Daniel Interprets Nebuchadnezzar’s Dream [Daniela e tātara nei i te ta’oto a Nebukanesa], nā Grant Romney Clawson

31 nō ’Ātopa–6 nō Novema

Daniela 1–6

« ’Aita atu Atua e ti’a ai ’ia fa’aora »

’Ua nā ’ō mai ’o Elder Richard G. Scott ē, te pāpa’ira’a i te fa’aurura’a « [e fa’a’itera’a te reira] i te Atua i te huru mo’a o te reira nō tātou nei. E riro te tāpa’ora’a i te tauturu rahi a’e ia tātou nō te ha’amana’o i te heheura’a » (« Nāhea e noa’a ai te heheura’a ’e te fa’aurura’a nō tō ’outou iho orara’a », Ensign ’e ’aore rā Liahona, Mē 2012, 46).

Pāpa’i i te mau mana’o e tae mai

E mea pāpū roa ē, ’aita e ta’ata e ha’amata’u ia ’outou nō te huri ia ’outou i roto i te umu auahi ’aore rā, i roto i te ’āpo’o liona nō tō ’outou fa’aro’o ia Iesu Mesia. Terā rā, ’aita hō’ē o tātou e rātere i roto i teie orara’a ma te ’ore e tāmatahia te fa’aro’o. E nehenehe tātou pā’āto’a e fāna’o i te hi’ora’a o te mau ta’ata mai ia Daniela, Sadaraka, Meseka, ’e ia Obede-nego, tei haruhia i tō rātou ’āpīra’a ra nā te hau ’ēmēpera pūai o Babulonia (’a hi’o 2 Te mau Ari’i 24:10–16). ’Ua hā’atihia teie nau feiā ’āpī i te hō’ē ta’ere mātaro-’ore-hia ’ua rau te mau faufa’a, ’e ’ua fa’aruru rātou i te mau fa’ahemara’a rarahi ’ia fa’aru’e i tō rātou mau ti’aturira’a ’e te mau peu tumu parauti’a. Noa atu rā i te reira, ’ua ha’apa’o noa rātou i tā rātou mau fafaura’a. Mai ia Iosepha i ’Aiphiti ’e ’o Esetera i Peresia, ’ua tāpe’a noa ’o Daniela ’e tōna mau hoa i Babulonia i tō rātou fa’aro’o i te Atua, ’e ’ua fa’atupu te Atua i te mau temeio ’o tē fa’auru noa nei ā i te feiā ti’aturi i teie mahana.

’Ua nāhea rātou i te ’itera’a i te pūai ’ia vai ha’apa’o noa ? ’Ua rave rātou i terā mau ’ohipa ri’i na’ina’i tā te Atua i ani ia tātou pā’āto’a ’ia rave—te purera’a, te ha’apaera’a i te mā’a, te mā’itira’a i te mau hoa maita’i, te ti’aturira’a i te Atua, ’e te rirora’a ’ei māramarama nō vetahi ’ē. Mai te mea ē, e ha’apūaihia tātou nā roto i te ravera’a i teie mau mea iti ’e te ’ōhie, e nehenehe tātou e fa’aruru i te mau liona ’e te mau umu auahi i roto i tō tātou iho orara’a ma te fa’aro’o.

Nō te hō’ē hi’ora’a rere ā manu nō te Buka a Daniela, ’a hi’o « Daniela i roto i te arata’i nō te mau pāpa’ira’a mo’a.

Mau mana’o nō te tuatāpapara’a pāpa’ira’a mo’a a te ta’ata hō’ē

Daniela 1 ; 3 ; 6

E nehenehe au e ti’aturi i te Fatu ’ia tāmata-ana’e-hia tō’u fa’aro’o.

E nehenehe e parau ē, tē ora nei tātou pā’āto’a i roto ia Babulonia. ’Ua ’ī te ao ’āti a’e ia tātou i te mau fa’ahemara’a e rave rahi nō te ’ōfati i tā tātou mau ture ’e nō te ha’afē’a’a i tō tātou fa’aro’o ia Iesu Mesia. ’Ia tai’o ana’e ’oe i te Daniela 1, 3, ’e te 6, ’a pāpa’i i te mau rāve’a i fa’a’ohipahia nō te tūra’i ia Daniela, Sadaraka, Meseka, e’ Abede-nego ’ia rave i te mau mea tā rātou i ’ite ē, ’ua hape. ’Ua tūra’ihia a’ena ānei ’oe nō te ’ōfati i tō ’oe mau ti’aturira’a ? E aha tā ’oe e ha’api’i mai nei nō ni’a ia rātou ’o tē nehenehe e tauturu ia ’oe ’ia ti’aturi i te Fatu ’ia fārerei ana’e ’oe i te pāto’ira’a ?

I roto i te buka a Daniela ’e i te tahi atu mau pāpa’ira’a mo’a e rave rahi, ’ua pāpa’ihia te mau ’ohipa nō te fa’atupura’a te fa’aro’o rahi i te mau temeio rarahi. ’E mai te mea pa’i ’aita tō tātou fa’aro’o e fa’atupu i te mau temeio tā tātou e ’imi ra ? (’a hi’o, ’ei hi’ora’a, Alama 14:8–13). ’Ia au i tā ’oe i tai’o i roto i te Daniela 3:13–18, ’āhani ’o Sadaraka, ’o Meseka, ’e ’o Abede-nego e nāhea rātou i te pāhono i teie uira’a ? Nāhea tō rātou hi’ora’a e nehenehe ai e ha’aferuri ia ’oe i te huru o tā ’oe fa’arurura’a i tō ’oe mau tāmatara’a nō te fa’aro’o ? Nō te mau mea hau atu nō ni’a i teie mau ’īrava, ’a hi’o i te a’ora’a a Elder Dennis E. Simmons « ’Ia ’ore rā… » (Ensign ’e ’aore rā Liahona, Mē 2004, 73–75).

Tē fa’a’ite ato’a mai nei te buka a Daniela nāhea te mau mā’itira’a ti’a a te hō’ē ta’ata e nehenehe ai e arata’i ia vetahi ’ē i roto i te fa’aro’o rahi a’e i te Fatu. E aha te mau hi’ora’a tā ’oe e ’ite nei i roto i te mau pene 1, te 3, ’e te 6 ? ’A feruri hōhonu i te mau mea tā tā ’oe mau mā’itira’a e fa’atupu i ni’a ia vetahi ’ē (’a hi’o Mataio 5:16).

’A hi’o ato’a Dieter F. Uchtdorf, « ’Eiaha e mata’u, ’a fa’aro’o noa mai », Ensign ’e ’aore rā Liahona, Novema 2015, 76–79 ; David R. Stone, « ’O Ziona i rotopū ia Babulonia », Ensign ’e ’aore rā Liahona, Mē 2006, 90–93.

Fa’ahōho’ara’a nō Daniela ’e tōna mau hoa i te pāto’ira’a i te mā’a a te ari’i, nā Brian Call

Daniela 2

Te ’Ēkālesia a Iesu Mesia i te Feiā Mo’a i te mau Mahana Hope’a nei, ’o te bāsileia ïa o te Atua i ni’a i te fenua nei.

Nā roto i te heheura’a, ’ua ’ite Daniela ē, tē fa’a’ite ātea ra te moemoeā a Nebukanesa i te mau bāsileia o te ao nei, ’e tae noa atu i te bāsileia o te Atua nō ananahi, ’o tē « ’ore roa ïa e mou » (Daniela 2:44). « Te ’Ēkalesia nei taua bāsileia ra i te mahana hope’a nei i tohuhia ra », te ha’api’ira’a ïa a Elder D.Todd Christofferson, « ’aore i patuhia e te ta’ata, fa’atupuhia rā nā te Atua rā o te ra’i, ’e ’o tē ’ohu nei mai te hō’ē ’ōfa’i ‘i ’ō’otihia mai roto mai i te mou’a ra ’aore e rima’ nō te fa’a’ī i te fenua nei » (« Nō te aha te ’Ēkālesia », Ensign ’aore rā Liahona, Novema 2015, 111). ’A feruri i te bāsileia o te Atua i te mau mahana hope’a nei ’a tai’o ai ’oe i te fa’a’itera’a nō te ’ōfa’i i roto i te Daniela 2:34–35, 44–45. E aha te mau tū’atira’a tā ’oe e ’ite nei i rotopū i te ’ōfa’i ’e te bāsileia ? E mea nāhea ’oe ’ia ’ite i te bāsileia o te Atua i te fa’a’īra’a i te fenua i teie ’anotau ?

’A hi’o ato’a Gordon B. Hinckley, « Te ’ōfa’i i ’ō’otihia nō roto mai i te mou’a », Ensign ’aore rā Liahona, Novema. 2007, 83–86 ; L.Whitney Clayton, « E tae mai te taime », Ensign ’e ’aore rā Liahona, Novema 2011, 11–13.

Daniela 3:19–28

E turu mai te Fa’aora iā’u i roto i tō’u mau tāmatara’a.

E aha te mau mana’o e tupu mai i roto ia ’oe ’a tai’o ai ’oe nō ni’a i te maha o te ta’ata i roto i te umu auahi i pīha’i iho ia Sadaraka, Meseka, ’e ’o Abede-nego ? Nāhea teie ’ā’amu e nehenehe ai e tauturu ia ’oe i roto i te mau tāmatara’a tā ’oe e fa’aruru nei ? E ’ite paha ’oe i te tahi atu mau mana’o i roto i te Mosia 3:5–7 ; Alama 7:11–13 ; Te Parau Ha’api’ira’a ’e te mau Parau Fafau 61:36–37 ; 121:5–8.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Daniela 1–2.’A tai’o ’āmui ai ’outou i te Daniela 1 ’e te 2 e nehenehe ’outou e ’imi i te mau ha’amaita’ira’a tā Daniela ’e tōna mau hoa i fāri’i nā roto i te ’orera’a e ’amu i te mā’a ’e te uaina a te ari’i. E nehenehe ’outou e fa’aau i te reira mau ha’amaita’ira’a i te mau parau fafau a te Fatu ia tātou ’ia ha’apa’o ana’e tātou i tāna mau fa’auera’a, mai te Parau pa’ari (’a hi’o Te Parau Ha’api’ira’a ’e te mau Parau Fafau 89:18–21). ’Ua nāhea tō te Fatu ha’amaita’ira’a ia tātou nō te orara’a i te Parau pa’ari ?

Daniela 3.Nāhea ’oe e nehenehe ai e tauturu i tō ’oe ’utuāfare ’ia ha’api’i mai i te ’ā’amu i roto i te Daniel3  ? E nehenehe te « Sadaraka, Meseka, ’e ’o Abede-nego » i roto i Te mau ’ā’amu o te Faufa’a Tahito e tauturu. E aha tā tātou e fa’ahiahia nei ia Sadaraka, Meseka, ’e ’o Abede-nego ? E aha te mau mea tā tātou e fa’aruru nei ’o tē tāmata nei i tō tātou fa’aro’o ’e ’o tē tītau nei ia tātou ’ia fa’a’ite i tō tātou ti’aturi i te Atua ?

Daniela 6:1–23.E au paha tō ’outou ’utuāfare ’ia ha’uti ta’ata ora i te tahi mau tuha’a o te ’ā’amu i roto i te Daniela 6:1–23 (’ei hi’ora’a, te mau ’īrava 10–12 ’e ’aore rā te 16–23). E aha tā tātou e ha’api’i mai nei i roto i te hi’ora’a o Daniela ? E aha tā tātou e nehenehe e rave ’ia hau atu tātou i te riro mai iāna te huru ?

Daniela 6:25–27.Mai te au i teie mau ’īrava, e aha te huru o te ari’i Dariu i te taime ’a fa’aora ai te Fatu ia Daniela i te mau liona ? E nehenehe ’outou e tai’o i te Daniela 2:47 ; 3:28–29 nō ni’a i te huru o te ari’i Nebukanesa i mua i te reira ’ohipa i tupu. E aha tā tātou mau rāve’a nō te fa’auru ia vetahi ’ē ? ’A paraparau i te mau hi’ora’a tā ’outou i ’ite nō ni’a i te huru tō te fa’aro’o o te tahi atu ta’ata, tae noa atu i tō te mau melo o te ’utuāfare, fa’aurura’a i te maita’i ia vetahi ’ē.

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Je suivrai l’Evangile », Chants pour les enfants, 72.

Ha’amaita’i i tā tātou ha’api’ira’a

Ha’api’i i te ha’api’ira’a tumu. E mea nehenehe te ’evanelia a te Fatu i roto i tōna ’ōhie (’a hi’o Te Parau Ha’api’ira’a ’e te mau Parau Fafau 133:57). E nehenehe te mau fa’a’oa’oara’a ’e te mau ’āparaura’a ’ōhie i rōtahihia i ni’a i te ha’api’ira’a tumu e tītau i te Vārua Maita’i ’ia hōpoi i te poro’i o te ’evanelia i roto i te ’ā’au o tō ’outou ’utuāfare.

Daniel in the Lion’s Den [Daniela i roto i te ’āpo’o o te liona], 1872. Rivière, Briton (1840–1920). Credit : Walker Art Gallery, National Museums Liverpool/Bridgeman Images