feiā ’āpī tamāhine e parauparau ra

27 nō Novema

Nāhea vau e nehenehe ai e fa’a’ite i te ’evanelia ?

Iona ; Mika

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ’a arata’i i te hō’e ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē uira’a i raro nei, ’aore rā hau atu, ’aore rā, tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). ’A fa’anaho i te tahi ’ohipa nō te rave i te mea i tāu’aparauhia.

• Ora i te ’evanelia. Nāhea tātou i te ha’afātatara’a i te Fa’aora ? Nāhea tātou e tāmata nei ’ia riro hau atu mai iāna te huru ?

• Aupuru i te feiā tei hina’aro i te tauturu. ’O vai tā tātou i feruri ’aita i maoro a’enei ? Nāhea tātou ’ia tauturu i teie mau ta’ata ?

• Ani manihini i te mau ta’ata ato’a ’ia fāri’i i te ’evanelia. Nāhea tātou e pāhono ai i te mau uira’a a tō tātou mau hoa nō ni’a i te ’Ēkālesia ?

• Tāhō’ē i te mau ’utuāfare ē a muri noa atu. E aha te tahi mau rāve’a e nehenehe ai tātou e fa’atū’ati maita’i a’e i te mau melo o te ’utuāfare, mai te mau metua rū’au ’e te mau fēti’i ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

Tē vai ra paha te mau melo o tā ’outou piha ’aore rā pupu ’o te ’imi tāmau nei i te mau rāve’a nō te fa’a’ite i te ’evanelia. Penei a’e tē rave ato’a ra ’outou i te reira ! Nō te mau ta’ata e rave rahi, e mea fifi ’e e mea taiā ato’a te fa’a’itera’a i te ’evanelia. ’Aua’a a’e rā, e nehenehe tātou pā’āto’a e ha’amaita’i ia tātou i te fa’a’itera’a i tō tātou fa’aro’o ia Iesu Mesia. E’ita paha ’outou e fa’aro’o tari’a i te reo o te Fatu i te fa’auera’a ia ’outou ’ia rave i te tahi ’ohipa mai te parau e « haere i te ’oire rahi ra i Nineve, ’a ti’aoro atu », mai ia Iona te huru (Iona 1:2). E nehenehe rā te reo marū o te Vārua Maita’i e fa’auru ia ’outou ’ia « haere i » te mau melo o te ’utuāfare ’e te mau hoa tei fa’aineinehia nō tē fa’aro’o i tō ’outou ’itera’a pāpū. ’Ia vai matara noa i te mea tā ’outou e nehenehe ’e ’apo mai i roto i te ’ohipa i tupu i ni’a ia Iona ’a tuatāpapa ai ’outou i te reira i teie hepetoma, ’e ’a fa’aineine ia ’outou iho ’ia fa’a’ite i te mea tā ’outou i ha’api’i mai i te feiā tā ’outou ’e ha’api’i ra. E nehenehe ato’a ’outou e tai’o i te a’ora’a a Elder D. Todd Christofferson « Fa’a’ite i te poro’i nō te Fa’aho’i-fa’ahou-ra’a ’e te Ti’afa’ahoura’a » ’a fa’aineine ai ’outou i te ha’api’i (Liahona, Mē 2020, 110–13).

tamāroa ’āpī e tuatāpapa ra i te mau pāpa’ira’a mo’a

E nehenehe te Vārua Maita’i e fa’auru ia tātou ’ia fa’a’ite i te ’evanelia i te feiā tei ineine i te fa’aro’o i tō tātou ’itera’a pāpū.

Ha’api’i ’āmui

’Ei tauturura’a i te feiā tā ’outou e ha’api’i ra ’ia fa’a’ite mai i tō rātou mana’o nō tā rātou tuatāpapara’a ia Iona i teie hepetoma, e nehenehe tā ’outou e fa’a’ite i te hōho’a nō Iona (hi’o te arata’i ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare). E ani ia rātou ’ia ’āparau e aha tā rātou i ha’api’i mai nō ni’a i te fa’a’itera’a i te ’evanelia nā roto mai i te mau ’ohipa i tupu nō Iona. E nehenehe tā ’outou ’e ani ia rātou ’ia hi’o fa’ahou ia Iona 1 ’e te 3 ’e ’ia ui : E aha tā tātou e ha’api’i nei nō ni’a i te fa’a’itera’a i te ’evanelia i te feiā tei ’ore paha i ineine nō te taui ? E aha tā tātou e ha’api’i nei nō ni’a i te hina’aro o te Atua ’ia fa’a’ore i te hapa a te feiā e tātarahapa nei ? Nō tē fa’auru i te mau melo o tā ’outou piha ’aore rā pupu ’ia fa’a’ite i te ’evanelia, ’a fa’a’ohipa i te hō’ē ’ohipara’a i muri nei, ’aore rā hau atu, ’aore rā, ’a feruri i tā ’outou iho ’ohipara’a.

• Nō te tahi mana’o nō ni’a i te fa’a’itera’a i te ’evanelia a te Fa’aora ia vetahi ’ē, e nehenehe tā ’outou piha ’aore rā pupu e hi’o i teie mau ’ā’amu i muri nei i roto i te mau pāpa’ira’a mo’a : Ioane 4:3–26 ; Te Mau ’Ohipa 16:25–33 ; Alama 19:14–18, 28–31. I muri iho, e nehenehe ’outou e tāu’aparau ’āmui i te mau uira’a mai teie : E mea nāhea tō te mau ta’ata i roto i teie mau ’ā’amu fa’aineinera’ahia nō te fa’aro’o i te parau poro’i o te ’evanelia ? E aha tā ’outou e ’ite ra nō ni’a i te huru te parau poro’i i te fa’a’itera’ahia mai ? I tō ’outou mana’o, nō te aha te Metua i te ao ra ’e Iesu Mesia e hina’aro nei ia tātou ’ia fa’a’ite i te ’evanelia ? I muri iho, e nehenehe ’outou e ’āparau ’ei piha ’aore rā ’ei pupu i te mea tā teie mau ’ā’amu e ha’api’i nei ia tātou nō ni’a i te huru e nehenehe ai ia tātou ’ia fa’a’ite i te ’evanelia i teie mahana.

• E nehenehe te tai’ora’a i te mau hi’ora’a fa’auru a vetahi ’ē i te fa’a’itera’a i te ’evanelia, e fa’aitoito i te feiā ’āpī ’o tā ’outou e ha’api’i ra ’ia rave ato’a i te reira. ’Ua fa’a’ite mai ’o Elder D. Todd Christofferson i te tahi mau hi’ora’a i roto i tāna a’ora’a « Fa’a’ite i te poro’i nō te Fa’aho’i-fa’ahou-ra’a ’e te Ti’afa’ahoura’a ». I roto i teie a’ora’a, ’ua ha’api’i mai ’o Elder Christofferson ē, e toru mea e tītauhia nō te fa’ariro i tā tātou mau anira’a manihini ’ia fāri’i i te ’evanelia ’ei anira’a pūai : tō tātou here, tō tātou hi’ora’a, ’e tā tātou fa’a’ohipara’a i te Buka a Moromona. ’A ’āparau nō ni’a i te mau hi’ora’a fa’a’itera’a ’evanelia i roto i teie a’ora’a, ’e ’a ani i te feiā tā ’outou e ha’api’i ra ’ia fa’a’ite mai i te tahi atu mau hi’ora’a, ’e tae noa atu i tō rātou iho. E nāhea teie mau ’itera’a i te fa’a’ite i nā mea e toru tei ha’api’ihia e Elder Christofferson ?

• Nāhea ’outou e nehenehe ai e tauturu i te feiā tā ’outou e ha’api’i ra ’ia māramarama ē e nehenehe te fa’a’itera’a i te ’evanelia ’ia riro ’ei mea ’ōhie, ’aita e taiāra’a ? E nehenehe ’outou e fa’a’ite i te mau video i roto i te « Pu’e parau ha’amāramaramara’a » ’e e ani i te mau feiā ’āpī ’ia feruri i te huru e ti’a ai ia rātou ’ia fa’a’ite i te ’evanelia i te tahi ta’ata tā rātou i mātau. E aha tā tātou e nehenehe e rave nō te anira’a ia rātou ’ia haere mai e hi’o ? E aha tā mau rāve’a nō te haere mai e tauturu ? Nāhea tātou e tauturu ai i te fa’atupura’a i te hina’aro ’ia haere mai ’e ’ia fa’aea mai ? Nāhea tātou e fa’ariro ai i te fa’a’itera’a i te ’evanelia ’ei tuha’a nō tō tātou orara’a i te mau mahana ato’a ?

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Carlos A. Godoy, « E mea ti’aturi au i te mau melahi », Liahona, Novema 2020, 86–88

• « Sharing the Gospel [Fa’a’ite i te ’evanelia] », « Sharing the Gospel’ [Ani ia vetahi ’ia ‘Haere mai e hi’o’] », « Inviting Others to ‘Come and Stay’ [Ani ia vetahi ’ia ‘Haere mai e tauturu’] », « Inviting Others to ‘Come and Stay’ [Ani ia vetahi ’ia ‘Haere mai ’e ’ia fa’aea mai’] » (video), ChurchofJesusChrist.org ; e nehenehe ’outou e ’ite mai i te tahi atu mātēria i roto i te « Sharing the Gospel [Fa’a’ite i te ’evanelia] », i roto i te Vaira’a buka ’evanelia

Ha’api’ira’a mai tā te Fa’aora

« E hina’aro te mau ta’ata e rave i te mau tauira’a faufa’a rahi i roto i tō rātou orara’a mai te peu nō rātou iho taua hina’aro ra ’ia rave. ’Ia fa’atae ana’e ’outou i te mau anira’a ’ia ’ohipa, ’a ha’apāpū ē tē fa’atura ra ’outou i te ti’amāra’a o te mau pīahi » (Ha’api’ira’a mai tā te Fa’aora, 35).