9 nō Tēnuare

Mea nāhea te Atua e hina’aro ai e ’ia ha’apa’o vau i te mau mea tāna i poiete, ’oia ato’a i tō’u tino ?

Genese 1–2 ; Mose 2–3 ; Aberahama 4–5

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā, te Parau tumu a te pupu Autahu’ara’a a Aarona I muri iho, ’a arata’i i te hō’ē tāu’ara’a parau nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a Nei, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea o tā ’outou i tāu’aparau.

• Ora i te ’evanelia. E aha tā tātou i ’āparau i ma’iri a’e nei, ’e e aha te mau anira’a ’aore rā te mau fa’auera’a tei ravehia ? E aha tā tātou i rave nō te ’ōhipa i ni’a i teie mau anira’a ’aore rā mau fa’auera’a ?

• Aupuru i te feiā tei hina’aro i te tauturu. E aha tā tātou e nehenehe e parau ’aore rā e rave nō te toro atu i te rima i te feiā e mana’o nei ē, tē vai ’otahi nei ’aore rā tē ātea nei rātou i te Metua i te Ao ra ?

• Ani i te mau ta’ata ato’a ’ia fāri’i i te ’evanelia. E aha te tahi mau rāve’a e nehenehe ai tātou e tauturu ia vetahi ’ē ’ia ’ite i te here o Iesu Mesia ?

• Tāhō’ē i te mau ’utuāfare ē a muri noa atu. E aha te mau manaʼo tā tātou e nehenehe e faʼaʼite i te tahi ʼe te tahi nō te tauturu i te ha’apūai i tō tātou ’utuāfare ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū i te mau parau tumu i ha’api’ihia.

• ’A fa’ahamana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Ha’api’i ’āmui

Nō te tauturu i te feiā ’āpī ’ia feruri i te mea tā rātou e nehenehe e rave nō te aupuru maita’i a’e i te mau poietera’a a te Atua, ’a pāpa’i i te mau upo’o parau i muri nei i ni’a i te tāpura ’ere’ere : Te Rahu nui, Te Poietera’a, ’e Tā tātou mau hōpoi’a. E ani ia rātou ’ia hi’o fa’ahou i te Genese 1–2 ’e ’ia pāpa’i e aha tā rātou i ’apo mai nō ni’a i te Rahu nui ’e te Poietera’a. E aha tā tātou e ha’api’i mai nō ni’a i tā tātou mau hōpoi’a ? (hi’o ta’a ’ē i te Genese 1:26–28 ; 2:15). E nehenehe te mau mana’o i muri nei e tauturu i te feiā ’āpī ’ia tāu’aparau i tā tātou hōpoi’a ’ia ha’apa’o i te mau poietera’a a te Atua.

• Nāhea ’outou e ti’a ai e tauturu i te feiā tā ’outou e ha’api’i ra ’ia hāro’aro’a ē e poietera’a mo’a tō rātou tino nā te Atua ? ’Ei hi’ora’a, e nehenehe ’outou e ui ia rātou e aha tā tātou i ha’api’i mai nō ni’a i tō tātou tino i roto i te 1 Korinetia 6:19–20 ; Mose 2:26–27 ; Aberahama 4:26–27. E aha te aura’a o te mau ta’o « te hōho’a » ’e « te huru » ? ’A ’ohipa ’āmui nō te hāmani i te hō’ē tāpura nō te tahi mau mea tā tātou e nehenehe e rave nō te ’atu’atu i tō tātou tino. (Hi’o « Te ora maita’i o te tino ’e o te ferurira’a », i roto Nō te Pūai o te Feiā ’Āpī [buka iti, 2011], 25–27.)

• E mea pinepine te feiā ’āpī i te fa’aruru i te mau poro’i ’o te fa’atupu i te mana’o pāpū ’ore nō ni’a i tō rātou tino. E ani i te feiā ’āpī ’ia hi’o i te video « God’s Greatest Creation [Te poietera’a rahi roa a’e a te Atua] » (ChurchofJesusChrist.org). ’A ani ia rātou ’ia ’imi i te mau poro’i ’o te tauturu ia rātou ’ia ’ite i te māuruuru nō tō rātou tino (hi’o ato’a Russell M. Nelson, « Your Body : A Magnificent Gift to Cherish », New Era, ’Ātete 2019, 2–7). E aha tā tātou e nehenehe e fa’a’ite atu nō te tauturu i te hō’ē hoa ’aore rā i te hō’ē melo o te ’utuāfare ’o tē ’ore roa e ta’a maita’i nei nō ni’a i tōna tino ?

• E ani i te feiā ’āpī e tai’o māmū noa i te hō’ē ’aore rā hau atu o teie mau ’īrava i muri nei, ma te ’imi i te mau mana’o nō ni’a i te tumu te Atua i hāmani ai i te fenua ’e e mea nāhea tāna e hina’aro nei ’ia aupuru tātou i te reira : Genese 1:26–28 ; 2:15 ; 1 Nephi 17:36 ; Te Parau Ha’api’ira’a ’e te mau Parau Fafau 49:19–21 ; 59:15–20 ; 104:13–18 ; Mose 2:26–31 ; 3:15. ’A ani ia rātou ’ia fa’a’ite mai i tō rātou mau mana’o nō ni’a i te reira mau tuha’a ’īrava. I muri iho, e ani ia rātou ’ia ’ohipa ’āmui nō te hāmani i te hō’ē tāpura nō te mau mea o tā rātou e nehenehe e rave tāta’itahi ’aore rā ’ei pupu nō te fa’aoti i tā rātou hōpoi’a i te ’atu’atura’a i te fenua (hi’o i te mau mana’o i roto i te « Pu’e parau ha’amāramaramara’a »). E aha te mau tauira’a e ti’a ia tātou ’ia rave i roto i tō tātou mau mana’o ’e tā tātou mau ’ohipa nō te ’atu’atu maita’i atu ā i te fenua ?

• ’A feruri i te ani i te mau melo o te piha ’aore rā o te pupu ’ia haere mai i te rurura’a ma te tahi mea e fa’a’ite ra i te nehenehe o te fenua o tā te Atua i hāmani, mai te hō’ē hōho’a pēni, te hō’ē hōho’a i patahia, ’aore rā te hō’ē pehepehe. E ani ia rātou ’ia fa’a’ite mai i te mea tā rātou i ’āfa’i mai ’e tō rātou mau mana’o nō te mau poietera’a a te Atua. ’A fa’a’ite i te video « Our Home [Tō tātou fare] » (ChurchofJesusChrist.org), ’e e ani ia rātou ’ia fa’aro’o i te mau mea e fa’a’ite nei i te mana’o o te Atua nō ni’a i te fenua ’e ’o te fa’auru ia rātou ’ia ’atu’atu i te reira.

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i i te mea tā rātou e rave nō te ’ohipa i te mau fa’a’itera’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i te mea e tae mai i tō rātou ferurira’a i te ha’apūai i tō rātou mau aura’a ’e te Metua i te ao ra ’e ’o Iesu Mesia.

Pu’e parau ha’amāramaramara’a

Te mau rāve’a e nehenehe ai tātou ’ia aupuru i te fenua :

• Tanu i te tahi mau huero, mau tumu rā’au, ’aore rā te hō’ē ’āua.

• E ’ohi i te mau pehu i roto i tō ’outou ’oire.

• E fa’anaho i te hō’ē tāmāra’a ’aore rā ’ohipa ha’aputura’a tauiha’a fa’a’ohipa ’āpī i tō ’outou veutupura’a [voisinage].

• E haere e orihaere i ni’a i te mou’a ’e e feruri i te mau mea tā ’outou e māuruuru nei.

• E hāmani i te anoihi ’e te mau tauiha’a ’o tā ’outou i fa’aru’e nā mua a’e, ’e e fa’a’ite i te reira i roto i te pupu fa’a’ite’itera’a anoihi.

• ’A fa’ata’a i te mau rāve’a e nehenehe ai ’outou e fa’aherehere i te ito ’e te pape.

Ha’api’ira’a mai tā te Fa’aora

’A hōro’a i te mau melo o te piha ’aore rā o te pupu e rave rahi mau rāve’a nō te ha’api’i i te tahi ’e te tahi i roto i te piha ha’api’ira’a, nō te mea e pinepine a’e rātou i te ha’api’i maita’i mai nā roto mai i te tahi ’e te tahi ’e nā roto i te hōro’ara’a i te ha’api’ira’a.