« 24–30 nō ’Ātopa. Ezekiela 1–3 ; 33–34 ; 36–37 ; 47 : ‘E vārua ’āpī tā’u e tu’u i roto ia ’outou », Mai, pe’e mai—nō te ta’ata hō’ē ’e te ’utuāfare : Faufa’a Tahito 2022 (2021)
« 24–30 nō ’Ātopa. Ezekiela 1–3 ; 33–34 ; 36–37 ; 47 », Mai, pe’e mai—nō te ta’ata hō’ē ’e te ’utuāfare : 2022
Come, Follow Me [Mai, pee mai], nā Scott Sumner
24–30 nō ’Ātopa
Ezekiela 1–3 ; 33–34 ; 36–37 ; 47
« E vārua ’āpī tā’u e tu’u i roto ia ’outou »
’Ua anihia ia Ezekiela « ’ia ’amu » i te parau a te Atua, e aura’a parau—nō te fa’a’ī iāna iho i te reira (’a hi’o i te Ezekiela 2:9–3:3,10). Nāhea ’outou i te fa’a’ī ia ’outou iho i te parau a te Atua i teie hepetoma ?
Pāpa’i i te mau mana’o e tae mai
’Ua riro Ezekiela ’ei peropheta uta-’ē-hia. ’Ua haruhia ’oia ma te tahi atu mau ’āti ’Īserā’ela, ’e ’ua hōpoihia i Babulonia e rave rahi matahiti hou ’a ha’amou-roa-hia ai ’o Ierusalema. ’Āhani tei Ierusalema ’oia, e tahu’a ïa ’o Ezekiela ’o tē tāvini i roto i te hiero. I Babulonia, tei rotopū ’oia i te « feiā tītī », ’e ’ua « pārahi atu ra iō rātou ra » (Ezekiela 3:15), e rave rahi hānere maire te ātea i te hiero ’e e’ita e nehenehe e ti’aturi rahi ē e ho’i atu i te fare here o te Atua. ’E i te hō’ē mahana ’ua fāri’i ’o Ezekiela i te hō’ē ’ōrama. ’Ua ’ite ’oia i « te ’ana’ana o Iehova » (Ezekiela 1:28)—’eiaha rā i te hiero i Ierusalema, i Babulonia rā i rotopū i te feiā uta-’ē-hia. ’Ua ha’api’i mai ’oia ē, ’ua ’ū’ana roa te ’ino i Ierusalema, ’aita e ’ite-fa’ahou-hia te parau nō te Atua i reira (’a hi’o Ezekiela 8–11 ; 33:21).
Hō’ē o te tuha’a ’ohipa a Ezekiela ’o te fa’aara ïa i te ’āti ’Īserā’ela nō ni’a i te mau hōpe’ara’a o tō rātou ’ōrurehau—e fa’aarara’a tei ’ore i ha’apa’o-rahi-hia. E mea hau atu rā i roto i te parau poro’i a Ezekiela : ’ua tohu ’oia ē, noa atu te huru te ’inora’a o te mau mea, e rāve’a nō te ho’i i muri. Mai te mea e fāri’i te mau ta’ata o te Atua i te anira’a ’ia « fa’aro’o mai i te parau a Iehova » (Ezekiela 37:4), te mea tei pohe i mūta’a ra, e ora fa’ahou ïa. E nehenehe « te ’ā’au ’ōfa’i » e monohia i « te ’ā’au marū » (Ezekiela 36:26). « E [nā’u] e tu’u i tā’u aho i roto ia ’outou » te parau ïa a te Fatu ia rātou, « ’e e ora ïa ’outou » (Ezekiela 37:14). ’E i te mau mahana hope’a, e ha’amau te Fatu i te hō’ē hiero ’āpī ’e te hō’ē Ierusalema ’āpī, « ’e te i’oa o taua ’oire ra mai taua mahana mai ra, TEI REIRA IEHOVA » (Ezekiela 48:35).
Mau mana’o nō te tuatāpapara’a pāpa’ira’a mo’a a te ta’ata hō’ē
« ’O tā’u nei rā parau tā ’oe e parau atu ia rātou ».
E nehenehe te tai’ora’a i te pi’ira’a a Ezekiela i te ’ohipa, i roto i te Ezekiela 1–3, e fa’auru ia ’oe ’ia feruri i te mau rāve’a tā te Atua i hōro’a ia ’oe ’ia « parau atu i [tāna] nei parau » ia vetahi ’ē (Ezekiela 3:4). I roto i te Ezekiela 2–3, ’a hi’o i tāna mau parau fa’aitoitora’a ’e te ha’api’ira’a ia Ezekiela. Noa atu ē, e ’ere paha te mau ta’ata tā ’oe e tāvini i te ta’ata ’ōrurehau mai te mau ta’ata o Ezekiela, ’a feruri e mea nāhea te mau parau a te Atua ia Ezekiela i te ’ohipa i ni’a i te huru nō tā ’oe hi’ora’a i tā ’oe tāvinira’a i roto i te ’Ēkālesia, i te fare, ’e i te tahi atu vāhi.
’A hi’o ato’a Ezekiela 33:1–9 ; D.Todd Christofferson, « Te reo fa’aara », Ensign ’aore rā Liahona, Mē 2017, 108–11.
Tē hina’aro nei te Fatu ’ia fa’a’ore i te hara.
« Tē vai nei tā mātou mau hara […] i ni’a ia mātou nei », te uiuira’a ïa a te ’āti ’Īserā’ela fa’atītīhia, « e aha ihora ho’i mātou e ora ai » ? (Ezekiela 33:10). ’Ei pāhonora’a, ’ua ha’api’i te Fatu ia rātou i te mau parau mau faufa’a nō ni’a i te tātarahapa ’e te fa’a’orera’a hara. E nehenehe teie mau uira’a e tauturu ia ’oe ’ia feruri i ni’a i te reira mau parau mau :
-
I tō ’oe mana’o, e aha te aura’a ’ia « ti’aturi i tō [’oe] iho parau-ti’a » ? (’a hi’o Ezekiela 33:12–13).
-
E aha tā ’oe e parau atu i te hō’ē ta’ata ’o tē feruri ra ē, te ta’ata parau ti’a ’e te ta’ata ’ino tei fa’a’itehia i roto i te Ezekiela 33:12–19 ’aita rāua i ravehia ma te ’āfaro ? (hi’o ato’a Mataio 21:28–31 ; Luka 18:9–14).
-
E aha te mau pereota tā ’oe e ’ite nei i roto i teie mau ’īrava ’o tē tauturu ia ’oe ’ia hāro’aro’a i te aura’a o te parau e tātarahapa ? E aha te tahi atu mau mana’o tā ’oe e ’ite nei i roto i te Ezekiela 36:26–27 ’e te Alama 7:14–16 ?
Tē ani mai nei te Fa’aora iā’u ’ia fa’a’amu i tāna māmoe.
I roto i te Ezekiela 34, tē parau nei te Fatu i te feiā fa’atere o tōna mau ta’ata e mau « tīa’i māmoe ». ’A tai’o ai ’oe, ’a feruri e aha tā teie upo’o parau e parau mai nei ia ’oe nō ni’a i te aura’a ’ia riro ’ei ta’ata fa’atere. ’O vai te mau « māmoe » tā te Fatu e hina’aro nei ’ia fa’a’amu ’oe ? Nāhea ’oe e ti’a ai e pe’e i te hi’ora’a tā te Fa’aora i ha’amau ’ei tīa’i māmoe nō tātou ? (’a hi’o ’īrava 11–31).
’A hi’o ato’a Ioane 21:15–17.
’Ua ’ite Ezekiela i roto i te ’ōrama i te hō’ē ’ānāvai e tahe mai ra nā roto mai i te hiero ’e ’ua fa’aora i te miti Pohe.
Tē ha’aputuputu nei te Fatu i tōna nūna’a ’e tē hōro’a nei ia rātou i te ora ’āpī.
’Ua fa’ahōho’ahia te ha’aputuputura’a o ’Īserā’ela i roto i te Ezekiela 37 nā roto e piti tāpa’o. ’A tai’o ai ’oe nō ni’a i te tāpa’o mātāmua—’ua fa’aho’ihia mai te mau ’ivi pohe i te ora (’a hi’o i te mau ’īrava 1–14)—’a feruri i te mea tā ’oe e ha’api’i nei nō ni’a i te ha’aputuputura’a o ’Īserā’ela i nā pae e piti o te pāruru (’a hi’o ato’a Ezekiela 36:24–30).
Te piti o te tāpa’o (’a hi’o i te mau ’īrava 15–28), e piti ïa rā’au, tā te mau ’aivāna’a e rave rahi e parau nei ē e mau ’iri pāpa’ira’a rā’au, tā’atihia i te hō’ē hīnere. E nehenehe te rā’au a Iuda e fa’ahōho’a i te Bibilia (inaha, nā te mau huā’ai o Iuda i pāpa’i i te pae rahi o te Bibilia), ’e te rā’au a Iosepha, e nehenehe ïa e fa’ahōho’a i te Buka a Moromona (inaha, e huā’ai te ’utuāfare o Lehi nō Iosepha nō ’Aiphiti). I roto i taua ferurira’a ra, e aha tā teie mau ’īrava e ha’api’i mai nei ia ’oe nō ni’a i te ’ohipa a te mau pāpa’ira’a mo’a i roto i te ha’aputuputura’a o ’Īserā’ela ? E aha tā 2 Nephi 3:11–13 (e parau tohu nō ni’a ia Iosepha Semita ’e te Buka a Moromona) ’e ’āmui mai nei i tō ’oe hāro’aro’ara’a ?
’A hi’o ato’a 2 Nephi 29:14.
Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare
-
Ezekiela 33:1–5.Nō te fa’ahōho’a i teie mau ’īrava, e nehenehe te hō’ē melo o te ’utuāfare e fa’ariro iāna ’ei « ta’ata tīa’i » nā roto i te hi’ora’a i rāpae i te ha’amāramarama ’e ’a parau atu ai i te toe’a o te ’utuāfare i te ’ohipa e tupu ra i rāpae. Mai te aha tō tātou peropheta ora mai te hō’ē ta’ata tīa’i nō tātou ?
-
Ezekiela 33:15–16.E aha tā teie mau ’īrava e ha’api’i mai nei ia tātou nō ni’a i te fa’a’orera’a hara tā tātou e nehenehe e fāri’i nā roto ia Iesu Mesia ?
-
Ezekiela 36:26–27.’A fa’a’ite i tō ’outou ’utuāfare i te tahi mau ’ōfa’i ’a paraparau ai ’outou i te aura’a o te parau ē, e « ’ā’au ’ōfa’i ». E vaiiho ia rātou ’ia fa’a’ite mai i te mau ta’o e fa’ata’a e aha te « ’ā’au ’āpī » ’e « te vārua ’āpī » tā te Fa’aora e hōro’a mai ia tātou (’a hi’o Mosia 3:19 ; 5:2).
-
Ezekiela 37:15–28.E nehenehe te mau melo o te ’utuāfare e ’imi e piti rā’au ’e e pāpa’i i ni’a i te hō’ē Nō Iuda (Bibilia) ’e i ni’a i te tahi Nō Iosepha (Buka a Moromona) (’a hi’o i te mau ’īrava 16–19). I muri iho, e nehenehe tā rātou e fa’a’ite i te mau ’ā’amu ’aore rā, i te mau pāpa’ira’a mo’a nō roto mai i te Bibilia ’e te Buka a Moromona ’o tē tauturu ia rātou ’ia ha’afātata i te Fa’aora ’e ’ia riro ’ei mau « ta’ata [nōna] » (’īrava 23).
-
Ezekiela 47:1–12.Tē fa’a’ite nei teie mau ’īrava i te ’ōrama a Ezekiela nō te pape e tahe mai ra nā roto mai i te hiero ’e ’ua fa’aora atu ra i te miti Pohe—nō te ’ava’ava te miti, e’ita te i’a ’e te mau rā’au tanu e ora i roto. E au paha te mau tamari’i ’ia pāpa’i i te hōho’a nō teie ’ōrama. E aha tā te pape e tahe mai ra nā roto mai i te hiero e nehenehe e fa’ahōho’a ? E nāhea te hiero i te fa’aora i tō tātou māuiui ? (’a hi’o Ezekiela 47:8–9, 11).
Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Hīmene tei mana’ohia : « ’Aūe te aroha rahi o te Tīa’i māmoe », Te mau hīmene, N°133.
Ha’amaita’i i tā tātou ha’api’ira’a
’Eiaha e tāmata i te ha’api’i i te tā’āto’ara’a o te ha’api’ira’a. E’ita paha e nehenehe ia ’outou ’ia hi’opo’a ’e tō ’outou ’utuāfare i te mau parau mau ato’a i roto i te Ezekiela. ’A ’imi i te arata’ira’a pae vārua nō te fa’ata’a i te mea e fa’atumu i ni’a iho. (’A hi’o Ha’api’ira’a mai tā te Fa’aora, 7.)
« ’E inaha, e pape i te tahera’a mai mai raro a’e i te ’ūputa o te fare […] ’E e ríro te mau mea ato’a e ora ra, tei matere ’ia haere ra, i te mau vāhi ato’a i tahehia e taua pape ra » (Ezekiela 47:1, 9). Hōho’a i fa’a’ohipahia i raro a’e i te parau fa’ati’a a shutterstock.com.