24 nō Tiurai

E aha te mau ha’amaita’ira’a e tae mai nā roto i te fāri’ira’a i te mau ’ōro’a o te hiero ?

Ezera 1 ; 3–7 ; Nehemia 2 ; 4–6 ; 8

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ’a arata’i i te hō’e ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē uira’a i raro nei, ’aore rā hau atu, ’aore rā, tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). ’A fa’anaho i te tahi ’ohipa nō te rave i te mea i tāu’aparauhia.

• Ora i te ’evanelia. ’Ua nāhea tātou i te ’itera’a i te rima o te Fatu i roto i tō tātou orara’a ?

• Aupuru i te feiā tei hina’aro i te tauturu. Nāhea tātou e pāturu ai i te tahi ’e te tahi i roto i te mau mea e fa’aruruhia nei e tātou ?

• Ani manihini i te mau ta’ata ato’a ’ia fāri’i i te ’evanelia. Nāhea tātou e nehenehe e fa’a’ohipa maita’i a’e i te mau rāve’a ’āpī ’ei mauha’a nō te fa’a’ite i te ’evanelia ?

• Tāhō’ē i te mau ’utuāfare ē a muri noa atu. E aha tā tātou e rave nei nō te tauturu i tō tātou mau ’utuāfare ’ia haere mai i te Mesia ra ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

I tō te mau ’āti Iuda ho’ira’a mai nā Babulonia, ’itehia mai ’o Ierusalema ’e tōna hiero ’ua hu’ahu’a roa (hi’o 2 Te mau Ari’i 25:1–10 ; 2 Paraleipomeno 36:17–19). ’Ua hina’aro roa te nūna’a ’ia patu fa’ahou i te hiero. Nō reira, e taime poto, ’ua ha’amata rātou i te patu-fa’ahou-ra’a ’e ’ua ’oa’oa iho ra i te otira’a te hiero (hi’o Ezera 3:8–13 ; 6:16–22). I teie mahana, ’ei nūna’a fafauhia nā te Atua, tē patu ato’a nei tātou i te mau hiero ’e tē ’oa’oa nei ho’i ’ia patu-ana’e-hia te hō’ē hiero ’āpī. Nō te aha ? Nō te mea e arata’i te mau ’ōro’a o te hiero i te mau ha’amaita’ira’a rahi a’e a te Metua i te ao ra. E hopoi mai rātou i te mana pae vārua. E horo’a mai rātou i te arata’ira’a ia tātou. ’E e tauturu rātou ia tātou ’ia riro mai te Atua te huru ’e ’ia fāri’i i te mau mea ato’a nāna ra. (Hiʼo Te Parau Ha’api’ira’a ’e te mau Parau Fafau 84:19–22 ; 109:22–26.)

E nāhea ’outou ’ia tauturu i te mau taure’are’a ’ia hina’aro rahi i te hiero mai te mau tamari’i a ’Īserā’ela ? E nāhea ’outou ’ia tauturu ia rātou ’ia ’ā’ataina ma tō rātou ’ā’au ato’a ’ia rave i te mau fafaura’a ’e te Atua i roto i tōna fare mo’a ? ’A fa’aineine ai ’outou nō te ha’api’i, e nehenehe e hi’o i te a’ora’a a te peresideni Thomas S. Monson « Te mau ha’amaita’ira’a o te hiero » (Liahona, Mē 2015) ’e te parau pāpa’i « L’importance des ordonnances et les alliances » i ni’a i te temples.ChurchofJesusChrist.org.

E tauturu te mau ’ōro’a o te hiero ia tātou ’ia riro mai te Atua te huru ’e ’ia fāri’i i te mau mea ato’a nāna ra.

Ha’api’i ’āmui

Nō te tauturu i te mau melo nō te piha ’aore rā nō te pupu autahu’ara’a ’ia tīa’i māite i te mau ha’amaita’ira’a tā rātou e fāri’i nā roto mai i te mau ’ōro’a o te hiero, e nehenehe ’outou e ani ia rātou ’ia tai’o i te Ezera 3:10–13 ; 6:16, 21–22. ’A ani ia rātou ’ia fa’a’ite mai i te mau ta’o ’aore rā, te mau pereota e fa’a’ite nei e aha te mana’o o te mau ’āti Iuda i tahito ra nō ni’a i te patu-fa’ahou-ra’a i tā rātou hiero. Nō te aha te patura’a i te hō’ē hiero e riro ai ’ei tumu nō te fa’ahanahanara’a ? E nāhea tā tātou mau hiero i teie mahana ’e te ’ohipa tā tātou e rave nei i reira i te tauturu ia tātou ’ia ha’afātata atu ā i te Fa’aora ? Teie te tahi atu mau mana’o nō te tauturu i te feiā ’āpī ’ia haro’aro’a i te mau ha’amaita’ira’a tā rātou e fāri’i i roto i te hiero.

• I te ha’amo’ara’a Iosepha Semita i te hiero nō Kirtland, ’ua hōro’a ’oia i te pure ha’amo’ara’a tei ’itehia i roto i Te Parau Ha’api’ira’a ’e te mau Parau Fafau 109. Tē fa’a’ite nei teie pure e rave rahi ha’amaita’ira’a tā tātou e fāri’i nā roto i te mau ’ōro’a o te hiero. E nehenehe te mau melo nō te piha ’aore rā nō te pupu e ’imi i roto i te tahi tuha’a o teie pure, te mau ’īrava 12–26 iho ā rā, i te mau ha’amaita’ira’a i purehia e Iosepha Semita. E nehenehe rātou e tāpura mai i te mau ha’amaita’ira’a i ni’a i te ’iri pāpa’ira’a. ’A ani i te mau taure’are’a ’ia ’āparau nāhea teie mau ha’amaita’ira’a tāta’itahi e ha’apūai ai ia rātou i teienei ’e ananahi. ’A fa’a’ite i tō ’outou ’itera’a pāpū nō te mau ha’amaita’ira’a tei fāri’ihia e ’outou nā roto i te mau ’ōro’a o te hiero.

• ’Ei tauturura’a i te mau melo nō te piha ’aore rā nō te pupu ’ia fa’a’ite mai i tō rātou mau mana’o nō ni’a i te hiero, ’a ani ia rātou ’ia fa’aoti i teie pereota : « ’Ia feruri ana’e au nō te hiero, e tae mai te mana’o… ». E nehenehe ’outou e ani ia rātou ’ia tai’o i nā paratarāfa mātāmua e pae nō te a’ora’a a Elder Kent F. Richards « Te mana nō te huru Atua » (Liahona, Mē 2016). Nō te aha tātou e hina’aro hau atu ai i te hiero i te tahi atu mea ? E aha tā tātou i ha’api’i mai nō ni’a i te mana tā te Atua e hōro’a mai ia tātou nā roto i te mau ’ōro’a o te hiero ? I muri iho, e nehenehe te feiā ’āpī e ’imi i roto i te toe’a o te a’ora’a a Elder Richards, ma te ’imi i te mau ha’amaita’ira’a e tae mai ia tātou nei ’a rave ai tātou i te mau ōro’a o te hiero. ’Aore rā e nehenehe rātou e ’imi i teie mau ha’amaita’ira’a i roto i te a’ora’a a te peresideni Thomas S. Monson, « Te mau ha’amaita’ira’a o te hiero. »

• Nō te tauturu i te mau melo nō te piha ha’api’ira’a ’aore rā, nō te pupu ’ia feruri i te mau tusia tā te tahi mau ta’ata i hina’aro i te rave nō te fāri’i i te mau ha’amaita’ira’a o te hiero, e nehenehe ’outou e fa’a’ite i te video « Temples Are a Beacon [E mōrī te mau hiero] » (ChurchofJesusChrist.org). Nō te aha te ’utuāfare Mou Tham i hina’aro ai e rave i teie mau fa’atusiara’a rahi nō te haere i te hiero ? (’A hi’o Thomas S. Monson, « Te Hiero Mo’a—E Mōrī nō tō te Ao nei », Liahona, Mē 2011, 92.) E aha te mau fa’atusiara’a tei tītauhia ia tātou ’ia rave nō te fāri’i i te mau ha’amaita’ira’a o te hiero ? Penei a’e e nehenehe te tahi ta’ata tei haere i te hiero ’aita i maoro a’e nei, e ’āmui mai i te rurura’a ’e e fa’a’ite mai i tāna ’itera’a. E nehenehe ’outou e ani i te feiā ’āpī ’ia ’imi i roto i te a’ora’a a Elder Ronald A. Rasband « Tu’uhia i te Fatu ra » (Liahona, Novema 2020, 22–25) ’e ’ia fa’a’ite i te mau ha’amaita’ira’a nō te maura’a i te parau fa’ati’a nō te hiero. E nehenehe ato’a ’outou e hi’o ’āmui i te mau uira’a nō te parau fa’ati’a nō te hiero (hi’o Russell M. Nelson, « Parau ’ōpanira’a », Liahona, Novema 2019, 120–22).

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Quentin L. Cook, « Hi’o ia ’outou iho i roto i te hiero », Liahona, Mē 2016, 97–101

Ha’api’ira’a mai tā te Fa’aora

’Ia ha’api’i ’outou, ’eiaha e fa’a’amu’amu noa i te mau parau, ’a tauturu rā i te mau taure’are’a ’ia ’ite i te mau parau mau o te ’evanelia nō rātou iho, i roto i te mau pāpa’ira’a mo’a ’e te mau parau a te mau peropheta » (Ha’api’ira’a mai tā te Fa’aora, 28).