24 nō ’Ēperēra

Nō te aha te Atua e hōro’a mai ai i te mau fa’auera’a ia tātou ?

Exodo 18–20

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā te Parau tumu a te pupu Autahu’ara’a a Aarona. I muri iho e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea tā ’outou i ’āparau.

• Ora i te ’evanelia. E aha te mau mea i orahia iho nei tei ha’afātata ia tātou i te Metua i te ao ra ’e ia Iesu Mesia ?

• Aupuru i te feiā tei hina’aro i te tauturu. E ta’ata ānei tei tomo mai ’aita i maoro a’enei i roto i tā tātou pāroita ’aore rā ’ua ’āmui mai i roto i te ’Ēkālesia ? Nāhea tātou i te tauturu ia rātou ʼia ’ite e te fāri’i-maita’i-hia nei rātou ?

• Ani i te mau ta’ata ato’a ’ia fāri’i i te ’evanelia. Tē vai ra ānei te tahi mau ’ātivite i muri nei i reira tātou e nehenehe ai e ani manihini i tō tātou mau hoa ’ia haere mai ?

• Tāhō’ē i te mau ’utuāfare ē a muri noa atu. E aha te mau tauto’ora’a tā tātou e nehenehe e rave nō te pāpa’i i tō tātou iho ’ā’amu ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’ahamana’o i te mau melo o te piha ’aore rā o te pupu nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

E nehenehe te tai’ora’a i te Exodo 20 e fa’auru ia ’outou ’ia feruri ē, nō te aha e mau fa’auera’a tā tātou. Tē hi’o nei te tahi mau ta’ata i te mau fa’auera’a ’ei ha’avīra’a ’aore rā ’ei tāmatara’a nō tē fa’atere ia tātou. Nō te mea rā ’ua ’ite tātou ē, e Metua here te Atua, e nehenehe tātou e ti’aturi ē tāna mau ture nō tō tātou ïa maita’i, noa atu ē ’aita tātou e ’ite noa i te mau tumu nō te reira. ’Ua fafau mai ’oia ia tātou ē, e nehenehe tātou e ’ite e parau mau tāna mau fa’auera’a ’ia ora ana’e tātou i te reira (hi’o Ioane 7:17).

’Ua ha’api’i mai te peresideni Russell M. Nelson ē : « Nō te mea ’ua here te Metua ’e te Tamaiti ia tātou ma te here fāito ’ore ’e te maita’i roa ’e nō te mea ’ua ’ite rāua ē e’ita e nehenehe ia tātou ’ia ’ite i te mau mea ato’a tā rāua e ’ite ra, ’ua hōro’a mai rāua i te mau ture nō te arata’i ’e nō te pāruru ia tātou. Tē vai nei te hō’ē tū’atira’a pūai i rotopū i te here ’o te Atua ’e tāna mau ture » (« Te here ’e te mau ture a te Atua » [Brigham Young University devotional, 17 nō Tetepa 2019], 2, speeches.byu.edu).

Nō te aha ’outou e māuruuru ai nō te mau fa’auera’a ? E aha tā outou e hina’aro nei ’ia ta’a te mau melo o te piha ’aore rā o te pupu nō ni’a i te tumu te Atua i hōro’a mai ai ia tātou i te mau fa’auera’a ? E nehenehe ’outou e fa’aineine nō te ha’api’i nā roto i te hi’o-fa’ahou-ra’a i te Exodo 20 ’e te a’ora’a a te peresideni Dallin H Oaks « Te herera’a ia vetahi ’ē ’e te orara’a i roto i te ta’a-’ē-ra’a » (Liahona, Novema 2014, 25–28).

E nehenehe tātou e ’ite ē e parau mau te mau fa’auera’a a te Atua ’ia ora ana’e tātou i te reira.

Ha’api’i ’āmui

Nō te tauturu i te mau melo o te piha ’aore rā o te pupu ’ia ha’amana’o fa’ahou i nā Ture Hō’ē ’Ahuru, e nehenehe ’outou e ani ia rātou ’ia tāpura e rave rahi o teie mau fa’auera’a e nehenehe ia rātou ’ia ha’amana’o. Mai te mea e hina’aro rātou i te tauturu, e nehenehe rātou e hi’o i roto i te Exodo 20:3–17. Nō te aha te Atua e hōro’a mai ai i te mau fa’auera’a ia tātou ? Nō te tauturu i te pāhono i teie uira’a, e nehenehe rātou e tāu’aparau i te tahi o nā Ture Hō’ē ’Ahuru nā roto i te mau pupu na’ina’i. Nāhea te orara’a i teie mau fa’auera’a e nehenehe ai e tauturu ia tātou ’ia ’ite i te ’oa’oa ’e ’ia ha’afātata atu ā i te Atua ? E nehenehe te mau mana’o i muri nei e tauturu i te feiā tā ’outou e ha’api’i ra, ’ia ha’api’i rahi mai nō ni’a i te tumu te Atua i hōro’a mai ai i te mau fa’auera’a ia tātou.

• Tei roto i te mau pāpa’ira’a mo’a te mau pāhonora’a i te uira’a : « Nō te aha te Atua e horo’a mai ai i te mau fa’auera’a ia tātou ? » E nehenehe ’outou e ani i te mau melo o te piha ’aore rā o te pupu ’ia ’imi i te mau pāhonora’a i roto hō’ē ’aore rā hau atu o te mau pāpa’ira’a mo’a e ’itehia i roto i « Pu’e parau ha’amāramaramara’a ». I muri iho e ani ia rātou ’ia fa’a’ite mai i te mea tā rātou i ’ite mai. E nehenehe ato’a rātou e māta’ita’i i te mau video i muri nei nō te ’imi i te mau mana’o : « Instructions Included [Mau arata’ira’a i roto] », « Why Does God Give Us Commandments ? [Nō te aha te Atua e hōro’a mai ai i te mau fa’auera’a ia tātou ?] » (ChurchofJesusChrist.org).

• Nō te tauturu i te mau melo o te piha ’aore rā o te pupu ’ia ta’a maita’i nō te aha te Atua e hōro’a mai ai ia tātou i te mau fa’auera’a, e nehenehe ’outou e fa’aau i te mau fa’auera’a a te Atua i te mau mea i orahia mai ’o tā rātou e nehenehe e fa’aau ia rātou iho. ’Ei hi’ora’a, e nehenehe ’outou e ani ia rātou ’ia feruri ē, tē tere ra rātou nā ni’a i te hō’ē purūmu mou’a piri i te hō’ē mato tārere ’e tē vai ra te hō’ē ’āua i te hiti o te purūmu. E ani ia rātou ’ia ’āparau ’e te tahi atu ta’ata i te mau uira’a mai teie i muri nei : Nāhea te mau fa’auera’a a te Atua e riro ai mai te ’āua te huru ? Nāhea te ha’apa’ora’a i te mau fa’auera’a i te ha’amaita’i ia tātou ? E aha te tahi atu mau fa’aaura’a e nehenehe e tauturu ia tātou ’ia māramarama ē, nō te aha te Atua e hōro’a mai ai ia tātou i te mau fa’auera’a ’e nō te aha e ti’a ai ia tātou ’ia ha’apa’o i te reira ? Nō te tahi mau hi’ora’a, e nehenehe ’outou e ani ia rātou ’ia hi’o fa’ahou i te hō’ē o te mau a’ora’a ’aore rā video e ’itehia i roto i « Pu’e parau ha’amāramaramara’a ». E ani ia rātou ’ia fa’a’ite mai i te mau fa’aaura’a tā rātou i ’ite mai ’e ’ia ’āparau i te mea tā rātou i ’apo mai.

• E nehenehe tā ’outou ’āparaura’a e arata’i i te mau melo o te piha ’aore rā o te pupu ’ia ’āparau e nāhea e ti’a ai ia tātou ’ia fa’ariro i te mau ta’ata ’aita e ti’aturi nei ’aore rā ’aita e ora i te tahi mau fa’auera’a. E nehenehe ’outou e ani ia rātou ’ia ’imi i te a’o i roto i te aora’a a te peresideni Dallin H. Oaks « Te herera’a ia vetahi ’ē ’e te orara’a ’e te mau ta’a-’ē-ra’a ». E nehenehe paha ’outou e ui i te mau uira’a mai teie : Nāhea e ti’a ai ia tātou ’ia fa’ariro i te feiā e mā’iti nei ’ia ora ta’a ’ē atu i tā tātou e rave nei ? Nāhea e nehenehe ai ia tātou ’ia ’ite i te maita’i i roto ia vetahi ’ē, ’ia rave ana’e rātou i te mau fa’aotira’a ta’a ’ē atu i tā tātou e rave nei ?

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i e aha tā rātou e rave nō te ’ohipa i ni’a i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i ni’a i tō rātou mau fa’a’itera’a mana’o i te ha’apūai i tō rātou mau aura’a ’e te Metua i te ao ra ’e Iesu Mesia.

Pu’e parau ha’amāramaramara’a

• Deuteronomi 10:12–13 ; Alama 36:30 ; Te Parau Ha’api’ira’a ’e te mau Parau Fafau 1:24–28 ; 82:8–10 ; 93:20, 28 ; 130:18–21 (Nō te aha te Atua e hōro’a mai ai i te mau fa’auera’a ia tātou)

• Jeffrey R. Holland, « ’Ua tāpa’ohia tātou pā’āto’a » (Liahona, Novema 2011, 44–47 ; hi’o ato’a i te video « Stay within the Lines [’A fa’aea i roto i te mau rēni] ») ; Richard G. Scott, « E nehenehe te Tāra’ehara e ha’apāpū i tō ’outou hau ’e tō ’outou ’oa’oa » (Liahona, Novema 2006, 40–42 ; hi’o ato’a i te video « A Secure Anchor [Hō’ē tūtau pāpū] ») ; Von G. Keetch, « E maita’i ’e e ’oa’oa te feiā e ha’apa’o i te mau fa’auera’a a te Atua » (Liahona, Novema 2015, 115–17 ; hi’o ato’a i te video with the same title [video hō’ē ā upo’o parau])

Ha’api’ira’a mai tā te Fa’aora

« I roto i tā ’outou tauto’ora’a ’ia ora ’e ’ia ha’api’i hau atu mai tā te Fa’aora, e’ita ’outou e manuia i te tahi taime. ’Eiaha e ha’aparuparu ; ’a vaiiho i tā ’outou mau hape ’e mau paruparu ’ia arata’i ia ’outou i te Metua i te ao ra ’e i te Fa’aora » (Ha’api’ira’a mai tā te Fa’aora, 14).