li loq’laj wa’ak, naqaye sa’ komonil “amen” chi kaw xyaab’ kux sa’ xraqik li aatinak, li k’utuk, ut li tijok—a’an naraj naxye naq wanko sa’ aatin sa’ komonil rik’in li k’a’ru wotzb’il chaq.
Li k’a’aq re ru a’in naqab’aanu sa’ komonil nokoxtenq’a chi wank chi junajinb’ilo sa’ li qach’uut.
A’b’anan, li k’a’ru naxk’ut, naxkawresi, malaj naxsach li qajunajil chi yaal, a’an chanru naqab’eresi qib’ naq wanko chi najt rik’ineb’ li qakomon sa’ li Iglees. Jo’ ak nakanaw chiqajunil, ak re naq too’aatinaq li jun chirix li jun chik.
A’ yaal k’a’ru taqasik’ xyeeb’al li jun chirix li jun chik, li qaatin tixk’e naq “kemb’il sa’ komonil [li qach’ool] rik’in junajil,” jo’ kixk’ut chaq laj Alma naq yoo chi kub’sink ha’ sa’ li ha’ Mormon, malaj tixk’e naq taasachmanq chi timil timil li rahok, li kanab’ank-ib’, ut li chaab’il ajom li taawanq raj sa’ qayanq.
Wankeb’ li aatin li timil timil neke’xsach li junajil, jo’ chanchan a’in “Jo’kan b’i’, a’an jun chaab’il obiisp, a’b’an xawil raj naq toj saaj winq chaq a’an!”
Jun aatin chaab’il wi’chik chirix a’an, a’in raj “Li obiisp jwal chaab’il, ut kiniman lix na’leb’ ut xnawom chiruheb’ li chihab’.”
Rajlal naqak’e jun eetalil chi junajwa sa’ xb’eeneb’ li komon naq naqaye k’a’ruhaq jo’ “Li awa’b’ej re li Komonil re Tenq’ank a’an sachenaq chik, k’a’jo’ xjipilal xk’a’uxl!” Reeqaj a’an, nokoru raj chixyeeb’al, “Li awa’b’ej re li Komonil re Tenq’ank nak’utun naq jwal laatz’ ru, maare nanumsi junaq xch’a’ajkilal. Chiqatenq’a ut chiqaxaqab’!”
Ex was wiitz’in, maak’a’ qak’ulub’ chixyeeb’al naq anihaq , jo’eb’ ajwi’ li qakomon sa’ li Iglees, ak sachenaq chi junajwa! Li qaatin chirix li qas qiitz’in tixk’utb’esi b’an li qapaab’aal chirix li Jesukristo ut lix tojb’al rix li maak xb’aan ut naq, sa’ a’an ut rik’in a’an, junelik naru toochaab’ilo’q!
Wankeb’ li neke’ok chi wech’ok ut neke’jache’ rik’ineb’ laj jolominel ut li komon sa’ li Iglees xb’aan k’a’ruhaq q’axal ka’ch’in.
Kama’an kik’ulman rik’in jun winq, laj Simonds Ryder xk’ab’a’, li ki’ok choq’ komon sa’ li Iglees sa’ li chihab’ 1831. Chirix naq kiril ru jun k’utb’esinb’il na’leb’ li wan rilom rik’in, sachso xch’ool naq ink’a’ tz’aqal tz’iib’anb’il xk’ab’a’. Rider, rik’in li i sa’ xna’aj li y. Li kixb’aanu rik’in a’in, jo’ ajwi’ jujunqeb’ chik li k’a’aq re ru, kixk’e chi wiib’ank xch’ool chirix li profeet ut chirix a’an kixrahob’tesi laj Jose ut ki’el chaq sa’ li Iglees.
Naru ajwi’ naq taqak’ul jun qatijom xb’aaneb’ li nokoh’exjolomi, ut aran taab’ise’q ma junajib’ilo qib’ rik’ineb’.
Yal junlaju chihab’ wan chaq we, a’u nanaq sa’ nch’ool naq numenaq 44 chihab’ chaq anajwan, li ch’utamil kab’l koowulak wi’ jo’ junkab’al choq’ re li iglees taajale’q chixjunil. Naq toj maji’ neke’ok chixjalb’al, kiwan jun ch’utam sa’ wi’ eb’ laj jolominel ke’xkuub’ xna’leb’ chirix chanru naq eb’ li komon te’tz’aqonq raj sa’ li k’anjel re xjalb’al. Lin yuwa’, li junxil kixjolomi li ch’utam a’an chiru naab’al chihab’, kixye chi xaqxo xpaab’aal naq li k’anjel a’an tento raj naq te’xb’aanu li neke’xnaw kab’lak ut ink’a’ li komon li ink’a’ neke’xnaw kab’lak.
Moko ka’aj ta wi’ ke’xtz’eqtaana li k’a’ru kixye, a’ut kiqab’i ajwi’ naq ke’xch’ila chi kaw chiruheb’ chixjunil sa’ li hoonal a’an. Anajwan ut, a’an jun winq jwal k’eek’o xch’ool chi k’anjelak sa’ li Iglees ut kiwan ajwi’ jo’ aj pleet sa’ li Guerra Mundial II aran Europa, ut k’aynaq chix kuyuk ut chi pleetik chirix li k’a’ru naxpaab’! Junaq tixpatz’ raj rib’ k’a’ru tixb’aanu chirix li kik’ulman aran. Ma tixxaqab’ rib’ sa’ xk’a’uxl ut tixtz’eqtaana li k’a’ru ak k’ulub’anb’il?
Qilomeb’ chaq li junkab’al sa’ li qateep li ke’q’uno’ sa’ li evangelio ut ke’xkanab’ wulak sa’eb’ li ch’utam xb’aan naq ink’a’ ke’ru chi wank sa’ junajil rik’ineb’ li neke’jolomin. Laa’in ajwi’ kiwil chaq naab’aleb’ li wamiiw sa’ Tzoleb’aal reheb’ li Kok’al li ink’a’ ke’kana chi tiikeb’ xpaab’aal sa’ xch’ajomil xb’aan naq xna’ xyuwa’ junelik neke’xtaw li k’a’ru ink’a’ us rik’ineb’ li komon re li Iglees.
A’b’anan, lin yuwa’ kixk’e xch’ool chi kanaak sa’ junajil rik’ineb’ li qech aj Santil Paab’anel. Wiib’ oxib’ kutan chirix a’an, naq ke’xch’utub’ rib’ li komon re tenq’ank chi kab’lak, a’an “kixb’oq” li qajunkab’al chixtaaqenkil sa’ li ch’utamil kab’l, b’ar wi’ tootenq’anq yalaq chanru tooruuq.
Laa’in jwal yoo injosq’il. Kiwaj xpatz’b’al re, “Yuwa’, k’a’ut naq tooxik chi k’anjelak wi laa’at ink’a’ xawaj naq eb’ li komon te’xb’aanu?” A’b’an xb’aan li kwil sa’ ru ink’a’ kinb’aanu. Kiwaj naq us wankin naq taayaalo’q ru xjalajik li ch’utamil kab’l. Jo’kan ut naq kinkana chi mem ut kintenq’an sa’ li kab’lak!
Lin yuwa’ ink’a’ kiru chirilb’al li ak’ ch’utamil kab’l xb’aan naq kikam naq toj maji’ kiyaalo’ li k’anjel. A’ut li qajunkab’al, chi b’eresinb’ilo xb’aan inna’ anajwan, kookanaak chixb’aanunkil li qak’anjel toj sa’ xyaalo’jik, ut a’an kooxjunaji rik’in lin yuwa’, rik’ineb’ li komon re li Iglees, rik’ineb’ li qajolominel, ut, nim chik xwankil chiru chixjunil, rik’in li Qaawa’!
Yal junjunq hoonal rub’elaj xnumsinkil li nimla rahilal sa’ Getsemani, naq yoo chaq chi tijok li Jesus chiru li Yuwa’b’ej choq’ reheb’ lix apostol ut chixjunileb’ laj Santil Paab’anel, a’an kixye, “Re naq junaqeb’ ta chixjunileb’ jo’ naq laa’at, at inYuwa’, wankat wik’in ut laa’in aawik’in.”
Ex was wiitz’in, ninch’olob’ xyaalal naq jo’q’e naqasik’ xjunajinkil qib’ rik’in li komon ut eb’ laj jolominel re li Iglees—naq ch’utch’uuko rik’ineb’, a’ut mas wi’chik naq jachjooko rik’ineb’—taqeek’a ajwi’ naq junajo chi tz’aqal rik’ineb’ li qaChoxahil Yuwa’ ut li Kolonel. Sa’ xk’ab’a’ li Jesukristo, amen.