8 nō Mē

Nāhea vau e ’ite ai ’ua fa’a’ore te Atua i tā’u hara ?

Exodo 35–40 ; Levitiko 1 ; 16 ; 19

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā te Parau tumu a te pupu Autahu’ara’a a Aarona. I muri iho e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho te mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea tā ’outou i ’āparau.

• Ora i te ’evanelia. Nāhea te fāriura’a i ni’a i te Fatu i te tauturu ia tātou ’ia fa’aruru i tō tātou mau fifi ’e mau tāmatara’a ?

• Aupuru i te feiā tei hina’aro i te tauturu. ’O vai tā tātou i ’ite ’o te hina’aro i tā tātou mau pure ’e tā tātou auhoara’a ?

• Ani i te mau ta’ata ato’a ’ia fāri’i i te ’evanelia. E aha te mau fa’anahora’a nō te fa’a’ite i te ’evanelia i tāu’aparauhia i roto i te mau rurura’a ’āpo’ora’a pāroita a te feiā ’āpī ? Nāhea tā tātou piha ’aore rā tā tātou pupu e nehenehe e fa’aō i roto ?

• Tāhō’ē i te mau ’utuāfare ē a muri noa atu. Nāhea te ravera’a i te ’ohipa ’ā’amu ’utuāfare i te ha’apūai i tō tātou mau aura’a ’e te Metua i te ao ra ’e Iesu Mesia ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’ahamana’o i te mau melo o te piha ’aore rā o te pupu nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

I te tahi taime e uiui te mau ta’ata, ’ua « nava’i ānei [tā rātou] i rave » ’ia fa’a’orehia tā rātou mau hara. Noa atu ē e tītauhia te tauto’ora’a nō te tātarahapa, i te hope’a ’aita tā tātou hara i fa’a’orehia nō te mea ’ua fa’aoti tātou i te hō’ē tāpura hi’opo’a ’aore rā ’ua rave i te tahi mau ’ohipa. E fa’aorehia tā tātou mau hara ’ia fāri’i ana’e tātou i te aroha i pūpūhia mai e Iesu Mesia. Mai te reira tā tātou huru e nehenehe ai e tauihia.

I tahito ra, e fa’atoro te mau ’ōro’a ’e te mau tusia nō te ture a Mose i te ’āti ’Īserā’ela i ni’a i te tāra’ehara a te Fa’aora. Mai tā te Fatu i ha’amāramarama i roto i te Levitiko 16:30, « ’ei te reira ho’i mahana e hōpoi ai te tahu’a rahi i te tāra’ehara nā ’outou, e tāmā ia ’outou i tā ’outou mau hara ato’a ; ’ia mā ’outou i mua i te aro o Iehova ». ’Oia mau, e’ita te hō’ē noa ’ōro’a e nehenehe e hōro’a mai i te fa’a’orera’a hara ia tātou. E tae mai te fa’a’orera’a hara nā roto mai ia Iesu Mesia. I tō tātou nei ’anotau, tē fa’atoro nei te mau ’ōro’a mai te bāpetizora’a ’e te ’ōro’a mo’a i tō tātou ferurira’a ’e tō tātou ’ā’au i ni’a i te Fa’aora. E tauturu te reira ia tātou ’ia ta’a ē, e fa’a’ore mai iho ā ’oia i tā tātou mau hara ’ia tātarahapa ana’e tātou.

Nāhea te Metua i te ao ra i te tauturu ia ’outou ’ia ’ite ē, ’ua fa’a’orehia tā ’outou mau hara ? E ti’a ia ’outou ’ia tuatāpapa i te Mosia 4:1–3 ’e te a’ora’a a te peresideni Tad R. Callister « Te tāra’ehara a Iesu Mesia » (Liahona, Mē 2019, 85–87). E nehenehe teie a’ora’a e tauturu i te feiā tā ’outou e ha’api’i ra ’ia ta’a ē, e fa’a’ore mai te Metua i te ao ra i tā tātou mau hara ’ia tātarahapa ana’e tātou.

E fa’aorehia tā tātou mau hara ’ia fāri’i ana’e tātou i te aroha i pūpūhia mai e Iesu Mesia.

Ha’api’i ’āmui

E nehenehe ’outou e ha’amata ma te pia i te mau hōho’a o te Fa’aora i Getesemane ’e i ni’a i te sātauro (hi’o Buka hōho’a ’evanelia, te mau nūmera. 56–57). E ani i te feiā ’āpī ’ia ’imi i te Levitiko 1:1–9 ; 16:15–16, 30. E ani ia rātou ’ia fa’a’ite mai i te mau pereota ’o tē fa’ahaamana’o ra ia rātou i te tāra’ehara a te Fa’aora. Nāhea te mau tusia i fa’ahitihia i roto i teie mau ’īrava i te tauturu i te ’āti ’Īserā’ela ’ia tīa’i ma te fa’a’oroma’i i te tāra’ehara a te Fa’aora ? E aha te tauturu ia tātou ’ia ha’amana’o i te tāra’ehara a te Fa’aora ? E aha te tauturu ia tātou ’ia ’ite i te here ’e te fa’a’orera’a hara a te Fa’aora ? E nehenehe te mau ’ātivite i raro nei e tauturu i te mau feiā ’āpī ’ia ta’a maita’i a’e ē, e fa’a’ore mai te Atua i tā tātou mau hapa.

• E rave rahi ta’ata i roto i te mau pāpa’ira’a mo’a tei fa’ata’a mai i te mau fa’a’itera’a mana’o tā rātou i fāri’i ’a fa’a’ore ai te Metua i te ao ra i tā rātou hapa. E nehenehe te mau melo o te piha ’aore rā o te pupu e tai’o i te tahi mau hi’ora’a (hi’o « Pu’e parau ha’amāramaramara’a »). ’A ani ia rātou ’ia hāmani i te hō’ē tāpura o te mau pereota nā roto mai i teie mau ’īrava ’o tē fa’ata’a nei i te huru ’ia fa’a’orehia te hapa. E nehenehe ’outou e ani ia rātou ’ia fa’a’ite mai nā roto i tā rātou iho mau parau, e aha tā te fa’a’orera’a hara e ha’aputapū ia rātou. E aha tā tātou e nehenehe e ’apo mai nō ni’a i te Atua nā roto mai i teie mau ha’aputapūra’a ? Penei a’e e nehenehe ’outou e fa’a’ite i tō ’outou iho mau ha’aputapūra’a nō ni’a i te fa’a’orera’a hara.

• I te tahi taime ’aita te mau ta’ata e pāpū ra ē, ’ua fa’a’orehia ānei tā rātou hara nō te mea ’aita rātou e pāpū ra ’ua tātarahapa mau ānei rātou. Tē ha’amāramarama nei te a’ora’a a Elder Dale G. Renlund « Te tātarahapa : Hō’ē mā’itira’a ’oa’oa » e nāhea ’ia tātarahapa mau ’e ’ia fāri’i i te fa’a’orera’a hara a te Atua (Liahona, Novema 2016, 121–24). E nehenehe ’outou e pāpa’i i ni’a i te tāpura ’ere’ere i te mau upo’o parau Te tātarahapara’a mau. ’e Te mau mea e ha’afifi nei i te tātarahapara’a. E ani i te feiā tā ’outou e ha’api’i ra ’ia ’imi mai i te mau ha’api’ira’a i roto i te a’ora’a, nō roto mai te mau upo’o parau. E aha tā tātou i ’apo mai nō ni’a i te Fa’aora ’e tāna fa’a’orera’a hara nō roto mai i nā pāratarafa hope’a e toru o teie a’ora’a ?

• E nehenehe te tahi mau ta’ata e tātarahapa, ’aita rā rātou e mana’o nei ’ua fa’a’orehia tā rātou hara. Peneia’e nō te mea ’aita i ti’a ia rātou ’ia fa’a’ore i tā rātou iho hapa. E nehenehe te a’o i roto i te a’ora’a a te peresideni Tad R. Callister « Te tāra’ehara a Iesu Mesia » e tauturu ia rātou. E nehenehe tā ’outou piha ’aore rā pupu e tai’o i te tuha’a e ha’amata ma te « 2. Hara ». E ani ia rātou ’ia ’imi mai i te parau a’o tā rātou e nehenehe e fa’a’ite i te hō’ē hoa ’aore rā te melo o te ’utuāfare ’o tē mana’o fa’ahapa noa ra, noa atu i muri iho i te tātarahapara’a. ’A hōro’a i te taime i te feiā ’āpī ’ia fa’a’ite mai i tō rātou mau mana’o nō ni’a i te Fa’aora, ’o tei fa’ati’a ia tātou ’ia tātarahapa ’e ’ia fa’a’orehia te mau hara.

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i e aha tā rātou e rave nō te ’ohipa i ni’a i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i ni’a i tō rātou mau fa’a’itera’a mana’o i te ha’apūai i tō rātou mau aura’a ’e te Metua i te Ao ra ’e Iesu Mesia.

Pu’e parau ha’amāramaramara’ara’a

• Enosa 1:1–8 ; Mosia 4:1–3 ; Alama 24:7–10 ; 36:17–21 (E aha te huru o te ta’ata i te taime ’a fa’a’orehia ai tā rātou hara)

• Isaia 1:18 ; Mosia 26:30 ; Moroni 6:8 ; Te Parau Ha’api’ira’a ’e te mau Parau Fafau 58:42–43 ; 64:10 (’Ua fafau mai te Fatu e fa’a’ore ’oia i tā tātou hara)

• Russell M. Nelson, « E nehenehe tātou e rave maita’i a’e ’e e ha’amaita’i ia tātou », Liahona, Mē 2019, 67-69

• Craig A. Cardon, « Ua hina’aro te Fa’aora ’ia fa’a’ore i te hara », Liahona, Mē 2013, 15–18

Ha’api’ira’a mai tā te Fa’aora

’Ua ha’api’i mai te Fa’aora ia tātou ’ia fa’a’ohipa i te mau pāpa’ira’a mo’a nō te ’ite mai i te mau pāhonora’a i tā tātou iho mau uira’a. Nāhea e ti’a ai ia ’outou ’ia tauturu i te feiā tā ’outou e ha’api’i ra ’ia hina’aro ’ia fāriu atu i ni’a i te mau pāpa’ira’a mo’a ’e te mau parau a te mau peropheta ’a ’imi ai rātou i te mau pāhonora’a ?