Jeremiah [Ieremia], nā Walter Rane

10–16 nō ’Ātopa

Ieremia 1–3 ; 7 ; 16–18 ; 20

« ’Aita ’oe i hāmanihia e au i roto i te ’ōpū, i ’ite ai au ia ’oe »

’Ua parau ’o Elder David A. Bednar : « Te hō’ē o te mau rāve’a e fa’aro’o ai au i [te Fatu] tei roto ïa i te mau pāpa’ira’a mo’a. Te mau pāpa’ira’a mo’a ’o te reo ïa o te Fatu i haruharuhia » (« ‘Hear Him’ in Your Heart and in Your Mind », ChurchofJesusChrist.org).

Pāpa’i i te mau mana’o e tae mai

I te ’ōmuara’a, ’aita ’o Ieremia i mana’o ē, e riro ’oia ’ei peropheta maita’i. « ’Aore ho’i au i ’ite i te parau », tāna ïa pāto’ira’a i te taime mātāmua ’a pi’i ai te Fatu iāna (Ieremia 1:6). ’Ua faitoito mai ra te Fatu iāna : « Inaha, ’ua tu’u vau i tā’u parau i roto i tō vaha » (’īrava 9). ’Ua mana’o ’o Ieremia ē, e « tamari’i » ’aravihi ’ore ’oia (’īrava 6), terā rā, ’ua fa’ata’a mai ra te Fatu ē, ua hau a’e tōna ineine i tāna i feruri—’ua fa’atōro’ahia ’oia i teie pi’ira’a nā mua roa hou ’a fānauhia mai ai ’oia (’a hi’o ’īrava 5). Nō reira, ’ua tu’u ’o Ieremia i tōna mau mata’u i te hiti ’e ’ua fāri’i i te pi’ira’a. ’Ua fa’aara ’oia i te mau ari’i ’e te mau tahu’a nō Ierusalema ē, e’ita tō rātou mo’ara’a ha’avarevare e fa’aora ia rātou i te ha’amoura’a. Te « tamari’i » i mana’o ē, e’ita tāna e nehenehe e parau, tē ’ite ra i te parau a te Atua « mai te auahi ’ama i roto i [tōna] ’ā’au ra » ’e e’ita e nehenehe e ha’amāmū (Ieremia 20:9).

Te ’ā’amu o Ieremia, tō tātou ato’a ïa ’ā’amu. ’Ua ’ite ato’a te ’Atua ia tātou, hou ’a fānauhia mai ai tātou ’e ’ua fa’aineine ia tātou nō te rave i tāna ’ohipa i ni’a i te fenua nei. I roto i te reira mau ’ohipa, e mea ato’a ïa tā Ieremia i ’ite ātea : ha’aputuputu i te nūna’a o te Atua, hō’ē i muri i te tahi, nō te « ’arata’i ia [rātou] i Ziona » (Ieremia 3:14). ’E noa atu ē, ’aita tātou i ’ite pāpū roa i te mea e rave ’aore rā, e parau, ’eiaha tātou e « mata’u […] nō te mea ’ei pīha’i ato’a iho vau ia ’oe, tē nā reira ra te Fatu »(Ieremia 1:8,19).

Nō te hō’ē hi’ora’a rere ā manu nō te Buka a Ieremia, ’a hio « Ieremia » i roto i te arata’i nō te mau pāpa’ira’a mo’a.

Mau mana’o nō te tuatāpapara’a pāpa’ira’a mo’a a te ta’ata hō’ē

Ieremia 1:4–19 ; 7:1–7 ; 20:8–10

’Ua pi’ihia te mau peropheta nō te paraparau i te parau a te Fatu.

’Ia tai’o ’oe i roto i te Ieremia 1:4–19 nō ni’a i te pi’ira’a o Ieremia ’ia riro ’ei peropheta, ’a feruri i te ’ohipa a te mau peropheta i roto i tō ’outou orara’a. E aha tā ’oe e ha’api’i mai nei nō ni’a i te mau peropheta mai roto mai i te mau parau a te Fatu ia Ieremia ? (’a hi’o ato’a Ieremia 7:1–7). E mea pinepine te porora’a a Ieremia i te pāto’ihia (’a hi’o Ieremia 20:8, 10). E aha tā ’oe e ha’api’i mai nei nā roto i te mau parau a Ieremia i roto i te Ieremia 20:9 ? ’A tāpe’a noa i teie mau mana’o i roto i te ferurira’a i te roara’a o tā ’oe tuatāpapara’a i te mau ha’api’ira’a a Ieremia. E aha tā ’oe e ’ite ra i roto i teie mau ha’api’ira’a ’o tē fa’auru ia ’oe ’ia pe’e i tō tātou mau peropheta nō te mau mahana hope’a nei ?

Ieremia 1:5

’Ua ’ite te Atua iā’u hou vau ’a fānauhia mai ai.

Hou Ieremia i fānauhia mai ai, ’ua ’ite te Atua iāna ’e ’ua mā’iti iāna ’aore rā, ’ua fa’atōro’a iāna, nō te fa’aoti i te hō’ē misiōni ta’a ’ē i ni’a i te fenua (’a hi’o Ieremia 1:5). I tō ’oe mana’o, nō te aha e mea faufa’a nō Ieremia ’ia ’ite i te reira ?

’Ua ’ite ato’a te Atua ia ’oe hou ’a fānauhia mai ai ’oe ’e ’ua fa’atōro’a ia ’oe i te mau hōpoi’a ta’a ’ē (’a hi’o Alama 13:1–4 ; Te Parau Ha’api’ira’a ’e te mau Parau Fafau 138:53–56 ; Aberahama 3:22–23). E aha te ta’a-’ē-ra’a tā teie ’ite e fa’atupu nei i roto i tō ’oe orara’a ? Mai te mea ē, ’ua fāri’i ’oe i tō ’oe ha’amaita’ira’a patereareha, e nehenehe ’oe e hi’ohi’o i te reira nā roto i te pure ’e e ani i te Atua e nāhea ’oe ’ia fa’aoti i te mau mea tāna i fa’aue mai ia ’oe ’ia rave.

’Ua fa’a’ohipa te ta’ata i ’Īserā’ela i tahito ra i te mau ’āpo’o pape rarahi nō te ha’aputu i te pape faufa’a rahi.

Ieremia 2 ; 7

« ’O vau tā rātou i fa’aru’e te tumu o te pape ora nei ».

I te mau fenua pāpāmarō i reira te ’āti ’Īserā’ela i ora na, ’ua ha’aputu te ta’ata i te pape faufa’a rahi i roto i te mau ’āpo’o tei parauhia e mau fāri’i pape. Nō te aha e mea maita’i a’e ’ia fāri’i i te pape o te hō’ē pape piha’a i te ti’aturira’a i ni’a i te hō’ē fāri’i pape ? E aha te aura’a o te parau ra, e fa’aru’e i « te tumu o te pape ora » ? I tō ’oe mana’o, e aha tā te « fāri’i amaha » tei fa’ahitihia i roto i te Ieremia 2:13 e fa’ahōho’a nei ? ’A tai’o ai ’oe i te Ieremia 2 ’e te 7, ’a hi’o na e mea nāhea tō te mau ta’ata fa’aru’era’a i te pape ora a te Fatu, ’e ’a feruri e mea nāhea ’oe e fāri’i nei i te pape ora i roto i tō ’oe orara’a.

Tē parau nei te Ieremia 7 i te mau ta’ata tei tomo i roto i « te ’ūputa o te fare o Iehova […] ’ia ha’amori ia Iehova » (Ieremia 7:2). Terā rā, noa atu teie huru fa’a’itera’a ’o rāpae nō te paieti, ’ua rave rātou i te ’ino rahi (’a hi’o i te mau ’īrava 2–11). I tō ’oe mana’o, e aha te parau poro’i a te Fatu nō ’oe i roto i te mau ’īrava 21–23 ?

Ieremia 3:14–18 ; 16:14–21

E ha’aputuputu te Fatu i tōna mau ta’ata.

I tō Ieremia tohura’a i te ha’aputuputura’a o ’Īserā’ela i ha’apurarahia, ’ua parau ’oia ē, e riro ïa ’ei ’ohipa māere, hau atu i te fa’aru’era’a ia Aiphiti (’a hi’o Ieremia 16:14–15). Nā reira ato’a, ’ua parau te peresideni Russell M. Nelson : « ’Ua tonohia mai ’outou i ni’a i te fenua nei i teie taime ti’a […] nō te tauturu i te ha’aputuputura’a ia ’Īserā’ela. ʼAita hō’ē mea e tupu nei i ni’a i teie fenua i teie taime tei hau atu i te faufa’a i te reira [ha’aputuputura’a] […] Teie ha’aputuputura’a,e mau mea ato’a ïa nō ’outou » (Russell M. Nelson ’e Wendy W. Nelson, « Ti’aturira’a nō ’Īserā’ela » [purera’a nā te feiā ’āpī nā te ao nei, 3 nō Tiunu 2018], e tuha’a hau o te New Era ’e te Ensign, 12 nō ’Ātete 2018, ChurchofJesusChrist.org).

’A tuatāpapa ai ’oe i te Ieremia 3:14–18 ; 16:14–21, e aha te mea e fa’auru nei ia ’oe nō ni’a i te ha’aputuputura’a o ’Īserā’ela i te mau mahana hope’a nei ? E aha tā teie mau ’īrava e parau nei nō ni’a i te huru o te tupura’a teie ha’aputura’a ? E aha te tahi atu mau mana’o tā ’oe e ’ite nei i roto i te toe’a o te parau poro’i a te peresideni Nelson tei fa’ahitihia i ni’a nei ?

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Ieremia 1:5.E nehenehe ’outou e fa’a’ohipa i teie ’īrava nō te paraparau nō ni’a i tō tātou orara’a ’e tō tātou Metua i te ao ra hou ’a fānauhia mai ai tātou. E nehenehe te mātēria te « ’Omuara’a : Te fa’anahora’a a tō tātou Metua i te ao ra » (i roto i te mau ’Ā’amu o te Faufa’a ’Āpī, 1–5), e tauturu. E mea nāhea te ’itera’a i tō tātou orara’a hou te tāhuti nei e nehenehe ai e tauturu ia tātou ’ia ora i tō tātou orara’a tāhuti nei ?

Ieremia 2:13 ; 17:13–14.Nō te tauturu i te mau melo o te ’utuāfare ’ia hi’o mana’o i teie mau ’īrava, e nehenehe ’outou e fa’a’ite i te ’ohipa e tupu mai ’ia tu’u ana’e ’outou i te pape i roto i te hō’ē fa’ari’i ’afā ’aore rā, pararī. E aha te fa’ahōho’ara’a nō « te tumu nō te pape ora » ’e « te mau fāri’i ’amaha » ? (Ieremia 2:13). E nāhea tātou ’ia inu i te pape ora a te Fatu ?

Ieremia 16:16.’Ua fa’aau te peresideni Russell M. Nelson i te mau ta’ata rava’ai ’e te mau ta’ata a’ua’u i roto i teie ’īrava i te mau misiōnare i te mau mahana hope’a nei (’a hi’o « Te ha’aputuputura’a ia ’Īserā’ela i ha’apurarahia », Ensign ’aore rā Liahona, Novema 2006, 81). E nehenehe te mau melo o te ’utuāfare e « a’ua’u » i te mau tao’a e ha’ati nei i tō ’outou fare ’a paraparau ai nāhea ’outou e nehenehe ai e tauturu i te « rava’ai » ’e i te « a’ua’u » ia ’Īserā’ela i ha’apurarahia.

Ieremia 18:1–6.Nō te tuatāpapa i teie mau ’īrava, e nehenehe ’outou e ’āparau ’aore rā, e fa’a’ite e mea nāhea te hāmanira’a ’ohipa pōtera. E aha te parau poro’i a te Fatu nō ’Īserā’ela i roto i te Ieremia 18:1–6 ? E aha te aura’a ’ia riro ’ei ’araea i roto i te rima o te Fatu ? (’a hi’o ato’a (Isaia 64:8). Nō te tahi atu ’ā’amu e fa’aau nei ia tātou i te ’araea o te pōtera, ’a hi’o i te a’ora’a a Elder Richard J. Maynes « Te ’oa’oa nō te orara’a i te hō’ē orara’a tei fa’atumuhia i ni’a i te Mesia » (Ensign ’aore rā Liahona, Novema 2015, 27–30).

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Pi’i mai ra te Atua », Te mau hīmene, N°8.

Ha’amaita’i i tā tātou ha’api’ira’a

Fa’a’ohipa i te mau ’ā’amu. ’Ua ha’api’i pinepine mai te Fa’aora ’ia fa’a’ohipa i te mau ’ā’amu. ’A feruri i te mau ’ā’amu nō roto mai i tō ’outou iho orara’a ’o tē nehenehe e fa’aoraora i te hō’ē parau tumu nō te ’evanelia. (’A hi’o i te Ha’api’ira’a mai tā te Fa’aora, 22.)

« E ’ore ānei e ti’a ato’a iā’u ’ia rave mai ’o tā teie nei pōtera ia ’outou, e te ’utuāfare о ’Īserā’ela » (Ieremia 18:6).