E tāmata tātou ia rātou i reira
I teienei te taime nō te fa’aineine ’e nō te hi’opo’a māite i tō tātou ineine ’e te ’aravihi ’ia rave i te mau mea ato’a e fa’aue mai te Fatu tō tātou Atua.
Tē pure nei au ’ia tauturu mai te Vārua Maita’i ia tātou pā’āto’a ’a fa’a’ite ai au i te mana’o tei tae mai i tō’u ferurira’a ’e i tō’u ’ā’au, nō te fa’aineine i teie ’āmuira’a rahi.
Te faufa’a rahi o te mau hi’opo’ara’a
’Ua hau i te piti ’ahuru matahiti nā mua a’e i tō’u pi’ira’a e tāvini tāmau i roto i te ’Ēkālesia, e ’orometua ’e e fa’atere ha’api’ira’a vau i roto i te tuatoru. Tā’u hōpoi’a mātāmua ’ei ’orometua, ’o te tauturura’a ïa i te mau pīahi ’ia ha’api’i nāhea i te ha’api’i nō rātou iho. ’E te hō’ē tuha’a faufa’a tumu nō tā’u ’ohipa, ’o te hāmanira’a ïa, te notara’a ’e te paraparaura’a i te mau hi’opo’ara’a a te mau pīahi. Mai tā ’outou iho i ’ite ’e mai tei mātauhia, e ’ere iho ā ïa te mau hi’opo’ara’a te tuha’a ha’api’ira’a au-roa-hia e te mau pīahi !
E mea tītau-roa-hia rā te mau hi’opo’ara’a i terā taime ’e terā taime nō te ha’api’i. E hi’opo’ara’a maita’i mai te mea e tauturu te reira i te fa’aau i te mea e tītauhia ’ia ’ite, i te mea tā tātou i ’ite nō ni’a i te hō’ē tumu parau ta’a ’ē ; e fāito ato’a te reira e nehenehe e hi’opo’a i te mea i ’apohia mai ’e tae noa atu te tupura’a i te pa’ari.
Nā reira ato’a, e mea faufa’a te mau hi’opo’ara’a a te ha’api’ira’a nō te tāhuti nei nō tō tātou nu’ura’a i mua. Terā rā, ’aita te ta’o hi’opo’ara’a e ’itehia nei i roto i te mau buka pāpa’ira’a mo’a reo peretāne, ’aita hō’ē noa atu taime. Tē ’itehia nei rā te mau ta’o mai te tāmata, hi’opo’a ’e perehahu nō te fa’ahōho’a i te mau ’ohipa nō te fa’a’ite-tano-ra’a i tō tātou ’ite pae vārua nō ni’a i te fa’anahora’a mure ’ore nō te ’oa’oa a te Metua i te Ao ra, nā reira ato’a tō tātou māramaramara’a ’e te pūpūra’a ia tātou i te reira, ’e tae noa atu i tō tātou ’aravihi ’ia tītau i te mau ha’amaita’ira’a nō te tāra’ehara a te Fa’aora.
Tē fa’a’ite nei ’oia tei hāmani i te fa’anahora’a nō te fa’aorara’a i te tumu mau nō tā tātou tāmatara’a tāhuti nei i te mau ta’o tāmata, hi’opo’a ’e perehahu, i roto i te mau pāpa’ira’a mo’a tahito ’e i tō tātou nei anotau. « ’E e tāmata tātou ia rātou i reira, ’ia ’ite tātou ē, e ha’apa’o ānei rātou i te mau mea ato’a tā te Fatu tō rātou Atua e fa’aue ia rātou ra ». 1
E hi’o na i teie tāparura’a a te Salamo ra Davida :
« E hi’opo’a mai ’oe, e tāmata mai, e Iehova ; e perehahu mai ’oe i tā’u ’ā’au ’e tā’u mana’o.
« E vai na tō hāmani maita’i i mua i tā’u mata, ’e ’ua fa’aau vau i tō’u haere’a i te parau mau nā ’oe ra ». 2
’Ua parau te Fatu i te matahiti 1833 ra : « Nō reira, ’eiaha e mata’u i tā ’outou mau ’enemi, nō te mea ’ua tapu vau i roto i tō’u ’ā’au, tē nā reira mai nei te Fatu, ’e e tāmata vau ia ’outou i roto i te mau mea ato’a, e ha’apa’o ānei ’outou i tā’u fafaura’a, ē tae noa atu i te pohe, ’ia ’itehia ē ’ua au maita’i ’outou ». 3
Te tāmatara’a ’e te perehahura’a i teie nei mahana
’Ua riro te matahiti 2020 ’ei matahiti ta’a ’ē mau, i te hō’ē pae nō te pararera’a ma’i pohe ’ati a’e i te ao nei tei tāmata, tei hi’opo’a ’e tei perehahu ia tātou ma te rāve’a rau. Tē pure nei au nō tātou tāta’itahi ’e nō te mau ’utuāfare ’ia ’apo mai tātou i te mau ha’api’ira’a faufa’a rahi ’o tā te mau tau fifi noa e nehenehe e hōro’a mai. Maita’i ato’a ē, e fā’i hope tātou pā’āto’a i te « rahi o te Atua » ’e te parau mau ē « e fa’ariro ’oia i tō [tātou] mau ’ati ’ei maita’i nō [tātou]. » 4
E piti parau tumu rahi tē nehenehe e arata’i ’e e ha’apūai ia tātou ’a fa’aruru ai i te mau ’ohipa tāmata ’e te perehahu i roto i te orara’a, ta’a ’ē noa atu te reira : (1) te parau tumu nō te fa’aineinera’a, ’e (2) te parau tumu nō te haere-ti’a-ra’a i mua ma te ti’a-māite-ra’a i te Mesia.
Te tāmatara’a ’e te fa’aineinera’a
’Ei pipi nā te Fa’aora, ’ua fa’auehia mai tātou ’ia « fa’aineine i te mau mea ato’a e hina’arohia ra ; ’e ’a ha’amau i te hō’ē fare, ’oia ’ei fare nō te pure, ’ei fare nō te ha’apaera’a mā’a, ’ei fare nō te fa’aro’o, ’ei fare nō te ha’api’ira’a, ’ei fare nō te hanahana, ’ei fare nō te ha’apa’o, ’ei fare ho’i nō te Atua ». 5
’Ua parau-ato’a-hia mai ē, « mai te mea rā ’ua vai ineine noa ’outou e ’ore ’outou e mata’u.
« ’E ’ia ora atu ’outou i te mana o te ’enemi, ’e ’ia ha’aputuputuhia mai ho’i iā’u nei ’ei feiā parauti’a ra, mai te pōra’o ’ore ra ’e te fa’ahapa ’ore ho’i ». 6
E vāhi maita’i roa teie nau ’īrava nō te fa’anahora’a ’e nō te fa’aineinera’a i tō tātou orara’a ’e tō tātou fare, i te pae tino ’e i te pae vārua ato’a. E mea ti’a ’ia pe’e tā tātou mau tauto’ora’a fa’aineinera’a i te mau ’ohipa tāmatara’a o te tāhuti nei, i te hi’ora’a o te Fa’aora, tei haere noa ē « tupu atu ra… i te rahi ’e te pa’ari, ’e te herehia mai e te Atua ’e te ta’ata ato’a » 7 —e ’āno’ira’a fāito au nō te vai-ineine-ra’a i te pae ferurira’a, i te pae tino, i te pae vārua ’e i te pae sōtiare.
I te hō’ē avatea e ma’a ’āva’e i ma’iri a’enei, ’ua tai’o māua Susan i tā māua mā’a ha’aputu ’e te mau tauiha’a tau rū. I taua taime ra, tē ’ū’ana ’oi’oi ra ïa te COVID-19 ’e ’ua fa’atā’ue’ue nā ’āueuera’a fenua ra i tō māua fare i Utah. Mai te ha’amatara’a mai ā o tō māua fa’aipoipora’a māua te pe’era’a i te a’o a te peropheta e fa’aineine nō te mau ’ati ’ite-’ore-hia, nō reira ’ua riro te « hi’opo’ara’a » i tō māua ineinera’a i roto i terā tirotiro ’e te mau ’āueuera’a fenua ’ei ’ohipa maita’i e rave ’e te tano maita’i ato’a ho’i. ’Ua hina’aro māua e hi’o i tō māua nota i roto i teie mau hi’opo’ara’a tei ’ore i fa’aarahia mai.
’Ua rahi roa ïa tā māua i ’apo mai. I te mau tuha’a e rave rahi, e mea tano tā māua fa’aineinera’a. I te tahi atu rā mau tuha’a, tītauhia te tahi mau ha’amaita’ira’a i te mea ē ’aita māua i hi’o ’e i ha’apa’o i te tahi mau hina’aro ta’a ’ē i te taime tano.
’Ua ’ata rahi ato’a māua. ’Ei hi’ora’a, ’ua ’itehia mai e mau tauiha’a i roto i te hō’ē vaira’a mā’a tei vai noa e fea matahiti. ’Ua ri’ari’a roa māua e tātara ’e e hi’o i teie mau vaira’a mā’a, ’o te tupu mai te tahi fa’ahou ā pararera’a ma’i pohe ’ua fa’aru’e māite māua i teie mau tao’a ataata, e’ita ïa te ao e ’ati i teie mā’a ’ino, ’ua fa’a’orehia te reira.
Tē parau nei te tahi mau melo o te ’Ēkālesia ē, ’aita paha te mau fa’anahora’a ’e te mau tauiha’a tau rū, te ha’aputuputura’a mā’a ’e te pūtē fa’aora 72 hora i te mea faufa’a rahi i teienei, ’aita pa’i te mau Taea’e i paraparau rahi a’enei nō ni’a i te reira i roto i te ’āmuira’a rahi. ’Ua a’ohia rā e te feiā fa’atere o te ’Ēkālesia ’ia fa’aineine, fa’ahou ’e fa’ahou ā, e rave rahi ’ahuru matahiti te maoro. ’Ua riro te tāmau-noa-ra’a teie parau a’o a te mau peropheta, i te roara’a o te tau, ’ei reo ’āmui pūai ’e te pāpū, e fa’aarara’a pūai a’e ho’i i te mau a’ora’a ’ōtahi.
Mai te mau tau fifi e fa’a’ite i te tano-’ore-ra’a te fa’aineinera’a pae tino, mai te reira ato’a te mau ma’i nō te tāu’a-’ore-ra’a pae vārua ’e te mana’o vaiiho noa e ha’amāuiui nei i roto i te mau ’ati rahi. ’Ei hi’ora’a, tē ha’api’i nei tātou i roto i te parabole nō nā paretenia hō’ē ’ahuru ē, e hi’opo’ara’a manuia ’ore te hope’a o te fa’ataimera’a i te fa’aineinera’a. E ha’amana’o na i nā paretenia ma’ama’a e pae tei manuia ’ore i te fa’aineine tano nō te hi’opo’ara’a tei hōro’ahia ia rātou i te mahana nō te taera’a mai te tāne fa’aipoipo.
« ’O te feiā ma’ama’a ra, i hopoi atu ra i tā rātou mau lamepa, ’aita rā i hopoi ato’a i te mōrī.
« ’Āre’a te feiā pa’ari ra, ’ua hopoi i tā rātou mau lamepa ma te mōrī ato’a i roto i tā rātou mau fāri’i.
« Ē tae a’era i te tu’ira’a pō ra, ’o te pi’i mai ra, Inaha tē haere mai nei te tāne fa’aipoipo ’āpī nei, e haere ’outou ’ia fārerei atu iāna.
« ’Ua ti’a a’era te mau paretenia ato’a ra, ’ua fa’anehenehe ihora i tā rātou mau lamepa.
« ’Ua parau atu ra te feiā ma’ama’a ra i te feiā pa’ari, Hō mai i te tahi vāhi i tā ’outou mōrī na ; tē pohe nei ho’i tā mātou mau lamepa.
« ’Ua parau mai ra rā te feiā pa’ari, nā ’ō mai ra, ’Eiaha, ’o te ’ore ho’i ’o tē nava’i ’ia ’ōpere nā tātou ato’a ; e haere rā ’outou i te feiā ho’o ra ho’o atu ai i tā ’outou iho.
« ’E tē haere atu ra rātou e ho’o ra, tae mai ra taua tāne fa’aipoipo ’āpī ra, ’e te feiā i ineine ra, haere atu ra ïa ’e ’oia ato’a i roto i te ’ōro’a fa’aipoipora’a, ’e ’ōpanihia ihora te ’ūputa.
« E muri a’era, ’ua haere mai ra te tahi pae paretenia ra, ’ua nā ’ō mai ra, E te Fatu, e te Fatu, ’a ’īriti a’e na ia mātou ». 8
« ’Ua parau atu ra rā ’oia, nā ’ō atura, ’Aore au i ’ite ia ’outou, ’oia mau tā’u e parau atu ia ’outou na ». 9
I teie hi’opo’ara’a, ’ua ’itehia a’e i nā paretenia ma’ama’a ’ei ta’ata fa’aro’o noa i te parau ’aita rā e rave. 10
E hoa tō’u, e pīahi ha’apa’o roa i te fare ha’api’ira’a ture. I roto i te hō’ē tau ha’api’ira’a, ’ua tu’u Sam i te taime i te mau mahana ato’a nō te hi’o, nō te ha’apoto ’e nō te ’apo mai i te ha’api’ira’a i roto i te mea tāna i pāpa’i i roto i te ha’api’ira’a tāta’itahi tāna i haere. ’Ua nā reira ’oia nō tāna mau piha ha’api’ira’a ato’a i te mau hope’a hepetoma ato’a ’e i te mau ’āva’e ato’a. Maoti tāna fa’anahora’a ’oia i ha’api’i ai i te ture, e ’ere i te tāmau-noa-ra’a i te ha’api’ira’a. Tae mai nei te mau hi’opo’ara’a hope’a, ’ua ineine roa Sam. ’Oia mau, ’ua parau ’oia ē, te tau hi’opo’ara’a hope’a, ’o te tuha’a ha’ape’ape’a iti roa ïa o tāna tau ha’api’ira’a ture. ’O te fa’aineinera’a maita’i ’e te tano te ’ōmuara’a o te hi’opo’ara’a manuia.
’Ua riro te fa’anahora’a a Sam nō tāna tau ha’api’ira’a ture ’ei fa’a’itera’a i te mau fa’anahora’a mātāmua a te Fatu nō te tupura’a ’e te ha’amaita’ira’a. « Inaha ho’i tē nā ’ō mai ra te Fatu te Atua, E hōro’a vau i te mau fa’aue i te mau tamari’i a te ta’ata, ’e ’ua nā ni’a iho i te fa’aue, ’ua a’o, ’e ’ua nā ni’a iho i te a’o, te tahi vāhi iti i ’ō nei, ’e mai reira ho’i ’ei ’ō te tahi vāhi iti ; e ao tō rātou tē fa’aro’o i tā’u parau, ’e tē hōro’a i te tari’a i tā’u a’o ; e ha’api’i ho’i rātou i te parau pa’ari, nō te mea e hōro’a atu ā vau iāna i tei fāri’i mai ra ». 11
Tē ani nei au ia tātou tāta’itahi ’ia « ha’amana’o māite na i tō [tātou] mau haere’a » 12 ’e ’ia « ’imi māite ia [tātou] iho i tō [tātou] fa’aro’o ; ’e e hi’opo’a māite ia [tātou] iho ». 13 E aha tā tātou i ’apo mai i roto i te mau fa’atanora’a orara’a ’e te mau ’ōpanira’a i te mau ’āva’e i ma’iri a’enei ? E aha tei tītauhia ’ia ha’amaita’i i roto i tō tātou orara’a i te pae vārua, i te pae tino, i te pae sōtiare, i te pae manava ’e i te pae ferurira’a ? I teienei te taime nō te fa’aineine ’e nō te hi’opo’a māite i tō tātou ineine ’e te ’aravihi ’ia rave i te mau mea ato’a e fa’aue mai te Fatu tō tātou Atua.
Te hi’opo’a-māite-ra’a ’e te haere-ti’a-ra’a i mua
’Ua haere a’enei au i te hō’ē hunara’a o te hō’ē taure’are’a misiōnare tei pohe i roto i te hō’ē ’ati. ’Ua paraparau te metua tāne o te misiōnare i roto i te purera’a ’e ’ua fa’ati’a mai i te māuiui o tōna ’ā’au nō teie fa’ata’ara’a mana’o-’ore-hia i te tama, i te tāhuti nei. ’Aita ’oia i huna ē, ’aita ’oia i ta’a i te mau tumu ’e te taime nō taua huru ’ohipa ra. E ha’amana’o noa ato’a rā vau i teie ta’ata maita’i i te paraura’a ē, ’ua ’ite ’oia ē ’ua ’ite te Atua i te mau tumu ’e te taime nō te fa’aru’era’a mai tāna tama—’e ’ua nava’i te reira nōna. ’Ua parau ’oia i te ’āmuira’a ē, e mea maita’i ’oia ’e tōna ’utuāfare, noa atu ā te ’oto ; e vai pāpū noa te ’itera’a pāpū, ma te ’āueue ’ore. ’Ua fa’aoti ’oia i tāna mau parau i teie fa’a’itera’a : « ’Ua hina’aro vau ’ia ’ite ’outou ē, i te pae nō te ’evanelia a Iesu Mesia, e mea pāpū tō’u ’utuāfare tā’āto’a i reira. E mea pāpū mātou pā’āto’a i roto ».
Noa atu te mamae o te ’ā’au ’e te pa’ari nō te mo’era’a tei herehia, ’ua ineine te mau melo o teie ’utuāfare itoito i te pae vārua, nō te fa’a’ite ē e ti’a ia rātou ’ia ’apo mai i te mau ha’api’ira’a faufa’a mure ’ore i roto i te mau mea tā rātou e māuiui. 14
E ’ere te ha’apa’o maita’i i te ’ohipa ma’ama’a ’e te tahi ma’ama’ara’a ’Aita ; ’o te ti’aturira’a rā ’e te tu’ura’a i te ti’aturi i ni’a ia Iesu Mesia ’ei Fa’aora nō tātou, i ni’a i tōna i’oa ’e i ni’a i tāna i parau mai. ’A « haere ti’a [ai tātou] i mua i te ti’a-māite-ra’a i te Mesia, ma te tīa’i pāpū roa, ’e te here i te Atua ’e te ta’ata ato’a », 15 e ha’amaita’ihia tātou i te hi’ora’a mure ’ore ’e te ’itera’a i te mau mea i’ō atu i tō tātou ’aravihi tāhuti ’e te piriha’o. E fāri’i tātou i te ’aravihi nō te « putuputu mai i te vāhi hō’ē, ’e ’ia ti’a mai i te mau vāhi mo’a ra » 16 ’e « ’eiaha ’ia fa’anu’u-’ē-hia atu, ē tae noa atu i te mahana o te Fatu e tae mai ai ». 17
’A tāvini ai au ’ei peresideni nō Brigham Young University–Idaho, ’ua haere mai Elder Jeffrey R. Holland i te fare ha’api’ira’a i te ’āva’e Tītema 1998 nō te paraparau i roto i te hō’ē o tā mātou mau purera’a hepetoma. ’Ua tītau manihini māua Susan i te hō’ē pupu pīahi ’ia fārerei ’e ’ia paraparau ia Elder Holland nā mua a’e tāna a’ora’a. ’A fātata ai te taime nō te fārereira’a, ’ua ui au ia Elder Holland : « Mai te mea hō’ē noa a’e ha’api’ira’a tā ’oe i teie nau pīahi, e aha ïa te reira ? »
’Ua pāhono mai ’oia :
« Tē ’itehia nei te ’ū’anara’a te fa’ata’a-’ē-ra’a i nā pae e piti. ’Aita fa’ahou terā mau ti’ara’a rōpū nō tātou te feiā mo’a. E ’īritihia te rōpūra’a o te purōmu.
« Mai te mea e pāinu noa ’oe i roto i te ’ōpape, e tāpae ’oe i te hō’ē vāhi. E tāpae ’oe i te vāhi e ’āfa’i te ’ōpape ia ’oe. E’ita e nava’i e pe’e noa i te tahera’a o te pape, e pe’e i te nanumiti, e pāinu i roto i te ’ōpape.
« Tītauhia ’ia mā’iti. Te ’orera’a e mā’iti, e mā’itira’a ato’a ïa. ’A ha’api’i ’ia mā’iti i teienei ».
’Ua riro roa mai teie parau a Elder Holland nō ni’a i te ’ū’anara’a te fa’ata’a-’ē-ra’a i nā pae e piti ’ei parau tohu, ’ia hi’ohia te huru o te sōtaiete ’e te mau ’ohipa i tupu mai te taime ’a pāhono mai ai ’oia i tā’u uira’a, ’a 22 matahiti i teienei. ’A tohu ātea ai Elder Holland nō ni’a i te ’ū’anara’a te ta’a-’ē-ra’a i roto i te haere’a a te Fatu ’e te haere’a a tō te ao nei, ’ua fa’aara mai ’oia ē, tē mōrohi ’oi’oi ra te mau mahana e mea ’ōhie ’ia ta’ahi te hō’ē ’āvae i roto i te ’Ēkālesia tei fa’aho’ihia mai ’e te tahi i roto i te ao. Tē fa’aitoito ra teie tāvini a te Fatu i te feiā ’āpī ’ia mā’iti, ’ia fa’aineine ’e ’ia riro mai ’ei pipi ’o tē pūpū iāna iho i te Fa’aora. Tē tauturu ra ’oia ia rātou ’ia fa’aineine ’e ’ia haere ti’a i mua nā roto i te mau ’ohipa tāmata ’e te hi’opo’a ’e te perehahu o tō rātou orara’a.
Te parau fafau ’e te ’itera’a pāpū
’Ua riro te ’ohipa tau maoro nō te hi’opo’ara’a ia tātou iho ’ei tuha’a faufa’a tumu nō te fa’anahora’a rahi ’oa’oa a te Metua i te Ao ra. Tē parau fafau nei au ē, ’a fa’aineine ai tātou ’e ’a haere ti’a ai i mua ma te fa’aro’o i te Fa’aora, e ti’a ia tātou pā’āto’a ’ia fāri’i i taua nota hope’a o te tāhuti nei, ’oia ho’i : « ’Ua ti’a roa, e teie nei tāvini maita’i ’e te ha’avare ’ore : ’o ’oe i ha’apa’o maita’i i tenā nā tao’a iti ha’iha’i, e fa’ati’a’au atu vau ia ’oe i ni’a iho i te mea rahi : e haere ’oe i roto i te ’ōro’a ’oa’oara’a a tō fatu ». 18
Tē fa’a’ite nei au ē, ’o te Atua te Metua mure ’ore tō tātou Metua. ’O Iesu Mesia tāna Tamaiti fānau tahi ’e te ora, tō tātou Fa’aora ’e te Tāra’ehara. Ma te ’oa’oa, tē fa’a’ite pāpū nei au nō teie mau parau mau, i te i’oa mo’a o te Fatu Iesu Mesia, ’āmene.