27 nō Fepuare

Nō te aha e mea faufa’a te fa’aipoipora’a mure ’ore ?

Genese 24–27

Tāu’aparau ʼāmui

’Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā te Parau tumu a te pupu Autahu’ara’a a Aarona. I muri iho e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea tā ’outou i ’āparau.

• Ora i te ’evanelia. E aha te mau tumu parau tā te ’episekōpora’a i ’āparau i roto i tā ’outou rurura’a ’āpo’ora’a feiā ’āpī a te pāroita ? E aha tā tātou e nehenehe e rave ’ei piha ha’api’ira’a ’aore rā ’ei pupu autahu’ara’a tei fa’atumuhia o ni’a i te reira mau ’āparaura’a ?

• Aupuru i te feiā tei hina’aro i te tauturu. Nāhea e ti’a ai ia tātou ’ia toro i te rima i te mau ta’ata mai tā te Mesia te huru, ’ia ’ite ana’e tātou i te hō’ē i roto i te fifi ’e ’aita tātou i ’ite e aha te parau atu ?

• Ani i te mau ta’ata ato’a ’ia fāri’i i te ’evanelia. E aha tā tātou i ’ite mai i roto i te ’evanelia a Iesu Mesia ’o te hōro’a mai ia tātou i te ’oa’oa ? Nāhea e ti’a ai ia tātou ’ia fa’a’ite i teie ’oa’oa ia vetahi ’ē ?

• Tāhō’ē i te mau ’utuāfare ē a muri noa atu. E aha tā tātou e rave nō te ’ite mai i te mau i’oa o tō tātou mau tupuna ’o te hina’aro i te mau ’ōro’a o te hiero ? E aha tā tātou e rave nō te tauturu ia vetahi ’ē ’ia ’ite mai i te mau i’oa o tō rātou mau tupuna ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū i te mau parau tumu i ha’api’ihia.

• ’A fa’aha’amana’o i te mau melo o te piha ’aore rā o te pupu nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

’Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

I te taera’a mai te taime nō Isaaka ’ia fa’aipoipohia, ’ua ani Aberahama i tāna tāvini ’ia ’imi i te hō’ē vahine nā Isaaka. ’Ua hina’aro Aberahama ’e ’o Isaaka ’ia ’ite mai i te hō’ē vahine nā Isaaka ’o te rave ’e ’o te ha’apa’o i te mau fafaura’a ’e te Fatu ’e ’ia ha’api’i i te reira i tāna mau tamari’i. ’O Rebeka te vahine ha’apa’o maita’i tei tomo i roto i te fafaura’a o te fa’aipoipora’a ’e ’o Isaaka. ’A ha’apāpū ai te mau pāpa’ira’a mo’a ē, e mea faufa’a rahi te fa’aipoipora’a nā te Atua, tē tuatāpapahia nei te mau ha’api’ira’a a te Atua nō ni’a i te fa’aipoipora’a i tō tātou nei ’anotau. ’Ua parau rā tāna mau peropheta ē te fa’aipoipora’a « ’ua ha’apa’ohia ïa e te Atua » (« Te ’Utuāfare : E Poro’i i tō te Ao nei », ChurchofJesusChrist.org). E mea faufa’a rahi nō te feiā tā ’outou e ha’api’i ra ’ia ta’a maita’i i te mau parau mau mure ’ore nō ni’a i te fa’aipoipora’a. E tauturu te reira ia rātou ’ia fa’aineine ’e ’ia fa’a’ite pāpū nō teie tuha’a fauha’a rahi nō te fa’anahora’a a te Metua i te ao ra.

E aha te mana’o o te feiā ’āpī tā ’outou e ha’api’i nei nō ni’a i te fa’aipoipora’a mure ’ore ? Nāhea ’outou i te tauturu ia rātou ’ia feruri nō te aha te fa’aipoipora’a mure ’ore i riro ai ’ei ’ohipa tumu i roto i te ’ōpuara’a ’a te Metua i te Ao ra ? ’A fa’aineine ai ’outou nō te ha’api’i, e nehenehe ’outou e hi’o fa’ahou i te a’ora’a a Elder D. Todd Christofferson « Nō te aha te fa’aipoipora’a, nō te aha te ’utuāfare » (Liahona, Mē 2015, 50–53). E nehenehe ato’a ’outou e hi’o fa’ahou « Te ’Utuāfare : E Poro’i i tō te ao nei » (ChurchofJesusChrist.org).

’Ua riro te fa’aipoipora’a mure ’ore ’e te mau ’utuāfare ’ei ’ohipa tumu nō te fa’anahora’a a te Metua i te ao ra.

Ha’api’i ’āmui

Penei a’e, ’ua feruri te feiā ’āpī tā ’outou e ha’api’i ra i te faufa’a o te fa’aipoipora’a ’a tai’o ai rātou i te Genese 24–27 i teie hepetoma. E tītau ia rātou ’ia hi’o fa’ahou i te Genese 24. ’A ani ia rātou ’ia fa’a’ite mai i te mau ’īrava e fa’a’ite ra ē, e mea faufa’a te fa’aipoipora’a nō te mau ta’ata i fa’a’itehia i roto i teie pene. E ani ia rātou ’ia feruri nō te aha te fa’aipoipora’a mure ’ore i riro ai ’ei ’ohipa tumu i roto i te ’ōpuara’a a te Atua. E nehenehe te mau ’ātivite i raro nei e tauturu ia rātou ’ia ta’a maita’i a’e i te faufa’a o te fa’aipoipora’a.

• Tē vai ra te rāve’a nō te mau melo o te piha ’aore rā o te pupu ’ia fa’ata’a atu ē, nō te aha e mea faufa’a te fa’aipoipora’a nō rātou. ’A ani ia rātou ’ia feruri e hoa tō rātou e ti’aturi nei ē, ’aita e faufa’a te parau nō te fa’aipoipora’a ’e e ’ere i te mea tītauhia. E nehenehe rātou e pāpa’i i te tahi parau i teie hoa nō te fa’ata’a i te faufa’a rahi o te fa’aipoipora’a i roto i te ’ōpuara’a a te Metua i te ao ra. ’A fa’aitoito ia rātou ’ia tu’u atu i te mau parau mau i ’itehia mai ia rātou i roto i « Te ’Utuāfare : E Poro’i i tō te Ao nei ». E nehenehe ato’a rātou e fa’a’ohipa i te mau pāpa’ira’a mo’a i roto i te « Pu’e parau ha’amāramaramara’a » ’aore rā i roto « Fa’aipoipora’a, Fa’aipoipo » i roto i te Arata’i o te mau pāpa’ira’a mo’a (scriptures.ChurchofJesusChrist.org). E ani ia rātou ʼia faʼaʼite mai i te piha haʼapiʼiraʼa e aha tā rātou i pāpa’i.

• Nō te ha’amata i te hō’ē ’āparaura’a nō ni’a i te faufa’a rahi o te fa’aipoipora’a, ’a pāpa’i i ni’a i te tābula ’ere’ere Nō te aha e mea faufa’a te fa’aipoipora’a mure ’ore ? ’A hōro’a i te feiā ’āpī te tahi minuti nō te pāpa’i i te mau pāhonora’a i te uira’a. I muri iho e ani ia rātou ’ia fa’a’ite mai i tā rātou mau pāhonora’a. E nehenehe rātou e ’imi i te tahi atu ā mau pāhonora’a i roto i te a’ora’a a Elder D. Todd Christofferson « Nō te aha te fa’aipoipora’a, nō te aha te ‘utuāfare » (Liahona, Mē 2015, 50–53). E nehenehe ato’a rātou e hi’o i te video « Pourquoi le mariage est-il sacré aux yeux de notre Père Céleste ? » nō roto mai i te «  Mata ’e Mata ’e ’o Elder ’e te tuahine Renlund » (ChurchofJesusChrist.org). E ani ia rātou ’ia fa’a’ite mai i tō rātou ’itera’a pāpū nō ni’a nō te aha e mea faufa’a te fa’aipoipora’a.

• ’Ia fāri’i ana’e tātou i te mau ha’api’ira’a a te Atua nō ni’a i te fa’aipoipora’a ’e ’ia tūtava tātou i te ora i te reira, e fāri’i tātou i te mau ha’amaita’ira’a e rave rahi. Terā rā te tahi mau ta’ata—tae noa atu i te feiā e rave nei ma te maita’i roa a’e ’ia ora i te ’evanelia—e fa’aruru rātou i te mau tāmatara’a i roto i te ha’amaura’a i te mau fa’aipoipora’a oa’oa ’e te mure ’ore. E nehenehe ’outou e ani i te feiā ’āpī ’ia paraparau mai nō ni’a i te tahi o te reira mau tāmatara’a. E aha tā tātou e nehenehe e rave i teienei nō te fa’aineine ia tātou nō te reira mau tāmatara’a ? E nehenehe ato’a ’outou e ani ia rātou ’ia tai’o i nā tuha’a hope’a e piti o te a’ora’a a Elder Neil L. Andersen « Te mata o te fa’aro’o » (Liahona, Mē 2019, 34–38). E nehenehe tā ’outou piha ’aore rā pupu e tāu’aparau i te mau hi’ora’a tā rātou i ’ite i roto i tō rātou orara’a ’aore rā tō rātou ’ā’amu ’utuāfare nō te mau ta’ata e fa’aruru nei ma te ha’apa’o maita’i i te mau tāmatara’a mai tā Elder Andersen i fa’ahiti. Nāhea te Fa’aora e nehenehe ai e tauturu i te feiā ato’a e fa’aruru nei i te mau tāmatara’a ’a ’imi ai rātou i te mau ha’amaita’ira’a o te fa’aipoipora’a mure ’ore ?

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i i te mea tā rātou e rave nō te ’ohipa i ni’a i te mau fa’a’itera’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ’ohipara’a i ni’a i tō rātou ferurira’a i te ha’apūai i tō rātou mau aura’a ’e te Metua i te ao ra ’e ’o Iesu Mesia.

Mau pu’e parau pāturura’a

• Te Ha’api’ira’a Tumu ’e te mau Fafaura’a 49:16–17 (E tauturu te fa’aipoipora’a i te fa’atupura’a i te tumu o te poietera’a)

• Te Ha’api’ira’a Tumu ’e te mau Fafaura’a 131:1–4 ; 132:15–21 (E tītauhia te fa’aipoipora’a mure ’ore nō te fa’ateiteira’a)

• « Renaissance of Marriage [Tē ’īra’a o te fa’aipoipora’a[ », « How Did Elder and Sister Bednar Meet ? [E mea nāhea tō Elder ’e te tuahine Bednar mātaura’a ?] » i roto « Mata ’e mata ’e ’o Elder ’e te tuahine Bednar » (mau video), ChurchofJesusChrist.org

Ha’api’ira’a mai tā te Fa’aora

’Ua ani te Fa’aora i tāna mau pipi ’ia ’ohipa ma te fa’aro’o ’e ’ia ora i te mau parau mau tāna i ha’api’i. Nāhea e nehenehe ai ia ’outou ’ia ani i te feiā tā ’outou e ha’api’i ra ’ia ora i te mau parau mau tā rātou i ha’api’i mai ?