11 nō Tītema

Tē tu’u ra ānei au i te mau mea a te Atua nā mua roa i roto i tō’u orara’a ?

Hagai ; Zekaria 1–3 ; 7–14

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ’a arata’i i te hō’e ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē uira’a i raro nei, ’aore rā hau atu, ’aore rā, tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). ’A fa’anaho i te tahi ’ohipa nō te rave i te mea i tāu’aparauhia.

• Ora i te ’evanelia. E aha tā te ’episekōpora’a i paraparau i roto i tā mātou mau rurura’a ’āpo’ora’a feiā ’āpī pāroita ? E aha te mau ’ohipa tā tātou e nehenehe e rave ’ia au i te mau mea i paraparauhia ?

• Aupuru i te feiā tei hina’aro i te tauturu. E nāhea tātou ’ia toro i te rima i te mau ta’ata, mai te Mesia te huru, ’ia ’ite ana’e tātou i te hina’aro ’aita rā i ’ite e aha tē parau atu ?

• Ani manihini i te mau ta’ata ato’a ’ia fāri’i i te ’evanelia. E aha te tahi mea tā tātou i ’ite i roto i te ’evanelia a Iesu Mesia ’o tē fa’atae mai i te ’oa’oa i roto ia tātou ? E nāhea tātou ’ia fa’a’ite i te reira ’oa’oa ia vetahi ’ē ?

• Tāhō’ē i te mau ’utuāfare ē a muri noa atu. E aha tā tātou e rave nei nō te ’imi i te i’oa o te mau tupuna tei tītauhia te mau ’ōro’a o te hiero ? E aha tā tātou e nehenehe e rave nō te tauturu ia vetahi ’ē ’ia ’imi i te i’oa o tō rātou mau tupuna ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

’Ua ’ī te orara’a i te mau mea faufa’a e rave. Mai te mea ’aita tātou e ha’apa’o maita’i, e nehenehe te mau ’ohipa o te orara’a e ha’amo’e ia tātou i te tumu mau o te orara’a. ’Ua ’ite tātou ē, e mea ti’a i te Fa’aora ’e tāna ’evanelia ’ia riro ’ei ’ohipa mātāmua roa nō tātou, terā rā, e nehenehe te tahi atu mau mea e fa’anevaneva ia tātou. Penei a’e nō reira te mau pāpa’ira’a mo’a e a’o nei ia tātou ’ia « ha’amana’o maita’i i te ’ē’a i haerehia e tō ’āvae » (Maseli 4:26), « e ha’amana’o māite na i tō ’outou na mau haere’a » (Hagai 1:5), ’e « e ’imi māite ia ’outou iho i tō ’outou fa’aro’o » (2 Korinetia 13:5).

’Ua tano maita’i te reira parau a’o nō te ’āti ’Īserā’ela e ora ra i te ’anotau o te peropheta Hagai. I roto i tā rātou tauto’ora’a maita’i nō te patu fa’ahou ia Ierusalema, ’ua fa’atāere rātou i te patu-fa’ahou-ra’a i te fare o te Fatu. ’A feruri na nāhea te mau fa’aarara’a a te Fatu i roto ia Hagai 1 e tano ai i tō tātou nei tau. E nāhea ’outou ’ia fa’auru i te feiā tā ’outou e ha’api’i ra ’ia hi’opo’a i tā rātou pūpūra’a ia rātou ’ia tu’u i te mau mea a te Atua nā mua roa i roto i tō rātou orara’a ? E nehenehe ’outou e hi’o fa’ahou i te a’ora’a a Elder Dale G. Renlund « Te fafau-’āueue-’ore-ra’a iāna ia Iesu Mesia » (Liahona, Novema 2019, 22–25) ’aore rā, te mau ha’api’ira’a a te peresideni Ezra Taft Benson i roto « Te ture rahi—here i te Fatu » (i roto i Te Mau Ha’api’ira’a a te Mau Peresideni o te ’Ēkālesia : Ezra Taft Benson [2014], 39–49).

E nehenehe ia tātou ’ia fa’ariro i te mau mea a te Atua ’ei ’ohipa mātāmua roa a’e nō tātou.

Ha’api’i ’āmui

E nehenehe ’outou e ha’amata i te ’āparaura’a nā roto i te pāpa’ira’a i te mau pereota nō roto mai ia Hagai 1:6 i ni’a i te ’iri pāpa’ira’a. E aha tā tātou e nehenehe e ’apo mai nā roto i teie mau mana’o—te ueuera’a i te huero ’aita rā e ’ō’oti, e ’amu ’aita rā e māha, ’aore rā, e ’āpī mai i te moni terā rā, e tu’u atu i roto i te hō’ē pūte ’āpo’opo’o—nō ni’a i te ha’amāu’ara’a i te taime i ni’a i te tahi atu mau mea ’eiaha rā i te mea tā te Fatu e hina’aro ia tātou ’ia rave ? Noa atu ē, ’aita te Fatu e ani mai nei ia tātou ’ia fa’atumu i tō tātou mana’o i ni’a i te patura’a i te hō’ē hiero, e aha rā tāna e ani mai nei ia tātou ’ia fa’atumu atu ? E nāhea tātou e fa’ariro ai i te reira mau mea ’ei ’ohipa mātāmua roa i roto i tō tātou orara’a ? E nehenehe te mau ’ohipara’a i muri nei e tauturu i te feiā ’āpī ’ia hi’opo’a i tā rātou fa’aotira’a ’ia tu’u i te mau mea a te Atua nā mua roa i roto i tō rātou orara’a.

• ’Ua riro te ravera’a i te ’ōro’a mo’a ’ei rāve’a maita’i ’e ’ei rāve’a tāhepetoma nō te hi’opo’a i tā tātou fafaura’a ia Iesu Mesia. E nāhea tātou e fa’a’ohipa ai i te ’ōro’a mo’a nō te hi’o ē tē rahi noa atu ra ānei tātou mai te Fa’aora ra te huru ? Penei a’e e nehenehe te feiā ’āpī e fa’a’ite mai mea nāhea tā rātou ravera’a. E nehenehe ato’a rātou e tāpura mai i te mau uira’a e nehenehe e ui ia rātou iho i te taime nō te ’ōro’a mo’a. ’A ani ia rātou ’ia feruri i ni’a i te hō’ē ’īrava, ’aore rā hau atu, te mau a’ora’a, ’aore rā te tahi atu mau mātēria tauturu i roto i te « Pu’e parau ha’amāramaramara’a » ’a hāmani ai rātou i tā rātou tāpura.

• I roto i tāna a’ora’a, « Te mau mea faufa’a a’e » (Liahona, Novema 2010, 19–22), ’ua hōro’a te peresideni Dieter F. Uchtdorf, i te hō’ē a’ora’a ’o tē nehenehe e tauturu i te feiā ’āpī ’ia « ha’amana’o māite na i [tō rātou] mau haere’a » (Hagai 1:5). E nehenehe tā ’outou e ani i te mau ta’ata ’aore rā, i te mau pupu na’ina’i ’ia tai’o i nā tuha’a hope’a e toru o te a’ora’a (ha’amata ma te tuha’a « Te mana o te mau mea tumu »), ma te ’imi i te aura’a o te parau ra, e fa’atumu i tō tātou orara’a i ni’a i te Fa’aora. E nehenehe rātou e fa’a’ite mai i te tahi mea tei fa’auruhia rātou ’ia rave nō te ha’apūai i tā rātou pūpūra’a ia rātou ia Iesu Mesia.

• E rave rahi o tātou e rohi nei i te rave i te mau mea maita’i. E ’ere noa rā i te mau mea maita’i roa a’e. E nehenehe e fa’a’ite atu i te hō’ē fa’ahitira’a parau nō roto mai i te tuha’a mātāmua o te a’ora’a a te peresideni Dallin H. Oaks « Maita’i, maita’i a’e, maita’i roa a’e » (Liahona, Novema 2007, 104–8) ’o tē tauturu i te feiā ’āpī ’ia hāro’aro’a i teie parau tumu. E nehenehe ato’a ’outou e ani ia rātou ’ia tāpura mai i tā rātou mau ’ohipa i te mau mahana ato’a. E ani ia rātou ’ia hi’opo’a i tā rātou iho mau ’ohipa tāta’itahi, e mea « maita’i » ānei, e mea « maita’i a’e », ’aore rā e mea « maita’i roa a’e ». E aha te mea e fa’ariro i te hō’ē ’ohipa ’ei « mea maita’i a’e » ? E fa’aitoito i te feiā ’āpī ’ia fa’a’ite i te tahi ’e te tahi i te mea tā rātou i ha’api’i mai nā roto mai i teie hi’opo’ara’a iāna iho.

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Iosua 24:14–15 ; Mataio 6:19–34 ; 22:36–40 ; Mareko 10:17–22 ; 1 Korinetia 11:23–28 ; 2 Korinetia 13:5 ; Kolosa 3:1–2 (E tu’u tātou i te mau mea a te Atua i mua roa i roto i t tātou orara’a)

• Scott D. Whiting, « Riro mai iāna te huru », Liahona, Novema 2020, 12–15

Ha’api’ira’a mai tā te Fa’aora

« E’ita e tītauhia ’ia ha’api’i i te tā’āto’ara’a i roto i te ārea o te hō’ē ha’api’ira’a nō te ha’aputapū i te ’ā’au o te ta’ata—te rahira’a o te taime, e nava’i noa hō’ē ’aore rā e piti tumu parau rahi » (Ha’api’ira’a mai tā te Fa’aora, 7).