13 nō Māti

Nāhea e ti’a ai iā’u ’ia pāhono i te ’ati ma te fa’aro’o ?

Genese 37–41

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā te Parau tumu a te pupu Autahu’ara’a a Aarona I muri iho e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea tā ’outou i ’āparau.

• Ora i te ’evanelia. Nāhea tātou i te ’itera’a i te rima o te Fatu i roto i tō tātou orara’a ?

• Aupuru i te feiā tei hina’aro i te tauturu. Nāhea e ti’a ai ia tātou ’ia pāturu i te tahi ’e te tahi i roto i te mau mea e fa’aruruhia nei e tātou ?

• Ani i te mau ta’ata ato’a ’ia fāri’i i te ’evanelia. Nāhea tātou e nehenehe ai e fa’a’ohipa maita’i a’e i te ihi anoa ha’a ’ei mau mauiha’a nō te fa’a’ite i te ’evanelia ?

• Tāhō’ē i te mau ’utuāfare ē a muri noa atu. E aha tā tātou e rave nō te tauturu i tō tātou ’utuāfare ’ia haere mai i te Mesia ra ?

I te hope’a o te ha’api’ira’a, mai te mea e tano, e rave i te mau mea i muri nei :

• E fa’a’ite pāpū nō te mau parau tumu i ha’api’ihia.

• E fa’ahamana’o i te mau melo o te piha ’aore rā o te pupu nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

’Ei taure’are’a tamāroa, ’ua fa’aruru Iosepha i Aiphiti i te mau huru ’ati e rave rahi. ’Ua fa’aruru ’oia i te mārōra’a i roto i tōna ’utuāfare ’e ’ua rave-’ino-hia e tōna mau taea’e. ’Ua faaruru ’oia i te fa’ahemara’a nō te ’ōfati i te ture nō te vi’ivi’i-’ore. ’Aita rā ’oia i fa’aturahia nō tōna parauti’a, ’ua hurihia ’oia i roto i te fare tāpe’ara’a. E nehenehe te mau melo o te piha ’aore rā o te pupu e fa’aruru i te mau fifi mai teie te huru ’e e rave rahi atu ā. ’A tuatāpapa ai ’outou i te mau ’ohipa i tupu nō Iosepha i roto i te Genese 37–41, ’a feruri i te feiā tā ’outou e ha’api’i ra. ’A feruri e aha tā te mau ha’api’ira’a faufa’a rahi nō te orara’a o Iosepha, e hōpoi mai nō rātou (hi’o ato’a Etera 12:27 ; Henry B. Eyring, « ’A tāmata, ’a tāmata, ’a tāmata », Liahona, Novema 2018, 90–93). E nehenehe te ’ā’amu o Iosepha e fa’auru i te mau melo o te piha ’aore o te pupu ’ia ui, « Nāhea e ti’a ai iā’u ’ia pāhono i tō’u mau ’ati ma te fa’aro’o, ’e e nāhea te Atua i te tauturu mai iā’u ? »

Nā roto i te fa’atumura’a i tō tātou fa’aro’o i ni’a ia Iesu Mesia, e nehenehe tātou e ’ite i te pūai i roto i tō tātou mau fifi.

Ha’api’i ’āmui

E nehenehe e ani i te mau melo o te piha ’aore rā o te pupu ’ia tāpura mai i ni’a i te tāpura ’ere’ere i te tahi mau ’ohipa i tupu i roto i te orara’a o Iosepha i Aiphiti, mai tei fa’a’itehia i roto i te Genese 37 ’e 39–41. ’A fa’a’ite i te tahi mau hōho’a, mai terā i roto i te Mai, pe’e mai—nō te ta’ata iho ’e te ’utuāfare, e tauturu te reira ia rātou ’ia ha’amana’o i teie mau ’ohipa i tupu. Nāhea te mau fifi o Iosepha e riro ai mai te mau fifi e fa’aruruhia nei e te feiā ’āpī i teie mahana ? ’Āhiri ē tē ora nei Iosepha i teienei, e aha te parau a’o tāna e nehenehe e hōro’a mai ia tātou nō te pāhono i te ’ati ? E aha tāna e parau mai, nō ni’a e nāhea tōna aura’a ’e te Fatu i te tauturura’a iāna ? ’A fa’a’ohipa i te mau ’ātivite mai teie i muri nei, nō te tauturu i te feiā ’āpī ’ia feruri e nāhea rātou e nehenehe ai e pāhono i tō rātou mau fifi ma te fa’aro’o ia Iesu Mesia.

• E nehenehe te tuatāpapara’a nāhea te Fa’aora i te pāhonora’a i te ’ati, e tauturu ia tātou ’ia fa’aruru i tō tātou mau ’ati ma te fa’aro’o. E nehenehe te feiā ’āpī e hōro’a mai i te tahi mau hi’ora’a nō te ’ati tā te Fa’aora i fa’aruru ’e ’ia hi’o ’āmui fa’ahou i te reira (hi’o « Pu’e parau ha’amāramaramara’a » nō te tahi mau mana’o). E aha tā tātou e fa’ahiahia nei nō te huru pāhonora’a a te Fa’aora i tōna mau taime ’ati ? Nāhea tātou e nehenehe ai e pe’e i tōna hi’ora’a ’a fa’aruru ai tātou i tō tātou iho mau ’ati ?

• I te tahi taime e mea ’ōhie a’e ’ia pāhono i te ’ati ’ia tāmata ana’e tātou i te hi’o i te reira mai roto mai i te hi’ora’a o te Fatu. Nō te tauturu i te feiā tā ’outou e ha’api’i ra ’ia ta’a maita’i i te reira, e ani ia rātou ’ia ’imi i te mau hi’ora’a nō te ta’a-’ē-ra’a tā te hi’ora’a ātea e nehenehe e rave ma te hi’o-fa’ahou-ra’a i te parau poro’i a Elder Rafael E. Pino « Te hi’o-fa’aātea-ra’a mure ’ore o te ’evanelia » (Liahona, Mē 2015, 117–19). ’A ani ia rātou ’ia fa’a’ite mai i te mea tei ’itehia ia rātou. E aha tā teie mau hi’ora’a e parau nei nō ni’a i te huru e ti’a ai ia tātou ’ia hi’o ’e ’ia pāhono atu i tō tātou mau ’ati ? ’Āhiri e nehenehe te Fa’aora e paraparau mai ia tātou nō ni’a i tō tātou mau tāmatara’a, i tō tātou mana’o, e aha tāna e parau mai ? Nō te tauturu i te pāhono i teie uira’a, e nehenehe te feiā ’āpī e hi’o fa’ahou i te mau pāpa’ira’a mo’a i roto i te « Pu’e parau ha’amāramaramara’a ».

• ’A feruri i te ani i te feiā ’āpī ’ia fa’a’ite mai i te hō’ē hi’ora’a o te tahi ta’ata (penei a’e te hō’ē tupuna), tei fa’auru ia rātou i te huru ’oia i te fa’arurura’a i te hō’ē tāmatara’a fifi. ’Aore rā e nehenehe ’outou e fa’a’ite i te mau hi’ora’a fa’auru o te mau ta’ata tā ’outou i mātau. Pinepine i roto te mau a’ora’a nō te ’āmuira’a rahi, e tu’uhia mai te mau ’ā’amu o te mau ta’ata ’o tei pāhono i tō rātou ’ati ma te fa’aro’o (hi’o i te tahi mau hi’ora’a i roto i te « Pu’e parau ha’amāramaramara’a »). ’A feruri e aha tā ’outou e nehenehe e fa’a’ite atu i roto i teie mau a’ora’a, ’ia riro ’ei mea faufa’a rahi nō te feiā tā ’outou e ha’api’i ra. ’A ’āparau ’āmui ai ’outou i teie mau hi’ora’a, ’a parau i te mau pīahi ’ia rōtahi i ni’a i te huru, tō te fa’aro’o ia Iesu Mesia tauturura’a i te ta’ata i roto i tō rātou mau ’ati. E nehenehe ato’a ’outou e fa’a’ite i te tāpura a te ’episekōpo W. Christopher Waddell nō ni’a i te mau rāve’a tā te Fatu i hōro’a mai nō te tauturu ia tātou i roto i tō tātou mau tāmatara’a, e ’itehia i te pae hope’a o tāna a’ora’a « Fāriu atu i te Fatu ra » (Liahona, Novema 2017, 94–96).

’A rave ma te fa’aro’o

’A fa’aitoito i te mau melo o te piha ’e o te mau pupu ’ia feruri ’e ’ia pāpa’i e aha tā rātou e rave nō te ’ohipa i ni’a i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i ni’a i tō rātou mau fa’a’itere’a mana’o i te ha’apūai i tō rātou mau aura’a ’e te Metua i te ao ra ’e Iesu Mesia.

Pu’e parau ha’amāramarama

• Mataio 4:1–11 (E fa’aro’o tō te Fa’aora i roto i te ’ati)

• Mataio 14:10–21 ; Luka 23:33–34 ; Ioane 19:25–27 (’Ua tāvini te Fa’aora i te ta’ata i roto i tōna ’ati)

• Mataio 27:45–46 ; Luka 23:44–46 (’Ua vai ’ōtahi noa te Fa’aora i roto i te ’ati tera rā ’ua ti’aturi ’oia i te Atua)

• Mataio 5:38–45 ; Mosia 24:8–15 ; Te Parau Ha’api’ira’a ’e te mau Parau Fafau 121:1–8 ; 122:5–9 (Te mau ha’api’ira’a a te Fa’aora nō ni’a i te fa’arurura’a i te ’ati)

• Neil L. Andersen, « Puta », Liahona, Novema 2018, 83–86

• L. Todd Budge, « Te ti’aturi tāmau ’e te tupu fa’ahou ā », Liahona, Novema 2019, 47–49

• Jean B. Bingham, « ’Ia ’ī roa ho’i tō ’oe na ’oa’oa », Liahona, Novema 2017, 85-87

Ha’api’ira’a mai tā te Fa’aora

« ’Ia fa’aineine ana’e ’outou, ’a vaiiho i tō ’outou ’ā’au maita’i i te ta’ata tā ’outou e ha’api’i ra ’ia arata’i i tā ’outou mau fa’anahora’a » (Ha’api’ira’a mai tā te Fa’aora, 7). ’Ei hi’ora’a, ’a fa’anaho i te mau ’ohipara’a nā roto i te pure ma te fa’a’ohipa i te mau pāpa’ira’a mo’a ’e te tahi atu mau mātēria e nehenehe e tauturu i te mau pīahi i roto i te mau fifi tā rātou e fa’aruru ra.