Haerera’a i mua
E haere tāmau noa te ’ohipa a te Fatu i mua.
E tō’u mau taea‘e ’e mau tuahine here, ’auē te ’oa’oa ’ia tae mai i rotopū ia ’outou i te ’ōmuara’a ’o te 190ra’a o te ’āmuira’a rahi ’āfa matahiti a te ’Ēkālesia a Iesu Mesia i te Feiā Mo’a i te mau Mahana Hope’a nei. E mea au nā’u ’ia ’āmui ia ’outou i roto i tō ’outou ’utuāfare ’aore rā, i te mau huru vāhi ato’a tei reira ’outou, nō te fa’aro’o ’āmui i te mau parau poro’i a te mau peropheta, te mau hi’o, ’e te mau heheu parau, ’e te tahi atu mau ti’a fa’atere o te ’Ēkālesia.
E māuruuru rahi tō tātou nō te mau rāve’a ’āpī o teie tau, e ti’a ai ia tātou ’ia tū’atihia ’ei hō’ē ta’irurura’a rahi ’ati a’e te ao nei o te mau pipi a Iesu Mesia. Te rahira’a ta’ata tei māta’ita’i i te ’āmuira’a rahi nō ’Ēperēra i ma’iri a’e nei, ’ua hau atu ïa i tō te mau ’āmuira’a ato’a nā mua atu, ’e tē feruri nei mātou ē, e tupu fa’ahou ā te reira.
I roto i te mau ’āva’e i ma’iri a’e nei, ’ua fa’atupu te hō’ē ma’i pe’e ’ati a’e te ao nei, te mau ’ati auahi ’ū’ana ’e te tahi atu mau ’ati ’o te nātura, i te ’ārepurepu rahi i roto i tō tātou nei ao. Tē ’oto nei au ’e ’o ’outou tāta’itahi tei mo’e te hō’ē tei herehia e ’outou i roto i teie pu’e tau. ’E tē pure nei au nō te tā’āto’ara’a e māuiui nei i teie taime.
Noa atu rā te reira, tē haere pāpū noa nei te ’ohipa a te Fatu i mua. I roto i te fa’aāteateara’a, te pāruru vaha, te putuputura’a nā ni’a i te Zoom, ’ua ha’api’i tātou ’ia rave i te tahi mau ’ohipa ma te ta’a ’ē, ’e ma te maita’i atu te tahi atu mau ’ohipa. E nehenehe te mau taime mātaro-’ore-hia e hōro’a mai i te ha’amāuruurura’a mātaro-’ore-hia.
’Ua māramarama i tō tātou mau misiōnare ’e te mau fa’atere misiōni, te pūai ’e te fa’ahiahia mau. Noa atu ē, ’ua tītauhia i te rahira’a o te mau misiōnare ’ia ’imi i te mau rāve’a ’āpī nō te rave i tā rātou ’ohipa, e rave rahi misiōni tei fa’a’ite mai ē, ’ua hau tā rātou ha’api’ira’a i tei nā mua a’e nei.
’Ua tītauhia ia tātou ’ia tāpiri i te mau hiero nō te hō’ē tau, ’e ’ua fa’atāerehia te tahi mau ’ohipa hāmanira’a, i teienei rā, tē tere nei te mau ’ohipa ato’a. I te matahiti 2020, e fa’atupuhia te tāpūra’a repo nō e 20 hiero ’āpī !
’Ua tere maita’i te ’ohipa ’ā’amu ’utuāfare. ’Ua fa’ati’ahia e rave rahi pāroita ’e te titi ’āpī. ’E tē ’oa’oa nei mātou ’ia fa’a’ite atu ē, ’ua hōro’a te ’Ēkālesia i te tauturu nō teie ma’i pe’e i te tauturu i te mau ta’ata nō e 895 ’ōpuara’a i roto e 150 fenua.
Nā roto i te mara’ara’a te tuatāpapara’a ’evanelia i roto e rave rahi ’utuāfare, ’ua ’itehia te mau ’itera’a pāpū ’e te mau autā’atira’a ’utuāfare pa’ari a’e. ’Ua pāpa’i te hō’ē metua vahine ē : « ’Ua hau a’e tō māua ha’afātatara’a i tā māua mau tamari’i ’e te mau mo’otua i teienei, i te mea ē, tē ha’aputuputu nei mātou nā ni’a i te fa’anahora’a Zoom i te mau sābati ato’a. E paraparau rātou te tahi i muri i te tahi nō te fa’a’ite i tō rātou mau mana’o nō ni’a i te Mai, pe’e mai. ’Ua taui tā māua mau pure nō te mau melo o te ’utuāfare nō te mea, ’ua māramarama a’e māua e aha tō rātou mau hina’aro ».
Tē pure nei au ē ’ia fa’a’ohipa tātou i teie taime ta’a ’ē nō te tupu i te rahi i te pae vārua. Tei ni’a tātou i te fenua nei ’ia tāmatahia, ’ia ’ite ē, e mā’iti ānei tātou e pe’e ia Iesu Mesia, e tātarahapa tāmau, e ha’api’i mai, ’e e haere i mua. Tē hina’aro nei tō tātou vārua e haere i mua. ’E e rave maita’i a’e tātou i te reira nā roto i te ti’a-pāpū-ra’a i ni’a i te ’ē’a nō te fafaura’a.
Tē here nei tō tātou Metua i te ao ra ’e tāna tamaiti ’o Iesu Mesia ia tātou, nā roto i te reira mau mea ato’a. Tē ha’apa’o nei rāua ia tātou ! Tē ara nei rāua ’e tā rāua mau melahi mo’a i ni’a ia tātou. 1 ’Ua ’ite au e parau mau te reira.
’A putuputu ai tātou nō te fa’aro’o i te mau parau tā te Fatu i fa’auru i tōna mau tāvini ’ia vauvau atu, tē ani manihini nei au ia ’outou ’ia feruri i te hō’ē parau fafau tā te Fatu i rave. ’Ua parau ’oia ē, « te feiā ato’a e tāpe’a i ni’a i te parau a te Atua, ’o te mea ora ïa, ’e te pūai hoʻi, ’o te fa’ata’a ’ē i te mau ha’avāre… ’e te mau marei a te diabolo, ’e e arata’ihia ai te [pipi] a te Mesia nā taua ’ē’a apiapi ’e te piriha’o ra ». 2
Tē pure nei au ’ia mā’iti ’outou e tāpe’a i ni’a i te parau a te Atua mai tei hōhorahia atu i roto i teie ’āmuira’a rahi. ’E tē pure nei au ē ’ia fāri’i ’outou i te here maita’i roa o te Fatu nō ’outou, 3 nā roto i te i’oa mo’a ’o Iesu Mesia ra, ’āmene.