E mā’a tē vai ra
’A ’imi ’ai tātou ’ia vai ineine i te pae tino nei, e nehenehe tātou e fa’aruru i te mau fifi o te orara’a ma te ti’aturi rahi atu ā.
Nā mua a’e i te mau ’ōpanira’a terera’a manureva nō te pararera’a ma’i pohe nei, tē ho’i ra vau i te fare mai te hō’ē ’ohipa nā te ara, ’e nō te tahi mau fifi tārenara’a, ’ua mau vau i te mahana sābati i reira. ’Ua taimehia vau nō te haere i te hō’ē purera’a ’ōro’a, i reira ato’a tō’u hōro’ara’a i te hō’ē a’ora’a poto. I muri iho i te purera’a, ’ua haere mai te hō’ē diakono ’ana’anatae mau e ui iā’u ’ua mātau ānei au i te Peresideni Nelson, ’e ’ua fāna’o a’enei au i te aroha rima iāna. ’Ua pāhono atu vau ē ’ua mātau mau ā vau iāna, ’ua aroha rima a’ena vau iāna nō te mea e melo vau nō te ’Episekōpora’a Fa’atere Rahi, ’ua fāna’o vau i te ruru ’e te Peresideni Nelson ’e i tōna nā tauturu e piti ’aore rā e toru a’e taime i te hepetoma.
Pārahi a’era teie diakono ’āpī i ni’a i te pārahira’a, amo a’era i tōna nau rima i ni’a ma te tuō ē : « E mahana rahi roa teie o tō’u orara’a » ! Te mau taea’e ’e te mau tuahine, e’ita paha vau e tu’u i tō’u nau rima i ni’a ma te tuō, e māuruuru a muri noa atu rā vau nō te peropheta ora ’e nō te arata’ira’a tā tātou e fāri’i nei mai roto i te mau peropheta, te mau hi’o ’e te mau heheu parau, i teie iho ā rā mau taime fifi.
Mai te ha’amatara’a o te tau, ’ua hōro’a te Fatu i te arata’ira’a i tōna mau ta’ata nō te tauturu ia rātou ’ia fa’aineine, i te pae vārua ’e i te pae tino, nō te mau ’ati rahi ’e te mau tāmatara’a tāna ho’i i ’ite e tae mai ’ei tuha’a nō te orara’a tāhuti nei. E mau ’ati rahi o te natura e nehenehe e tupu i ni’a i te ta’ata hō’ē ’e i ni’a i te tā’āto’ara’a, ’are’a rā e hōro’a mai te arata’ira’a a te Fatu i te pāruru ’e te tauturu i te fāito o tō tātou mana’o ’e tā tātou ’ohipa mai te au i Tāna parau a’o. E hi’ora’a fa’ahiahia tei hōro’ahia i roto i te hō’ē fa’ati’ara’a nō te buka Genese, tē ha’api’i nei tātou nō ni’a ia Iosepha i Aiphiti ’e tāna ’iritira’a fa’auruhia nō te ’ōrama a Pharao.
« ’Ua parau mai ra Iosepha ia Pharao… ’Ua fa’a’ite mai te Atua ia Pharao i tāna e fātata i te rave nei…
« Inaha, teie ’a tupu nā matahiti ’auhune rahi roa e hitu, ē ’ati noa a’e te fenua ato’a nei o Aiphiti :
« Ē i muri a’e i te reira, ’o nā matahiti o’e ïa e hitu, ’e e mo’e taua ’auhune rahi i te fenua nei o Aiphiti ». 1
’Ua fa’aro’o Pharao ia Iosepha ’e, ’aua’a a’e, ’ua pāhono i tā te Atua i fa’a’ite iāna i roto i te moemoeā ’e ’ua fa’aineine atu ra nō te mau mea e tae mai. Tē parau nei ïa te mau pāpa’ira’a mo’a :
« Hotu’umu atu ra taua fenua ra i nā matahiti ’auhune e hitu ra.
« ’Ua ha’aputu ihora ’oia i te mā’a ato’a i nā matahiti e hitu…
« Pu’e māite a’era te sitona ia Iosepha mai te one tahatai ra, ’e ’aita atu ra ’oia i tai’o… ’aita a’era e ti’a ’ia tai’o ». 2
I te ma’irira’a nā matahiti hotu rahi e hitu, tē parauhia ra « ’ua tupu mai ra taua nā matahiti o’e e hitu tā Iosepha i parau ra. ’E ’ua ’ati te mau fenua ato’a i te o’e, ’āre’a te fenua ra o Aiphiti ē ’ati noa a’e, e mā’a ïa tē vai ra ». 3
I teie mahana, ’ua ha’amaita’ihia tātou tē arata’ihia nei tātou e te mau peropheta tei māramarama i te tītaura’a nō tātou ’ia fa’aineine nō te mau ’ati rahi « ’o tē tae mai » 4 ’e tei ’ite ato’a i te mau tā’ōti’ara’a ’e te mau ’ōpanira’a tā tātou e fa’aruru atu ’a tūtava ai i te pe’e i tā rātou parau a’o.
E mea pāpū maita’i ē, ’aita te ’ino o te COVID-19, mai te mau ’ati natura rahi ato’a, e ma’iti nei i te ta’ata, tē nā ni’a nei i te mau ’ōti’a pupu ta’ata ’e sōtiare ’e ha’apa’ora’a fa’aro’o, i te mau tūha’a fenua ato’a. ’Ua ’ere te ta’ata i te ’ohipa ’e ’ua iti mai te moni ’āpī nō te ’inora’a te ’ohipa i te mau tihātira’a ’e ’ua ’ino ato’a te ’ohipara’a nō te mau fifi pae ea ’e te mau ha’afifira’a ha’amanahia.
I te mau ta’ata ato’a tei ’ati i te reira, tē fa’a’ite nei mātou i tō mātou hāro’aro’a ’e te māna’ona’ora’a i tō ’outou vaira’a, mai te ti’aturira’a pāpū ato’a ē, e mau mahana maita’i a’e i muri nei. ’Ua ha’amaita’ihia ’outou i te mau ’episekōpo ’e te mau peresideni ’āma’a ’o tē ’imi nei ’e ’o tē tauturu nei i te mau melo o tō rātou ’āmuira’a i te pae tino, ’e ’o tē fāna’o nei i te mau mauiha’a ’e te mau mātēria e nehenehe e tauturu ia ’outou ’ia fa’ati’a fa’ahou ā i tō ’outou orara’a ’e ’ia tu’u ia ’outou i ni’a i te ’ē’a nō te fa’arava’ira’a ia ’outou iho ’a fa’a’ohipa ai i te mau parau tumu nō te fa’aineinera’a.
I teie nei mahana, i teie pararera’a ma’i pohe tei tū’ino i te mau ’īmira’a faufa’a mai te mau orara’a ato’a, e ’ere te Fa’aora i te Fa’aora aumihi ’āhani e tāu’a ’ore ’oia i te parau pāpū nō te fifira’a te ta’ata e rave rahi, ’e e ani ’oia ia rātou ’ia ha’amata i te ha’aputu i te mā’a ’e te moni. Terā rā, ’eiaha pa’i tātou e tāu’a ’ore roa atu i te mau parau tumu nō te fa’aineinera’a… ’ia fa’a’ohipahia rā teie nau parau tumu « ma te pa’ari ’e te au maita’i », 5 ia ti’a ia tātou ’ia parau mai ia Iosepha i Aiphiti : « e mā’a ïa tē vai ra ». 6
’Aita te Fatu e tīa’i nei ia tātou ’ia rave hau atu i te mea tē noa’a ia tātou, tē tīa’i nei rā ’Oia ia tātou ’ia rave i tā tātou e nehenehe… i te taime tātou e nehenehe e nā reira. Mai tā te peresideni Nelson i fa’aha’amana’o ia tātou i roto i tā tātou ’āmuira’a rahi i ma’iri : « Mea au na te Fatu te tūtavara’a ». 7
I fa’aitoito noa ana te feiā fa’atere o te ’Ēkālesia i te feiā mo’a « ’ia fa’aineine nō te tau ’ati o te orara’a maoti te tahi ha’aputura’a mā’a ’e te pape ’e te tahi moni fa’aherehere ». 8 I te hō’ē ā taime, tē fa’aitoitohia nei tātou ’ia « vai te pa’ari » ’e « ’eiaha ’ia fa’arahi roa ’ino » 9 i roto i tā tātou mau tauto’ora’a nō te ha’aputu i te mā’a ’e te moni. Tē vai nei te tahi mātēria tauturu, pi’ihia, Personal Finances for Self-Reliance [Te ha’apa’ora’a i tā ’oe iho moni nō te fa’arava’ira’a ia ’oe iho], tei ha’apararehia i te matahiti 2017, e noa’a i ni’a i te tahua natirara a te ’Ēkālesia nā roto e 36 reo, ma teie parau ’ōmuara’a a te Peresidenira’a Mātāmua :
« ’Ua parau te Fatu : ‘’O tā’u ’ōpuara’a ïa ’ia hōro’a i te faufa’a nā ta’u feiā mo’a’ [Te Parau Ha’api’ira’a ’e te mau Parau Fafau 104:15]. E parau fafau teie heheura’a nō ’ō mai i te Fatu ē, e fa’afāna’o ’oia i te mau ha’amaita’ira’a pae tino ’e ’e ’īriti ’oia i te ’ūputa nō te fa’arava’ira’a iāna iho…
Nā roto i te fāri’ira’a ’e te orara’a i teie mau parau tumu, e tauturu maita’i atu te reira ia tātou ’ia fāri’i i te mau ha’amaita’ira’a pae tino tei fafauhia mai e te Fatu…
Tē ani nei mātou ia ’outou ’ia fa’aitoito i te tuatāpapa i teie mau parau tumu ’e ’ia ha’api’i i te reira i te mau melo o te ’utuāfare. ’A nā reira ai ’outou, e ha’amaita’ihia tō ’outou orara’a… [i te mea ē] e tamari’i ’outou nā tō tātou Metua i te Ra’i. ’Ua here ’Oia ia ’outou ’e e’ita roa atu ’Oia e fa’aru’e ia ’outou. ’Ua ’ite ’Oia ia ’outou ’e ’ua ineine nō te fa’atoro atu ia ’outou i te mau ha’amaita’ira’a pae vārua ’e pae tino nō te fa’arava’ira’a iāna iho ». 10
Tei roto i teie mātēria te mau pene tei fa’ata’ahia nō te ha’amau ’e nō te ora i roto i te hō’ē tāpura faufa’a, nō te pāruru i tō ’outou ’utuāfare i mua i te mau taime fifi, nō te fa’aruru i te mau fifi moni, nō te tu’u i te faufa’a nō ananahi, ’e tē vai atu ra, ’e ’ua matara i te mau ta’ata ato’a i ni’a i te tahua natirara a te ’ēkalesia ’aore rā nā roto i te feiā fa’atere.
’Ia feruri tātou i te parau tumu nō te fa’aineinera’a, e nehenehe e hi’o i muri, ia Iosepha i Aiphiti, ’ei fa’aurura’a. E’ita e nava’i te ’itera’a i te mau mea e tupu nō te fa’aruru atu i te mau matahiti « ’ī’ino » mai te mea ’aita e fāito fa’atusiara’a i roto i te mau matahiti ’auhune. ’Aita rātou i ’amu i te mau mea ato’a tā rātou i fa’ahotu, ’ua ha’amauhia te mau ’ōti’a ’e ’ua pe’ehia te reira, ’ua nava’i a’era nō te mau hina’aro i reira ra, ’e nō ananahi ato’a. ’Aita i nava’i ’ia ’ite ē e tupu mai te mau tau fifi. E mea tītauhia ia rātou ’ia rave i te ’ohipa, inaha i tā rātou mau tauto’ora’a, « e mā’a ïa tē vai ra ». 11
E arata’i te reira i te hō’ē uira’a faufa’a rahi : « Nāhea atu ra ïa ? » Te vāhi maita’i nō te ha’amata ’o te māramaramara’a ïa ē, pauroa te mau mea e mau mea pae vārua i te Fatu, ’e « ’aore » ’oia i hōro’a mai ia tātou i « te hō’ē ture tāhuti noa nei ». 12 ’E nō reira, e fa’atoro te mau mea ato’a i ni’a ia Iesu Mesia, ’ei niu i ni’a iho e patu ai i tā tātou ato’a fa’aineinera’a pae tino.
Te vai-ineine-ra’a ’e te fa’arava’ira’a iāna iho i te pae tino, te aura’a ra, « e ti’aturi ē, nā roto i te maita’i o Iesu Mesia, ’oia ho’i tōna mana ha’amana, ’e tā tātou iho mau tauto’ora’a, e noa’a ia tātou te mau mea ato’a o te orara’a nei tei tītauhia i te pae vārua ’e i te pae tino, ’o tā tātou e tītau atu nō tātou iho ’e nō te ’utuāfare ». 13
Te tahi fa’ahou hi’ora’a nō te niu pae vārua o te fa’aineinera’a pae tino, ’o te ravera’a ïa « ma te pa’ari ’e te au maita’i », 14 ’oia ho’i, e tātuha’a i te ha’amaura’a i te mā’a ha’aputu ’e te moni ha’aputu, i te roara’a o te tau, ’e ’ia au i tā tātou moni, nā reira ato’a te ha’apa’ora’a i te mau rāve’a « iti ’e te pāpū », 15 ’ei fa’a’itera’a ho’i nō tō tātou fa’aro’o ē, e fa’arahi te Fatu i tā tātou mau tauto’ora’a iti ’e te tāmau ra.
Maoti te hō’ē niu pae vārua i ha’amauhia e ti’a ai ia tātou ’ia manuia i te fa’a’ohipa e piti mea faufa’a rahi nō te fa’aineinera’a pae tino—te ha’apa’ora’a i te moni ’e te ha’aputura’a mā’a.
Te mau tāviri tumu nō te ha’apa’ora’a i te moni, ’o te ’aufaura’a ïa i te tuha’a ’ahuru ’e te mau ō, te fa’a’orera’a ’e te ’apera’a i te tārahu, ’e te fa’aineinera’a ’e te orara’a i roto i te hō’ē tāpura faufa’a ; ’e te fa’ahereherera’a nō ananahi.
Te mau tāviri tumu nō te ha’aputura’a mā’a, ’o te ha’aputura’a ïa i te mā’a, te ha’aputura’a i te pape ’e te ha’aputura’a i te tahi atu mau mea tītauhia, ’ia au i te mau hina’aro o te ta’ata ’e te ’utuāfare… i te mea ho’i « te fare vaira’a tao’a maita’i a’e », 16 ’o te fare ïa, ’o tē riro mai ’ei « vāhi ha’aputura’a ’ōhie roa a’e i te taime fifi ». 17
’A fāri’i ai tātou i te mau parau tumu pae vārua ’e ’a ’imi ai i te fa’aurura’a a te Fatu, e arata’ihia tātou nō te ’ite i te hina’aro o te Fatu nō tātou, te ta’ata hō’ē ’e te ’utuāfare, ’e nāhea i te fa’a’ohipa maita’i a’e i te mau parau tumu faufa’a rahi nō te fa’aineinera’a pae tino. Te ta’ahira’a faufa’a roa a’e, ’o te ta’ahira’a mātāmua ïa.
’Ua ha’api’i pāpū Elder David A. Bednar i teie parau tumu i te nā-’ō-ra’a ’oia ē : « ’O te ravera’a i te hō’ē mea te fa’a’ohipara’a i te fa’aro’o… E fa’atumu te fa’aro’o mau i roto ’e i ni’a i te Fatu ia Iesu Mesia, ’e e arata’i noa ’oia i te ’ohipa ». 18
Te mau taea’e ’e te mau tuahine, i roto i teie ao tauiui noa, tītauhia ’ia fa’aineine tātou nō te mau tau e’ita e ta’ahia. Noa atu ā te vaira’a te mau mahana maita’i a’e i mua ’ua ’ite iho ā tātou e haere te tāhuti nei i ni’a ’e i raro, e’ita e fa’aea. ’A ’imi ’ai tātou i te vai ineine i te pae tino nei, e nehenehe tātou e fa’aruru i te mau fifi o te orara’a ma te ti’aturi rahi atu ā, ma te ’ā’au hau, ’e mai ia Iosepha i Aiphiti e parau tātou noa atu te orara’a ahoaho ē : « E mā’a tē vai ra ». 19 I te i’oa o Iesu Mesia, ’āmene.