piha nō te feiā ’āpī tamāhine

13 nō Novema

Nāhea vau e nehenehe ai e fāri’i i te nīni’ira’a o te Vārua o te Fatu ?

Hosea 1–6 ; 10–14 ; Ioela

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ’a arata’i i te hō’e ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē uira’a i raro nei, ’aore rā hau atu, ’aore rā, tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). ’A fa’anaho i te tahi ’ohipa nō te rave i te mea i tāu’aparauhia.

• Ora i te ’evanelia. E aha te mau ’ohipa a’enei tei ha’apūai i tō tātou ’itera’a pāpū ?

• Aupuru i te feiā tei hina’aro i te tauturu. ’O vai tē hina’aro i tā tātou tauturu ’e te mau pure ? E aha tā tātou fa’aurura’a e fāri’i nei nō te tauturu ia rātou ?

• Ani manihini i te mau ta’ata ato’a ’ia fāri’i i te ’evanelia. Nāhea tātou e nehenehe ai e riro ’ei māramarama nō te mau melo o te ’utuāfare ’aore rā, nō te mau hoa e ’ere hō’ē ā tō tātou mau ti’aturira’a ?

• Tāhō’ē i te mau ’utuāfare ē a muri noa atu. Nāhea tātou e nehenehe ai e fa’a’ite rahi atu ā i te here ’e te pāturura’a i tō tātou mau ’utuāfare ’e e fa’atupu i te maita’i ta’a ’ē i roto i tō tātou mau ’utuāfare ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

Mea pāpū maita’i, tē ora nei tātou i roto i te hō’ē tau pāpū ’ore ’e te mata’u. Teie te mau parau a te peropheta Ioela nō te Faufa’a Tahito nō ni’a i tō tātou ’anotau—te « mahana o te Fatu »—mai « te hō’ē mahana pōuri ’e te rumaruma » ’e « te rahi ’e te ri’ari’a rahi » (Ioela 2:1–2, 11). E ’ere rā i te parau ē, ’aita tō tātou e rāve’a i teie mahana. ’A feruri i teie parau fafau a Elder Dieter F. Uchtdorf : « Noa atu ā e mau taime e mana’o tātou ē, ’ua po’ihia tātou i raro a’e i te mau fifi o te orara’a, ’aore rā, ’ua ha’a’atihia i te manava pōiri, e fa’atae mai te here o te Atua ’e te mau ha’amaita’ira’a a te ’evanelia a Iesu Mesia i fa’aho’ihia, i te hō’ē mea māere rahi ’ia pata mai » (« E rave te Atua i te hō’ē mea māere rahi », Liahona, Novema 2020, 52).

Nō reira, ’ia ’ite ana’e ’outou i te pōiri ’e te rumaruma o tō tātou ’anotau, ’a ha’amana’o ē, ’ua fafau rahi ato’a mai te Fatu i te mau ha’amaita’ira’a rahi—’e te mana’o-’ore-hia ato’a ho’i : « E nīni’i atu ai au i tā’u vārua i ni’a i te ta’ata ato’a ; e tohu ho’i tā ’outou mau tamari’i tamāroa ’e te mau tamāhine » (Ioela 2:28 ; hi’o ato’a Iosepha Semita—’Ā’amu 1:41). ’A hi’o maita’i i te fafaura’a ta’a ’ē ē, e nīni’ihia te Vārua o te Atua i ni’a i te feiā ’āpī tamāroa ’e te feiā āpī tamāhine. I tō ’outou mana’o, nō te aha e mea faufa’a nō te feiā tā ’outou e ha’api’i ra ’ia māramarama maita’i i te reira ? ’A feruri i teie uira’a ’a tai’o ai i te Ioela 2 ’e te a’ora’a a Elder Uchtdorf i roto i tā ’oe fa’aineinera’a nō te ha’api’i.

tamāroa ’āpī e tuatāpapa ra i te mau pāpa’ira’a mo’a

’Ua fafau mai te Fatu ē, i te mau mahana hope’a nei, e nīni’i mai ’oia i tōna Vārua, ’e « e tohu ho’i tā ’outou mau tamari’i tamāroa ’e te mau tamāhine » (Ioela 2:28).

Ha’api’i ’āmui

’Ei tauturura’a i te feiā tā ’outou e ha’api’i ra ’ia ta’a maita’i a’e i te Ioela 2:28–29, e nehenehe ’outou e tu’u i te tahi tao’a i roto i te hō’ē ’āu’a ’e ’ia mani’i mai te tahi ta’ata i te pape i ni’a iho i te tao’a. E nāhea te reira i te tauturu ia tātou ’ia māramarama i te aura’a nō te Fatu ’ia « nīni’i mai [i tōna] vārua i ni’a i te ta’ata ato’a » ? Tē nāhea ra te mau parau tohu i roto ia Ioela 2:28–29 i te tupu ? Teie te tahi mau mana’o ’o tē nehenehe e tauturu i te feiā ’āpī ’ia hāro’aro’a maita’i a’e i te huru tā te Fatu ’ia nīni’i i tōna Vārua i teie ’anotau.

• Tē fa’a’ite ra te mau pāpa’ira’a mo’a e rave rahi taime tō te Fatu nīni’ira’a i tōna Vārua i ni’a i tōna mau ta’ata. E nehenehe te hi’o-fa’ahou-ra’a i te tahi o teie mau taime e tauturu i te feiā ’āpī ’ia māramarama maita’i a’e e nāhea rātou ’ia fāri’i i te nīni’ira’a a te Vārua o te Atua i roto i tō rātou orara’a. E nehenehe e pāpa’i i ni’a i te ’iri pāpa’ira’a i te hōho’a o te hō’ē pita rahi e māni’i ra i te pape, ’e ’a ani i te mau ta’ata ’aore rā te mau pupu na’ina’i ’ia tai’o hō’ē ’īrava pāpa’ira’a mo’a, ’aore rā hau atu, i roto i te « Pu’e parau ha’amāramaramara’a ». E nehenehe rātou e pāpa’i i ni’a i te ’iri pāpa’ira’a nā te hiti i te pita i te ’ohipa tā te mau ta’ata i roto i tā rātou ’īrava pāpa’ira’a mo’a i rave, ’ia ti’a i te Fatu ’ia nīni’i mai i tāna Vārua ’e e aha te mau ha’amaita’ira’a nō muri mai. I nāfea tātou i te ’itera’a i te Vārua i te tāmāhanahanara’a ia tātou, i te arata’ira’a ’aore rā i te tāmāra’a ?

• E nehenehe ’outou e pāpa’i i teie mau parau a Elder Dieter F. Uchtdorf i ni’a i te ’iri pāpa’ira’a : « E ’ohipa māere rahi tā te Atua nō ’outou tāta’itahi ’e nō te ’Ēkālesia ’āmui—e ’ohipa ’umerehia ’e te māerehia » (« E rave te Atua i te hō’ē mea māere rahi », 53). E nehenehe e ani i te feiā ’āpī ’ia hi’o i roto i te a’ora’a a Elder Uchtdorf i te mau ha’amaita’ira’a māere rahi tā te Atua i hōro’a i te mau ta’ata i roto i te mau pāpa’ira’a mo’a i muri mai i te mau taime fifi. E aha tā Elder Uchtdorf i ha’api’i mai ia tātou ’ia rave nō te mā’iti i te fa’aotira’a tano ’ia fa’aruru ana’e tātou i te fifi ? ’A ani i te feiā ’āpī ’ia tāpura mai i te mau mea « māerehia » tā te Atua e mana’o ra nō tātou. ’A ani i te feiā tā ’outou e ha’api’i ra ’ia feruri e aha tā rātou e hina’aro ’ia rave nō te fāri’i i teie mau ha’amaita’ira’a.

• E nehenehe e fa’a’ite i te video « President Nelson: Hear Him—Personal Revelation [Peresideni Nelson : ’A fa’aro’o iāna—Heheura’a nā te ta’ata iho] » (ChurchofJesusChrist.org). ’A ani i te feiā ’āpī ’ia fa’aro’o ’e ’ia ’apo mai i te mau rāve’a nā te Vārua nō te paraparau mai ia tātou ’e nō te ha’amaita’i i tō tātou orara’a. E nehenehe ato’a rātou e hi’o fa’ahou i te a’ora’a a te peresideni Russell M. Nelson, « Heheura’a nō te ’Ēkālesia, heheura’a nō tō tātou orara’a » (Liahona, Mē 2018, 93–96). ’A ani ia rātou ’ia ’imi i te mau pāhonora’a i te mau uira’a mai teie : ’Ua nāhea te peresideni Nelson i te ’imira’a ’e i te fāri’ira’a i te mau muhumuhu a te Vārua ? E aha tā tātou e ha’api’i mai nei nā roto ia Iosepha Semita nō ni’a i te hina’aro o te Atua ’ia paraparau i tāna mau tamari’i ? E aha tā te peresideni Nelson i fa’aitoito ia tātou ’ia rave ? ’A fa’a’ite i te feiā ’āpī i te hō’ē taime ’a ’ite ai ’outou i te Fatu i te nīni’ira’a mai i tōna Vārua. ’A ani ia rātou ’ia feruri i te mau ’itera’a tei roa’a ia rātou ’e, e au ānei ia rātou, ’ia fa’a’ite mai i te reira.

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Te Mau ’Ohipa 2:1–6, 14–21 ; Iakoba 7:1–8 ; Mosia 4:1–3, 19–20 ; 18:7–11 ; Alama 19:14, 28–36 ; Helamana 6:34–36 ; Te Parau Ha’api’ira’a ’e te mau Parau Fafau 19:37–41

Ha’api’ira’a mai tā te Fa’aora

« Ta’a ’ē noa atu te tauturura’a i te mau pīahi ’ia fāri’i ’e ’ia ’ite i te Vārua, ’a tauturu ia rātou ’ia ha’a mai te au i te mau muhumuhu tā rātou e fāri’i » (Ha’api’ira’a mai tā te Fa’aora, 10).