10 nō Tiurai

Nō te aha e mea faufa’a ’ia pe’e i te mau peropheta ora a te Atua ?

2 Te mau Ari’i 2–7

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ’a arata’i i te hō’e ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē uira’a i raro nei, ’aore rā hau atu, ’aore rā, tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). ’A fa’anaho i te tahi ’ohipa nō te rave i te mea i tāu’aparauhia.

• Ora i te ’evanelia. E aha tā te ’episekōpora’a i paraparau i roto i tā mātou mau rurura’a ’āpo’ora’a feiā ’āpī pāroita ? E aha te mau ’ohipa tā tātou e nehenehe e rave ’ia au i te mau mea i paraparauhia ?

• Aupuru i te feiā tei hina’aro i te tauturu. Nāhea tātou e toro ai i te rima i te mau ta’ata, mai te Mesia te huru, ’ia ’ite ana’e tātou i te hina’aro ’aita rā i ’ite e aha tē parau atu ?

• Ani manihini i te mau ta’ata ato’a ’ia fāri’i i te ’evanelia. E aha te tahi mea tā tātou i ’ite i roto i te ’evanelia a Iesu Mesia ’o tē fa’atae mai i te ’oa’oa i roto ia tātou ? Nāhea tātou e fa’a’ite ai i te reira ’oa’oa ia vetahi ’ē ?

• Tāhō’ē i te mau ’utuāfare ē a muri noa atu. E aha te tahi mau rāve’a e nehenehe ai tātou e fa’atū’ati maita’i a’e i te mau melo o te ’utuāfare, mai te mau metua rū’au ’e te mau fēti’i ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

Tē vai ra paha te tahi ma’a tuha’a iti o Naamana te lepera i roto ia tātou pā’āto’a (hi’o 2 Te mau Ari’i 5:1–15). Mai ia Naamana, tei riri i te paraura’a te peropheta Elisaia iāna ’ia horoi noa i roto i te hō’ē ’ānāvai pape e ora ai, e’ita paha tātou e ta’a ’oi’oi i te mau tumu o te a’o a tō tātou mau peropheta. E mana’o paha tātou, ’aita te tahi o tā rātou a’ora’a i ta’a-maita’i-hia ’e nō reira, ’aita e tano nō tātou. Terā rā, ’ua fafau mai te Atua i te mau ha’amaita’ira’a rahi mai te mea e fa’aha’eha’a tātou ’ia pe’e i te peropheta (hi’o Te Parau Ha’api’ira’a ’e te mau Parau Fafau 21:4–7). ’Ua nāhea te pe’era’a i te peropheta i te tauturu ia ’outou ’ia ha’afātata atu ā i te Fatu ? E aha te tahi atu mau hi’ora’a i roto i te 2 Te mau Ari’i 4–6 e fa’a’ite nei tē nāhea ra tātou i te ha’amaita’ihia ’a pe’e ai i te mau peropheta ora ?

’A fa’aineine ai ’outou i te ha’api’i nō ni’a i te mau ha’amaita’ira’a e tae mai nō te pe’era’a i te peropheta ora, ’a feruri i te mau fifi e fa’aruruhia nei e te feiā ’āpī. Nāhea te ha’apa’ora’a i te peropheta e tauturu ai ia rātou i roto i teie mau fifi ? E nehenehe ato’a ’outou e tai’o i te a’ora’a a Elder Neil L. Andersen « Te peropheta a te Atua » (Liahona, Mē 2018, 24–27) ’aore rā, te a’ora’a a Elder L. Whitney Clayton « Tāna e fa’aue mai ia ’outou na, e nā reira ’outou » (Liahona, Mē 2017, 97–99).

E nehenehe te pe’era’a i te peropheta e tauturu i te feiā ’āpī i roto i te mau tāmatara’a tā rātou e fa’aruru nei.

Ha’api’i ’āmui

Nō te ha’amata i te hō’ē ’āparaura’a, e nehenehe ’outou e ani i te melo tāta’itahi nō te piha ’aore rā nō te pupu autahu’ara’a (’aore rā te mau pupu na’ina’i) ’ia tai’o fa’ahou i te hō’ē ’ā’amu i muri nei : 2 Te mau Ari’i 4:1–7 ; 5:6–14 ; 6:8, 13–17. E ani ia rātou ’ia ’imi i te tahi mea ’o tē fa’auru ia rātou ’ia tai’o ’e ’ia pe’e i te mau ha’api’ira’a a te mau peropheta ’e te mau ’āpōsetolo o teie mahana. I muri a’e i te fa’a’itera’a mai te pupu i te tahi mea tei ’itehia ia rātou, e nehenehe ’outou e ani i te tahi mau taure’a ’ia fa’aoti i teie parau : « ’Ia pe’e ana’e au i te mau peropheta ’e te mau ’āpōsetolo ora, e… ». Nō te tāmau noa i te ’āparaura’a nō ni’a i te pe’era’a i te mau peropheta, ’a mā’iti hō’ē o te mau mana’o i muri nei, ’aore rā hau atu.

• Nō te mea ho’i ē, tei roto ana’e i te ’Ēkālesia a te Fatu i fa’aho’i-fa’ahou-hia mai e ’itehia ai te mau peropheta ora, e nehenehe te mau melo nō tā ’outou piha ha’api’ira’a ’aore rā nō te pupu autahu’ara’a e fāna’o i te pāhono atu i te mau uira’a tā vetahi ’ē e uiui noa nei nō ni’a i te mau peropheta ora. E nehenehe ’outou e pāpa’i i ni’a i te ’iri pāpa’ira’a i te mau uira’a i muri nei tā te mau ta’ata e uiui nō ni’a i te mau peropheta ora : Nō te aha e peropheta tā ’outou ? E nāhea te hō’ē peropheta ’i te mā’itihia ? Nāhea ’oe e ’ite ai ē tē paraparau mau nei te peropheta nō te Atua ? E nehenehe te feiā ’āpī e ’imi i te mau pāhonora’a i teie mau uira’a i roto i te mau mātēria i roto i te « Pu’e parau ha’amāramaramara’a ». E nehenehe rātou e ha’api’ipi’i i te pāhono i teie mau uira’a ’e i te tahi atu ma te fa’a’ohipa i te mau parau mau tei ’itehia mai ia rātou ’e tō rātou iho mau mana’o ’e te mau ’ohipa i tupu nō rātou.

• Nāhea te mau parau a tō tātou peropheta ora e tauturu ai ia tātou ’a fa’aruru ai i te mau tāmatara’a nō tātou iho ? Nō te tauturu i te feia ’āpī ’ia pāhono i teie uira’a, e nehenehe ’outou e ani ia rātou ’ia tāpura mai i ni’a i te ’iri pāpa’ira’a i te tahi o te mau parau a’o ’e te mau anira’a a te peropheta i roto i te ’āmuira’a rahi i tupu iho nei. E aha tā tātou i rave nō te fa’a’ohipa i tāna parau a’o ’e tāna mau anira’a ? E aha te mau tauira’a tā tātou i ’ite i roto i tō tātou orara’a maoti teie mau tauto’ora’a ? E nehenehe ’outou e ani i te tahi ta’ata ’ia fa’a’ite mai i tōna iho ’itera’a nō ni’a i te parau a’o a te peropheta tei tauturu iāna i roto i tōna iho fifi.

• Nāhea ’outou e tauturu ai i te feiā tā ’outou e ha’api’i ra ’ia māramarama ē, e tauturu te pe’era’a i te peropheta ia rātou ’ia ha’afātata atu ā i te Fa’aora ? Te hō’ē rāve’a ’o te hōro’ara’a ïa ia rātou tāta’itahi i te hō’ē tareta na’ina’i ’e ’ia ani ia rātou ’ia tai’o i te mau tuha’a o te a’ora’a a Elder Neil L. Andersen « Te peropheta a te Atua ». E nehenehe rātou e pāpa’i i ni’a i te tahi a’e pae o te tāreta i te tahi mea tā rātou i ha’api’i mai, nāhea te peropheta e tauturu ai ia rātou ’ia ha’afātata atu ā i te Mesia. I te tahi mai pae o te tāreta, e nehenehe tā rātou e pāpa’i i te tahi mea tei fa’auruhia rātou ’ia rave nō te pe’era’a i te peropheta. ’A ani ia rātou ’ia fa’a’ite mai i tā rātou i pāpa’i.

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Amosa 3:7 ; Te Parau Ha’api’ira’a ’e te mau Parau Fafau 1:4, 37–38 ; Mose 6:26–27, 32–36 ; Gospel Topics, « Peropheta », topics. ChurchofJesusChrist.org ; « Why Do We Have Prophets? [Nō te aha e mau peropheta tā tātou] » (video), ChurchofJesusChrist.org (Nō te aha e mau peropheta tā tātou)

• Gary E. Stevenson, « Te ’ā’au o te peropheta », Liahona, Mē 2018, 17–20 (Nāhea te peropheta e mā’itihia ai)

Ha’api’ira’a mai tā te Fa’aora

« E ’ere te fa’afāriura’a mau i te ’ite-noa-ra’a i te Vārua e ha’apāpū mai i te parau mau i tō tātou vārua ; e mea ti’a roa ato’a rā ia tātou ’ia ’ohipa mai te au i taua mau parau mau ra. Ta’a ’ē noa atu te tauturura’a i te mau pīahi ’ia fāri’i ’e ’ia ’ite i te Vārua, ’a tauturu ia rātou ’ia ha’a mai te au i te mau muhumuhu tā rātou e fāri’i » (Ha’api’ira’a mai tā te Fa’aora, 10).