« 21–27 nō Novema. Iona ; Mika : ‘E mea au iāna te aroha’ », Mai, pe’e mai—nō te Paraimere : Faufa’a Tahito 2022 (2021)
« 21–27 nō Novema. Iona ; Mika », Mai, pe’e mai—nō te Paraimere : 2022
Jonah on the Beach at Nineveh [Iona i te pae tahatai nō Nineve], nā Daniel A. Lewis
21–27 nō Novema
Iona ; Mika
« E mea au iāna te aroha »
’A ’imi i te mau parau tumu faufa’a rahi i roto ia Iona ’e ia Mika o te ha’amaita’i i te mau tamari’i tā ’outou e ha’api’i ra. ’A feruri nāhea ’oe ’ia tauturu i te mau tamari’i ’ia ’apo mai i teie mau parau tumu. E nehenehe te mau manaʼo i roto i teie faʼanahoraʼa e tauturu.
Pāpa’i i te mau mana’o e tae mai
Tītau i te mana’o
Nō te tauturu i te mau tamari’i ’ia ha’amana’o i te ’ā’amu o Iona ’aore rā, i te tahi atu mau parau mau tā rātou i ha’api’i mai i te fare, ’ia hīmene ’āmui i te hō’ē hīmene, mai te ’īrava 7 o te « Suis les prophètes » (Chants pour les enfants, 58–59).
Ha’api’i i te ha’api’ira’a tumu : Te mau tamari’i ’āpī
E ha’amaita’i te Fatu iā’u ’ia ha’apa’o vau iāna.
’A ani ai te Fatu ia Iona ’ia poro i te mau ta’ata nō te Nineve, ’aita Iona i ha’apa’o. E tauturu i te mau tamari’i ’ia māramarama ē, e ha’amaita’ihia tātou ’ia ha’apa’o ana’e tātou i te parau a te Fatu.
Mau ’ohipa ri’i e nehenehe e rave
-
’A fa’a’ite i te mau hōho’a o te ’ā’amu o Iona, ’e ’a ani i te mau tamari’i ’ia fa’a’ite mai i te mea tā rātou i ’ite nō ni’a i te ’ā’amu (hi’o « Iona te peropheta » i roto i Te mau ’ā’amu nō te Faufa’a Tahito ; te ’api ’ohipara’a nō teie hepetoma; ’aore rā te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’A ui i te mau uira’a mai teie : E aha tei tupu i te taime a ’ore ai o Iona i ha’apa’o i te parau a te Fatu ? (hi’o Iona 1:4–17). E aha te ’ohipa i tupu a ha’apa’o ai ’oia ? (hi’o Iona 3:3–5). ’A fa’a’ite i tō ’outou ’itera’a pāpū ē, e ha’amaita’i mai te Fatu ’ia ha’apa’o ana’e tātou iāna.
-
E hīmene ʼāmui i te hōʼē hīmene nō niʼa i te haʼapaʼoraʼa, mai « Je veux obéir » (Chants pour les enfants, 71). ’A ’āparau nāhea te reira i te au maita’i a’e nō Iona i te ha’apa’o i te taime mātāmua. E tauturu i te mau tamari’i ’ia feruri i te mau mea tā te Atua e hina’aro ia rātou ’ia rave ’e i muri iho ’ia tūtava ’ia ha’apa’o vitiviti.
Tē hina’aro nei te Metua i te ao ra ’ia fa’aro’o te mau ta’ata ato’a i te ’evanelia.
Nō te mau ta’ata ato’a te ’evanelia.
’Ua tātarahapa te mau ta’ata nō Nineve a fa’a’ite ai o Iona i te poro’i a te Fatu ia rātou. E aha te mau taime maita’i e ti’a ai i te mau tamari’i ia fa’a’ite mai i te ’evanelia ?
Mau ’ohipa ri’i e nehenehe e rave
-
’A rave i te mau tuha’a o te Iona 3:3–8 ’e te mau tamari’i, mai te haerera’a i te ’oire nō Nineve, nō te fa’a’ite i te parau poro’i a te Fatu, ’e ’a pāpa’i i te hō’ē ture nō roto mai i te ari’i i tōna mau ta’ata. E fa’a’ite i te hō’ē hōho’a nō te mau misiōnare (hi’o Buka hōho’a nō te ’evanelia, N°109, 110). E aha tā te mau misiōnare e rave ? Eaha tō Iona huru ’ei misionare ? E tauturu i te mau tamari’i ’ia feruri i te mau rāve’a e nehenehe ai rātou e fa’a’ite i te ’evanelia ia vetahi ’ē, mai te fa’a’itera’a i te hō’ē hīro’a fa’aro’o ’aore rā, te fa’a’itera’a i tō rātou ’itera’a pāpū nō ni’a ia Iesu Mesia.
-
’A fa’a’ite i te hō’ē ’itera’a ’a poro ai ’outou i te ’evanelia a Iesu Mesia. ’Aore rā, tau mahana nā mua a’e i te piha ha’api’ira’a, ’a ani i te hō’ē ta’ata ’ia haere mai e fārerei i tā ’outou piha ’e ’ia parau i te mau tamari’i nō ni’a i te hō’ē taime a fa’a’ite ai ’oia i te ’evanelia ’aore rā, i te taime a fa’a’ite ai te hō’ē ta’ata i te ’evanelia iāna. ’A fa’aitoito i te ta’ata ’ia fa’a’ite mai i te mau hōho’a, mai te mea e nehenehe. E tauturu i te mau tamari’i ’ia feruri i te mau rāve’a e nehenehe rātou e riro ai ’ei misiōnare i teienei.
’Ua fānauhia Iesu Mesia i te ’oire nō Betelehema.
’Ua tohu o Mika ē, e tae mai te hō’ē « tāvana i ’Īserā’ela » fānauhia i Betelehema. E nehenehe ’outou e tauturu i te mau tamari’i ’ia ’ite ē, ’ua fa’atupu te fānaura’a o Iesu Mesia i teie parau tohu.
Mau ’ohipa ri’i e nehenehe e rave
-
’A pia i te mau hōho’a o te mau ’ohipa i tupu i te fānaura’a o Iesu Mesia (hi’o Buka hōho’a nō te ’evanelia, N°28, 29, 30, 31). Ani i te mau tamari’i ’ia fa’a’ite mai e aha te tupu nei i roto i te hōho’a tāta’itahi. E tai’o Mika 5:2’e e ani i te mau tamari’i ’ia ti’a i ni’a ’ia fa’aro’o ana’e rātou i te ta’o ra « Betelehema ». ’A fa’a’ite pāpū ē, e faufa’a rahi roa te fānaura’a o Iesu, nō reira te mau peropheta a ’ite roa ai te reira hou a fānauhia mai ai ’Oia.
-
E ani i te mau tamariʼi ’ia pāpa’i i te hōʼē hōhoʼa nō te fānaura’a o Iesu. A fa’a’ite ai rātou i tā rātou mau hōho’a, ’a ani ia rātou ’ia fa’a’ite mai nō te aha rātou i māuruuru ai ia Iesu Mesia.
Ha’api’i i te ha’api’ira’a tumu : Te mau tamari’i pa’ari
Iona 1:10–12 ; 2:1–4, 9 ; 3:1–5
Te tātarahapa o te ’itera’a ïa i tā’u mau hara ’e te anira’a nō te fa’a’orera’a hara.
E fa’auru te hi’ora’a o Iona i te mau tamari’i ’ia fāriu atu i te Fatu ’ia hara ana’e rātou .
Mau ’ohipa ri’i e nehenehe e rave
-
’A tauturu i te mau tamari’i ’ia tāpura mai i ni’a i te tāpura ’ere’ere te tahi mau tuha’a tumu nō te tātarahapara’a (hi’o i te Buka arata’i nō te mau pāpa’ira’a mo’a, « tātarahapa, tātarahapara’a », scriptures.ChurchofJesusChrist.org). ’A hi’o ’āmui fa’ahou i te ’ā’amu o Iona, ’e ’a ani i te mau tamari’i ’ia ’imi i te fa’a’itera’a ē, te tātarahapa ra o Iona (hi’o, ’ei hi’ora’a, Iona 1:10–12 ; 2:1–4, 9 ; 3:1–5). Nāhea e ti’a ai ia tātou ’ia fa’a’ite i te Fatu ē, e mea pāpū mau tā tātou tātarahapa ?
-
E hīmene ’āmui i te hō’ē hīmene nō ni’a i te tātarahapa. ’A ani i te mau tamari’i eaha te mau ta’o ’aore rā te mau pereota i roto i te hīmene tā rātou e fa’a’ite atu ia Iona nō te tauturu iāna ’ia tātarahapa.
Iona 2:7–10 ; 3:10 ; 4:2 ; Mika 7:18–19
E aroha te Fatu i te feiā ato’a e fāriu iāna ra.
’Ia māramarama ana’e te mau tamari’i e mea aroha ’e e mea hāmani maita’i te Fatu, e fāriu atu rātou iāna ra ’ia hina’aro rātou i te aroha.
Mau ’ohipa ri’i e nehenehe e rave
-
’A ani i te mau tamari’i ’ia ’imi i te hō’ē tātarara’a nō te ta’o aroha i roto i te titionare ’aore rā, i roto i te Buka arata’i nō te mau pāpa’ira’a mo’a (scriptures.ChurchofJesusChrist.org). Nō te aha Iona i hina’aro ai i te aroha ? Nō te aha te nūna’a nō te Nineve e hina’aro ai i te aroha ? (hi’o Iona 1:1–3). ’A ani i te mau tamari’i ia feruri ē, e nehenehe tā rātou e uiui ia Iona. E aha te mau fa’a’itera’a a Iona tei fa’a’ite ra, e aroha rahi tō te Fatu ? (hi’o, ’ei hi’ora’a, Iona 2:7–10 ; 3:10 ; 4:2). Nāhea te Fatu i te fa’a’itera’a ia tātou i tōna aroha rahi ?
-
E ani i te mau tamari’i ’ia tāpura mai i ni’a i te tāpura ’ere’ere i te mau mea tā rātou e « ’oa’oa rahi », mai te mau fa’a’oa’oara’a anei, te mau hāmaita’ira’a nō ’ō mai i te Fatu ’e te vai atu rā. ’A ani ia rātou ’ia tai’o Mika 7:18–19 nō te ’ite mai hō’ē mea tā te Fatu e ’oa’oa rahi nei. E aha te mau parau mau i roto i teie mau ’īrava e tauturu i te hō’ē ta’ata te māta’u nei ’ia tātarahapa ?
-
E tauturu i te mau tamari’i ’ia feruri i te mau hi’ora’a a fa’a’ite mai ai te Fa’aora i te aroha ia vetahi ’ē, mai te Mareko 2:3–12 ; Luka 23:33–34 ; ’e Ioane 8:1–11. Fa’a’ite i te mau hōho’a nō teie mau ’ohipa i tupu, mai te mea e nehenehe. A tauturu i te mau tamari’i ’ia feruri i te mau rāve’a e vai rā ’ia aroha ’e ’ia hāmani maita’i ia vetahi.
Tē hina’aro nei te Fatu iā’u ’ia rave i te parauti’a, ’ia here i te aroha, ’e ’ia haere ma te ha’eha’a i te aro o te Atua.
Te hōro’a nei oMika 6:8 i te hō’ē hōho’a nō te orara’a ma te parauti’a. Nāhea e ti’a ai ia ’outou ’ia tauturu i te mau tamari’i ’ia ’ite ’e ’ia ora i te mau ha’api’ira’a i roto i teie ’īrava ?
Mau ’ohipa ri’i e nehenehe e rave
-
E tai’o ’āmui ia Mika 6:8, ’e e tauturu i te mau tamari’i ’ia māramarama i te aura’a o teie mau pereota : « te rave i te parauti’a », « here i te aroha », ’e « te haere ma te ha’eha’a i te aro o to Atua. » E ani i te mau tamari’i ’ia pāpa’i i tō rātou iho hōho’a tē rave rā i te hō’ē ’ohipa e au i te hō’ē o te mau pereota.
-
’A pāpa’i i ni’a i te tāpura ’ere’ere « e aha tā Iehova hina’aro ia ’oe ? » ’A ani ia rātou ’ia ’imi i te pāhonora’a i roto ia Mika 6:8. Nāhea te ha’apa’ora’a i te mau fa’auera’a a te Fatu e tauturu ai ia tātou ’ia rave fa’aoti i te mea tā te Fatu e tītau nei ia tātou i roto i teie ’īrava ?
Fa’aitoito i te ha’api’ira’a i te fare
’A pāpa’i i ni’a i te ’api parau i te hō’ē pereota tumu nā te tamari’i tāta’itahi nō roto mai i te mau pāpa’ira’a mo’a tā ’outou i tuatāpapa i roto i te piha ha’api’ira’a. ’A ani i te mau tamari’i ’ia tāmau ’ā’au i te pereota ’e ’ia ani i te hō’ē melo o te ’utuāfare ’ia fa’a’ite mai i tōna mau mana’o nō ni’a i te reira.
Ha’amaita’i i tā tātou ha’api’ira’a
Ha’apa’o maita’i i te mau tamari’i. E aha te huru o te mau tamari’i i roto i tā ’outou piha ha’api’ira’a i te pāhonora’a i te mau ’ohipara’a nō te ha’api’ira’a mai ? Mai te mea tūreru ri’i rātou, e taime paha ïa nō te tāmata i te tahi atu huru fa’a’oa’oara’a. I te tahi atu pae, mai te mea ē, e ’ite ’outou te vai ’ana’anatae rā te mau tamari’i i roto i te fa’a’oa’oara’a, eiaha e rū nō te haere i mua nō te mea ’aita ’outou i hōro’a i te mau mātēria ha’api’ira’a ato’a.
