22 nō Mē

Nāhea vau i te fa’a’ite i tō’u ’ā’au mēhara i te Atua ?

Deuteronomi 6–8 ; 15 ; 18 ; 29–30 ; 34

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā te Parau tumu a te pupu Autahu’ara’a a Aarona I muri iho e arata’i i te hō’ē ’āparaura’a nō ni’a i te ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea tā ’outou i ’āparau.

• Ora i te ’evanelia. E aha tā tātou i ’āparau i ma’iri a’e nei, ’e e aha te mau ani-manihini-ra’a ’aore rā te mau tītaura’a i ravehia ? E aha tā tātou i rave nō te ’ōhipa i ni’a i teie mau ’ani-manihini-ra’a ’aore rā mau tītaura’a ?

• Aupuru i te feiā tei hina’aro i te tauturu. E aha tā tātou e nehenehe e rave ’aore rā e parau nō te toro i te rima i te feiā e mana’o ’ōtahi tō rātou ’aore rā ’ua ātea i te Metua i te ao ra ?

• Ani i te mau ta’ata ato’a ’ia fāri’i i te ’evanelia. E aha te tahi mau rāve’a tā tātou e nehenehe e tauturu ia vetahi ’ē ’ia ’ite i te here ’o Iesu Mesia ?

• Tāhō’ē i te mau ’utuāfare ē a muri noa atu. E aha te mau manaʼo tā tātou e nehenehe e faʼaʼite i te tahi ʼe te tahi nō te tauturu i te ha’apūai i tō tātou ’utuāfare ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’ahamana’o i te mau melo o te piha ’aore rā o te pupu i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

Tē ara tāmau nei te Atua i ni’a ia tātou ’e tē ha’amaita’i nei ’oia ia tātou. Terā rā ma te mau fa’anevanevara’a ato’a ’e te mau fa’ahemara’a tā tātou e fa’aruru nei, e mea ’ōhie ’ia ha’amo’e iāna. ’Ua tupu te reira i ni’a i te ’āti ’Īserā’ela e rave rahi taime, ’oia ato’a i roto i te mau taime fifi ’a haere noa ai rātou nā roto i te mēdēbara. ’Ua arata’i rā te Fatu ia rātou nā roto i te here i te fenua i parauhia ra—hō’ē vāhi tāmahanahanara’a rahi a’e ’e te mau fa’ahemara’a e rave rahi, i reira ho’i rātou e fa’ahemahia ai ’ia ha’amo’e fa’ahou iāna. ’Ua fa’ata’ahia te mau arata’ira’a a te Fatu i roto i te Deuteronomi 6 nō te tauturu i te ’āti ’Īserā’ela ’ia ha’amana’o tāmau noa iāna ’e i tāna mau parau (hi’o i mau ’īrava 6–9).

Nāhea ’outou i te tāpe’a i te Fatu ’e i tāna mau parau i roto i tō ’outou ’ā’au—« ’o te mōina Iehova ia ’outou » ? (Deuteronomi 6:12). Nāhea te ha’amana’ora’a i te Fatu i te tauturu ia tātou ’ia fāri’i i te ’ā’au mēhara i roto i te mau huru tupura’a ato’a o tō tātou orara’a ? ’A fa’aineine ai ’outou i te ha’api’i, ’a feruri i te hi’o fa’ahou i te Deuteronomi 12:6–9, 12 ’e te Luka 17:11–19. E nehenehe ato’a ’outou e hi’o fa’ahou i te a’ora’a a te peresideni Dieter F. Uchtdorf « ’Ia māuruuru i roto i te mau huru ato’a o te orara’a » (Liahona, Mē 2014, 70–77).

E nehenehe te ha’amana’ora’a i te Fatu e tauturu ia tātou ’ia fāri’i i te ’ā’au mēhara i roto i te mau huru tupura’a ato’a o te orara’a.

Ha’api’i ’āmui

Nō te ha’amata i te hō’ē ’āparaura’a nō ni’a i te ha’amana’ora’a i te Fatu, e nehenehe ’outou e ani i te feiā ’āpī ’ia fa’a’ite mai i te mau mea i orahia mai, ’a mo’ehia ai ia rātou te tahi mea fauha’a roa. E aha te mau hope’ara’a ? E aha te tupu mai ’ia mo’ehia ia tātou te mau mea rarahi tā te Fatu i rave nō tātou ? E ani i tā ’outou piha ’aore rā pupu ’ia hi’o fa’ahou i te Deuteronomi 6:4–9, 20–25. E aha tā teie mau ʼīrava e haʼapiʼi nei nō ni’a i te ha’amana’ora’a i te maita’i o te Atua i roto i tō tātou orara’a ? ’A mā’iti hō’ē ’aore rā hau atu o te mau ’ātivite i raro nei nō te tauturu i te feiā tā ’outou e ha’api’i ra ’ia ’apo mai, nāhea ’ia ’ite rahi atu ā i te māuruuru rahi nō te maita’i o te Atua ’e ’ia fa’a’ite i tō rātou ’ā’au mēhara iāna.

• E nehenehe te tai’o-’āmui-ra’a i te Luka 17:11–19 e tauturu i te feiā ’āpī ’ia feruri, nō te aha e mea faufa’a nō tātou ’ia fa’a’ite i tō tātou ’ā’au mēhara i te Atua. ’A feruri i te ui i te mau uira’a ’o te tauturu ia rātou ’ia fa’aau i teie ’ā’amu i ni’a i tō rātou orara’a. ’Ei hi’ora’a, e aha te tahi mau tumu nō te aha ’aita nā iva lepera i ni’a i te hō’ē ’ahuru i ha’amāuruuru i te Fa’aora ? Nō te aha i te tahi taime ’aita tātou e fa’a’ite nei i te ’ā’au mēhara i te Atua ? E ani i te feiā tā ’outou e ha’api’i ra ’ia feruri i te mau taime ’a māuruuru ai rātou, noa atu ā e mea pa’ari. E aha tā te fa’a’itera’a i te māuruuru e fa’atupu i ni’a ia tātou ? Nō te aha e mea faufa’a ’ia fa’a’ite i tō tātou mau mana’o māuruuru i te Atua ? (Hi’o te mau fa’ahorora’a pāpa’ira’a mo’a i roto i te « Pu’e parau ha’amāramaramara’ara’a » nō te tahi mau pāhonora’a). E aha tā tātou e nehenehe e rave nō te fa’a’ite i tō tātou ’ā’au mēhara i te Atua ?

• E rave rahi mau hīmene ’āruera’a ’e ha’amāuruurura’a, mai « Tō’u Fa’aora, tō’u Atua » ’e « Tai’o mai nā i tō mau maita’i » (Te mau Hīmene, mau nūmera. 42, 147). E nehenehe ’outou e ani i te feiā ’āpī ’ia ’imi i te mau parau o teie mau hīmene nō te mau mea e māuruuruhia nei e rātou. E ani ia rātou ’ia fa’a’ite mai i te mau mea tei ’itehia ia rātou ’e ’ia fa’ata’a mai nō te aha rātou e māuruuru ai i te reira. E nehenehe ’outou e hīmene ’āmui i te tahi o te reira mau hīmene.

• E tauturu te a’ora’a a te peresideni Dieter F. Uchtdorf « ’Ia māuruuru i roto i te mau huru ato’a o te orara’a » ia tātou ’ia māramarama nāhea ’ia rahi atu ā te māuruuru. Te hō’ē rāve’a nō te tauturu i te feiā ’āpī ’ia ha’api’i mai nā roto mai i teie a’ora’a ’o te vāhira’a ïa ia rātou ’ei mau pupu na’ina’i ’e ’ia hōro’a i te pupu tāta’itahi hō’ē tuha’a o te a’ora’a. ’A ani ia rātou ’ia fa’a’ite mai i te hō’ē parau ’aore rā te hō’ē pereota ’o tā rātou e mana’o ra e ha’apoto i te mea tā te peresideni Uchtdorf i ha’api’i. E ani ia rātou ’ia fa’a’ite mai i te tahi mea tā rātou i ha’api’i mai nō ni’a i te ’ā’au mēhara. E nehenehe ato’a rātou e māta’ita’i i te video « President Russell M. Nelson on the Healing Power of Gratitude » (ChurchofJesusChrist.org). E aha tā tātou e rave « ’Ia māuruuru i roto i te mau huru ato’a o te orara’a », noa atu e aha te huru o te reira ? E aha te mau hi’ora’a tā tātou i ’ite nō te mau ta’ata e māuruuru nei noa atu ā tō rātou vaira’a fifi ?

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i e aha tā rātou e rave nō te ’ohipa i ni’a i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i ni’a i tō rātou mau fa’a’itera’a mana’o i te ha’apūai i tō rātou mau aura’a ’e te Metua i te Ao ra ’e Iesu Mesia.

Pu’e parau ha’amāramaramara’ara’a

• Mosia 2:19–24 (E ti’a ia tātou ’ia ’ārue ’e ’ia ha’amaita’i i te Atua)

• Alama 34:38 ; 37:37 ; Te Parau Ha’api’ira’a ’e te mau Parau Fafau 46:32 ; 59:7, 15–21 (E ti’a ia tātou ’ia ha’amāuruuru i roto i te mau mea ato’a)

• Salamo 107:8–9 ; Philipi 4:6–7 ; Te Parau Ha’api’ira’a ’e te mau Parau Fafau 78:19 (Te mau ha’amaita’ira’a o te ’ā’au mēhara)

• Dale G. Renlund, « ’A feruri na i te hāmani maita’i ’e te rahi o te Atua », Liahona, Mē 2020, 41–44

• « Te ’ā’au mēhara », i roto Nō te Pūai o te Feiā ’Āpī (buka iti, 2011), 18

Ha’api’ira’a mai tā te Fa’aora

’Ua ’ite te Fa’aora i tāna mau pipi ’e ’o vai tā rātou e nehenehe e riro mai. Nā teie ’itera’a i fa’auru i te huru o tāna ha’api’ira’a ia rātou. Nāhea ’outou i te ha’api’i mai nō ni’a i te mau mea e ’ana’anataehia, te mau hina’aro, ’e te mau tāmatara’a o te feiā tā ’outou e ha’api’i ra ’ia ti’a ia ’outou ’ia ha’api’i maita’i atu ā ia rātou ?