Tāpe’a noa atu
Nā roto ia Iesu Mesia, ’ua hōro’ahia mai te pūai nō te rave i te mau tauira’a vai maoro. ’A fāriu ai tātou ma te ha’eha’a i ni’a iāna, e fa’arahi ’oia i tō tātou ’aravihi ’ia taui.
E au mau tuahine, e ’oa’oa iti rahi ’ia tae mai i rotopū ia ’outou.
E feruri na i te hō’ē ta’ata e haere i te fare toa nō te ho’o i te hō’ē tao’a. ’Ua ’aufau ’oia i te ’ona hau atu i te moni nō te tao’a ra, e fa’aho’i ïa te ’ona i te moni toe.
’Ua ha’api’i te ari’i Beniamina i tōna mau ta’ata i Amerika tahito, i te mau ha’amaita’ira’a fa’ahiahia tā tātou e fāri’i mai roto mai i tō tātou Fa’aora, Iesu Mesia. ’Ua hāmani ’oia i te mau ra’i, te fenua ’e te mau nehenehe ato’a tā tātou e ’oa’oa nei. 1 Nā roto i tāna tara’ehara nō te here, e hōro’a ’oia i te rāve’a ’ia fa’aorahia tātou i te hara ’e te pohe. ’A faa’ite ai tātou i tō tātou māuruuru iāna nā roto i te ora-itoito-ra’a i tāna mau fa’auera’a, e ha’amaita’i ’oi’oi ’oia ia tātou, e vai noa ïa tā tātou tārahu iāna.
’Ua rahi roa, rahi roa atu, tāna e hōro’a nei ia tātou, i te faufa’a ’o tā tātou e nehenehe e fa’aho’i atu iāna. E aha ïa tā tātou e nehenehe e hōro’a iāna, ’oia tei ’aufau nō tā tātou mau hara i te ho’o e’ita e nehenehe e tai’o ? E nehenehe tātou e hōro’a iāna i te taui. E nehenehe tātou e hōro’a iāna i tō tātou taui. E nehenehe ē, ’o te tauira’a o te ’ā’au, te tauira’a o te peu, ’aore rā te tauira’a o tā tātou ’avei’a. Nō tōna ’aufaura’a i te ho’o rahi roa nō tātou tāta’i tahi, tē ani nei te Fatu ’ia taui i tō tātou ’ā’au. Te tauira’a tāna e tītau nei nō tātou, e ’ere ïa nō tōna maita’i, nō to tātou rā. Maoti te ta’ata ho’o i te mātete ’o tē rave i te moni fa’aho’i, tē pi’i nei tō tātou Fa’aora ia tātou ’ia tāpe’a taua moni ra.
I muri iho i te fa’aro’ora’a i te mau parau a te ari’i Beniamina, ’ua tuō tōna mau ta’ata nō te parau ē, ’ua taui tō rātou ’ā’au, i te nā-’ō-ra’a : « Nā roto i te Vārua o te Fatu pūai hope tei fa’ahuru ’ē ia mātou… i ’ore ai mātou i hina’aro ai i te rave i te ’ino, ’ia rave rā i te maita’i ma te fa’aea ’ore ». 2 ’Aita te mau pāpa’ira’a mo’a e parau nei ē, ’ua maita’i roa rātou i reira ra, ’aita, ’ua tūra’i rā tō rātou hina’aro e taui ’ia rave i te ’ohipa. ’Ua riro te tauira’a o tō rātou ’ā’au ’ei fa’aru’era’a i te tāne ’e te vahine tino nei, nō te tūtava i te riro rahi atu ā mai ia Iesu Mesia te huru.
Tē ha’api’i nei te peresideni Henry B. Eyring : « Tei ni’a te fa’afāriura’a mau i te ’imi-hua-ra’a i te fa’aro’o, ma te tauto’ora’a rahi ’e te rohirohi ato’a. ’Ei reira nā te Fatu e hō mai… i te semeio nō te tāmāra’a ’e te tauira’a ». 3 ’Ia ’āno’i tātou i tā tātou tauto’ora’a i tō te Fa’aora ’aravihi ’ia taui ia tātou, e riro mai tātou ’ei ta’ata ’āpī.
I tō’u ’āpīra’a, ’ua hi’o mana’o vau iā’u i te haerera’a i te hō’ē ’ē’a ta’uma ’e te poutū, nō te tae i tā’u fā nō te ora mure ’ore. I te mau taime ato’a e rave au, ’aore rā e parau vau i te hō’ē mea hape, mai te huru ē tē he’e ra vau, ’e ’ua ha’amata ’āpī fa’ahou ā i te tere. Mai te huru te topara’a i ni’a i terā mau marū nō te ha’uti tamari’i e ta’uma haere ’e ’ua he’e a’era mai ni’a mai i te ha’amatara’a o te ha’uti ! E mea huru fiu ! I te ha’amatara’a rā vau i te māramarama i te parau ha’api’ira’a a te Mesia, 5 ’e nāhea i te fa’a’ohipa i te reira i roto i tō’u orara’a tāmahana, ’ua ’itehia mai te tīa’ira’a.
’Ua hōro’a Iesu Mesia i te hō’ē hōho’a fa’anahora’a tāmau nō te tauira’a. Tē tītau manihini nei ’oia ia tātou ’ia fa’aro’o iāna, ’o tē fa’auru ia tātou ’ia tātarahapa—« ’ā’au ». 4 ’Ia tātarahapa ana’e tātou ’e ’ia fāriu atu i tō tātou māfatu iāna, e roa’a ïa i te hia’ai rahi a’e ’ia rave ’e ’ia ha’apa’o i te mau fafaura’a mo’a. E itoito noa tātou ē tae noa atu i te hope’a nā roto i te fa’a’ohipra’a i te mau tumu parau i roto i tō tātou orara’a, ’e nā roto i te tītau-manihini-ra’a i te Fatu ’ia taui i tō tātou huru. Tāpe’a māite ē tae noa atu i te hope’a, te aura’a ra, e taui ē tae noa atu i te hope’a. I teienei ’ua ta’a iā’u ē, ’aita vau e ha’amata ’āpī fa’ahou nei ’ia manuia ’ore ana’e te tauto’ora’a, i te tāmatara’a tāta’itahi rā, tē tāmau nei au i tā’u ’ohipa tau maoro nō te taui.
E parau fa’auru tē vai ra i roto i te parau tai’o a te Feiā ’Āpī Tamahine e fa’ahiti pāpū nei : « E poihere au i te hōro’a nō te tātarahapara’a ’e e ’imi au i te ha’amaita’i iā’u i te mahana tāta’itahi ». 7 Tē pure nei au ’ia poihere mau tātou i teie hōro’a nehenehe ’e ’ia ’imi tātou i te taui ma te mana’o pāpū. I te tahi taime te tauira’a tei tītauhia, ’ua tū’ati ïa i te hara teimaha. I te rahira’a taime rā, e tūtava tātou i te fa’aau atu ā i tō tātou huru i ni’a i te mau hīro’a o Iesu Mesia. E riro tā tātou mau mā’itira’a tāmahana i te tauturu ’aore rā i te fa’ataupupū i tō tātou haerera’a i mua. Nā te mau tauira’a iti ’e te tāmau e tauturu ia tātou ’ia ha’amaita’i ia tātou. ’Eiaha e fiu. E ’ohipa tau maoro te tauira’a, nō te oraraʼa tāʼātoʼa. ’Ua māuruuru vau i te mea ē, i roto i tā tātou mau tāfifira’a e taui, e mea fa’a’oroma’i te Fatu ia tātou.
Nā roto ia Iesu ’A fāriu ai tātou ma te ha’eha’a i ni’a iāna, e fa’arahi ’oia i tō tātou ’aravihi ’ia taui.
Hau atu te mana fa’ataui o te tāra’ehara a tō tātou Fa’aora, e turu mai te Vārua Maita’i ’e e arata’i mai ’oia ’a tu’u ai tātou i tā tātou tauto’ora’a. E nehenehe ato’a ’oia e tauturu ia tātou ’ia ’ite e aha te mau tauira’a e tītauhia ’ia rave. E nehenehe ato’a tātou e ’ite mai i te tauturu ’e te fa’aitoitora’a nā roto i te mau ha’amaita’ira’a autahu’ara’a, te pure, te ha’apaera’a mā’a ’e te haerera’a i te hiero.
E nehenehe ato’a te mau melo ti’aturihia o te ’utuāfare, te feiā fa’atere ’e te mau hoa e tauturu i tā tātou mau tauto’ora’a e taui. I te va’ura’a o tō’u matahiti, e haere māua tō’u taea’e ’o Lee ’e tō māua mau hoa e ha’uti nā ni’a i te mau tumu rā’au i tō mātou vāhi. E mea au nā māua ’ia haere ’e tō māua mau hoa i raro a’e i terā mau tumu rā’au. I te hō’ē mahana, ’ua topa mai ’o Lee nā ni’a i te tumu rā’au, ’e ’ua fati tōna rima. Nō tōna rima fati, e mea pa’ari nōna ’ia ta’uma i ni’a i te tumu rā’au. E ’ere roa rā hō’ē ā huru ’aita ana’e ’oia. Nō reira, ’ua tāpe’a vetahi o mātou iāna nā muri, ’e ’ua huti vetahi iāna i ni’a i tōna rima maita’i—’e ’aita i fifi rahi roa—tō ni’a Lee i te tumu rā’au. E rima fati iho ā tōna, tei rotopū fa’ahou rā ’oia ia mātou, tō mātou fa’ahoara’a, ’a tīa’i noa ai ’ia ora tōna rima.
Pinepine au i te feruri i teie ’ohipa ha’uti nā ni’a i te mau tumu rā’au ’ei ’ohipa ri’i nā mātou i roto i te ’evanelia a Iesu Mesia. I raro a’e i te maru o te mau ’āma’a ’evanelia, ’ua ’oa’oa mātou i te mau ha’amaita’ira’a e au i tā mātou mau fafaura’a. Tē vai nei paha tei topa mai roto mai i te ataata ’ore o tā rātou mau fafaura’a, ’e ’ua tītauhia i tō tātou tauturu nō te ta’uma fa’ahou mai i roto i te pāruru o te ’evanelia. E mea fifi paha nō rātou ’ia ho’i mai ’o rātou ana’e iho. E ti’a ānei ’ia tātou ’ia huti ri’i mai i’ō nei, ’e ’ia hīvi ri’i mai i reira, nō te tauturu ia rātou ’ia ora mai i tō rātou ma’i ’a ’oa’oa ai i tō tātou fa’ahoara’a.
Mai te mea tē mamae ra ’outou i te pēpē nō te maruara’a, e vaiiho na i te ta’ata ’ia tauturu ia ’outou nō te ho’i mai i tā ’outou mau fafaura’a ’e te mau ha’amaita’ira’a o te reira. E nehenehe te Fa’aora e tauturu ia ’outou ’ia ora mai ’e ’ia taui, ’a ha’a’ati-noa-hia ai e te feiā tei here ia ’outou.
I te tahi mau taime e fārerei au i te mau hoa e mea maoro ’aita vau i ’ite ia rātou. I te tahi taime e nā ’ō mai rātou : « ’Aita ’oe i taui ri’i a’e ! » I te mau taime ato’a e fa’aro’o vau i te reira, e fa’aita ri’i au, nō te mea tē ti’aturi nei au ē ’ua taui au i te roara’a o te mau matahiti. Maita’i ē, ’ua taui au mai ananahi ra ! Maita’i ē, e mea hāmani maita’i ri’i atu ā vau, ’aita e ha’avā i te ta’ata ’e e mea aumihi a’e. Maita’i ē, e mea ’oi’oi a’e au i te pāhono i te mau hina’aro o te ta’ata, ’e maita’i ē, e mea huru fa’a’oroma’i ri’i atu ā.
E mea au nā’u ’ia ori haere nā roto i te mau mou’a tāpiri i tō’u fare. E mea pinepine te hō’ē ’ōfa’i iti e mau i roto i tō’u tia’a ’a haere ai au. I te hope’a, e fa’aea vau nō te ueue i tō’u tia’a. E mea māere nō’u tō’u fa’a’oroma’i-noa-ra’a i te haere ma te māuiui hou ’a fa’aea ai nō te tātara i teie ’ohipa ha’amāuiui.
’A rātere ai tātou i te ’ē’a nō te fafaura’a, i te tahi taime, e mau mai te tahi mau ’ōfa’i i roto i tō tātou tia’a mai te mau peu au ’ore, te mau hara ’aore rā te huru au ’ore. ’Oi’oi noa atu tātou i te ueue i te reira i rāpae i tō tātou orara’a, ’oa’oa noa ato’a atu tō tātou tere tāhuti nei.
’Ia vai noa te taui, tītauhia te tauto’ora’a. ’Aita vau e mana’o ē, e tāpe’a vau i tō’u tere nō te tu’u fa’ahou mai i roto i tō’u tia’a te tao’a ha’ape’ape’a ’e te ha’amāuiui tā’u i tātara a’enei. E’ita vau e hina’aro e rave fa’ahou ā i te reira mai te hō’ē pepe nehenehe e’ita e hina’aro e mā’iti e ho’i i roto i tōna pū’ohu tirita.
Tē parau pāpū nei au ē, maoti Iesu Mesia e ti’a ai ia tātou ’ia taui. E ti’a ia tātou ’ia fa’atano i tā tātou mau peu, e taui i tō tātou mau mana’o ’e e ha’amaita’i i tō tātou huru nō te riro rahi atu ā mai iāna te huru. ’E maoti tōna tauturu, e nehenehe ia tātou e tāpe’a noa atu. I te i’oa o Iesu Mesia, ’āmene.