’Ua ’ahuhia te pēpe Iesu i roto i te ’ahu ’uo’uo ’e tē tārava ra i roto i te fātene

For unto Us a Child Is Born [’Ua fānau mai hoʼi te hōʼē tama nā tātou], nā Simon Dewey

19–25 nō Tītema

Noela

« ’Ua tīa’i tātou iāna ra, ’e ’ua fa’aora ’oia ia tātou »

Tē hi’o ateā nei te mau peropheta ’o te Faufa’a Tahito i te ’oa’oa rahi i te fānaura’a o te Mesia (hi’o Isaia 25:9). ’A fa’aineine ai ’outou nō te ha’api’i i roto i te pu’e tau noela, ’a feruri nāhea e nehenehe ai ia ’outou ’ia tauturu i te mau tamari’i ’ia ’ite i te ’oa’oa i roto i te fānaura’a o te Fa’aora o Iesu Mesia.

Pāpa’i i te mau mana’o e tae mai

ītona fa’a’itera’a

Tītau i te mana’o

E ani i te mau tamari’i ’ia fa’a’ite mai e aha tā rātou i ’ite nō ni’a i te fānaura’a ’o Iesu Mesia. ’A fa’ahiti ai rātou i te hō’ē ta’ata ’e ’aore rā, i te hō’ē tāo’a nō roto mai i te ’ā’amu, ’a ani ia rātou ’ia pāpa’i te reira i ni’a i te tāpura ’ere’ere. ’A ani i te mau tamari’i e aha tā rātou i here roa nō ni’a i teie ’ā’amu.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Tē ha’api’i nei te Faufa’a Tahito iā’u nō ni’a ia Iesu.

’A tauturu i te mau tamari’i ’ia ha’atumu rātou i ni’a i te Fa’aora ia Iesu Mesia mai te tumu e fa’ahanahana ai tātou i te noela. E nehenehe tā ’outou e rave i te reira ma te fa’a’ohipa i te mau pāpa’ira’a mo’a i roto i te Faufa’a Tahito ’o tē fa’a’ite pāpū nei nō ni’a iāna.

Mau ’ohipa ri’i e nehenehe e rave

• ’A pia i te hō’ē hōho’a nō te fānaura’a (mai te Buka hōho’a nō te ’evanelia, N°30, ’e ’aore rā, te hō’ē ’o te mau hōho’a i roto i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’A tai’o Isaia 9:6, ma te hōro’a i te tamari’i tāta’itahi i te taime nō te fa’atoro i te rima i te ’aiu ra o Iesu ’a fa’aro’o ai rātou i te pereota « ’Ua fānauhia mai te hō’ē tamari’i. » ’A fa’a’ite i tō ’outou ’itera’a pāpū ē, ’ua ’ite te mau peropheta i roto i te Faufa’a Tahito, e fānauhia mai Iesu.

• E ani i te tamari’i tāta’itahi ’ia parau i tōna i’oa, ’e ’a fa’ata’a atu ē, e nehenehe rātou ’e tātou ato’a e pi’ihia ’e te tahi atu mau i’oa, mai te tuahine anei, ’aore rā, te taea’e ’aore rā, te hoa. E ani i te mau tamari’i ’ia feruri mai i te tahi atu mau hi’ora’a. ’A tai’o Isaia 9:6 i te mau tamari’i, ma te ha’apāpū i te mau i’oa e au i tō Iesu Mesia : « Hau ’ē, e A’o, te Atua pūai, te Metua nō te mau u’i a muri atu, te Ari’i nō te Hau. » E tauturu i te mau tamari’i ’ia māramarama i te mea tā teie mau i’oa e parau mai nei ia tātou nō ni’a ia Iesu.

• ’A hōro’a i te tamari’i tāta’itahi i te hō’ē fetia ’api parau, ’e ’a ani i te mau tamari’i ’ia tāpe’a i tā rātou mau feti’a i ni’a ’ia tai’o ana’e ’outou i te pereota i muri nei i roto i te Numera 24 :17 : « e feti’a tē tae mai, mai ’ō ia Iakoba ra. » E ani i te mau tamari’i ’ia fa’a’ite mai e mea nāhea Iesu i te fa’ahōho’ahia e te hō’ē feti’a ’ana’ana o te ’ana’ana i tō te ao ato’a nei. ’A hīmene ’āmui i te hō’ē hīmene nō ni’a i te feti’a tei fā mai a fānauhia ai Iesu, mai te « Nuit de Noël » (Chants pour les enfants, 24) ’e ’aore rā « I te Noela Mātāmua » (Te mau hīmene, N°128).

’O Iesu Mesia tō’u Fa’aora.

Te Noela, o te taime ïa nō te fa’ahanahana ’eiaha noa te fānaura’a o Iesu, i tōna ra orara’a ’e tāna misiōni ’ei Fa’aora nō tō te ao ato’a nei. Nāhea ’e ti’a ai ia ’outou ’ia tauturu i te mau tamari’i ’ia fāri’i i te ’oa’oa ’e te māuruuru nō te Tāra’ehara a Iesu Mesia ?

Mau ’ohipa ri’i e nehenehe e rave

• ’A ani i te mau tamari’i ’ia feruri i te hō’ē mea tā rātou e tīa’i noa nei ’ia tae mai. ’A fa’ata’a, ’ua tīa’i te mau ta’ata ha’apa’o maita’i i te tau ’o te Faufa’a Tahito i te fānaura’a o Iesu Mesia. ’A tai’o Isaia 25:9 i te mau tamari’i, ’e ’a ani ia rātou ’ia fa’ahiti fa’ahou i te pereota « tā tātou i tīa’i na, e ’oa’oa tātou ma te ’ou’au’a i te ora nāna. » ’A fa’a’ite ia rātou nō te aha ’outou e ’oa’oa ai i te fānau-ra’a-hia mai te Mesia. ’A ani i te mau tamari’i ’ia fa’a’ite mai i tō rātou mau mana’o nō ni’a i te Fa’aora.

• ’A hīmene ’āmui i te hō’ē hīmene nō ni’a i te fānaura’a o Iesu, mai te « Au loin dans l’étable » (Chants pour les enfants, 26–27) ’e ’aore rā, « Hīmene te melahi ! I te Ari’i ’āpī ! » (Te mau hīmene, N°126). ’A tauturu i te mau tamari’i ’ia ’ite mai i te mau pereota i roto i teie mau hīmene ’o tē ha’api’i nei ia tātou nō ni’a i tō tātou Fa’aora ’e te mau ha’amaita’ira’a tā tātou i fāri’i nā roto iāna.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Tē ha’api’i mai nei te Faufa’a Tahito iā’u nō ni’a ia Iesu Mesia, te Mesia tei parauhia ra.

’Ua hau te Faufa’a Tahito i te hō’ē ha’aputura’a nō te mau ’ā’amu ’e te mau pāpa’ira’a ; tāna fā, mai te mau pāpa’ira’a mo’a ato’a, ’o tē fa’a’ite-pāpū-ra’a ïa nō ni’a ia Iesu Mesia. E tauturu i te mau tamari’i ’ia ha’api’i mai nāhea i te ’imi iāna i roto i te Faufa’a Tahito.

Mau ’ohipa ri’i e nehenehe e rave

• E ani i te mau tamari’i ’ia hāmani i te hō’ē tāpura nō te mau i’oa ato’a ’e te mau ti’ara’a o Iesu Mesia e ’itehia ia rātou i roto i te Mose 7:53 ; Salamo 23:1 ; Ioba 19:25 ; Isaia 7:14 ; 9:6 ; 12:2 ; Amosa 4:13 ; ’e Zekaria 14:16. ’A vaiiho ia rātou ’ia rave ’āpīpiti i te ’ohipa mai te mea e hina’aro rātou. ’A ani ia rātou ’ia fa’a’ite mai i tā rātou mau tāpura i te tahi ’e te tahi. E aha tā tātou e ha’api’i mai nei nō ni’a i te Fa’aora nā roto mai i teie mau i’oa tāta’itahi ’e te mau ti’ara’a ?

• ’A fa’a’ite i te mau tamari’i i te tahi mau fa’anehenehera’a noela (’e ’aore rā te hōho’a o te reira), mai te hō’ē feti’a, te mau mori, ’aore rā, te hō’ē tao’a hōro’a. ’A ani i te mau tamari’i nāhea teie mau mea tāta’itahi e nehenehe ai e fa’aha’amana’o ia tātou nō te Fa’aora. ’A fa’ata’a ē, pinepine te mau pāpa’ira’a mo’a i te fa’a’ohipa i te mau tāpa’o nō te ha’api’i ia tātou nō ni’a ia Iesu Mesia. ’A ani i te mau tamari’i ’ia hi’o i roto i te hō’ē ’e ’aore rā, hau atu i te mau ’īrava i muri nei nō te tahi mea e nehenehe e fa’ahōho’a ia Iesu Mesia : Genese 22:8 ; Exodo 17:6 ; Salamo 18:2 ; 27:1 (hi’o i arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare nō te tahi atu mau hi’ora’a). E aha ’o Iesu mai te hō’ē ’ārenio te huru, mai te pape, te ’ōfa’i, te pare, ’aore rā, te māramarama ?

• I te hōpe’a o te tuatāpapara’a i te Faufa’a Tahito nō teie matahiti, ’a ani i te mau tamari’i ’ia fa’ati’a mai i tā rātou mau ’ā’amu au roa a’e ’aore rā, i te mau pāpa’ira’a mo’a nō roto mai i te Faufa’a Tahito. E aha tā teie mau ʼāʼamu ’aore rā te mau pāpa’ira’a mo’a e haʼapiʼi mai nei ia tātou nō niʼa ia Iesu Mesia ? Nō te aha tātou i māuruuru ai i te fāri’ira’a i te Faufa’a Tahito ?

’O Iesu Mesia tō’u Fa’aora ’e Tāra’ehara.

’A fa’ahanahana ai tātou i te fānaura’a o Iesu Mesia, e nehenehe ato’a tātou e ’oa’oa i roto i tōna orara’a ’e i tāna tusia tāra’ehara. Nāhea e nehenehe ai ia ’outou ’ia fa’a’ohipa i te mau pāpa’ira’a mo’a i roto i te Faufa’a Tahito nō te tauturu i te mau tamari’i ’ia patu i tō rātou fa’aro’o i tō rātou Fa’aora ’e tō rātou Tāra’ehara ?

Mau ’ohipa ri’i e nehenehe e rave

• Tai’o ’āmui i te Isaia 7:14 ; i muri iho ’a ani i te mau tamari’i ’ia fa’a’ite mai i te mea tā rātou i ’ite nō ni’a i te fānaura’a o te Mesia. ’Aore rā, ’e fa’a’ite’ite i te video « Te fānaura’a » (ChurchofJesusChrist.org), ’e e ani i te tamari’i tāta’itahi ’ia mā’iti i te hō’ē ta’ata mai roto mai i te video ’e ’ia fa’a’ite mai, nāhea te reira ta’ata i te putapūra’a. ’A fa’a’ite atu i tō ’outou ’itera’a pāpū nō ni’a i te Fa’aora, ’e ’a ani i te mau tamari’i ’ia nā reira ato’a.

• Nō te tauturu i te mau tamari’i ’ia māramarama maita’i a’e i te ti’ara’a o Iesu Mesia ’ei Fa’aora nō tātou, ’a ani ia rātou ’ia tai’o Isaia 25:8–9 ; 53:3–5 ; ’e Hosea 13:14. E aha tā teie mau pāpa’ira’a mo’a e ha’api’i nei ia tātou nō ni’a i te huru tō te Fatu fa’aora ra’a ia tātou ? Nāhea e ti’a ai ia tātou ’ia « ’oa’oa ma te ’ou’au’a i te ora nāna » ? (Isaia 25:9).

• ’A hīmene ’āmui i te hō’ē hīmene nō ni’a i te here o Iesu Mesia nō tātou, mai te « Au loin dans l’étable » (Chants pour les enfants, 26–27) ’aore rā « Te māere nei au » (Te mau hīmene, N°111). ’A ani i te mau tamari’i ’ia fa’a’ite mai te mau pereota o te tauturu ia rātou ’ia fa’ari’i i te here ’o te Fa’aora.

ītona ’apora’a mai

Fa’aitoito i te ha’api’ira’a i te fare

’A ani i te mau tamari’i ’ia fa’a’ite i tō rātou ’utuāfare ’aore rā i te hō’ē hoa i te mea tā rātou i ’apo mai nō ni’a ia Iesu Mesia mai roto mai i te Faufa’a Tahito. ’A fa’aitoito ia rātou ’ia ha’amata i te tuatāpapa i te Faufa’a ’Āpī i teie hepetoma.

Ha’amaita’i i tā tātou ha’api’ira’a

Fa’atupu i te hō’ē vāhi ’o tē ani i te Vārua. ’Ua rau te mau rāve’a e nehenehe ai ’outou e ani i te Vārua i roto i tā ’outou piha ha’api’ira’a. Nā te pehe ’ōmuara’a e fa’atupu i te tura. Nā te fa’a’itera’a i te here ’e te ’itera’a pāpu e fa’atupu i te hō’ē vāhi māhanahana pae vārua. ’A feruri nā roto i te pure i te mea tā ’outou e nehenehe e rave nō te fa’atupu i te hō’ē vāhi tei ’ī i te vārua i roto i tā ’outou piha ha’api’ira’a. (Hi’o Ha’api’ira’a mai tā te Fa’aora, 15.)

’api ’ohipara’a : Tē ha’api’i nei te Faufa’a Tahito iā’u nō ni’a ia Iesu