« Tōna mau haerea e haere’a mure ’ore īa » (Habakuka 3:6). In the Beginning Was the Word [I vai nā te Logo i te mātāmua ra], nā Eva Timothy

28 nō Novema–4 nō Tītema

Nahuma ; Habakuka ; Zephania

« Tōna mau haere’a e haere’a mure ’ore ïa »

E nehenehe tō ’outou here i te mau pāpa’ira’a mo’a e riro ’ei fa’aurura’a pūai i ni’a i te mau tamari’i tā ’outou e ha’api’i rā. ’A vaiiho ia rātou ’ia ’ite i tō ’outou māuruuru nō te parau a te Atua.

Pāpa’i i te mau mana’o e tae mai

Tītau i te mana’o

E ani i te mau tamari’i ’ia ti’a mai hō’ē i muri i te tahi ’e ’ia fa’ahua mai te huru e peropheta nō te Faufa’a Tahito e ti’a ra « i ni’a i te patu » mai ia Habakuka (Habakuka 2:1). ’A ani ia rātou ’ia parau i te tahi atu mau tamari’i i te tahi mea tā rātou e ’apo rā nō ni’a ia Iesu Mesia ’e i tāna ’evanelia.

Ha’api’i i te ha’api’ira’a tumu : Te mau tamari’i ’āpī

Habakuka 2:3

E fa’atupu te Atua i tāna mau parau fafau i te mau taime ato’a.

’Ua pe’ape’a te peropheta Habakuka i te ’ino tāna i ’ite i rotopū i te mau ta’ata nō Iuda (hi’o Habakuka 1:2–4). ’Ua ha’apāpū te Fatu iāna ē, e tupu tāna mau parau fafau i tōna ra ’anotau (hi’o Habakuka 2:3).

Mau ’ohipa ri’i e nehenehe e rave

• ’A fa’a’ite i te tahi mau hi’ora’a nō te mau mea maita’i, i muri iho ā rā i tō tātou tia’ira’a—mai te hotu e hina’arohia ’ia para ’aore rā te faraoa tei hina’arohia ’ia ’eu. E aha te tupu mai mai te mea e tāmata tātou i te ’amu i te hotu ’aore rā, i te faraoa hou a ineine ai ? ’A fa’a’ite i te parau nō ni’a i te peropheta Habakuka, tei hina’aro ’ia ’ite ē, afea te Fatu e tāpe’a ai te ino tāna i ’ite ’ati a’e iāna. Tai’o i te mau tamari’i i te pāhonora’a a te Fatu, e ’itehia i roto i te Habakuka 2:3. ’A ha’apāpū, ’ua tītauhia ia Habakuka ’ia tīa’i i te mau fafaura’a a te Fatu ’ia tupu mai, mai ia tātou ato’a i tītauhia ’ia rave i te tahi mau taime. ’A fa’a’ite nā i te hō’ē taime a tīa’i ai ’outou i te hō’ē ha’amaita’ira’a.

• E tauturu i te mau tamari’i ’ia feruri i te mau mea tā te Atua i fafau mai—’ei hi’ora’a, e ho’i mai Iesu Mesia i ni’a i te fenua nei ’aore rā, e ora fa’ahou tātou i pīha’i iho i te Atua. ’E te hi’ora’a tāta’itahi, ’a ani i te mau tamari’i ’ia fa’ahiti fa’ahou i te pereota « e tīa’i atu ā; e tae mau mai ïa ».

Habakuka 2:14

E nehenehe tā’u e tauturu i te fa’a’ī i te fenua i te māramarama a Iesu Mesia.

’Ua tohu Habakuka i te mahana e ’ite ai te ao ato’a nei nō ni’a ia Iesu Mesia. E ha’amata te reira parau tohu i te tupu i tō tātou nei tau. ’A feruri nāhea e nehenehe ai ia ’outou ’ia tauturu i te mau tamari’i ’ia riro ’ei tuha’a nō tōna tupura’a.

Mau ’ohipa ri’i e nehenehe e rave

• ’A fa’a’ite i te hō’ē fāri’i, ’e ’a hōro’a i te tamari’i tāta’itahi i te hō’ē tao’a iti. ’A ani i te tamari’i tāta’itahi ’ia fa’a’ite mai i te hō’ē ’ohipa tā Iesu i rave ’aore rā i ha’api’i, i reira, e tu’u atu ai i tā rātou tao’a i roto i te fāri’i. ’A tai’o ha’apuai Habakuka 2:14, ’e ’a fa’ata’a ē, mai tā te mau tamari’i i fa’a’ī i te fāri’i ’e tō rātou ’ite nō ni’a i te Fatu, e nehenehe ato’a tātou e fa’a’ī i te ao nei ma te ’ite nō ni’a iāna.

• Fa’a’ite i te mau tamari’i i te hōho’a fenua o te ao nei (hi’o te mau hōho’a fenua ’ā’amu o te ’Ēkālesia, N° 7, « Hōho’a o te ao nei »). E tauturu ia rātou ’ia ’ite i te vāhi i reira rātou e ora ai ’e te mau vāhi i reira te mau misiōnare tā rātou i mātau i te tāvinira’a. ’A fa’a’ite i tō ’outou ’itera’a pāpū ē, tē hina’aro nei te Metua i te ao ra i te mau ta’ata ato’a nā te ao nei ’ia ’ite ia Iesu Mesia. Nāhea e ti’a ai ia tātou ’ia tauturu i te ha’api’i i te tahi atu mau ta’ata nō ni’a ia Iesu ? ’A parau i te mau tamari’i nō ni’a i te mau mea tā ’outou i ’ite ia rātou i te ravera’a o te ha’api’i mai ia ’outou nō ni’a ia Iesu Mesia. Tauturu ia rātou ’ia feruri i te tahi mau mea tā rātou e nehenehe e rave.

• Hīmene ’āmui i te hō’ē hīmene nō ni’a i te fa’a’itera’a i te ’evanelia, mai te « Je voudrais déjà partir en mission » (Chants pour les enfants, 90). E aha atu ā tā tātou e nehenehe e parau ia vetahi ’ē nō ni’a ia Iesu Mesia ? Nō te tahi mau mana’o, a hi’o i te mau hīro’a fa’aro’o.

Zephania 2:3

« E ’imi ia Iehova ».

’Ua ha’api’i Zephania e ti’a ia tātou ’ia ’imi i te Fatu i roto i te mau taime ’ino rahi, mai teie mau mahana hope’a nei. ’A feruri nāhea ’outou i te fa’aitoito i te mau tamari’i ’ia ’imi iāna.

Mau ’ohipa ri’i e nehenehe e rave

• ’A pia i te hō’ē hōho’a nō Iesu, ’e ’a tai’o i te mau tamari’i i te zephania 2:3. ’A ani ia rātou ’ia ha’amenemene i tō rātou rima i tō rātou mata mai te tīti’a mata te huru ’e ’ia hi’o i te hōho’a i te mau taime ato’a e tai’o ’outou i te ta’o ra « ’imi ». ’A fa’ata’a ē, ’ua hina’aro te peropheta Zephania i te mau ta’ata ’ia ’imi i te Fatu. Nāfea tātou i te ’imi i te Fatu ? I hea tātou e ’imi ai iāna ?

• ’A fa’a’ohipa i te ’api ’ohipara’a o teie hepetoma, ’aore ra ’a feruri i te tahi atu mau ha’uti o te fa’aitoito i te mau tamari’i ’ia ’imi i te Fatu. ’A ha’uti ’aore rā ’a hīmene ’āmui i te hō’ē hīmene e tū’ati i ni’a i teie tumu parau, mai te « Sans tarder, je recherche mon Sauveur » (Chants pour les enfants, 67). ’A ’āparau e aha tā te hīmene e ha’api’i mai nei e nāhea tātou e ’ite ai ia Iesu Mesia i roto i tō tātou orara’a.

Ha’api’i i te ha’api’ira’a tumu : Te mau tamari’i pa’ari

Nahuma 1:7

« E maita’i tō Iehova, e ha’apūra’a ’eta’eta i te mahana ahoaho ».

Te fa’aruru nei tātou tāta’itahi i tō tātou iho « mau mahana ahoaho ». Nāhea e ti’a ai ia ’outou ’ia tauturu i te mau tamari’i ’ia fāriu i te Fatu ra, « ti’aturi iāna », ’e ’a ’imi i te pārurura’a i te pae vārua i roto i tō rātou mau mahana fifi ?

Mau ’ohipa ri’i e nehenehe e rave

• ’A fa’a’ite i te mau tamari’i i te hō’ē hōho’a nō te hō’ē pare puai ’aore rā te hō’ē pā. E aha te tahi mau tumu tā te ta’ata e hina’aro ai i te hō’ē pare ? E ani i te mau tamari’i ’ia tai’o i te Nahuma 1:7 nō te ’ite mai i te mea tā te peropheta Nahuma i parau ē, mai te hō’ē pare puai ’aore rā, i te pā nō tātou. E aha te tumu te Fa’aora e pāruru ai ia tātou ?

• E ani i te mau tamari’i ’ia pāpa’i i te hō’ē hōho’a nō rātou iho ’e nō tō rātou ’utuāfare i roto i te hō’ē pare puai ’aore ra, i te hō’ē pā. ’A fa’aitoito ia rātou ’ia pāpa’i i te mau ta’o ’ati a’e i te pare o te fa’a’ite mai i te tahi o te mau fa’aurura’a a te ti’aporo i roto i te ao nei. ’A ani ia rātou ’ia pāpa’i i te mau ta’o i roto i te pare o te fa’a’ite nō Iesu Mesia. E aha te mea tāna e ani mai nei ia tātou ’ia rave nō te fāri’i i tōna puai ’e tōna pārurura’a ? (hi’o Te Parau Ha’api’ira’a ’e te mau Parau Fafau 35:24).

  

  « E maita’i tō Iehova, e ha’apūra’a ’eta’eta i te mahana ahoaho » (Nahuma 1:7).

Habakuka 3:17–19

E nehenehe au e fāri’i i te ’oa’oa ia Iesu Mesia ra, noatu ē, ’aita te mau mea e tupu maita’i nei.

’Ua fa’a’ite mai o Habakuka i te tahi mau tāmatara’a o te nehenehe e tupu i ni’a i tōna mau ta’ata, mai te tumu rā’au ’aore rā te vine tei ’ore e hotu. I muri iho, ’ua parau ’oia ē, noatu e tupu teie mau mea « e ’oa’oa vau ia Iehova ».

Mau ’ohipa ri’i e nehenehe e rave

• E ani i te mau tamari’i ’ia tai’o i te Habakuka 3:17 ’e ’ia ’imi mai i te mau tāmatara’a tei fa’a’itehia i roto i teie ’īrava. E aha te tupu i roto i te hō’ē ta’ata, ’ia tae mai teie mau mea ? ’A tauturu i te mau tamari’i ’ia feruri i te mau tāmatara’a e nehenehe e tupu mai i ni’a ia rātou. I muri iho, ’a tai’o ’āmui i te mau ’īrava 18–19 nō te ha’api’i mai e aha tā Habakuka e parau nei ’ia tae i te taime, e tupu mai ai teie mau mea i ni’a iāna.

• E tauturu i te mau tamari’i ’ia ’imi i te tahi atu mau hi’ora’a o te mau ta’ata i roto i te mau pāpa’ira’a mo’a o tei ’oa’oa i te Fatu i roto i te mau taime fifi. E ’itehia ia rātou te mau hi’ora’a i roto i Te ohipa 16:19–25 ; Mosia 24:10–15 ; ’e te poro’i a te peresideni Dieter F. Uchtdorf « Ia māuruuru i roto i te mau huru ato’a o te orara’a » (Liahona, Mē 2014, 70–77), o te tuha’a iho ā ra « Ia māuruuru i roto i tō tātou mau huru ato’a. » Nō te aha teie mau ta’ata e nehenehe ai e ’oa’oa i roto i te mau taime fifi ? Nāhea e ti’a ai ia tātou ’ia peʼe i tā rātou hiʼoraʼa ?

Zephania 3:14–20

’O rātou ’o tē pe’e ia Iesu Mesia e ’itehia ïa ia rātou te hau ’e te ’oa’oa.

Te fa’a’ite neiZephania 3:14–20 i te mahana ’oa’oa i te taime Iesu Mesia, « te ari’i o ’Īserā’ela », a tāvana ’oia i rotopū i tōna mau ta’ata ’e « e ’ōu’au’a ’oia ia ’oe ma te ha’amaita’i » (’īrava 15, 17).

Mau ’ohipa ri’i e nehenehe e rave

• ’A tai’o ’āmui Zephania 3:14. I muri iho, ’a ani i te tamari’i tāta’itahi ’ia mā’iti i te hō’ē o te mau ’īrava i roto i te Zephania 3:15–20 ’e a tuatāpapa i te reira, ma te ’imi i te mea o te nehenehe e tauturu ia tātou ’ia « re’are’a ’oe ’e ’ia ’oa’oa ». Ani atu ia rātou ’ia fa’a’ite mai te mea tā rātou i ’ite mai.

• E tauturu i te mau tamari’i ’ia ’imi i te mau hīmene e tauturu ia rātou ’ia « re’are’a oe e ia oaoa ma to ’ā’au atoa » (Zephania 3:14). ’A hīmene ’āmui i te tahi mau hīmene, e ’a fa’aitoito i te mau tamari’i ’ia parauparau mai nō ni’a i te ’oa’oa tā rātou e ’ite nei i roto i te ’evanelia a Iesu Mesia.

Fa’aitoito i te ha’api’ira’a i te fare

’A ani i te mau tamari’i ’ia pāpa’i i te fa’ahorora’a o te hō’ē pāpa’ira’a mo’a tā rātou e hina’aro e fa’a’ite i tō rātou ’utuāfare (’aore rā, e pāpa’i nō rātou).

Ha’amaita’i i tā tātou ha’api’ira’a

Tauturu i te mau tamari’i ’ia ’ite i te Vārua. ’A tāmata i te ite i te mau taime e fāri’i ai te mau tamari’i i te fa’aurura’a a te Vārua. ’Ia tupu ana’e te reira, ’a tauturu ia rātou ’ia māramarama ē, nō ’ō mai teie mau mana’o i te Vārua Maita’i.