27 nō Māti

’O vai au nei, ’e ’o vai tā te Atua e hina’aro ’ia riro mai au ?

Exodo 1–6

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā, te Parau tumu a te pupu Autahu’ara’a a Aarona. I muri iho e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea tā ’outou i ’āparau.

• Ora i te ’evanelia. Nāhea tātou e ’ite mai ai i te ’oa’oa nā roto i te pe’era’a ia Iesu Mesia ?

• Aupuru i te feiā tei hina’aro i te tauturu. ’O vai i roto i tā tātou pāroita ’aore rā orara’a huira’atira e hina’aro i tā tātou tauturu ? Nāhea tātou e nehenehe ai e tauturu atu ?

• Ani i te mau ta’ata ato’a ’ia fāri’i i te ’evanelia. Nāhea tātou e nehenehe ai e tauturu te tahi i te tahi ’ia fa’aineine nō te tāvinira’a misiōnare ?

• Tāhō’ē i te mau ’utuāfare ē a muri noa atu. Nāhea tātou e nehenehe ai e tauturu i te mau tauto’ora’a a tā tātou pāroita ’ia rave i te ’ā’amu ’utuāfare ’e te ’ohipa hiero ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū i te mau parau tumu i ha’api’ihia.

• ’A fa’ahamana’o i te mau melo o te piha ’aore rā o te pupu nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

Te hō’ē pū ’aihere ura ’aita i pau e riro ’ei hi’ora’a fa’ahiahia, ’e ’ua haru te reira i te mana’o ’o Mose. Te ’ohipa fa’ahiahia roa atu rā ’o te ’ohipa ïa i tupu i muri iho. ’Ua paraparau te Atua ia Mose, ’e ’ua ha’api’i mai Mose ’ia hi’o iāna iho mai tā te Atua e hi’o ra iāna. Nā roto i taua hi’ora’a ātea ra, ’ua fa’aoti Mose i te hō’ē ’ohipa nā roto i te tauturu a te Fatu ’o tāna i feruri e’ita e mara’a iāna : ’Ua fa’aruru ’oia ia Pharao ’e ’ua fa’aora i te nūna’a o te Atua.

E hina’aro tātou pā’āto’a i te mau mea i orahia mai ’o te tauturu ia tātou ’ia mono i tō tātou mau fē’a’a ma te māramarama o te Atua ’o vai mau tātou ’e ’o vai tā tātou e nehenehe e riro mai. Tē fa’aruru nei, te feiā ’āpī iho ā rā, i te mau poro’i hape nō ni’a i tō rātou iho faufa’a. ’E mai ia Mose, « e ’ohipa tā te Atua nā [rātou] e rave » Tumu parau a te pupu nō te Autahu’ara’a a Aarona). Tē vai ra tō rātou iho mau Phara’o e fa’aruru ’e tō rātou iho mau ta’ata e fa’aora. Nāhea ’outou i te tauturu ia rātou ’ia ha’amana’o ē, e mau tamāhine ’e mau tamaiti herehia rātou nā te mau metua i te ra’i « ma te nātura hanahana ’e te haere’a mure ’ore » ? (Tumu parau a te Feiā ’Āpī Tamāhine). ’A feruri i te reira ’a tai’o ai ’outou i te Exodo 1–6. ’A feruri ato’a i te tuatāpapa i Te Parau Ha’api’ira’a ’e te mau Parau Fafau 18:10–15 ’e te parau poro’i a te peresideni Dieter F Uchtdorf « E mea faufa’a ’outou nōna » (Liahona, Novema 2011, 19–22).

E nehenehe tō tātou orara’a e tauihia ’ia māramarama ana’e tātou i tō tātou ti’ara’a mau ’ei mau tamari’i nā te Atua.

Ha’api’i ’āmui

’Ua tai’o paha te mau melo o tā ’outou piha ’aore rā pupu i te Exodo 1–6 i teie hepetoma. Nō te tauturu ia rātou ’ia fa’a’ite mai i te mea tā rātou i ha’api’i mai, e nehenehe ’outou e ani ia rātou e aha te mana’o o Mose nō ni’a i tōna pi’ira’a ’ia fa’aora i te mau tamari’i o ’Īserā’ela (hi’o Exodo 3:11). E aha te mau parau mau tā te Fatu i ha’api’i ia Mose nō te tauturu ’ia taui i tāna hi’ora’a ātea ? (hi’o Exodo 3:4–15 ; 4:10–17 ; hi’o ato’a Mose 1:3–11). Nāhea teie mau parau mau i te tauturura’a ia Mose ? Nāhea te reira e nehenehe ai e tauturu ia tātou ? ’A fa’a’ohipa i te hō’ē ’ātivite mai teie i raro nei nō te tauturu i te mau melo o te piha ’aore o te pupu ’ia ’ite mai e aha tā te Atua i heheu mai nō ni’a i tō rātou ihota’ata mau, te faufa’a, ’e te pūai.

• ’Ua parau te peresideni Dieter F. Uchtdorf, « tē fa’a’ohipa nei te Fatu i te hō’ē fāito ta’a ’ē roa i tā tō te ao nei, nō te fāito i te faufa’a o te hō’ē vārua » (« E mea faufa’a ’outou nōna », 22). Nō te ’āparau i teie mana’o, e nehenehe ’outou e tāpa’o i ni’a i te tāpura ’ere’ere Nāhea te ao nei i te fa’a’ite i te hō’ē ta’ata ē e mea faufa’a ’oia ? E ani i te feiā tā ’outou e ha’api’i ra ’ia fa’a’ite mai i te mau pāhonora’a. Mai te mea e ha’avā tātou i tō tātou faufa’a mai teie te huru, nāhea teie mau mana’o i te ha’aputapū i tā tātou mau mā’itira’a ? I muri iho e nehenehe ’outou e pāpa’i i ni’a i te tābula ’ere’ere Nāhea te Atua i te fa’a’ite i te hō’ē ta’ata e mea faufa’a ’oia ? ’A fa’a’ite ai te feiā ’āpī i te mau pāhonora’a, e fa’aitoito ia rātou ’ia tai’o i te Ioane 3:16 ; Te Parau Ha’api’ira’a ’e te mau Parau Fafau 18:10–15 ; Luka 15:3–6, 11–32. E nehenehe ato’a rātou e tai’o i te tuha’a hope’a o te a’ora’a a te peresideni Uchtdorf. Mai te mea e ha’avā tātou i tō tātou faufa’a mai teie te huru, nāhea teie mau mana’o i te ha’aputapū i tā tātou mau mā’itira’a ?

• E ha’aputapū te mau i’oa pi’i i te huru tātou e mana’o nei ia tātou iho ’e te fa’arirora’a ia tātou iho ’e ia vetahi ’ē. Nō te tauturu i te mau melo o te piha ’aore rā o te pupu ’ia feruri e nāhea rātou ’ia pi’i i tō rātou iho i’oa, e nehenehe ’outou e hōro’a ia rātou tāta’itahi e rave rahi mau tāreta i’oa ’uo’uo. E nehenehe te tāreta tāta’itahi e riro « ’Ia ora na, o vau ’o … » pāpa’ihia i ni’a roa. E ani ia rātou ’ia feruri e rave rahi mau ta’o ’aore rā mau pereota tā rātou e nehenehe e pāpa’i i ni’a i tā rātou mau tāreta i’oa. ’Āhiri e fa’a’ī te Metua i te ao ra i te mau tāreta i’oa nō tātou, e aha ïa tāna e pāpa’i ? E aha tāna e nehenehe e pāpa’i mai te mea e parau mai te mau tāreta « ’Ia ora na, e nehenehe au e riro mai… » ? E nehenehe te mau melo o te piha ’aore rā o te pupu e feruri i teie mau uira’a ’a tai’o ai rātou i te tahi o te mau pāpa’ira’a mo’a i muri nei : 1 Ioane 3:1–3 ; Moroni 10:32–33 ; Te Parau Ha’api’ira’a ’e te mau Parau Fafau 76:69–70 ; 84:37–38.

• Te mau a’ora’a nō te ’āmuira’a rahi i roto i te « Pu’e parau ha’amāramaramara’a » tē vai ra te mau hi’ora’a o te mau ta’ata tei tauihia te orara’a nō te mea ’ua ha’api’i mai rātou i tō rātou ihota’ata mau ’ei mau tamari’i nā te Atua. ’A feruri i te hōro’a i te melo tāta’itahi o te piha ’aore rā o te pupu hō’ē o teie mau hi’ora’a nō te feruri ’e nō te fa’a’ite i te pupu. E nehenehe ato’a ’outou e paraparau nāhea te ’itera’a ē, e mau tamari’i tātou pā’āto’a nā te Atua tei ha’aputapū i tō ’outou orara’a. E ani i te mau melo o te piha ’aore rā o te pupu ’ia nā reira ato’a.

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i e aha tā rātou e rave nō te ’ohipa i ni’a i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i ni’a i tō rātou fa’a’itera’a mana’o i te ha’apūai i tō rātou mau aura’a ’e te Metua i te ao ra ’e Iesu Mesia.

Pu’e parau ha’amāramaramara’a

• Joy D. Jones, « Te faufa’a i ’ore roa e noa’a i te fāito », Liahona, Novema 2017, 13–15

• Brian K. Taylor, « E tamari’i ānei au nā te Atua ? » Liahona, Mē 2018, 12–14

• « Notre véritable identité », « How Can I See Myself as God Does? [Nāhea e ti’a ai iā’u ’ia hi’o iā’u iho mai tā te Atua e rave nei ?] » i roto i te « Mata ’e Mata ’e ’o Elder Rasband, te tuahine Oscarson, ’e te taea’e Owen » (mau video), ChurchofJesusChrist.org

• « Te mau mea ato’a nō ni’a iā’u » te ’itera’a FamilySearch.org/discovery

Ha’api’ira’a mai tā te Fa’aora

« Mai te mea e ’ite te feiā ’āpī ē tē ti’aturi nei ’outou ia rātou, e tupu ïa tō rātou ti’aturira’a i tō rātou ’aravihi hanahana, ’e e fa’ahiti mahuta ïa rātou ia ’outou i te mea tā rātou e nehenehe e rave » (Ha’api’ira’a mai tā te Fa’aora, 28).