28 nō ’Ātete

Nāhea te Fa’aora e nehenehe ai e tauturu iā’u i roto i tō’u mau tāmatara’a ?

Salamo 102–103 ; 110 ; 116–119 ; 127–128 ; 135–139 ; 146–150

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ’a arata’i i te hō’e ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē uira’a i raro nei, ’aore rā hau atu, ’aore rā, tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). ’A fa’anaho i te tahi ’ohipa nō te rave i te mea i tāu’aparauhia.

• Ora i te ’evanelia. E aha te mau ’ohipa i tupu a’enei tei ha’afātata ia tātou i te Metua i te ao ra ’e ia Iesu Mesia ?

• Aupuru i te feiā tei hina’aro i te tauturu. ’Ua tae ’āpī mai ānei te tahi ta’ata i roto i tā tātou pāroita ’aore rā ’ua tomo ’āpī mai ānei ? Nāhea tātou e tauturu ai, ’ia ’ite rātou ē tē fāriʼi-poupou-hia nei rātou ?

• Ani manihini i te mau ta’ata ato’a ’ia fāri’i i te ’evanelia. E aha te mau ’ohipa ri’i i ’ōpuahia ’o tā tātou e nehenehe e ani manihini i tō tātou mau hoa ’ia haere mai ?

• Tāhō’ē i te mau ’utuāfare ē a muri noa atu. E aha te mau tauto’ora’a e nehenehe e rave, ’ia tāpa’opa’o tātou i tō tātou iho ’ā’amu ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

Te mau tāmatara’a tā tātou e fa’aruru nei, e nehenehe ïa e fa’arohirohi ia tātou, e fa’atupu i te ’ino’ino, e fa’ati’i, ’e e fa’atīni. ’Ua ta’a i te feiā pāpa’i i te mau Salamo i taua mau mana’o ra ’e ’ua fa’a’ite i te reira ma te pūai : « ’Ua tā’irihia to’u ’ā’au, mai te ’aihere ’ōriorio ra […] tē tīa’i nei au mai te manu iti ’oia ana’e ra i ni’a i te fare » (Salamo 102:4, 7). Nā roto ato’a rā i te mana rahi, ’ua fa’a’ite pāpū rātou ē, nā te fāriura’a i ni’a i te Fa’aora e hōro’a mai i te tāmarūra’a : « E ha’amaita’i atu i te Fatu, e tā’u vārua, ’e ’eiaha te hō’ē maita’i tāna i hōro’a mai ra e ha’amo’ehia ; ’e ’o tei fa’aora i tō ’oe ato’a ra mau ma’i ; ’o tei fa’aora ia ’oe i te pohe ; ’o tei fa’akorona ia ’oe i te hāmani maita’i ’e te aroha » (Salamo 103:2–4).

’A feruri i te mau ha’amaita’ira’a e tae mai i te mau melo nō tā ’outou piha ’aore rā pupu, ’a hāro’aro’a maita’i a’e ai rātou nāhea te Fa’aora e nehenehe ai e tauturu ia rātou i roto i tō rātou mau tāmatara’a. ’Ua nāhea te ’episekōpo i te tauturura’a ia ’outou ? ’A fa’aineine ai ’outou nō te ha’api’i, e nehenehe ’outou e hi’o fa’ahou i te a’ora’a a te peresideni Henry B. Eyring « Tāmatahia, ha’apāpūhia ’e fa’a’ana’anahia » (Liahona, Novema 2020, 96–99).

E tauturu te Fa’aora ia tātou ’e e tāmāhanahana ho’i i roto i tō tātou mau tāmatara’a.

Ha’api’i ’āmui

E nehenehe ’outou e ha’amata nā roto i te anira’a i te mau melo nō te piha ha’api’ira’a ’aore rā nō te pupu ’ia hi’o fa’ahou i te mau Salamo 102, te 103, ’e te 116, ma te ’imi tē nāhea ra te Fa’aora i te tauturu ia tātou i roto i tā tātou mau tauto’ora’a ’ia upo’oti’a i ni’a i te mau tāmatara’a. E nehenehe tā rātou e ’ohipa hō’ē hō’ē ’aore rā ’ei pupu nō te pāpa’i i te tahi mau fa’ahitira’a parau nō ni’a i te mea tā rātou i ’ite mai, ’e ’ia fa’a’ite mai i muri iho i te mea tā rātou i pāpa’i. ’A mā’iti hō’ē o te mau ’ohipara’a i muri nei, ’aore rā hau atu, nō te tauturu i te fa’ahōhonu atu ā i teie tumu parau.

• E mea ti’aoro te mau hīmene purera’a i te Vārua ’e e ha’api’i te reira i te ha’api’ira’a tumu nā roto i te rāve’a pūai mau. E nehenehe e hi’o i te hō’ē hīmene purera’a nō ni’a i te huru tā te Fa’aora e tauturu nei ia tātou i roto i tō tātou mau tāmatara’a, mai te « ’Auē te Pa’ari ’e te aroha » (Te mau hīmene, N°41). E aha tā te hīmene e ha’api’i nei nō ni’a i te huru tauturura’a tā te Fa’aora e nehenehe e hōro’a mai ia tātou ? I muri iho, e nehenehe te feiā ’āpī e tai’o fa’ahou i te mau ’īrava pāpa’ira’a mo’a i roto i te « Pu’e parau ha’amāramaramara’a ». E mea maita’i paha ’ia tāpe’a mai rātou i te hō’ē pereota nō te hīmene ’aore rā hō’ē ’irava pāpa’ira’a mo’a ’o tē fa’aha’amana’o ia rātou ’ia ’imi i te Fa’aora i roto i tō rātou mau tāmatara’a.

• E nehenehe te a’ora’a a te peresideni Henry B. Eyring « Tāmatahia, ha’apāpūhia ’e fa’a’ana’anahia » e tauturu i te feiā tā ’outou e ha’api’i ra ’ia ta’a maita’i a’e i te mau uira’a mai teie i muri nei : E aha te tahi mau fā nō te mau tāmatara’a tāhuti nei ? E nāhea te Fa’aora ’ia tauturu ia tātou i roto i tō tātou mau tāmatara’a ? E aha tā tātou e rave nō te fa’a’ohipa i te tauturu ’e te mana o te Fa’aora ? E nehenehe e pāpa’i i teie mau uira’a i ni’a i te ’iri pāpa’ira’a. E nehenehe te mau melo nō te piha ’aore rā nō te pupu e ’imi i te mau pāhonora’a nō roto mai i te a’ora’a a te peresideni Eyring. ‘Ei hi’ora’a, e aha tā tātou e ha’api’i mai nei nō roto mai i te mau ’ā’amu o te metua vahine o te peresideni Eyring i te ha’amatara’a ’e i te hope’a o te parau poro’i ? E nehenehe ’outou e ani i te ta’ata tāta’itahi ’ia feruri nāhea rātou e nehenehe ai e fa’a’ohipa i te mea tā rātou i ha’api’i mai i roto i tō rātou iho mau tāmatara’a. E hina’aro paha te tahi mau taure’are’a e fa’a’ite mai i tō rātou mau mana’o.

• ’Ua fa’ati’a te tuahine Lisa L. Harkness i te ’ā’amu nō ni’a i te Fa’aora i te tāmarūra’a i te vero nō te ha’api’i ē, e nehenehe tāna e tāmarū i te mau vero i roto i tō tātou orara’a (hi’o Mareko 4:35–41 ; « ’A fa’aea, ’a mania », Liahona, Novema 2020, 80–82). E nehenehe tā ’outou e ani i te tahi melo nō te piha ’aore rā nō te pupu ’ia haere ineine mai nō te fa’a’ite e aha tāna i ha’api’i mai nō ni’a i te Fa’aora i roto i te ā’amu o te pāpa’ira’a mo’a. E nehenehe ato’a teie ta’ata e fa’a’ite i te hō’ē hōho’a (hi’o Buka hōho’a nō te ’evanelia, N°40). I muri iho, e nehenehe te feiā ’āpī e hi’o fa’ahou i te mea tā te tuahine Harkness i ha’api’i mai nāhea te Fa’aora « i roto i tō tātou poti » ’a fa’aruru ai tātou i te mau tāmatara’a. E nehenehe tā ’outou e ani i te mau ta’ata ’ia fa’a’ite mai nāhea te Fa’aora i te tauturura’a ia rātou i roto i tō rātou mau tāmatara’a, ’e tae noa atu e mea nāhea ’oia i te tauturura’a ia rātou nā roto i te tahi atu mau ta’ata. ’A fa’aitoito i te feiā ’āpī ’ia fa’a’ite i tō rātou mau ’itera’a ’e te tahi ta’ata tā rātou i mātau ’o tei hina’aro i te hau o te Fa’aora.

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Isaia 53:3–5 ; Hebera 2:17–18 ; Alama 7:11–13 ; 36:3 ; Etera 12:27 (E tauturu te Fa’aora ia tātou i roto i tō tātou mau tāmatara’a)

• Dieter F. Uchtdorf, « E rave te Atua i te hō’ē mea māere rahi », Liahona, Novema 2020, 51–54

• Cristina B. Franco, « Te mana fa’aora o Iesu Mesia », Liahona, Novema 2020, 60–62

• « Mountains to Climb [Mou’a e ta’uma] » (video), ChurchofJesusChrist.org

Ha’api’ira’a mai tā te Fa’aora

« E nehenehe te uira’a i te mau uira’a ’o tē fa’aitoito i te mau pīahi ’ia fa’a’ite i tō rātou ’itera’a pāpū nō ni’a i te mau parau tumu e ha’api’ihia ra, e riro ’ei rāve’a pūai nō te tītau manihini i te Vārua… E tupu tō rātou mau ’itera’a pāpū i te rahi—’e te mau ’itera’a pāpū o vetahi ’ē i roto i te piha—’a fa’a’ite ai te Vārua i te parau mau » (Ha’api’ira’a mai tā te Faʼaora, 32).