feiā ’āpī e ha’uti ra i rāpae

14 nō ’Ātete

Nāhea vau e nehenehe ai e ’ite i te ’oa’oa nā roto i te pe’era’a i te Fa’aora ?

Salamo 1–2 ; 8 ; 19–33 ; 40 ; 46

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ’a arata’i i te hō’e ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē uira’a i raro nei, ’aore rā hau atu, ’aore rā, tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). ’A fa’anaho i te tahi ’ohipa nō te rave i te mea i tāu’aparauhia.

• Ora i te ’evanelia. Tē nāhea ra tātou i te ’ite i te ’oa’oa nā roto i te pe’era’a i te Iesu Mesia ?

• Aupuru i te feiā tei hina’aro i te tauturu. ’O vai i roto i tā tātou pāroita ’aore rā ’oire e hina’aro nei i tā tātou tauturu ? Nāhea tātou e nehenehe ai e tauturu ia rātou ?

• Ani manihini i te mau ta’ata ato’a ’ia fāri’i i te ’evanelia. Nāhea tātou e nehenehe ai e tauturu i te tahi ’e te tahi ’ia fa’aineine nō te ’ohipa misiōnare ?

• Tāhō’ē i te mau ’utuāfare ē a muri noa atu. Nāhea tātou e pāturu ai i te mau tauto’ora’a a tā tātou pāroita ’ia rave i te ’ā’amu ’utuāfare ’e te ’ohipa hiero ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

E aha te mea e fa’a’oa’oa ia ’outou ? E nehenehe te mau ta’ata e parau ē, e ’itehia ia rātou te ’oa’oa i rotopū i te mau hoa ’e te ’utuāfare, ’aore rā i roto i te tahi ’ohipa au-roa-hia, ’aore rā i te hō’ē mahana ’aita e fifi. ’Ua ha’api’i te peresideni Russell M. Nelson : « Te ’oa’oa e tae mai, ’aore re’a nō te mea e fa’aruruhia nei, pauroa rā nō te mea i ni’a iho e fa’atumuhia ai tō tātou orara’a. Tei ni’a te fa’atumura’a o tō tātou orara’a i ni’a i te fa’anahora’a nō te fa’aorara’a a te Atua ra […] ’e ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a. Nō ’ō mai iāna ’e nōna te ’oa’oa e tae mai ai » (« Te ’oa’oa ’e te oraora pae vārua », Liahona, Novema 2016, 82). E rave rahi o te Salamo e tāvevo ato’a nei i teie parau poro’i : « E riro ’oe i te fa’a’ite mai iā’u i te ’ē’a ora : ’e te ’īra’a o te ’oa’oa i mua i tō aro na » (Salamo16:11).

’A feruri i te tahi o te mau fifi e fa’aruruhia nei e te mau melo nō te piha ’aore rā nō te pupu. Nāhea ’outou i te tauturu ia rātou ’ia māramarama e tae mai te oa’oa mau ’ia fa’a’ohipahia te fa’aro’o i te Fa’aora—i roto ato’a ho’i i te mau tau fifi ? ’A feruri i teie mau uira’a ’a fa’aineine ai ’outou i te ha’api’i i te ta’ata. ’A imi i te mau tuha’a tū’ati e nehenehe e fa’a’ite i te piha ’aore rā i te pupu, i roto i te Salamo ’aore rā, i roto i te a’ora’a a te peresideni Nelson « Te ’oa’oa ’e te oraora pae vārua ».

te piha a te feiā ’āpī tamāroa

E tae mai te ’oa’oa mau maoti te fa’a’ohipara’a i te fa’aro’o i te Fa’aora, noa atu te mau tau fifi.

Ha’api’i ’āmui

E nehenehe e ani i te mau melo nō te piha ’aore rā nō te pupu ’ia hi’o fa’ahou i te tahi o teie mau mea i muri nei : Salamo 1 ; 8 ; 19 ; 23 ; 27. E aha tā tātou e ha’api’i nei i roto i teie mau Salamo nō te mau mea e hōpoi mai ia tātou nei i te ’oa’oa ? I muri iho, e nehenehe ’outou e fa’a’ohipa hō’ē ’aore rā hau atu o teie mau ’ohipa ri’i i muri nei, nō te tauturu i te feiā tā ’outou e ha’api’i nei ’ia hāro’aro’a maita’i a’e ē, e tae mai te ’oa’oa maoti te pe’era’a ia Iesu Mesia.

• ’Ua hina’aro tātou pā’āto’a ’ia ’ite i te ’oa’oa, tītauhia rā ia tātou ’ia māramarama i te mea e horo’a mai i te ’oa’oa mau ’e te mea e arata’i atu i te ’oto. E ani i te feiā ’āpī ’ia fa’a’ite mai i te tahi mau mea ’o tē fa’atae mai i te ’oa’oa ia rātou ’e nō te aha. ’A pāpa’i i ni’a i te ’iri pāpa’ira’a « Tē vai nei te mau ta’ata ’ia noa’a tō rātou ’oa’oa » (2 Nephi 2:25). I muri iho, e ani i te feiā ’āpī, ’ei ta’ata hō’ē ’aore rā, ’ei mau pupu na’ina’i, ’ia hi’o fa’ahou hō’ē o te mau ’īrava, ’aore rā hau atu, i roto i te « Pu’e parau ha’amāramaramara’a » ’e ’ia tāpura i te mea tā rātou i ’ite mai ’o tē arata’i atu i te ’oa’oa. E nehenehe ato’a e fa’a’ite i te video « We Can Find Happiness [E ti’a ia tātou ’ia ’ite i te ’oa’oa] » (ChurchofJesusChrist.org). E aha te tahi mau hi’ora’a nō te ta’ata e tāmata nei i te ’imi i te ’oa’oa, e ’oa’oa rā ’o tē arata’i i te ’oto ? ’Ua nāhea te Fa’aora i te fa’ataera’a mai i te ’oa’oa ia tātou ?

• ’Ua mātau tātou pā’āto’a i te mau ta’ata e fa’aruru nei i te mau fifi noa atu ā tā rātou tāmata-noa-ra’a ’ia ora i te ’evanelia. Nāhea ’outou e tauturu ai i te feiā tā ’outou e ha’api’i ra ’ia fāri’i i te ’oa’oa noa atu ā e mea fifi tō tātou orara’a ? E nehenehe ’outou e ani ia rātou ’ia hi’o fa’ahou i te a’ora’a a te peresideni Russell M. Nelson « Te ’oa’oa ’e te oraora pae vārua » ’aore rā te a’ora’a a te peresideni Steven J. Lund « Te ’itera’a i te oa’oa i roto i te Mesia » (Liahona, Novema 2020, 35–37). E aha te mau hi’ora’a tā tātou e ’ite nei nō te mau ta’ata tei ’ite i te ’oa’oa i roto i te Mesia noa atu tā rātou mau fa’atāfifira’a ? E aha tā tātou e ʼapo mai nei i roto i teie mau hi’ora’a ? E aha te mau ’ohipa i tupu ’o tā tātou e nehenehe e fa’a’ite ?

• E nehenehe tā tātou pā’āto’a e fāri’i i te mau mana’o pe’ape’a ’e te fa’aturumara’a ’a fa’aruru ai i te mau tāmatara’a o te orara’a nei. Nō vetahi, ’ua riro ïa teie mau mana’o ’ei ’arora’a nō te orara’a tā’ātoa. E mea maita’i paha nō tā ’outou piha ’aore rā pupu ’ia ’āparau nō ni’a i teie mau tāmatara’a, ’e e nāhea te Fa’aora e tauturu ai i te feiā e fifi ra i te ahoaho ’e te fa’aturumara’a. Nō te ha’amata i teie parauparaura’a, e nehenehe tā ’outou e ani i te feiā ’āpī ’ia hi’o i te a’ora’a a Elder Jeffrey R. Holland « Mai te ’āu’a i parari ra », te mau paratarāfa hōpe’a e maha iho ā rā (Liahona, Novema 2013, 40–42), ’aore rā te a’ora’a a te tuahine Reyna I. Aburto « I roto i te ata ’e te mahana, e pārahi te Fatu i pīha’i iho iā’u ! » (Liahona, Novema 2019, 57–60). ’A ani i te mau melo nō te piha ’aore rā nō te pupu ’ia ’imi i te mau parau mau tā rātou e tāpe’a mai ’e ’ia fa’a’ite mai i te mea tā rātou i ’ite mai. E fa’aitoito i te feiā ’āpī ’ia paraparau i te hō’ē metua ’aore rā i te hō’ē ta’ata fa’atere tei ti’aturihia ’aore rā, ’ia haere e hi’o mentalhealth.ChurchofJesusChrist.org ’ia mana’o rātou tītauhia te tauturu nō rātou.

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Mataio 5:1–12 ; 1 Petero 4:12–13 ; 2 Nephi 2:25–27 ; Mosia 2:41 ; 3:3–7 ; 4:2–3 ; Alama 36:16–22 ; 4 Nephi 1:15–16 (Nāhea tātou ’ia ’ite i te ’oa’oa)

• D. Todd Christofferson, « Te ’oa’oa o te feiā mo’a », Liahona, Novema 2019, 15–18

• « Suicide Prevention and Ministering [Te āraira’a i te ’ōnohi ’e te tāvinira’a i terā mau ta’ata] », ChurchofJesusChrist.org

Ha’api’ira’a mai tā te Fa’aora

’Ua ’ite te Fa’aora nōna iho i te feiā tāna i ha’api’i—’e ’o vai tā rātou e nehenehe ’ia riro mai. ’Ia fifi ana’e rātou, ’ua tamau noa ’oia i te here ia rātou. Nāhea ’outou e nehenehe ai ’ia fa’a’ite ē tē here nei ’e tē turu nei ’outou i te feiā tā ’outou e ha’api’i ra ?