Jonah on the Beach at Nineveh [’O Iona i te pae tahatai i Nineve], nā Daniel A. Lewis

21–27 nō Novema

Iona ; Mika

« E mea au iāna te aroha »

’A pāpa’i ai ’outou i tō ’outou mau mana’o, ’a feruri e nāhea te mau parau tumu i roto ia Iona ’e ia Mika e tū’ati ai i te mea tā ’outou i ha’api’i mai i roto i te mau pāpa’ira’a mo’a.

Pāpa’i i te mau mana’o e tae mai

Tei ni’a iho ’o Iona i te hō’ē pahī tē tere ra i Taresisa. ’Aita e fifi te fanora’a i Taresisa, terā noa rā, e mea ātea roa ia Ninive, i reira ho’i Iona e haere ai e fa’a’ite i te parau poro’i a te Atua. Nō reira, i te fa’arurura’a te pahī i te hō’ē vero rahi, ’ua ta’a ia Iona ē, nō tōna ha’apa’o ’ore. Nō te anira’a onoono a Iona, ’ua huri tōna mau hoa horo pahī iāna i raro roa i te moana nō te tāpe’a i te vero. I mana’ohia ē, ’o te hope’a ïa ’o Iona ’e tāna tāvinira’a. ’Aita rā te Fatu i fa’aru’e ia Iona—mai iāna i ’ore i fa’aru’e i te mau ta’ata nō Ninive, ’e mai iāna ho’i e ’ore e fa’aru’e i te hō’ē o tātou. Mai tā Mika i ha’api’i mai, e ’ere te mea au i te Fatu i te fa’ahapa ia tātou, terā rā, « e mea au iāna te aroha ». ’Ia fāriu ana’e tātou i ni’a iāna, « e fāriu fa’ahou mai ’oia, e aroha fa’ahou mai ā ’oia ia tātou ; ’e tinai mai ā ’oia i tō tātou ’ino ; ’e fa’aru’e pā’āto’a [’oia] i tā [tātou] hara i raro roa i te moana ra » (Mika 7:18–19).

Nō te hō’ē hi’ora’a rere ā manu nō te mau buka a Iona ’e a Mika, ’a hi’o « Iona » ’e « Mika » i roto i te arata’i nō te mau pāpa’ira’a mo’a.

Mau mana’o nō te tuatāpapara’a pāpa’ira’a mo’a a te ta’ata hō’ē

Iona 1–4 ; Mika 7:18–19

E aroha te Fatu i te feiā ato’a e fāriu iāna ra.

Ta’a ’ē atu i te tahi mau mea, tē fa’a’ite nei te buka a Iona ē, e aroha rahi tō te Fatu ’ia tātarahapa ana’e tātou. ’A tai’o ai ’oe i te Iona, ’a ’imi i te mau hi’ora’a nō tōna aroha. ’A feruri na e mea nāhea tō ’oe ’itera’a i te reira aroha i roto i tō ’oe orara’a. E aha tā ’oe e ha’api’i mai nei ’o tē nehenehe e tauturu ia ’oe ’ia fa’a’ite i te aroha rahi a’e ia vetahi ’ē ?

Te ’itera’a i te aroha o te Fatu e mea pinepine te reira i te fa’auru mai i te mau mana’o nō te here ’e te māuruuru. Terā rā, « māuiui roa a’e ra » ’o Iona ’e te « riri rahi » (Iona 4:1) i te fa’a’itera’a te Fatu i te aroha i te mau ta’ata nō Ninive, ’o te enemi ho’i rātou nō ’Īserā’ela. Nō te aha ’o Iona i feruri ai mai te reira ? ’Ua tupu a’ena ānei te reira mau huru mana’o i roto ia ’oe ? I tō ’oe mana’o e aha tā te Fatu i tāmata i te tauturu ia Iona ’ia māramarama i roto i te pene 4 ?

’A feruri i te mau ha’api’ira’a i roto i te Mika 7:18–19. ’Ua nāhea pa’i teie mau parau mau i te tauturura’a ia Iona ’ia taui i tōna huru nō ni’a i te Fatu ’e nō ni’a i te mau ta’ata nō Ninive ?

’A hi’o ato’a Luka 15:11–32 ; Jeffrey R. Holland, « The Justice and Mercy of God [Te parau-ti’a ’e te aroha o te Atua] », Ensign, Tetepa 2013, 16–21.

E nehenehe tātou e fa’a’ite i te ’evanelia i te mau tamari’i a te Atua.

Iona 1 ; 3–4

E mea tītauhia i te mau tamari’i ato’a a te Atua ’ia fa’aro’o i te ’evanelia.

E tuha’a o Ninive nō te hau ’ēmēpera nō Asuria, e ’enemi nō ’Īserā’ela tei tu’iro’o nō tōna ha’avī ’ū’ana ’e te aroha ’ore. Nō Iona, mai te huru ē, ’aita roa atu te mau ta’ata nō Ninive i ineine nō te fāri’i i te parau nā te Atua ’e ’ia tātarahapa. Terā rā, mai tā te peresideni Dallin H. Oaks i ha’api’i mai : « ’Eiaha roa atu tātou e fa’ariro ia tātou ’ei ha’avā ē ’o vai tei ineine ’e ’o vai tei ineine ’ore. ’ore. ’Ua ’ite te Fatu i te ’ā’au o te tā’āto’ara’a o tāna mau tamari’i, ’e mai te mea e pure tātou nō te fa’aurura’a, e tauturu ïa ’oia ia tātou ’ia ’imi i te mau ta’ata tāna i ’ite ‘tei ineine i te fa’aro’o i te parau’ (Alama 32:6) » (« Fa’a’ite i te ’evanelia tei fa’aho’i-fa’ahou-hia mai », Ensign ’aore rā Liahona, Novema 2016, 58–59). E aha tā ’oe i ha’api’i mai i roto i te Iona 3 ’o tē fa’auru ia ’oe ’ia fa’a’ite i te ’evanelia, ’e tae roa atu i te feiā tei hi’ohia ē, ’aita i ineine nō te taui ?

E mea maita’i paha ’ia fa’aau i te huru o Iona (’a hi’o Iona 1 ; 3–4) i te mau mana’o o Alama ’e te mau tamaiti a Mosia (’a hi’o Mosia 28:1–5 ; Alama 17:23–25).

’A hi’o ato’a 3 Nephi 18:32.

Mika 4:11–13 ; 5:8–15 ; 7:5–7

’Ua fa’ahiti ’o Iesu Mesia i te mau pāpa’ira’a a Mika.

’Ua mātau maita’i ē, ’ua fa’ahiti te Fa’aora ia Isaia ’e i te Salamo. ’Ua ’ite ānei rā ’oe ē, ’ua fa’ahiti ato’a ’oia ia Mika e rave rahi taime ? ’A hi’o i te mau hi’ora’a i muri nei, ’e ’a feruri ē, nō te aha te Fa’aora i ha’afaufa’a ai i teie mau ’īrava. Nō te aha e mea faufa’a te reira nō ’oe ?

Mika 4:11–13 (’a hi’o 3 Nephi 20:18–20). Tē fa’aau nei te Fatu i te ha’aputuputura’a i te mau mahana hope’a nei mai te ’ō’otira’a tītona (’a hi’o ato’a Alama 26:5–7 ; Te Parau Ha’api’ira’a ’e te mau Parau Fafau 11:3–4). E aha tā teie fa’aaura’a e fa’a’ite mai nei ia ’oe nō ni’a i te ha’aputuputura’a o ’Īserā’ela ?

Mika 5:8–15 (’a hi’o 3 Nephi 21:12–21). E aha tā teie mau ’īrava e fa’a’ite nei ia ’oe nō ni’a i te mau ta’ata o te Atua (« te toe’a o Iakoba ») i te mau mahana hope’a nei ?

Mika 7:5–7 (hi’o Mataio 10:35–36). Mai te au i teie mau ’īrava, nō te aha e mea faufa’a ’ia « hi’o […] ia Iehova » nā mua roa ? Nō te aha e mea faufa’a teie parau a’o i teie mahana ?

Mika 6:1–8

« E aha tā Iehova hina’aro ia ’oe ? »

Tē ani mai nei Mika ia tātou ’ia feruri e aha ra te huru ’ia « haere atu i mua i te aro o Iehova […] ’a ha’api’o ai i raro i te aro o te Atua teitei » (Mika 6:6). E aha tā te mau ’īrava 6–8 e fa’a’ite nei ia ’oe nō ni’a i te mau mea faufa’a i te Fatu ’ia hi’opo’a mai ’oia i tō ’oe orara’a ?

’A hi’o ato’a Mataio 7:21–23 ; 25:31–40 ; Dale G. Renlund, « Rave i te parau ti’a, ’e ’ia hina’aro ho’i i te aroha, ’e te haere ma te ha’aha’a i te aro о tō Atua », Ensign ’e ’aore rā Liahona, Novema 2020, 109–12.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Iona 1–4.E au paha tā ’outou mau tamari’i ’ia rave i te mau ’ohipa ’o tē fa’ati’a i te ’ā’amu o Iona, mai te horo-’ē-ra’a, te ha’amānianiara’a mai te vero i ni’a i te miti, ’e ’aore rā, mai te horomi’ira’a a te hō’ē i’a rahi (’a hi’o « Iona te peropheta » i roto i Te mau ’ā’amu o te Faufa’a Tahito). ’A ani i te mau melo o te ’utuāfare i te mea tā rātou i ha’api’i mai i roto i te ’ohipa i tupu nō Iona. Nō te hō’ē hi’ora’a ha’api’ira’a nō roto mai ia Iona, ’a hi’o i te ’īrava 7 o te hīmene « Suis les prophètes » (Chants pour les enfants, 58–59).

Iona 3.E aha tā Iona i ha’api’i mai nō ni’a i te fa’a’itera’a i te ’evanelia ? ’O vai tā tātou i ’ite ’o tē riro i te ha’amaita’ihia nā roto i te fa’aro’ora’a i te parau poro’i o te ’evanelia a Iesu Mesia i fa’aho’i-fa’ahou-hia mai ?

Mika 4:1–5.Mai te au i teie mau ’īrava, e aha te mea e hōpoi mai i te hau ’e te ruperupe i te nūna’a o te Fatu ? E aha tā tātou e nehenehe e rave nō te fa’atupu i teie parau tohu i roto i tō tātou fare ?

Mika 5:2.E nehenehe ’outou e pia i te hō’ē hōho’a nō Iesu i tōna tamari’ira’a ’e tōna metua vahine (hi’o i te Buka hōho’a nō te ’evanelia, N°33) i te hō’ē pae o te piha ’e te hōho’a o te mau ta’ata pa’ari i ni’a i te tahi atu pae. ’A tai’o ’amui i te Mika 5:2 ’e te Mataio 2:1–6. ’Ua nāhea te parau tohu a Mika i te tauturura’a i te mau ta’ata pa’ari ’ia ’ite ia Iesu ? E nehenehe te mau melo o te ’utuāfare e fa’anu’u i te hōho’a o te mau ta’ata pa’ari i pīha’i iho i te hōho’a o Iesu. E au ato’a paha tō ’outou ’utuāfare ’ia māta’ita’i i te video « The Christ Child: A Nativity Story [Te tamari’i Mesia : E ’ā’amu fānaura’a] » (ChurchofJesusChrist.org).

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « E pe’e au ia ’oe », Te mau hīmene, N°165.

Ha’amaita’i i tā ’oe iho tuatāpapara’a pāpa’ira’a mo’a

’Ite mai i te here o te Atua. ’A tai’o ai ’outou i te mau pāpa’ira’a mo’a, e nehenehe e tāpa’o i te mau fa’a’itera’a nō te here o te Atua tā ’outou e tāpe’a mai. Ei hi’ora’a, ’a ’imi e mea nāhea tō te Atua fa’a’itera’a i tōna here nō tāna mau tamari’i i roto i te ’ā’amu o Iona.

Fa’ahōho’ara’a nā Kevin Carden