e feiā ’āpī tamāroa e ’ata nei

11 nō Tetepa

Nāhea vau e nehenehe ai e mā ’e e ’oa’oa fa’ahou i muri a’e i tō’u harara’a ?

Isaia 1–12

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ’a arata’i i te hō’e ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē uira’a i raro nei, ’aore rā hau atu, ’aore rā, tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). ’A fa’anaho i te tahi ’ohipa nō te rave i te mea i tāu’aparauhia.

• Ora i te ’evanelia. Nāhea te fāriura’a i ni’a i te Fatu e tauturu ai ia tātou ’ia fa’aruru i te mau tītaura’a ’e te mau tāmatara’a ?

• Aupuru i te feiā tei hina’aro i te tauturu. ’O vai tā tātou i ’ite tei hina’aro i tā tātou mau pure ’e tā tātou auhoara’a ?

• Ani manihini i te mau ta’ata ato’a ’ia fāri’i i te ’evanelia. E aha te mau ’ōpuara’a nō te fa’a’itera’a i te ’evanelia i tuatāpapahia i roto i te mau rurura’a ’āpo’ora’a feiā ’āpī pāroita ? Nāhea tā tātou piha ’aore rā pupu e nehenehe ai e fa’aō i roto i teie mau ’ōpuara’a ?

• Tāhō’ē i te mau ’utuāfare ē a muri noa atu. Nāhea te ravera’a i te ’ohipa ’ā’amu ʼutuāfare e ha’apūai ai i tō tātou aura’a ’e te Metua i te ao ra ’e ia Iesu ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

’Ia tupu ana’e te mana’o fa’ahapa i roto ia tātou ’a hara ai tātou, e mā’itira’a ïa tā tātou. E nehenehe teie mau mana’o, noa atu te māuiui, e riro ’ei ha’amaita’ira’a mai te mea e fa’ahaere mai te reira ia tātou i te tātarahapara’a. Terā rā, te parau mai nei Sātane ia tātou ē, teie mau mana’o, e fa’a’itera’a ïa ’aita te Atua e here nei ia tātou ’e e tāmata ’oia ’ia ha’aparuparu i tō tātou mana’o ’e tō tātou ti’aturira’a. Tē vai ra paha te mau ta’ata tā ’outou e ha’api’i nei ’o tei teimaha i taua huru mana’o ra. E uiui paha rātou ē, e nehenehe ānei tā rātou e mā fa’ahou ’e e ’oa’oa fa’ahou. Nāhea ’outou e tauturu ai ia rātou ’ia ’ite mai i te ti’aturira’a i roto i te tāra’ehara a te Fa’aora ?

’Ua fa’autu’a hua te peropheta Isaia i te ta’ata nō tā rātou mau hara. ’Ua fa’a’ite pāpū ato’a rā ’oia ē, maoti te Fa’aora, « ’ia ’ute’ute roa tā ’outou mau hara ra, e riro ïa mai te hiona » (Isaia 1:18). ’A feruri i te reira ’a tai’o ai ’outou ia Isaia 1–12 i teie hepetoma. E aha te mea e nehenehe e fa’auru i te feiā tā ’outou e ha’api’i ra ’ia fāriu atu i ni’a ia Iesu Mesia ma te fa’aro’o ’ia nehenehe te mau hōpoi’a teimaha nō tā rātou mau hara ’ia fa’aātea-’ē-hia atu ? E nehenehe ato’a ’outou e tuatāpapa i te ’itera’a pāpū o te tuahine Sharon Eubank nō ni’a i te Mesia i roto i tāna parau poro’i « Te Mesia : Te māramarama e ’ana’ana i roto i te pōiri » (Liahona, Mē 2019, 73–76).

piha nō te feiā ’āpī tamāhine

Maoti Iesu Mesia, e nehenehe tā tātou mau hōpoi’a teimaha nō te hara e fa’a’orehia.

Ha’api’i ’āmui

Nō te fa’aineine nō te ’āparaura’a tei patuhia i ni’a ia Isaia 1–12, e nehenehe ’outou e ani i te mau taure’are’a tāta’itahi ’ia ’āfa’i mai i te rurura’a i te tahi tao’a ’ute’ute ’e te tahi tao’a ’uo’uo. E nehenehe ’outou e fa’a’ite’ite i teie mau tao’a ’a tai’o ’āmui ai i te Isaia 1:16–18. I muri iho, e nehenehe te feiā ’āpī e fa’a’ite mai nā roto i tā rātou iho fa’ati’ara’a i te mea tā rātou i ’apo mai i roto i teie mau ’īrava. (Hi’o i te tāu’ara’a parau a te tuahine Sharon Eubank nō te ’īrava 18 i roto « Te Mesia : Te māramarama e ’ana’ana i roto i te pōiri ».) Teie te tahi atu mau ’ohipa e nehenehe e fa’auru i te fa’aro’o i roto i te mana o te Fa’aora ’ia fa’ariro ia tātou ’ei mea mā i te pae vārua.

• E nehenehe te hi’o-fa’ahou-ra’a i te mau hi’ora’a o te tātarahapara’a e tauturu i te feiā tā ’outou e ha’api’i ra e patu i tō rātou fa’aro’o ’e e nehenehe Iesu Mesia e fa’ariro ia rātou ’ei mea mā i te pae vārua. E nehenehe ’outou e pāpa’i i ni’a i te ’iri pāpa’ira’a te mau i’oa mai ia Saulo (i muri mai ’o Paulo), Alama tamaiti, Zeezeroma, ’e te mau Aniti-Nephi-Lehi. E nehenehe ato’a ’outou e pāpa’i e piti pupu fa’ahorora’a pāpa’ira’a mo’a : ’Ohipa 8:3 ; Mosia 27:8–10 ; Alama 11:21–23 ; Alama 17:12–15 (teie mau ta’ata i roto i tā rātou hara) ’e ’Ohipa 9:13–20 ; Alama 36:17–24 ; Alama 15:5–12 ; Alama 23:6–12 (I muri a’e i te fāriura’a teie mau ta’ata i ni’a i te Fa’aora ’e ’ua tātarahapa). E nehenehe te feiā ’āpī e fa’atū’ati i te i’oa tāta’itahi ’e te mau ’īrava pāpa’ira’a mo’a nō ni’a iāna. E aha tā teie mau ta’ata i rave nō te tātarahapa ? E aha tā teie mau fa’ati’ara’a e ha’api’i nei nō ni’a i te hina’aro o te Fa’aora ’ia fa’a’ore i te hapa ? Tē ’ite ra ānei tātou i te tahi mau hōho’a e ti’a ia tātou ’ia pe’e ?

• ’Ei tauturura’a i te feiā tā ’outou e ha’api’i ra ’ia hāro’aro’a maita’i a’e i te fa’a’orera’a hara, e nehenehe tā ’outou e hōro’a i te ta’ata tāta’itahi i te hō’ē ’ā’amu fa’aaura’a ’aore rā, i te parabole nō te tuatāpapa. Tei roto i te reira te tamaiti pūhura (hi’o Luka 15:11–24) ; te Fa’aora ’ei Tia’i māmoe nō tātou (paratarafa 5–8 nō te a’ora’a a Elder Dale G. Renlund « Tō tātou tīa’i māmoe maita’i » [Liahona, Mē 2017, 29–32]) ; ’e te piana ’ino (te ha’amatara’a o te a’ora’a a te tuahine Cristina B. Franco « Te mana fa’aora o Iesu Mesia » [Liahona, Novema 2020, 60–62]). E nehenehe te feiā ’āpī e ha’apoto i te mau fa’aaura’a tāta’itahi ’aore rā te parabole, ’e ’ia ’āparau e aha tā te reira e ha’api’i nei nō ni’a i te here o te Fa’aora ’e te mana tāra’ehara.

• E mea maita’i te mana’o tātarahapa i te hara ’e e arata’i te reira ia tātou i te tātarahapara’a. E ’ere te mana’o ha’aparuparu ’aore rā, te ti’aturi-’ore-ra’a e tupu nō tā tātou mau hara, i te mea tauturu roa ’e e nehenehe te reira e fa’ataupupū i tā tātou tātarahapara’a. E nehenehe te piha ’aore rā te pupu e tai’o ’āmui i te tuha’a « Te ’oto e au i te Atua » i roto i te a’ora’a a te peresideni Dieter F. Uchtdorf « E nehenehe ’outou e rave i teie nei! » (Liahona, Novema 2013, 55–57). E aha te ta’a-’ē-ra’a i rotopū i te ’oto nō te hara ’o tē arata’i atu i te tātarahapara’a, ’e te ’oto ’o tē arata’i atu i te ti’aturi-’ore-ra’a ? (hi’o ato’a 2 Korinetia 7:9–10 ; Moromona 2:12–14). Mai te mea e mana’o hapa ’e te ti’aturi ’ore tō te hō’ē ta’ata nō tāna hara, e aha ïa tā tātou e parau atu nō te tauturu iāna ’ia fāriu atu i ni’a i te Fa’aora ? E ani i te feiā ’āpī ’ia fa’a’ite mai i tō rātou ’itera’a pāpū nō ni’a i te Fa’aora ’e tōna aroha.

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Dallin H. Oaks, « Tāmāhia e te tātarahapa », Liahona, Mē 2019, 91–94

• « Repentance: A Joyful Choice [Te tātarahapa : E mā’itira’a ’oa’oa] » (video), ChurchofJesusChrist.org

Ha’api’ira’a mai tā te Fa’aora

« Nā te ’itera’a pāpū o te Fa’aora iho i hōro’a i te mana i tāna mau parau […] ’A fa’a’ite ai ’outou i tō ’outou ’itera’a pāpū nō ni’a i te ha’api’ira’a tumu mau, e ha’apāpū ïa te Vārua i te parau mau o te ha’api’ira’a tumu i roto i te ’ā’au nō te feiā tā ’outou e ha’api’i ra » (Ha’api’ira’a mai tā te Fa’aora, 21).