Te mau tuahine nō Ziona
E riro ’outou ’ei pūai faufa’a roa i roto i te ha’aputuputura’a ia ’Īsera’ela ’e i roto i te fa’ati’ara’a i te nūna’a ’o Ziona.
E au mau tuahine here, ’ua ha’amaita’ihia vau ’ia paraparau i roto i teie taime nehenehe roa i roto i te ’ā’amu o te ao nei. I te mau mahana ato’a, tē fātata nei tātou i te taime hanahana e ho’i fa’ahou mai ai te Fa’aora ’o Iesu Mesia i ni’a i te fenua nei. ’Ua ’ite tātou i te hō’ē mea nō ni’a i te mau mea ri’ari’a e tupu hou tōna taera’a mai, noa atu rā i te reira, tē ’ī nei tō tātou ’ā’au i te oa’oa ’e te ti’aturi ato’a nō te mau parau fafau hanahana ’o tē tupu hou ’a ho’i mai ai ’oia.
’Ei mau tamāhine herehia nā tō tātou Metua i te ao ra, ’e ’ei mau tamāhine nā Iesu Mesia i roto i tōna bāsileia, 1 e ’ohipa faufa’a rahi tā ’outou i roto i te mau tau rarahi e tae mai. ’Ua ’ite tātou ē, e haere mai te Fa’aora i te hō’ē nūna’a tei ha’aputuputuhia ’e tei ineine nō te ora mai tā te nūna’a i rave i roto i te ’oire ’o Enoha. ’Ua hō’ē te ta’ata i reira i roto i te fa’aro’o ia Iesu Mesia ’e ’ua riro mai ’ei mau ta’ata mā, nō reira rātou i tāhitihia ai i te ra’i.
Teie te tātarara’a fa’auruhia mai a te Fa’aora nō ni’a i te mea e tupu i ni’a i te mau ta’ata ’o Enoha, ’e te mau mea e tupu i roto i teie tau tu’ura’a hope’a o te ’īra’a o te mau tau :
« ’E e tae mai te mahana e fa’afa’aea ai te ao nei ; nā mua rā i taua mahana ra, e ha’apō’irihia te mau ra’i, ’e e tāpo’ihia te fenua e te hō’ē pāruru pō’iri ; ’e e ’āueue te mau ra’i, ’e te fenua ato’a ra, ’e e tupu te ahoaho rahi i rotopū i te mau tamari’i a te ta’ata,āre’a rā, e fa’aherehere au i tō’u feiā mā’itihia ;
« ’E te parauti’a, o tā’u ïa e fa’atae atu i raro nō te ra’i mai ; ’e te parau mau, ’o tā’u ato’a ïa e fa’atae atu nō roto mai i te fenua ’ei fa’a’ite i te parau nō tā’u ra Fānau Tahi ’oia ho’i tōna ti’afa’ahoura’a mai te pohe mai ; ’oia ïa, ’e te ti’afa’ahoura’a o te mau ta’ata ato’a ; ’e te parauti’a ’e te parau mau ’o tā’u ïa e ha’aparare i te fenua ato’a mai te diluvi te huru, nō te ha’aputuputu mai i tā’u i mā’iti mai nā poro e maha o te ao nei, i te hō’ē vāhi tā’u e fa’aineine, ’ei ’oire mo’a, ’ia ti’a i tō’u ra mau ta’ata ’ia tātua i tō rātou ra tauupu, ma te hi’o i mua i te taime o tō’u haerera’a mai e i reira ho’i tō’u ra sekene, ’e e parauhia ïa ’o Ziona, te Ierusalema ’āpī.
« ’E ’ua parau mai ra te Fatu ia Enoha : ’Ei reira ’oe ’e tō ’oe ato’a ra ’oire e fārerei atu ai ia rātou, ’e e fāri’i tātou ia rātou i roto i tō tātou ’ōuma, ’e e ’ite rātou ia tātou ; ’e e ma’iri tātou i ni’a iho i tō rātou a’i, ’e e ma’iri mai ho’i rātou i ni’a iho i tō tātou a’i, ’e e ’āpā tātou te tahi i te tahi ;
’E ’ei reira tō’u pārahira’a, ’o Ziona ïa, ’o tē tae mai nō roto mai i te mau mea ato’a tā’u i hāmani ra ; ’e nō te tau ’e hō’ē tauatini matahiti e fa’afa’aea ai te ao nei ». 2
’Outou e te mau tuahine, tā ’outou mau tamāhine, tā ’outou mau mo’otua tamāhine, ’e te mau vahine tā ’outou i fa’a’amu, e vai ’outou i te pū mau o te fa’ati’ara’a i taua tōtaiete ta’ata ra ’o tē ’āmui i roto i te ’āpitira’a hanahana ’e te Fa’aora. E riro ’outou ’ei pūai faufa’a i roto i te ha’aputuputura’a ia ’Īsera’ela ’e i roto i te fa’ati’ara’a i te mau ta’ata o Ziona o tē pārahi i roto i te hau i roto i te Ierusalema ’āpī.
Nā roto i tāna mau peropheta, ’ua tu’u mai te Fatu i te hō’ē parau fafau ia ’outou. I te mau mahana mātāmua o te Sōtaiete Tauturu, ’ua parau te peropheta Iosepha Semita i te mau tuahine, « Mai te mea e ora ’outou i te fāito o tā ’outou mau faufa’a ta’a ’ē, e’ita e mau ’ia tāpe’a i te mau melahi ’ia riro ’ei mau ’āpiti nō outou ». 3
Tē vai nei tāua pūai nehenehe ra i roto ia ’outou, ’e ’ua ineine ’outou nō te reira.
’Ua parau mai te peresideni Gordon B. Hinckley ē :
« ’Outou e te mau tuahine… ’aita ’outou e mau nei i te ti’ara’a iti a’e i roto i te fa’anahora’a a tō tātou Metua nō te ’oa’oara’a mure ’ore ’e te orara’a maita’i o tāna mau tamari’i. E tuha’a faufa’a rahi mau ’outou nō taua fa’anahora’a ra.
« ’Ia ’ore ’outou e’ita ïa te fa’anahora’a e tere. ’Ia ’ore ’outou e’ita ïa te tā’āto’ara’a o te fa’anahonahora’a e manuia.
« E tamāhine ’outou tāta’itahi nā te Atua, tei fāri’i i te hō’ē ti’ara’a matahiapo hanahana ». 4
Tō tātou peropheta i teie taime, te peresideni Russell M. Nelson, ’ua hōro’a mai ’oia i teie fa’ata’ara’a o te tuha’a tā ’outou e rave i roto i te fa’aineinera’a i te taera’a mai te Fa’aora:
« E’ita e ti’a ’ia fāito i te fa’aurura’a e vai ra i roto i te mau vahine, ’eiaha i ni’a noa i te mau ’utuāfare, i ni’a ato’a rā i te ’Ēkālesia a te Fatu, ’ei mau vahine fa’aipoipo, ’ei mau metua vahine ’e ’ei mau metua vahine tupuna ; ’ei mau tuahine ’e ’ei mama fēti’i ; ’ei orometua ha’api’i ’e ’ei ti’a fa’atere ; ’e ’ei mau hi’ora’a iho ā rā, ’e ’ei mau pāruru pāpū nō te fa’aro’o.
« ’Ua ’itehia te reira huru i roto i te mau tau tu’ura’a ’evanelia ato’a mai te tau mai ’o Adamu ’e ’o Eva. Terā rā, e mea ta’a ’ē te mau vahine o teie tau tu’ura’a i te mau vahine o te tahi atu huru tau tu’ura’a, nō te mea, e mea ta’a ’ē teie tau tu’ura’a i te tahi atu mau tau tu’ura’a. Nā teie ta’a-’ē-ra’a e hōro’a mai i te mau ha’amaita’ira’a ’e i te mau hōpoi’a ». 5
E mea ta’a ’ē teie tau tu’ura’a i te mea ē, e arata’i te Fatu ia tātou ’ia ineine ’ia riro mai te ’oire ’o Enoha. Nā roto i tāna mau ’āpōsetolo ’e tāna mau peropheta, ’ua fa’ata’a mai ’oia i te ’ohipa e tupu mai, nā roto i taua tauira’a ra ’ei nūna’a nō Ziona.
‘Ua ha’api’i mai ’o Elder Bruce R. McConkie ē :
« ’Ua riro te ’anotau o Enoha ’ei ’anotau nō te parauti’a ’ore ’e te ’ino, e ’anotau nō te pō’iri ’e te ’ōrurehau, e ’anotau nō te tama’i ’e te anoano, e ’anotau nō te tāmāra’a i te fenua i te pape.
« Terā rā, ’ua ha’apa’o maita’i noa ’o Enoha. ’Ua ‘’ite ’oia i te Fatu’, ’e ’ua paraparau iāna, ‘mata ’e mata’ mai te hō’ē ta’ata e paraparau i te tahi atu ta’ata.(Mose 7:4). ’Ua tono te Fatu iāna ’ia tuō i te tātarahapa i tō te ao, ’e ’ua fa’aue iāna ’ia ‘bāpetizo i roto i te i’oa ’o te Metua ’e ’o te tamaiti, tei ’ī i te aroha ’e te parau mau, ’e ’o te Vārua Maita’i, tei fa’a’ite pāpū i te Metua ’e te Tamaiti.’(Mose 1:39). ’Ua rave Enoha i te mau fafaura’a ’e ’ua ha’aputuputu i te hō’ē ’āmuira’a o te feiā ti’aturi mau, ’o rātou pā’āto’a ’ua riro mai ’ei feiā ha’apa’o maita’i, i haere mai ai te Fatu e pārahi i rotopū i tōna mau ta’ata, ’e ’ua ora rātou i roto i te parauti’a, ’e ’ua ha’amaita’ihia mai te ra’i mai. ‘’E ma’iri ihora te Fatu i te i’oa o tōna ra feiā ’o Ziona, nō te mea hō’ē ā tō rātou ’ā’au ’e hō’ē ā tō rātou mana’o, ’e ’ua pārahi ho’i rātou ma te parauti’a ; ’e ’aore e ta’ata veve i rotopū ia rātou.’(Mose 7:18) […]
« I muri a’e i tō te Fatu pi’ira’a i tōna mau ta’ata ’o Ziona, tē parau ra te pāpa’ira’a ē, ’ua ‘patu ’o Enoha i te hō’ē ’oire tei parauhia te ’oire nō te mo’ara’a, ’o Ziona’ ; ’ua hōpoi-’ē-hia te reira Ziona i te ra’i ra’ i reira ’ua fāri’ihia mai ïa i ni’a e te Atua i roto i tōna iho ra ’ōuma ; ’e mai reira atu ho’i te parau ē, ’ua reva ’o Ziona.’ (Mose 7:19, 21, 69) […]
« Taua Ziona ra tei hōpoihia i ni’a i te ra’i ra, e ho’i fa’ahou mai ïa ’ia fa’aho’i fa’ahou ana’e mai te Fatu ia Ziona, ’e e ’āmui mai tōna mau ta’ata i te Ierusalema ’āpī, ’o tē ha’amauhia i reira ». 6
Mai te mea e ’ōmuara’a te tau nō mūta’a iho ra, ’ia tae i te taime nō te ho’ira’a mai te Fa’aora, te mau tamāhine tei ha’apa’o hōhonu i tā rātou fafaura’a i te Atua, e hau atu ïa rātou i te ’āfara’a o rātou ’o tei ineine nō te fāri’i iāna ’ia tae mai ’oia. Ta’a ’ē noa atu rā te mau nūmera, tā ’outou tauturura’a i te fa’atupura’a i te tāhō’ēra’a i rotopū i te mau ta’ata tei ineine nō te reira Ziona, e rahi atu ïa i te ’āfara’a.
E parau atu vau ia ’outou nō te aha mai te reira ai. Tē hōro’a nei te Buka a Moromona i te hō’ē ’ā’amu nō te hō’ē nūna’a Ziona. Tē ha’amana’o ra ’outou ē, i muri a’e i tō rātou ha’api’ira’ahia, herera’ahia, ’e ha’amaita’ira’ahia nā te Fa’aora tei ti’afa’ahou ē « nō te aroha o te Atua tei roto i te ’ā’au o te mau ta’ata, ’aore atura e mārōra’a i te fenua ra ». 7
’Ua ha’api’i mai tō’u mau ’itera’a iā’u ē, e hōro’a tō te mau tamāhine a te Metua i te ao ra nō te tāmarū i te mārōra’a ’e nō te fa’atupu i te parauti’a nā roto i tō rātou here i te Atua ’e nā roto i te here o te Atua tā rātou e fa’atupu i roto i te feiā tā rātou e tāvini.
’Ua ’ite au i te reira i roto i tō’u ’āpīra’a ’a putuputu ai tā mātou ’āma’a iti i roto i tō mātou fare. ’O māua ana’e tō’u taea’e tei mau i te autahu’ara’a a Aarona, ’e tō’u ana’e metua tāne tei mau i te autahu’ara’a a Melehizedeka. Te peresideni nō te Sōtaiete Tauturu e vahine fa’afāriuhia mai ïa, ’e ’aita tāna tāne fa’aipoipo i māuruuru roa i tāna ’ohipa i roto i te ’Ēkālesia. Te mau melo, e mau tuahine pa’ari ana’e ïa ’aita e taea’e autahu’ara’a i roto i tō rātou ’utuāfare. ’Ua hi’o vau i tō’u metua vahine ’e i terā mau tuahine ’ia here, ’ia fa’ateitei ’e ’ia ’atu’atu te tahi i te tahi ma te hape ’ore. Tē ’ite nei au i teienei ē, ’ua hōro’ahia mai iā’u te hō’ē ’itera’a mātāmua nō Ziona.
’Ua tāmau noa tā’u ha’api’ipi’ira’a nō ni’a i te mana o te mau vahine ha’apa’o maita’i i roto i te hō’ē ’āma’a na’ina’i a te ’Ēkālesia i Albuquerque, Niu Mehico. ’Ua māta’ita’i au i te vahine a te peresideni ’āma’a, te vahine a te peresideni mata’eina’a, ’e te peresideni nō te Sōtaiete Tauturu ’ia tāmāhanahana i te ’ā’au o te mau ta’ata ’āpī ato’a e haere mai ’e te mau ta’ata fa’afāriuhia. I te sābati ’a fa’aru’e ai au ia Albuquerque, i muri a’e e piti matahiti i te hi’opo’a-noa-ra’a i te mana fa’auru o te mau tuahine i reira, ’ua fa’ati’ahia te titi mātāmua. I teienei, ’ua tu’u te Fatu i te hō’ē hiero i reira.
I muri iho haere atura vau i Boston, i reira tō’u tāvinira’a i roto i te peresidenira’a mata’eina’a e fa’atere ra i te mau ’āma’a na’ina’i i roto e piti tuha’a fenua. Tē vai ra te mau mārōra’a tei fa’a’āfarohia hau i te hō’ē taime nā te mau vahine here ’e te fa’a’orera’a hapa, tei tauturu ’ia tāmarū i te mau ’ā’au. I te sābati ’a fa’aru’e ai au ia Boston, ’ua fa’atupu te hō’ē melo o te Peresidenira’a Mātāmua i te titi mātāmua i Massachusetts. Tē vai ra hō’ē hiero i reira i teienei, e mea piri atu i te vāhi i orahia e te peresideni mata’eina’a i te hō’ē taime. ’Ua arata’ihia mai ’oia i roto i te ’ohipara’a a te ’Ēkālesia, ’e i muri a’e, ’ua pi’ihia ’ia tāvini ’ei peresideni titi, ’e i muri iho, ’ei peresideni misiōni, ma te fa’auruhia e te hō’ē vahine ha’apa’o maita’i ’e te here.
E te mau tuahine, ’ua hōro’ahia ia ’outou te ha’amaita’ira’a nō te rirora’a ’ei mau tamāhine nā te Atua ma te mau hōro’a ta’a ’ē. ’Ua ta’ita’i mai ’outou nā muri iho ia ’outou i roto i te orara’a tāhuti nei, i te hō’ē ’aravihi pae vārua nō te fa’a’amu ia vetahi ’ē ’e nō te fa’ateitei ia rātou e tae atu ai i te here ’e te vi’ivi’i ’ore ’o tē fa’ati’a ia rātou ’ia ora ’āmui i roto i te hō’ē tōtaiete Ziona. E ’ere mai terā noa tō te Sōtaiete Tauturu, te pupu mātāmua ta’a ’ē a te ’Ēkālesia nō te mau tamāhine a te Metua i te ao ra, ravera’a i te parau tumu « E ’ore roa te aroha e mou ».
Te aroha, ’o te hina’aro mau ïa i te Mesia. ’E nā te fa’aro’o iāna ’e te mau ’ohipara’a hope o tāna tāra’ehara hope’a ’ore e fāri’i ai ’oe, ’e ’o rātou tā ’oe e here nei ’e e tāvini nei, i te hōro’a nō te ra’i, ’ia ora i roto i taua huru tōtaiete nō Ziona ra tei tīa’i ’e tei fafau maorohia. I reira, e riro ’outou ’ei mau tuahine i Ziona, tei here-tino-hia e te Fatu ’e ’o rātou ho’i ’o tā ’outou i ha’amaita’i.
Tē fa’a’ite pāpū nei au ē, e mau ta’ata ’ai’a ’outou nō te bāsileia o te Atua i ni’a i te fenua nei. E mau tamāhine ’outou nō te hō’ē Metua here i te ao ra, tei tono mai ia ’outou i roto i te ao nei ma te mau hōro’a hō’ē roa, tā ’outou i fafau e fa’a’ohipa nō te ha’amaita’i ia vetahi ’ē. Tē fafau atu nei au ia ’outou ē, e arata’i te Fatu ia ’outou nā te rima, nā roto i te Vārua Maita’i. E haere ’oia nā mua i tō ’outou mata ’a tauturu ai ’outou iāna ’ia fa’aineine i tōna mau ta’ata ’ia riro mai ’ei Ziona fafauhia nōna. Tē fa’a’ite pāpū nei au i te reira i te i’oa mo’a ’o Iesu Mesia, ’āmene.