Iesu Mesia ’e te mau ta’ata e haere ra

23 nō Tēnuare

Nāhea te Fatu i te tauturu iā’u ’ia tāvini ma te fa’aro’o rahi ?

Genese 5 ; Mose 6

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā te Parau tumu a te pupu Autahu’ara’a a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea tā ’outou i tāu’aparau.

• Ora i te ’evanelia. E aha te mau ’itera’a ’aita i maoro a’enei tei ha’apūai i tō tātou ’itera’a pāpū ?

• Aupuru i te feiā tei hina’aro i te tauturu. ’O vai te hina’aro i tā tātou tauturu ’e mau pure ? E aha tei fa’auruhia mai ia tātou e rave, nō te tauturu ia rātou ?

• Ani i te mau ta’ata ato’a ’ia fāri’i i te ’evanelia. Nāhea tātou e nehenehe ai e riro ’ei māramarama nō te mau melo o te ’utuāfare ’aore rā nō te mau hoa ’aita e fāri’i nei i tō tātou mau ti’aturira’a ?

• Tāhō’ē i te mau ’utuāfare ē a muri noa atu. Nāhea e nehenehe ai ia tātou ’ia fa’a’ite rahi atu ā i te here ’e te pāturura’a i tō tātou ’utuāfare ’e ’ia fa’atupu i te hō’ē ta’a-’ē-ra’a maita’i i roto i tō tātou fare ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū i te mau parau tumu i ha’api’ihia.

• ’A fa’aha’amana’o i te mau pīahi nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

I tō Enoha fāri’ira’a i tōna pi’ira’a ’ia tāvini i te Fatu, ’ua tupu te mana’o ’aravihi ’ore mau i roto iāna (hi’o Mose 6:31). ’Aita rā te Fatu i tono noa mai ia Enoha nō te rave i tāna ohipa ; ’Ua fafau ’oia ia Enoha ē e pāruru ’e e tauturu ’oia iāna (hi’o Mose 6:32–34).

Penei a’e e nehenehe ’outou e ta’a i te mau mana’o ’aravihi ’ore ’o Enoha i roto i tā ’outou iho mau tauto’ora’a nō te tāvini. ’Ua hōro’ahia mai te tahi o tā tātou tāvinira’a nā roto i te mau pi’ira’a o te ’Ēkālesia. I te tahi atu taime, e ’ite ’ōhie tātou i te hō’ē hina’aro ’e e ’ite tātou i te fa’aurura’a a te Vārua ’ia fa’a’ite i tō tātou here ’e tā tātou pāturura’a. Noa atu te huru o te rāve’a e tae mai, e nehenehe tātou e fa’aitoito, mai tā Enoha i rave, i te ’itera’a ē e tauturu mai te Fatu ia tātou ’a fāri’i ai tātou i tāna anira’a ’ia « haere nā muri iā’u » (Mose 6:34).

’A fa’aineine ai ’outou i te ha’api’i atu nō ni’a i te tauturu tā tātou i fāri’i nō ’o mai i te Fatu ra, ’a tāvini ai tātou ia vetahi ’ē, hi’o fa’ahou Mose 6 ’e ’a feruri i te mau ’itera’a tā ’outou i fāri’i nā roto i te tāvinira’a ia vetahi ’ē. Nāhea tō te Fatu tauturura’a ia ’outou i roto i tā ’outou mau tauto’ora’a ? E aha tā ’outou e tīa’i ra ïa ha’api’i mai te mau melo o tā ’outou piha ’aore rā pupu nā roto mai i te mau hi’ora’a ’o Enoha ’e ’o vetahi ’ē ? E nehenehe ato’a ’outou e tai’o i te hō’ē o teie mau a’ora’a a te peresideni Henry B. Eyring : « Haere mai nā muri iā’u » (Liahona, Mē 2017, 82–85) ’aore rā « Te mau vahine nō te fafaura’a e ’āpiti atu ’e te Atua » (Liahona, Novema 2019, 70–73).

e metua vahine ’e te tamahine i roto i te piha tunura’a mā’a

E ti’a ia tātou ’ia pe’e i te hi’ora’a o te Fa’aora ’a tāvini ai tātou ’ei tuha’a i roto i tō tātou orara’a i te mau mahana ato’a.

Ha’api’i ’āmui

E hōro’a mai te tāvinira’a ia vetahi ’ē i te hō’ē rāve’a nō tātou « ’ia haere nā muri i [te Atua] », ’e e fāri’i tātou i tāna tauturu ’a tāvini ai tātou (Mose 6:34). Nō te tauturu i te mau melo o te piha ’aore rā o te pupu ’ia ha’amata i te ’āparau i te reira, e nehenehe ’outou e ani ia rātou ’ia ’imi i roto i te Mose 6:32–39 i te mau rāve’a ’a vai ai te Fatu i pīha’i iho ia Enoha i roto i tāna ’ohipa. Nāhea te Fatu i te tauturu ia tātou ’ia tāvini ana’e tātou iāna ? E nehenehe te mau mana’o i muri nei e tauturu ia ’outou ’ia arata’i i te hō’ē ’āparaura’a nō ni’a i te tauturu hanahana o tā tātou e nehenehe e fāri’i ’a tāvini ai tātou ia vetahi ’ē.

• ’Ua ’ī te mau pāpa’iraa mo’a i te mau ha’api’ira’a nō ni’a i te tāvinira’a (hi’o, ’ei hi’ora’a, Mataio 25:31–40 ; Luka 10:25–37 ; Mosia 2:17). ’A feruri i te ani i te feiā tā ’outou e ha’api’i ra ’ia fa’a’ite mai i te mau ’īrava pāpa’ira’a mo’a ’o te fa’auru ia rātou ’ia tāvini ia vetahi ’ē. E nehenehe ’outou e ani ia rātou nā mua a’e, ’ia haere ineine mai nō te fa’a’ite i te mau tuha’a pāpa’ira’a mo’a nō ni’a i te tāvinira’a ’aore rā te mau hi’ora’a o te tāvinira’a. Mai te mea e hina’aro rātou i te tauturu, e fa’aitoito ia rātou ’ia hi’o i te parau « Tāvinira’a » i roto i te Arata’i o te mau pāpa’ira’a mo’a (scriptures.ChurchofJesusChrist.org). E aha te mana’o i fa’auruhia mai nā roto i te mea tā tātou i tai’o ?

• ‘Ua tāvini te Fa’aora i te ta’ata i te roara’a o tāna tāvinira’a. E aha tā tātou i ha’api’i mai nā roto mai i tōna hi’ora’a ’o te nehenehe e tauturu ia tātou ’a tāvini ai tātou ? Nō te pāhono i teie uira’a, e nehenehe te melo tāta’itahi o te piha ’aore rā o te pupu e tai’o i te hō’ē ’o te mau pāpa’ira’a mo’a i muri nei, ma te ’imi i te tahi mea tā te reira e ha’api’i nei nō ni’a i te hi’ora’a o te Fa’aora nō ni’a i te tāvinira’a : Mataio 14:13–21 ; Ioane 9:1–11, 35–38 ; 13:4–5, 12–17 ; 3 Nephi 17:5–9. E ani ia rātou tāta’itahi ’ia fa’a’ite mai i te mea tei ’itehia ia rātou. E hōro’a i te taime i te mau ta’ata ato’a ’ia feruri i te tahi ta’ata tā rātou e nehenehe e tāvini ’e e nāhea rātou i te pe’e i te hi’ora’a o te Fa’aora i roto i tā rātou tāvinira’a.

• I te tahi taime, tē mana’o nei tātou ē te tāvinira’a ’o te ravera’a ïa i te hō’ē ’ohipa rahi ’e ’ia rave rahi i te taime. Penei a’e ’o te reira paha te hō’ē tumu te tahi o tātou e ’ore ai e tāvini rahi roa i tei ti’a ia tātou. E nehenehe tā ’outou e parau ē, ’ua tāvini pinepine te Fa’aora i te mau ta’ata tāna i fārerei i te roara’a ’o tōna orara’a i te mau mahana ato’a (hi’o, ’ei hi’ora’a, Mataio 12:9–13 ; Mareko 5:21–34 ; Luka 19:1–10 ; Ioane 4:3–26). Nō te tauturu i te mau melo o te piha ’aora rā o te pupu ’ia feruri i te mau rāve’a ’ōhie nō te tāvini ia vetahi ’ē i roto i tō rātou orara’a i te mau mahana ato’a, e nehenehe ’outou e fa’a’ite i te hō’ē o te mau video i muri nei : « When Ye Are in the Service—YM » ’aore rā « When Ye Are in the Service—YW » (ChurchofJesusChrist.org). E ani i te feiā ’āpī ’ia fa’a’ite mai i tō rātou mau mana’o. E aha te mau ’ohipa ha’iha’i o te tāvinira’a ’o tā tātou i ’ite ia vetahi ’ē i te ravera’a ? E aha tei fa’auruhia ia tātou ’ia rave ? E ani i te ta’ata tāta’itahi ’ia pāpa’i i te mau rāve’a nō te fa’ahope i te mau fa’ahitira’a parau i muri nei : « E nehenehe au e tāvini ia vetahi ’ē nā roto… » ’e « e ’imi au i te tauturu a te Fatu i roto i tā’u mau tauto’ora’a nō te tāvini nā roto… » i muri iho e ani i te mau ta’ata e rave rahi ’ia fa’a’ite mai i te mea tā rātou i pāpa’i.

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i e aha tā rātou e rave nō te ’ohipa i ni’a i te mau fa’a’itera’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i te mea i tae mai i te ferurira’a i te ha’apūai i tō rātou mau aura’a ’e te Metua i te ao ra ’e ’o Iesu Mesia.

Pu’e parau ha’amāramaramara’a

• « Opportunities to Do Good [Te mau rāve’a ’ia rave i te maita’i] », « Te mau ha’api’ira’a a Thomas S. Monson : Fa’aorara’a i te feiā i roto i te ’ati » (mau videos), ChurchofJesusChrist.org

• Bonnie L. Oscarson, « Te mau hina’aro i mua ia tātou » (Liahona, Novema 2017, 25–27)

Ha’api’ira’a mai tā te Fa’aora

« Ta’a ’ē noa atu te tauturura’a i te mau pīahi ’ia fāri’i ’e ’ia ’ite i te Vārua, ’a tauturu ia rātou ’ia ha’a mai te au i te mau muhumuhu tā rātou e fāri’i » (Ha’api’ira’a mai tā te Fa’aora [2016], 10).