13 nō Fepuare

Nāhea tātou e ti’a ai ’ia vai ha’apa’o noa i te Fa’aora i roto i te hō’ē ao ’ino ?

Genese 12–17 ; Aberahama 1–2

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tumu a te Feiā ’Āpī Tamāhine ’aore rā, te Parau tumu a te pupu Autahu’ara’a a Aarona. I muri iho, ’a arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea ’o tā ’outou i ’āparau.

• Ora i te ’evanelia. Nāhea tātou i te ha’afātata atu i te Fa’aora ? Nāhea tātou i te tāmata ’ia riro hau atu mai iāna te huru ?

• Aupuru i te feiā tei hina’aro i te tauturu. ’O vai tei roto i tō tātou ferurira’a ’aita i maoro a’enei ? Nāhea tātou e nehenehe ai e tauturu i taua mau ta’ata ra ?

• Ani i te mau ta’ata ato’a ’ia fāri’i i te ’evanelia. Nāhea tātou ’ia pāhono i te mau uira’a a tō tātou mau hoa nō ni’a i te ’Ēkālesia ma te rāve’a e ha’apūai i tō rātou fa’aro’o i te Fa’aora ?

• Tāhō’ē i te mau ’utuāfare ē a muri noa atu. E aha te tahi mau rāve’a e nehenehe ai tātou e tū’ati maita’i a’e i te mau melo o te ’utuāfare, mai te mau metua pa’ari ’e te mau taea’e fēti’i ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

’Aita te orara’a ma te parauti’a i roto i te hō’ē ao ’ino i riro ’ei mea ’ōhie. Nō Aberahama, ’aita te tūra’ira’a ’ia fāriu ’ē atu i te Atua i tae mai noa nā te ao i rāpae mai—’ua fa’aru’e ato’a te metua tāne o Aberahama i te Fatu (hi’o Aberahama 1:5–12 ; 2:5). ’Ua fa’aruru Aberahama ’e ’o Sara i te mau fifi, terā rā ’ua ti’aturi rāua i te mau fafaura’a a te Fatu « ’e ’ua fa’a’ite atu ra ia rāua, ’e ’ua tauahi atu ra ia rāua, ’e ’ua fa’a’ite mai ra e ta’ata ’e’ē ’e te purutia rāua i ni’a i te fenua nei » (Hebera 11:13).

Nāhea ’outou e ti’a ai e tauturu i te mau melo o te piha ’aore rā o te pupu ’ia vai ha’apa’o maita’i noa, ’ia mana’o ana’e rātou ē « e ta’ata ’e’ē ’e te purutia » rātou i te ao nei, nō te mea tē ora nei rātou i te mau ture a te Fatu ? Nāhea ’outou e nehenehe ai e fa’auru ia rātou ’ia vai itoito noa, ’a ora ai rātou ma te ha’apa’o maita’i i te Fatu ? ’A fa’aineine ai ’outou nō te ha’api’i, ’a feruri e hi’o fa’ahou i te Ioane 15:18–20 ’e te a’ora’a a Elder Neil L. Andersen « ’Ia riro te rē i te ao nei » (Liahona, Mē 2017, 58–62).

E nehenehe te mau pipi a Iesu Mesia e ’ite i te hau ’a ora itoito ai noa atu te pāto’ira’a.

Ha’api’i ’āmui

’Ua fa’auruhia paha tā ’outou mau pīahi i te hi’ora’a o Aberahama i teie hepetoma ’a tuatāpapa ai rātou i te Genese 12–17 ’e te Aberahama 1–2. E nehenehe ’outou e ani ia rātou ’ia hi’o fa’ahou i te Aberahama 1:1–19 ’e ’ia fa’a’ite mai e aha te mea e fa’auru nei ia rātou nā roto i te hi’ora’a ’o Aberahama. E aha te mau tū’atira’a tā tātou e ’ite nei i roto i te mau tāmatara’a tā Aberahama i fa’aruru ’e te mau tāmatara’a tā tātou e fa’aruru nei i teie mahana ? ’A mā’iti i te hō’ē ’aore rā hau atu ’ātivite i raro nei nō te fa’aitoito i te ’āparaura’a nō ni’a i te huru e nehenehe ai ia tātou ’ia vai ha’apa’o noa ia Iesu Mesia i roto i te mau huru ato’a o te orara’a.

• Pinepine te Fatu ’e tāna mau peropheta i te fa’aitoito i te feiā tā rātou e ha’api’i nei ’ia ora ma te ha’apa’o maita’i, noa atu te ’ino ’ati a’e ia rātou. E aha te tahi mau rāve’a a Sātane nō te fa’ahema i te feiā ’āpī ’ia ’ōfati i te mau fa’auera’a a te Atua i tō tātou nei ’anotau ? E nehenehe te feiā tā ’outou e ha’api’i ra e tai’o i te tahi o te mau pāpa’ira’a mo’a i tāpurahia i roto i te « Pu’e parau ha’amāramaramara’a ». ’A ani ia rātou ’ia ’āparau e aha tā rātou i ha’api’i mai nō ni’a i te vai-ha’apa’o-noa-ra’a i te Mesia i te taime e fa’ahema ai te ao nei ia tātou ’ia rave ’ē ’aore rā ’ia fa’ao’ō’ohia tātou. E nehenehe rātou e fa’a’ite mai i te mau rāve’a tei ’itehia ia rātou nō te ora ma te ha’apa’o noa ’ia ’ore ana’e vetahi ’ē ’ia nā reira. E aha te taime e ti’a ai ia tātou ’aore rā ia vetahi ’ē ’ia rave i te reira ? E nehenehe ato’a ’outou e fa’a’ite i te hō’ē video ’aore rā hau atu i roto i « Pu’e parau ha’amāramaramara’a ».

• Nō te tauturu i tā ’outou piha ’aore rā pupu ’ia hāro’aro’a e nāhea ’ia upo’oti’a i ni’a i te ao nei ’e ’ia fāri’i i te mau ha’amaita’ira’a nā roto i te ravera’a i te reira, ’a pāpa’i i ni’a i te tābula ’ere’ere Te rirora’a te rē i te ao nei ’o tē … ’e Te rirora’a te rē i te ao nei i roto  … I muri iho e nehenehe ’outou e ani i te mau pīahi ’ia hi’o fa’ahou i te a’ora’a a Elder Neil L. Andersen « ’Ia riro te rē i te ao nei ». E ani ia rātou ’ia ’imi i te mau rāve’a e nāhea ’ia fa’a’ī i teie mau pereota, ma te pāpa’i i te mea tā rātou i ha’api’i mai i ni’a i te tāpura ’ere’ere. E ’āparau e aha tā rātou i ’ite mai. E ani i te hō’ē ta’ata nā mua roa ’ia haere ineine mai nō te fa’a’ite mai i te hō’ē ’ā’amu e fa’a’ite ra e mea nāhea Iesu Mesia i te vai ha’apa’o noa i tōna Metua noa atu te pāto’ira’a (hi’o, ’ei hi’ora’a, Mataio 4:1–11 ; Luka 22:39–44). E aha tā te hi’ora’a o te Fa’aora e tauturu nei ia tātou ’ia ta’a maita’i nō ni’a i te rēra’a i ni’a i te ao nei ? (hi’o Ioane 16:33).

• E tītauhia i te mau pipi a Iesu Mesia ’ia vai « i roto i te ao nei ’eiaha rā nō tō te ao nei ». Te vaira’a « i roto i te ao nei » e nehenehe tōna aura’a ē, e fa’aruru tātou i te pāto’ira’a mai te mea e ora tātou i tā tātou mau fa’aturera’a. Tōna aura’a ato’a ’oia ho’i e nehenehe tātou e fa’auru ia vetahi ’ē nō te maita’i. Nō te ha’api’i i teie parau tumu, e nehenehe ’outou e ani i te hō’ē ta’ata ’ia haere ineine mai i roto i te piha ha’api’ira’a nō te fa’a’ite i te hō’ē ’aore rā hau atu o te mau ’ā’amu i roto i te a’ora’a a te peresideni Bonnie H. Cordon « ’Ia hi’o rātou » (Liahona, Mē 2020, 78–80). E aha tā tātou i ha’api’i mai nā roto i teie mau ’ā’amu nō ni’a i te fa’a’ohipara’a i tō tātou mōrī nō te tauturu ia vetahi ’ē ’ia ha’afātata mai ia Iesu Mesia ? ’A ani i te piha ’aore rā i te pupu ’ia ’imi i te mau pereota i roto i te a’ora’a a te peresideni Cordon, ’o te fa’auru ia rātou ’ia riro ’ei mōrī nō vetahi ’ē i roto i te hō’ē ao ’ino. E ani ia rātou ’ia tai’o ha’apūai i tā rātou mau pereota ’e ’ia fa’a’ite mai e aha tei fa’auruhia ia rātou ’ia rave.

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i i te mea tā rātou e rave nō te ’ohipa i ni’a i te mau fa’a’itera’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ’ohipara’a i ni’a i tō rātou mau ferurira’a i te ha’apūai i tō rātou mau aura’a ’e te Metua i te ao ra ’e ’o Iesu Mesia.

Pu’e parau ha’amāramaramara’a

• Mataio 5:14–16 ; 1 Nephi 15:23–25 ; Helamana 5:12 ; Te Ha’api’ira’a Tumu ’e te mau Fafaura’a 10:5 ; 27:15–18 ; 87:8 (Nāhea ’ia vai parauti’a noa ia Iesu Mesia i roto i te ao ’ino)

• « Stand Ye in Holy Places—Bloom Where You’re Planted », « 195 Dresses [195 mau ’ahu] », « Guided Safely Home » (mau video), ChurchofJesusChrist.org

Ha’api’ira’a mai tā te Fa’aora

’Ua ani manihini te Fa’aora ia Petero ’ia fa’a’ite pāpū ma te ui atu : « ’O vai au nei i tā ’outou na paraura’a ? » (Mataio 16:15). ’A pāhono ai Petero, ’ua ha’apūaihia tōna ’itera’a pāpū. E aha te mau uira’a e ani nei i te feiā tā ’outou e ha’api’i ra ’ia fa’a’ite pāpū ’ia ti’a i te Vārua ’ia ha’apūai i tō rātou ’itera’a pāpū ?