9 nō ’Ātopa

Nō te aha ’ei pū Iesu Mesia nō tō’u orara’a ?

Isaia 58-66

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā, te Parau tai’o a te pupu Autahu’ara’a a Aarona. I muri iho, ta’a ’ē atu te ’āparaura’a nō ni’a i te ’ohipa ta’a ’ē a te piha ’aore rā, a te pupu, e hina’aro paha ’outou e ’āparau i te mau mana’o tei tae mai, ’e te mau tumu parau nō roto mai i te ’āmuira’a rahi. E tauturu te mau uira’a i muri nei.

• E aha te mau tumu parau ’aore rā, te mau parau poro’i tei ha’aputapū ia tātou ? E aha te mea i ha’apūai i tō tātou fa’aro’o ia Iesu Mesia ?

• E aha te mea i ha’apūai i tō tātou ’itera’a pāpū i te mau peropheta ora ? E aha tei muhumuhuhia mai ’ia rave nā roto i te mea tā tātou i ha’api’i mai ’aore rā tā tātou i putapū ?

• E aha te mea tei tītauhia ia tātou ’ia rave ’ei piha ’aore rā, ’ei pupu, nō te fa’a’ohipa i te parau a’o tā tātou i fa’aro’o i te ’āmuira’a rahi ?

I te hope’a o te ha’api’ira’a, mai te mea e tano, e rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’ahamana’o i te mau melo nō te piha ’e nō te pupu nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē ti’a fa’atere pa’ari ’aore rā taure’are’a ; 25–35 minuti

Fa’aineine ia ’outou iho i te pae vārua

« E ’oa’oa roa vau ia Iehova, e ’ōu’au’a noa tā’u vārua i te ’oa’oa i tā’u Atua », tē nā reira ra ’o Isaia, « i fa’a’ahu mai ’oia iā’u i te ’ahu ra i te ora, ’e ’ua tāpo’i ’oia iā’u i te ’ahu pū ra i te parauti’a » (Isaia 61:10). Nō te aha ’outou « e ’oa’oa roa [ai] ia Iehova » ? Mai ia Isaia, tē ’ite nei tātou i te mea tā te Fatu i rave nō tātou, tē ’oa’oa nei tātou, ’e tē tāmau nei ho’i ’ia parau nō te « aroha o Iehova, ’e te ha’amaita’i ia Iehova » (Isaia 63:7).

E aha te mana’o o te mau feiā tā ’outou e ha’api’i nei nō ni’a i te Fa’aora ? E aha te mea e tauturu ai ia rātou ’ia ’ite i te here rahi a’e ’e te tura rahi a’e iāna ? E aha te mea e tauturu ai ia rātou ’ia fāri’i i tōna here ? ’A feruri ai ’outou i teie mau uira’a ’e ’a tai’o ai i te Isaia 58–66, e nehenehe ato’a ’outou e hi’o fa’ahou i te a’ora’a a Elder Matthew S. Holland « Te hōro’a maita’i roa a te Tamaiti » (Liahona, Novema 2020, 45–47) ’e te a’ora’a a te tuahine Cristina B. Franco « Te mana fa’aora o Iesu Mesia » (Liahona, Novema 2020, 60–62).

’A ha’api’i rahi atu ā ai tātou i te parau a te Fa’aora, e fa’auruhia tātou ’ia fa’ariro iāna ’ei pū nō tō tātou orara’a.

Ha’api’i ’āmui

’A ha’api’i mai ai te mau melo nō te piha ’aore rā nō te pupu i te misiōni i tonohia mai ai Iesu Mesia, e fa’auruhia rātou ’ia fa’ariro i te Fa’aora ’ei pū nō tō rātou orara’a. Penei a’e e nehenehe tā tātou e ’imi i roto ia Isaia 61:1–3 ’e ’ia tāpura i ni’a i te ’iri pāpa’ira’a i te mau ’ohipa tā te Fa’aora i fa’atāhinuhia ’ia rave (hi’o ato’a Luka 4:16–20). ’Ua nāhea te Fa’aora i te fa’atupura’a i teie mau tuha’a o tāna misiōni ? E nāhea ’oia i te fa’atupu i te reira i roto i tō tātou orara’a i teienei ? E nehenehe te mau mana’o i raro nei e tauturu i tā ’outou piha ’aore rā pupu ’ia tāmau noa i te ’āparaura’a nō ni’a i te tumu Iesu Mesia e riro ai ’ei pū nō tō tātou orara’a.

• I te mau taime ato’a tē vai ra te mau a’ora’a nō te ’āmuira’a rahi ’o tē fa’a’ite pāpū nei nō Iesu Mesia. E nehenehe ’outou e ani e rave rahi mau melo nō te piha ’aore rā te pupu, ’ia fa’a’ite mai i te tahi mea tā rātou i ha’api’i mai nō ni’a i te Fa’aora i roto i te āmuira’a rahi. E fa’aitoito ia rātou ’ia fa’a’ite mai e aha tō rātou mana’o nō ni’a i te Fa’aora maoti te mea tā rātou i ha’api’i.

• E nehenehe te mau pāpa’ira’a mo’a e tauturu i te feiā ’āpī ’ia māramarama maita’i a’e nō te aha te Fa’aora e riro ai ’ei pū nō tō rātou orara’a. E nehenehe paha ’outou e pāpa’i i ni’a i te ’iri pāpa’ira’a Nō te aha ’ei pū Iesu Mesia nō tō’u orara’a ? ’A ani i te feiā ’āpī ’ia fa’a’ite mai i tō rātou mana’o. I muri iho e nehenehe ’outou e ani ia rātou (i te ta’ata hō’ē ’aore rā i te pupu) ’ia ’imi i roto i te mau pāpa’ira’a mo’a o te « Pu’e parau ha’amāramarama » i te tahi atu ā mau pāhonora’a. ’A ani atu ia rātou i te mau rāve’a ’ia fa’a’ite mai i te mea tā rātou i ’apo mai ’e nō te aha e mea faufa’a te reira nō rātou.

• E hina’aro paha ’outou e ani i te feiā tā ’outou e ha’api’i ra ’ia fa’ata’a mai i te mahana fauha’a roa a’e o tō rātou orara’a. E aha te mahana fauha’a roa a’e i roto i te ’ā’ai ? E ani ia rātou ’ia hi’o mai e aha tā Elder Dieter F. Uchtdorf i parau ’o te mahana faufa’a roa a’e i roto i tāna parau poro’i « ’A hi’o mai na i taua ta’ata nei ! »(Liahona, Mē 2018, 107–10). E fa’aitoito i te feiā ’āpī ’ia ’imi i te mau ha’amaita’ira’a tā Elder Uchtdorf i fafau i te feiā e « hi’o » ia Iesu Mesia. E nehenehe ato’a rātou e fa’a’ite mai i te mea tā rātou e rave nei nō te fa’arirora’a i te Fa’aora ’ei pū nō tō rātou orara’a. E nehenehe ’outou e fa’aitoito ia rātou ’ia feruri e aha tā rātou e nehenehe e rave nō te ha’afātata atu ā ia Iesu Mesia ’e ’ia fa’ata’a i te fā ’ia rave i te reira.

• Mai te mea e ani mai te tahi ta’ata ia tātou nō te aha tātou e ti’aturi ai ia Iesu Mesia, e aha tā tātou e parau ? ’A fa’aitoito i te feiā ’āpī ’ia fa’a’ite mai i tō rātou mana’o ’e ’ia pāpa’i i te reira i ni’a i te ’iri pāpa’ira’a. E nehenehe ato’a ’outou e ani ia rātou ’ia tai’o fa’ahou « Te Mesia Ora : Te ’itera’a pāpū o te mau ’āpōsetolo » (ChurchofJesusChrist.org) ’aore rā « Te misiōni hanahana a Iesu Mesia » i roto i te pene 3 o te ’Ia Poro Haere i tā’u nei ’Evanelia ([2019], 60–61). E fa’aitoito ia rātou ’ia ’imi i te mau parau mau ’ōhie tā rātou e fa’a’ite mai nō te fa’ata’a nō te aha e mea faufa’a te Fa’aora nō rātou. E nehenehe tā rātou e tu’u atu i te mau parau mau tā rātou i ’ite mai i ni’a i te ’iri pāpa’ira’a ’e ’ia ’āparau nāhea rātou e nehenehe ai e fa’a’ite i teie mau parau mau i te mau ta’ata tā rātou i mātau.

Rave ma te fa’aro’o

’A fa’aitoito i te mau melo nō te piha ’aore rā nō te pupu ’ia feruri ’e ’ia pāpa’i i te mea tā rātou e rave nō te fa’a’ohipa i te mau fa’aurura’a tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, ’ia ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Ioane 8:12 ; 14:6 ; Roma 8:35–39 ; 2 Nephi 2:3–9 ; 9:5–10 ; Alama 36:3, 27 ; 3 Nephi 27:14–16, 27 ; Etera 12:27 (Nō te aha ’ei pū Iesu Mesia nō tō tātou orara’a)

• Becky Craven, « Tāpe’a noa atu » (Liahona, Novema 2020, 58–60)

• « Ti’aturi au i te Mesia », « Tē māere nei au » (Te mau hīmene, N°66, 111)

• « Why We Need a Savior—A Christmas Message about Our Savior Jesus Christ [Nō te aha tātou e hina’aro ai i te Fa’aora—E parau poro’i nō te Noera nō ni’a i tō tātou Fa’aora o Iesu Mesia] », « Because of Him [Maoti ’oia] » (videos), ChurchofJesusChrist.org

Ha’api’ira’a mai tā te Fa’aora

« ’Ua riro te pīahi tāta’itahi i roto i tā ’outou piha ’ei puna rahi nō te ’itera’a pāpū, te mau mana’o, ’e te mau ’itera’a nō te orara’a i te ’evanelia. ’A ani ia rātou ’ia fa’a’ite mai ’e ’ia fa’ateitei i te tahi ’e te tahi » (Ha’api’ira’a mai tā te Fa’aora, 5).