e ’utuāfare e tuatāpapa ra i te mau pāpa’ira’a mo’a

12 nō Tiunu

Nāhea vau ’ia fa’aro’o i te reo o te Fatu ?

Ruta ; 1 Samuela 1–3

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā te Parau tumu a te pupu Autahu’ara’a a Aarona. I muri iho e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea tā ’outou i ’āparau.

• Ora i te ’evanelia. E aha te mau ’itera’a ’aita i maoro a’enei tei ha’apūai i tō tātou ’itera’a pāpū ?

• Aupuru i te feiā tei hina’aro i te tauturu. ’O vai te hina’aro i tā tātou tauturu ’e mau pure ? E aha te mau mana’o e tura’i nei ia tātou e tauturu ia rātou ?

• Ani i te mau ta’ata ato’a ’ia fāri’i i te ’evanelia. Nāhea tātou ’ia riro ’ei māramarama nō te mau melo o te ’utuāfare ’aore rā nō te mau hoa ’aita e fa’a’ite nei i tō tātou mau ti’aturira’a ?

• Tāhō’ē i te mau ’utuāfare ē a muri noa atu. Nāhea tātou e nehenehe ai e fa’a’ite rahi atu ā i te here ’e te pāturura’a i tō tātou ’utuāfare ’e ’ia fa’atupu i te ta’a-’ē-ra’a maita’i i roto i tō tātou fare ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’ahamana’o i te mau melo o te piha ’aore rā o te pupu i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

E rave rahi mau melo o tā ’outou piha ’aore rā pupu e nehenehe e ta’a maita’i i te tamaiti ra ia Samuela. I te paraparaura’a te Fatu iāna, ’aita Samuela i nava’i roa i te mau ’ite rau o te heheura’a ’ia ’ite i te reo o te Fatu. E mea ti’a i te fa’aa’o arata’i o Samuela, ’o Eli, e tauturu ia Samuela ’ia ha’api’i mai i te ’ite i teie reo. Mai ia Eli te huru, e rāve’a tā ’outou nō te fa’a’ite pāpū i te feiā tā ’outou e ha’api’i ra ē, tē hina’aro nei te Fatu e paraparau ia rātou. E nehenehe ’outou e tauturu ia rātou ’ia ha’api’i mai i te ’ite i te reo o te Fatu, noa atu ē tē ha’api’i ato’a mai ra ’outou i te fa’aro’o iāna. E nehenehe ’outou e tuatāpapa ’āmui e aha tā tāna mau peropheta i ha’api’i nō ni’a i te heheura’a a te ta’ata iho. ’E e nehenehe ’outou e ha’api’i mai i te paraparau i te Fatu, mai tā Samuela i rave, « ’a parau mai ; tē fa’aro’o atu nei tō tāvini » (1 Samuela 3:10).

Hau atu i te tai’ora’a i te 1 Samuela 3 i teie hepetoma, e nehenehe ’outou e fa’aineine nō te ha’api’i nā roto i te tai’ora’a i te a’ora’a a te peresideni Russell M Nelson « ’A fa’aro’o iāna » (Liahona, Mē 2020, 88–92).

tamāhine e tuatāpapa ra i te mau pāpa’ira’a mo’a

’Ua ani mai te peresideni Russell M. Nelson ia tātou ’ia « fa’arahi i tō [tātou] ’aravihi i te pae vārua nō te fāri’i i te heheura’a ».

Ha’api’i ’āmui

Nō te fa’aineine i te feiā tā ’outou e ha’api’i ra nō te ’āparaura’a i teie mahana, ’a feruri e ani ia rātou ’ia hi’o fa’ahou i te 1 Samuela 3:1–14. E ani ia rātou ’ia fa’a’ite mai e aha tā rātou i ha’api’i mai nā roto mai i teie ā’amu nō ni’a i te fa’aro’ora’a i te reo o te Fatu. E aha te tahi atu mau rāve’a tā te Fatu nō te paraparau ia tātou ? E nehenehe te mau ’ātivite i muri nei e tauturu i te feiā ’āpī ’ia fa’ahōhonu atu ā i tō rātou māramarama nō te heheura’a a te ta’ata iho.

• Teie te hō’ē rāve’a nō te tauturu i te feiā tā ’outou e ha’api’i ra ’ia māramarama maita’i e nāhea ’ia fāri’i i te heheura’a. E nehenehe ’outou e pāpa’i i ni’a i te tāpura ’ere’ere i te mau fa’ahorora’a pāpa’ira’a mo’a i tu’uhia i roto « Pu’e parau ha’amāramaramara’ara’a » (’aore rā te tahi atu tā ’outou i ’ite). E ani i te feiā ’āpī ’ia tai’o i te pāpa’ira’a mo’a tāta’itahi. I muri iho, e nehenehe rātou e pāpa’i i ni’a i te tāpura ’ere’ere i pīha’i iho i te mau fa’ahitira’a parau tāta’itahi, e aha tā teie pāpa’ira’a mo’a e ha’api’i nei nō ni’a i te fāri’ira’a i te heheura’a o te ta’ata iho. E ani ia rātou ’ia fa’a’ite mai i te mau mea i orahia mai e rātou i te ’imira’a ’e te fāri’ira’a i te heheura’a. Mai te mea e tano, ’a fa’a’ite i te mau mea i orahia mai e ’outou iho.

• E fāri’i tātou i te mau ha’amaita’ira’a rahi ’ia ha’api’i ana’e mai tātou ’ia fa’aro’o i te reo o te Fatu. E nehenehe ’outou e ha’amata i te hō’ē ’āparaura’a nō ni’a i te reira, nā roto i te anira’a i te feiā ’āpī ’ia fa’a’ite mai i te mau tumu e hina’aro ai rātou i te heheura’a. I muri iho e ani ia rātou ’ia ’imi i te a’ora’a a te peresideni Russell M. Nelson « ’A fa’aro’o iāna ». ’A ani ia rātou ’ia ’imi i te a’o ’o te tauturu ia rātou ’ia ta’a maita’i e nāhea ’ia fa’aro’o i te reo o te Fatu. E nehenehe ato’a ’outou e fa’a’ite i te hō’ē ’aore rā hau atu o te mau video ha’aputu o te « Ecoute le » (ChurchofJesusChrist.org/media). Nō te aha e mea faufa’a nō tātou ’ia ha’api’i mai i te fa’aro’o i te reo o te Fatu ? ’A fa’aitoito i te feiā ’āpī ’ia pāpa’i i te mea tā rātou i ha’api’i mai i roto i tā rātou buka ’ā’amu ’aore rā i ni’a i te ’api parau nō te pia i roto i tō rātou fare.

• Tē uiui nei paha te feiā ’āpī tā ’outou e ha’api’i ra, e nāhea ’ia ’ite i te taime e paraparau mai ai te Vārua Maita’i ia rātou. ’A feruri i te fa’a’ite i te mau video « How Can I Tell the Difference between the Holy Ghost and My Emotions ? [Nāhea vau i te fa’a’ite i te ta’a-’ē-ra’a i rotopū i te Vārua Maita’i ’e tō’u mau mana’o ?] » ’e « How Can I Feel the Holy Ghost More Often ? [Nāhea e nehenehe ai iā’u ’ia ’ite pinepine atu ā i te Vārua Maita’i ?] » nō roto mai « Mata ’e Mata ’e te peresideni Eyring ’e Elder Holland » (ChurchofJesusChrist.org). E aha te ha’api’ira’a tā tātou i ’apo mai nā roto mai i teie mau video nō ni’a i te ’itera’a i ta’a ’ē i roto i te mau muhumuhu a te Vārua ’e tō tātou mau mana’o ? E nehenehe te mau melo o te piha ’aore rā o te pupu e fa’a’ite mai e nāhea rātou i te pāhono atu i te hō’ē hoa e uira’a tāna mai tei ’āparauhia i roto i teie mau video.

’A rave ma te fa’aro’o

’A fa’aitoito i te mau pīahi ’ia feruri ’e ’ia pāpa’i e aha tā rātou e rave nō tē ’ohipa i ni’a i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i ni’a i tō rātou mau fa’a’itera’a mana’o i te ha’apuai i tō rātou mau aura’a ’e te Metua i te ao ra ’e Iesu Mesia.

Pu’e parau ha’amāramaramara’ara’a

• 1 Te mau Ari’i 19:9–12 ; Helamana 5:29–31 ; Te Parau Ha’api’ira’a ’e te mau Parau Fafau 6:14–16, 21–23 ; 8:2–3 ; 11:12–14 (Te mau rāve’a e paraparau mai ai te Fatu ia tātou)

• Te Parau Ha’api’ira’a ’e te mau Parau Fafau 9:7–9 (E tītau te heheura’a i tō tātou iho ferurira’a ’e tā tātou tuatātapara’a)

• Ronald A. Rasband, « Nā te vārua mo’a e arata’i », Liahona, Mē 2017, 93-96

• ’Ua ha’api’i te peresideni Russell M. Nelson, « i te mau mahana i muri nei, e’ita tātou e ora mai i te pae vārua mai te peu ’aita te mana arata’i, te fa’atere, te tāmāhanahana ’e te fa’auru tāmau o te Vārua Maita’i. E au mau taea’e ’e mau tuahine here, tē tāparu nei au ia ’outou ’ia fa’arahi i tō ’outou ’aravihi pae vārua nō te fāri’i i te heheura’a » (« Heheura’a nō te ’Ēkālesia, heheura’a nō tō tātou orara’a », Liahona, Mē 2018, 96).