26 nō Tiunu

Nō te aha e mea faufa’a te vi’ivi’i ’ore i roto i te ’ōpuara’a a te Atua ?

2 Samuela 5–7 ; 11–12 ; 1 Te mau Ari’i 3 ; 8 ; 11

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, e tai’o ’āmui i te Parau tumu a te Feiā ’Āpī Tamāhine ’aore rā te Parau tumu a te pupu Autahu’ara’a a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). Fa’anaho i te mau rāve’a nō te ’ohipa i ni’a i te mea tā ’outou i ’āparau.

• Ora i te ’evanelia. Nāhea tātou i te ha’afātata atu i te Fa’aora ? Nāhea tātou i te tāmata ’ia riro hau atu mai iāna te huru ?

• Aupuru i te feiā tei hina’aro i te tauturu. ’O vai tei vai i roto i tō tātou ferurira’a ’aita i maoro a’enei ? Nāhea tātou i te tauturu i teie mau ta’ata ?

• Ani i te mau ta’ata ato’a ’ia fāri’i i te ’evanelia. Nāhea tātou e nehenehe ai e pāhono i te mau uira’a a tō tātou mau hoa nō ni’a i te ’Ēkālesia, ’o te ha’apūai i tō rātou fa’aro’o i te Fa’aora ?

• Tāhō’ē i te mau ’utuāfare ē a muri noa atu. E aha te tahi mau rāve’a e nehenehe ai tātou e tū’ati maita’i a’e i te mau melo o te ’utuāfare, mai te mau metua pa’ari ’e te mau taea’e fēti’i ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• E fa’ahamana’o i te mau melo o te piha ’aore rā o te pupu nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’ari ’aore rā feiā ’āpī ; 25–35 minuti

Fa’aineine ia ’outou iho i te pae vārua

’Ua hōro’a mai tō tātou Metua i te ao ra, ’o tē hina’aro nei ’ia ’oa’oa tātou, i te ture nō te vi’ivi’i-’ore. ’E ’o Sātane, ’o tē hina’aro nei ’ia ’oto tātou, tē ha’api’i nei ïa e ’ere teie ture i te mea faufa’a. Tē rave nei ’oia i te mau mea ato’a e nehenehe iāna, nō te fa’ahema ia tātou ’ia rave i te hara pae ’āpeni. E nehenehe te feiā ’āpī e fa’aitoitohia e te mau hōho’a ’e e te mau parau poro’i ’o tē pāto’i nei i te mea tā te Atua i ha’api’i nō ni’a i te orara’a ’āpeni. E ti’a ia tātou tāta’itahi ’ia ara maita’i i taua mau huru fa’ahemara’a ra ’e ’ia tūtava i te tāpe’a mā noa i tō tātou mau mana’o, tā tātou mau parau ’e tā tātou mau ’ohipa i te roara’a o tō tātou orara’a. ’Ua ha’api’i mai tātou i teie ha’api’ira’a nā roto mai i te ’ohipa ’oto a te ari’i Davida. ’Ua riro ’oia ’ei hi’ora’a nō te ha’apa’o maita’i rahi. ’Ua topa atu rā ’oia i roto i te fa’ahemara’a ’e ’ua ’ōfati i te ture o te vi’ivi’i ’ore (hi’o 2 Samuela 11:1–5).

E nehenehe ’outou e fa’aineine i te ha’api’i nā roto i te tai’ora’a i te 2 Samuela 11, te a’ora’a a Elder David A. Bednar « Tē ti’aturi nei tātou i te vi’ivi’i ’ore » (Liahona, Mē 2013, 41–44), ’e te tahi atu mau mātēria tauturu nō ni’a i te vi’ivi’i ’ore. E aha te mea e fa’auru nei i te mau melo o te piha ’aore rā o te pupu ’ia hi’o i te vi’ivi’i ’ore mai tā te Atua e hi’o nei i te reira ? E aha te mea e tauturu ia rātou ’ia pāto’i i te huru o tā Sātane hi’o nei i te reira ?

Nō te vai ha’apa’o noa i te ture nō te vi’ivi’i ’ore a te Atua, e ti’a ia tātou ’ia tūtava i te mahana ato’a ’ia tāpe’a mā noa i tō tātou mau mana’o, tā tātou mau parau, ’e tā tātou mau ’ohipa.

Ha’api’i ’āmui

Teie hō’ē rāve’a nō te ha’amata i te tumu parau o te vi’ivi’i ’ore, ma te tauturu i te feiā tā ’outou e ha’api’i ra ’ia hi’o fa’ahou i te mea tā rātou i tai’o i roto i te mau pāpa’ira’a mo’a. Pāpaʼi i te mau ta’o Davida ’e Iosepha i ni’a i te tāpura ’ere’ere. I muri iho i te hi’o-’āmui-fa’ahou-ra’a i te 2 Samuela 11:1–5 ’e te Genese 39:7–12. Nāhea Davida ’e Iosepha i te pāhonora’a tāta’itahi i te fa’ahemara’a ’ia rave i te hara pae ’āpeni ? E aha tā tātou e ’apo mai nā roto mai i tō rāua hi’ora’a ? ’A fa’a’ohipa i te mau ’ātivite i muri nei ’aore rā i te tahi o tā ’outou iho, nō te fa’auru i te hō’ē ’āparaura’a hōhonu atu nō ni’a nō te aha e mea faufa’a te vi’ivi’i ’ore i roto i te fa’anahora’a a te Atua.

• E mea maita’i paha i te feiā ’āpī tā ’outou e ha’api’i ra, ’ia fāna’o i te tātarara’a o te fāito māra’a o te vi’ivi’i ’ore a te Fatu. E ani ia rātou ’ia hi’o fa’ahou « Te vi’ivi’i ’ore i te pae ’āpeni » i roto i te Nō te Pūai o te Feiā ’Āpī ([buka iti, 2011], 35–37) ’aore rā te paratarāfa maha o « Te ’Utuāfare : E Poro’i i tō te Ao nei » (ChurchofJesusChrist.org). Nāhea te mau ha’api’ira’a a te Fatu nō ni’a i te ’āpenira’a e ta’a ’ē ai i te mea tā Sātane e hina’aro nei ’ia ti’aturi tātou ? E nehenehe te feiā ’āpī e hi’o fa’ahou « Te ’Utuāfare : E Poro’i i tō te Ao nei », ma te ’imi i te mau fa’ahitira’a parau e fa’ata’a nei, nō te aha e mea faufa’a te vi’ivi’i ’ore i roto i te fa’anahora’a nō te oa’oa a te Metua i te ao ra. E aha tā tātou i ha’api’i mai i roto i teie mau fa’ahitira’a parau ’o te tauturu ia tātou ’ia ora parauti’a i roto i te ao i teie mahana ?

• I te tahi taime ’aita vetahi e ta’a maita’i nei i tā tātou mau fa’aturera’a morare, nō te mea iho ā ra e mea ta’a ’ē roa teie mau fa’aturera’a i te mea tā te mau ta’ata e rave rahi e ti’aturi nei. Nāhea tātou e nehenehe ai e pāhono i tā rātou mau uira’a ? E aha tā tātou e ha’api’i mai nā roto mai ia Elder ’e te tuahine Renlund i roto i te video « Pourquoi est-il important de respecter la loi de chasteté ? » mai roto mai i te « Mata ’e Mata ’e ’o Elder ’e te tuahine Renlund » (ChurchofJesusChrist.org). E nehenehe ato’a te feiā ’āpī e ’imi i te mau pāpa’ira’a mo’a i roto i te « Pu’e parau ha’amāramaramara’ara’a » nō te mau fa’ahitira’a parau e fa’ata’a nei i te mau ha’amaita’ira’a o te vi’ivi’i ’ore. E nehenehe ’outou e ani ia rātou ’ia fa’a’ite mai i tō rātou mana’o, nō ni’a i te tumu rātou e mā’iti ai e ha’apa’o i te ture morare o te ’āpenira’a a te Fatu.

• Pinepine te ta’ere a te ta’ata i te ha’api’i ē, e’ita i te mea tītauhia ’ia vai mā i te pae ’āpeni. Noa atu rā te reira, ’aita te ta’ere e tau’a nei i te mau parau mau nō ni’a i te mau ha’amaita’ira’a o te vi’ivi’i ’ore ’e te mau ’ati o te orara’a vi’ivi’i. Nō te ha’api’i rahi mai nō ni’a i teie mau parau mau, e nehenehe te feiā ’āpī e tuatāpapa i te a’ora’a a Elder David A. Bednar « Tē ti’aturi nei tātou i te vi’ivi’i ’ore ». E nehenehe te tahi pae e tuatāpapa i te tuha’a « Te hina’aro o te ’ēnemi », ’e e nehenehe vetahi e tuatāpapa « Te mau ha’amaita’ira’a nō te rirora’a ’ei mea vi’ivi’i ’ore ». ’Ei reira, e ti’a ai ia rātou ’ia fa’a’ite i te tahi ’e te tahi e aha tā rātou i ’apo mai. E fa’aitoito ia rātou ’ia pāpa’i i te hō’ē pereota nō roto mai i teie a’ora’a ’o tā rātou e hina’aro e ha’amana’o i muri nei, ’a fārerei ai rātou i te mau poro’i hape nō te ’āpenira’a. E nehenehe ato’a ’outou e arata’i ia rātou i te tuha’a e parauhia « Te parau tumu nō te tātarahapa ». E ’āparau nāhea te Fa’aora e nehenehe ai e fa’aora i te feiā ato’a e hina’aro e tātarahapa i te hara pae ’āpeni. ’A fa’aha’amana’o i te feiā tā ’outou e ha’api’i ra ē, e nehenehe rātou e paraparau i tō rātou mau metua ’aore rā i te ’episekōpo mai te mea e uira’a tā rātou ’aore rā e hina’aro rātou e tātarahapa.

’A rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i e aha tā rātou e rave nō tē ’ohipa i ni’a i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te ravera’a i ni’a i tō rātou mau fa’a’itera’a mana’o i te ha’apūai i tō rātou mau aura’a ’e te Metua i te ao ra ’e Iesu Mesia.

Pu’e parau ha’amāramaramara’ara’a

• 1 Korinetia 6:19–20 (E hiero tō tātou tino)

• Alama 38:12 (Mai te mea e ha’avī tātou i tō tātou hina’aro, e nehenehe tātou e ’ī i te here)

• Te Parau Ha’api’ira’a ’e te mau Parau Fafau 25:2 ; 121:45–46 (Te mau ha’amaita’ira’a o te vi’ivi’i ’ore)

• « Chastity: What Are the Limits? [Te vi’ivi’i ’ore : E aha ïa te mau ’ōti’a ?] » « True Confidence [Ti’aturira’a mau] », « I Choose to Be Pure [E mā’iti au ’ia vai mā noa » (videos), ChurchofJesusChrist.org

Ha’api’ira’a mai tā te Fa’aora

I te mau vāhi ato’a, ’ua riro te Fa’aora ’ei hi’ora’a ʼe ’ei arataʼi. ’Ua ha’api’i ’oia i tāna mau pipi ’ia pure nā roto i te purera’a nā muri ia rātou. ’Ua ha’api’i ’oia ia rātou ’ia here ’e ’ia tāvini nā roto i te huru ’oia e here ai ’e e tāvini ai ia rātou. ’Ua ha’api’i ’oia ia rātou nāhea ’ia ha’api’i i tāna ’evanelia mai tāna i ha’api’i i te reira.