10 nō ’Ēperēra

Nāhea e ti’a ai iā’u ’ia ha’apūai i tō’u fa’aro’o ia Iesu Mesia i te mau mahana ato’a ?

Exodo 14–17

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te pupu Feiā ’Āpī Tamāhine ’aore rā te Parau tumu a te Autahu’ara’a a Aarona. I muri iho, hau atu i te ’āparau-’āmui-ra’a nō ni’a i te mau hina’aro ta’a ’ē o te pupu autahu’ara’a ’aore rā o te piha tamāhine, e nehenehe ’outou e paraparau nō ni’a i te mau mana’o i tae mai ’e te mau parau tumu nō te ’āmuira’a rahi. E tauturu te mau uira’a i muri nei.

• E aha te mau parau tumu ’aore rā te mau ’aora’a tei ha’aputapū ia tātou ? E aha tei ha’apūai i tō tātou fa’aro’o ia Iesu Mesia ?

• E aha tei ha’apūai i tō tātou ’itera’a pāpū nō te mau peropheta ora ? E aha tei fa’auruhia ia tātou ’ia rave nō te mea tā tātou i ha’api’i mai ’aore rā i ha’aputapū ia tātou ?

• E aha tā tātou e ti’a ’ia rave ’ei piha ’aore rā ’ei pupu nō te ha’amana’o ’e nō te fa’a’ohipa i te a’ora’a tā tātou i fa’aro’o i roto i te ’āmuira’a rahi ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’ahamana’o i te mau melo o te piha ’aore rā o te pupu nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

Nō te ora mai i roto i te mēdēbara, ’ua tītauhia i te mau tamari’i a ’Īserā’ela ’ia ha’api’i mai e nāhea i te ti’aturi i te Fatu. ’Ua ti’aturi rātou i ni’a iāna nō te mau temeio e fa’aora i te ora, mai te fa’ata’ara’ahia te Miti ’Ute’ute, ’e nō te mau temeio ato’a nō te ito turu ora, mai te mana nō te ra’i mai. Mai te reira ato’a nō te feiā tā ’outou e ha’api’i ra. Mai te mea e hina’aro rātou ’ia fa’aorahia i roto i tō rātou tere pae vārua i roto i te mēdēbara o te tāhuti nei, e ti’a ia rātou ’ia fa’a’ohipa i te fa’aro’o ia Iesu Mesia. ’E e mea ti’a ia rātou ’ia fa’a’ohipa i taua fa’aro’o ra i te mau mahana ato’a, ’eiaha noa i te tahi taime. E nehenehe vetahi o rātou tā ’outou e ha’api’i ra e mana’o ra ē, e ’ere tō rātou fa’aro’o i te mea pāutuutu maita’i. E nehenehe ’outou e tauturu ia rātou ’ia ’ite ē e tupu marū noa te fa’aro’o i te rahi, i terā mahana ’e terā mahana. E fa’a’amuhia te reira nā roto i te mau mea iti ’e te ’ōhie tā tātou e rave tāmau nei. ’A feruri i teie mau mea ’a tuatāpapa ai ’outou i te Exodo 14–17 i i teie hepetoma. E nehenehe ato’a ’outou e tuatāpapa i te a’ora’a a te peresideni Dallin H. Oaks « Te mau mea iti ’e te ’ōhie ».(Liahona, Mē 2018, 89–92).

E nehenehe tātou e ha’apūai i tō tātou fa’aro’o i te mau mahana ato’a nā roto i te mau rāve’a iti ’e te ’ōhie.

Ha’api’i ’āmui

Nō te ha’amata i te hō’ē ’āparaura’a, e nehenehe ’outou e ani i te feiā ’āpī ’ia fa’a’ite mai i te tahi o tā rātou mau peu i te mau mahana ato’a, ’o te tauturu ia rātou ’ia rave i te mau ’ohipa maita’i. I roto i teie mau mea tē vai ra te tāpe’ara’a i te ea maita’i ’aore rā te ha’apūaira’a i tō rātou ’itera’a pāpū. E aha te tupu mai mai te peu ’aita tātou e tāpe’a noa i teie mau peu ? Nāhea tā tātou mau tauto’ora’a i te mau mahana ato’a, ’ia rave i te mau ’ohipa maita’i i te fa’aauhia i te mau arata’ira’a tā te Fatu i hōro’a i te ’āti ’Īserā’ela nō te ha’aputuputura’a i te māna ? (hi’o Exodo 16:16–21). E nehenehe ’outou e tauturu i te piha ’aore rā i te pupu ’ia fa’aau i te mea i orahia mai e te ’āti ’Īserā’ela ’e tā tātou mau tauto’ora’a nō te ha’apūai i tō tātou fa’aro’o ia Iesu Mesia i te mau mahana ato’a. ’Ei hi’ora’a, e aha tā te Fatu i hōro’a mai ia tātou tei riro mai te māna i te mau mahana ato’a ’o tāna i hōro’a i te ’āti ’Īserā’ela ? E aha tā tātou e nehenehe e rave e riro mai te ha’aputuputura’a i te māna ? Nō te tāmau noa i tā ’outou tāu’ara’a parau, ’a fa’a’ohipa i te hō’ē ’aore rā hau atu o te mau ’ātivite i raro nei ’aore rā hō’ē o tā ’outou iho.

• E tai’o ’āmui i te Alama 37:6–7. ’Ei piha ’aore rā ’ei pupu, ’a tāpura i ni’a i te tāpura ’ere’ere i te tahi o te « mau mea iti ’e te ’ōhie » tā te Fatu i ani ia tātou ’ia rave i te mahana tāta’itahi nō te haere mai iāna ra. I muri iho, e nehenehe te feiā tā ’outou e ha’api’i ra e hi’o fa’ahou i te a’ora’a a te peresideni Dallin H Oaks « Te mau mea iti ’e te ’ōhie » nō te ’ite mai i te tahi atu ā mau mea ha’iha’i ’o te nehenehe e ha’aputapū rahi i tō tātou orara’a. E aha te huru tupura’a tā teie mau mea e nehenehe e fa’atupu mai ? E aha tei fa’auruhia ia tātou ’ia rave nō te fa’ariro i teie mau mea ’ei tuha’a tāmau i roto i tō tātou orara’a i te mau mahana ato’a ?

• Nō te aha e mea ti’a i te fa’aro’o ia Iesu Mesia ’ia fa’a’amuhia i te mau mahana ato’a ? Nō te tauturu i te mau melo ’ia ta’a maita’i a’e i te reira, e nehenehe ’outou e fa’a’ite i te hō’ē ’aore rā hau atu o te mau video i tāpurahia i raro a’e i te « Pu’e parau ha’amāramaramara’a ». I roto i teie mau video, ’ua ha’api’i Elder D. Todd Christofferson nō ni’a i te mau tauto’ora’a e hina’arohia i te mau mahana ato’a nō te turu i tō tātou fa’aro’o. E ani i te feiā tā ’outou e ha’api’i ra, ’ia fa’a’ite mai i te mau mea tā rātou i ha’api’i mai ’o tē fa’auru ia rātou ’ia fa’arahi i tō rātou fa’aro’o ia Iesu Mesia i te mau mahana ato’a.

• Te mau tauto’ora’a tāmau i te mau mahana ato’a ’o te rāve’a maita’i roa a’e nō te ha’apūai i tō tātou fa’aro’o i te Mesia. Nō te ’āparau i teie mana’o, ’a tai’o ’āmui i te toru o te mana’o ’o Elder David A. Bednar i roto i tāna a’ora’a « ’Ia itoito atu ā ’e ’ia ha’apa’o maita’i i te fare » (Liahona, Novema 2009, 17–20). E aha te mau ha’api’ira’a tā tātou e nehenehe e ha’api’i mai i roto i tāna fa’ata’ara’a nō te hō’ē hōho’a pēni i roto i tōna piha tōro’a ? Nāhea teie mau ha’api’ira’a e tano ai i tā tātou mau tauto’ora’a nō te patu i tō tātou fa’aro’o ia Iesu Mesia ? E nehenehe te tai’o-’āmui-ra’a i te Alama 32:21, 26–43 e ha’amaita’i atu ā i tā ’outou tāu’ara’a parau. E aha te mau mana’o tā tātou i ’ite mai nō ni’a i te ha’apūaira’a i tō tātou fa’aro’o ia Iesu Mesia ?

• E nehenehe tātou e fa’arahi i tō tātou fa’aro’o nā roto i te mā’itira’a ’ia ha’api’i mai nā roto mai i te mau mea i orahia mai ’o te tāmata i te reira. E nehenehe ’outou e fa’a’ite i te video « Spiritual Whirlwinds [Te mau pūāhiohio pae vārua] » (ChurchofJesusChrist.org). E ’āparau ’āmui e aha tā tātou e nehenehe e rave i roto i te tāmatara’a nō te ha’apūai i tō tātou fa’aro’o. (Hi’o ato’a Neil L. Andersen, « Te mau pūāhiohio pae vārua », Liahona, Mē 2014, 18–21.) E nehenehe ’outou e ani i te mau pīahi ’ia fa’a’ite mai i te mau taime ’a ’ite ai rātou ē, ’ua tāmatahia tō rātou fa’aro’o i te Mesia ’e e aha tā rātou i rave nō te ha’apūai i tō rātou fa’aro’o i taua taime ra. ’A fa’a’ite atu ē, tē fa’ata’a nei te Exodo 14–17 i te amuamu pinepine ’aore rā te māuruuru ’ore a te ’āti ’Īserā’ela ’a fa’aruru ai rātou i te mau tāmatara’a. Nāhea te amuamura’a i roto i te mau tāmatara’a i ti ha’aparuparu i tō tātou fa’aro’o ? E aha te ta’a-’ē-ra’a i rotopu i te amuamura’a ’e te fa’a’itera’a i tō tātou mau hepohepo i te Metua i te ao ra i roto i te mau taime fifi ?

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i e aha tā rātou e rave nō te ’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i ni’a i tō rātou mau fa’a’itera’a mana’o i te ha’apūai i tō rātou mau aura’a e te Metua i te ao ra ’e Iesu Mesia.

Pu’e parau ha’amāramaramara’a

• « Daily Bread: Pattern [Pane i te mau mahana ato’a : Hōho’a] », « Daily Bread: Change [Pane i te mau mahana ato’a : Taui] », « Daily Bread: Experience [Pane i te mau mahana ato’a : ’Itera’a] » (mau videos), ChurchofJesusChrist.org

Ha’api’ira’a mai tā te Fa’aora

Tauturu i te mau pīahi ’ia hāro’aro’a e nāhea rātou e nehenehe ai e ani i te Vārua ’ia pārahi mai i roto i tā rātou ’āparaura’a. E nehenehe rātou e rave i te reira nā roto i tō rātou « huru … , te huru rātou e fa’ariro i te tahi ’e te tahi, ’e te huru o tō rātou mana’o nō ni’a i te ’evanelia » (Ha’api’ira’a mai tā te Fa’aora, 15).