tuatāpapara’a pāpa’ira’a mo’a a te ’utuāfare

23 nō ’Ātopa

’Ua pāpa’ihia ānei te ’Evanelia i roto i tō’u ’ā’au ?

Ieremia 30–33 ; 36 ; Te ’Oto o Ieremia ra 1 ; 3

ītona tāu’aparau ʼāmui

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ’a arata’i i te hō’e ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē uira’a i raro nei, ’aore rā hau atu, ’aore rā, tā ’outou iho mau uira’a (hi’o Buka arata’i rahi, 10.2, 11.2, ChurchofJesusChrist.org). ’A fa’anaho i te tahi ’ohipa nō te rave i te mea i tāu’aparauhia.

• Ora i te ’evanelia. E aha tā tātou i ’āparau i te taime i ma’iri a’e nei, ’e e aha te mau anira’a ’aore rā te mau fa’auera’a ’ohipa i ravehia ? E aha tā tātou i rave nō te ’ohipa i ni’a i teie mau anira’a ’aore rā fa’auera’a ’ohipa ?

• Aupuru i te feiā tei hina’aro i te tauturu. E aha tā tātou e nehenehe e rave ’aore rā, e parau atu nō te toro atu i te rima i te feiā e mana’o mo’emo’e ’e te ātea i te Metua i te ao ra ?

• Ani manihini i te mau ta’ata ato’a ’ia fāri’i i te ’evanelia. E aha te tahi mau rāve’a e nehenehe ai tātou e tauturu ia vetahi ’ē ’ia ’ite i te here o Iesu Mesia ?

• Tāhō’ē i te mau ’utuāfare ē a muri noa atu. E aha te mau manaʼo tā tātou e faʼaʼite i te tahi ʼe te tahi e ha’apūai ai i tō tātou mau ’utuāfare ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

’Ua parau te Fatu i te peropheta Ieremia ē, i te mau mahana i muri nei, e ha’aputuputu ’oia ia ’Īserā’ela ’e e rave ’oia i te hō’ē « fafaura’a ’āpī » ’e tōna mau ta’ata. ’Ua parau ’oia : « E tu’u vau i tā’u ture i roto ia rātou, e pāpa’i au i te reira i roto i tō rātou ’ā’au ; ’e e riro vau ’ei Atua nō rātou, ’e ’ei ta’ata ho’i rātou nō’u » (hi’o Ieremia 31:31–34). Teie taua mau mahana ra, ’e e nūna’a tātou nō te Atua. E nehenehe teie mau ha’api’ira’a e muhumuhu ia ’outou—’e i te feiā tā ’outou e ha’api’i ra—’ia ui, e aha te aura’a o te ’evanelia tei pāpa’ihia i roto i tō’u ’ā’au ? ’Ua pāpa’ihia ānei te ’evanelia i roto i tō’u ’ā’au ? Mai te mea ’aita, e aha ïa tā’u e nehenehe e rave ’ia nā reira ?

’A feruri e nāhea ’outou ’ia tauturu i te mau melo nō te piha ’aore rā nō te pupu ’ia feruri i teie mau uira’a nō rātou iho. Nō te fa’aineine nō te ha’api’i, e ’itehia ia ’outou te mau poro’i nō te fa’a’ite atu i roto ia Ieremia 30–33 ; 36 ; nō roto mai i te a’ora’a a te peresideni Russell M. Nelson « ’A vaiiho i te Atua ’ia upo’oti’a » (Liahona, Novema 2020, 92–95) ; ’e nō roto mai i te a’ora’a a Elder D. Todd Christofferson « ’E ’ia fa’afāriuhia mai ’oe ra » (Liahona, Mē 2004, 11–13).

tamāhine e tuatāpapa ra i te mau pāpa’ira’a mo’a

’A here ai tātou i te Fatu ’e ’a ’imi ai tātou ’ia ’apo mai mai roto mai iāna, e pāpa’ihia te ’evanelia i roto i tō tātou ’ā’au.

Ha’api’i ’āmui

Fa’aitoito i te feiā ’āpī ’ia ’āparau nō ni’a ia Ieremia 31:31–34. Nō te rave i te reira, e nehenehe ’outou e hōro’a ia rātou i te mau māfatu pāpie ma te mau uira’a e rave rahi i ni’a iho nō ni’a i te aura’a o te parau, te ’evanelia i roto i tō tātou ’ā’au, mai tei ’itehia i roto i te « Fa’aineine ia ’outou iho i te pae vārua ». E nehenehe te feiā ’āpī e ’ohipa ta’ata hō’ē, ’āpitipiti, ’aore rā ’ei pupu na’ina’i, ’a tai’o ai i teie mau ’īrava nō roto ia Ieremia ’e ’a feruri ai nāhea rātou e pāhono ai i te mau uira’a. ’A vaiiho ia rātou ’ia fa’a’ite mai i te mau uira’a ’e te mau pāhonora’a i ferurihia e rātou. Teie i raro nei te tahi atu ā mau mana’o ’o tē nehenehe e tauturu ia ’outou ’ia ha’api’i i te feiā ’āpī nāhea te ’evanelia e pāpa’ihia ai i roto i tō rātou ’ā’au.

• I tō Mose hōro’ara’a i te tahi o tāna mau ha’api’ira’a hope’a i te ’āti ’īserā’ela, ’ua fa’aitoito ’oia ia rātou ’ia fāri’i i te mau parau a te Atua i roto i tō rātou ’ā’au. ’Ua ha’api’i ato’a ’oia ia rātou i te tahi mau rāve’a e ti’a ai ia rātou ’ia rave i te reira, mai tei ’itehia i roto i te Deuteronomi 6:3–9. ’Ei piha ’aore rā ’ei pupu, ’a tai’o ’āmui i teie mau ’īrava ’e ’a ’āparau i te mau huru rāve’a nō te rave i te mea tā Mose i a’o. Nō te tahi mau mana’o, e nehenehe tā ’outou piha ’aore rā pupu e māta’ita’i i te video « Come, Follow Me : These Words[Mai, pe’e mai : Teie nau parau] » (ChurchofJesusChrist.org). E nehenehe ato’a rātou e tuatāpapa i te Alama 5:14, 26–35 nō te ’imi e aha tā Alama i ha’api’i nō ni’a i te huru e vai-pāpa’i-hia ai te ’evanelia i roto i tō tātou ’ā’au.

• I roto i tāna a’ora’a « ’E ’ia fa’afāriuhia mai ’oe ra », ’ua fa’ata’a mai Elder D. Todd Christofferson e aha tā tātou e nehenehe e rave nō te pāpa’i i te ’evanelia i roto i tō tātou ’ā’au. E aha te ha’api’ira’a tā tātou e ’apo mai i roto i nā paratarāfa mātāmua e maha, e aha te aura’a ’ia pāpa’ihia te ’evanelia i roto i tō tātou ’ā’au ? E nehenehe tā ’outou e ani i te feiā ’āpī tāta’itahi ’ia tai’o hō’ē o te mau paratarāfa e toe ra, ’aore rā hau atu, ’e ’ia ’imi e aha tei tītauhia ia tātou ’ia rave ’ia tupu te reira. E aha ïa tā te Fa’aora ’ohipa i roto i te reira ? E aha tā tātou ’ohiopa i roto i te reira ? E fa’aitoito i te feiā ’āpī ’ia fa’a’ite mai i tā rātou mau pāhonora’a, ’e tae noa atu i te mau mana’o tei ’itehia ia rātou. E aha te mau ’ohipa tei tupu ’o tei tauturu ia tātou ’ia pāpa’ihia te ’evanelia i roto i tō tātou ’ā’au ? E aha tā te ha’apa’ora’a i tā tātou mau fafaura’a e fa’atupu i roto i teie fa’anahora’a ?

• ’Ua fa’ata’a mai te peresideni Russell M. Nelson i te ta’o ra ’Īserā’ela « e parau ïa nō te hō’ē ta’ata ’o tē hina’aro ’ia vaiiho i te Atua ’ia upo’oti’a i roto i tōna orara’a » (« ’A vaiiho i te Atua ’ia upo’oti’a », 92). E nehenehe tā ’outou e ani i te feiā ’āpī ’ia ’imi i roto i nā paratarāfa mātāmua e ono o te a’ora’a a te peresideni Nelson ’e i te tuha’a hope’a ato’a, ha’amata i te parau « Te uira’a nō tātou tāta’itahi ». ’E ani ia rātou ’ia ’imi i te tahi mea ’o tē tauturu ia rātou ’ia māramarama e aha te aura’a o te parau « vaiiho i te Atua ’ia upo’oti’a » i roto i tō rātou orara’a. E aha tā tātou e fāri’i ’e e rave ’ia upo’oti’a ana’e te Atua i roto i tō tātou orara’a ? E aha tā te peresideni Nelson i ha’api’i mai nō ni’a i tā te pāpa’ira’ahia te ’evanelia i roto i tō tātou ’ā’au e fa’atupu i ni’a i tā tātou mau tauto’ora’a ha’aputuputura’a ia ’Īserā’ela ?

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Henry B. Eyring, « Write upon My Heart » (Liahona, Novema 2000, 85–87)

• Linda K. Burton, « Te fa’aro’o i te tāra’ehara a Iesu Mesia, ’ua pāpa’ihia ānei i roto i tō tātou ’ā’au ? » (Liahona, Novema 2012, 111–15)

Ha’api’ira’a mai tā te Fa’aora

« E mana tō te ha’api’ira’a tumu i roto i te mau pāpa’ira’a mo’a ’e i roto i te mau parau a te mau peropheta nō te mau mahana hope’a nei nō te taui i te mau ’ā’au ’e nō te fa’arahi i te fa’aro’o. ’A tāmata ai ’outou ’e te mau pīahi i ‘te mana o te parau a te Atua’, e ’ite ’outou ē ‘e arata’i te reira i te ta’ata ’ia rave i te ’ohipa ti’a’ (Alama 31:5) » (Ha’api’ira’a mai tā te Fa’aora, 5).