For unto Us a Child Is Born [’Ua fānau mai ho’i te hō’ē tama nā tātou], nā Simon Dewey

19–25 nō Titema

Noela

« ’Ua tīa’i tātou iāna, ’e e fa’aora ’oia ia tātou »

I roto i teie pu’e tau Noela, ’a feruri e nāhea te Faufa’a Tahito i te ha’apūaira’a i tō ’outou ’itera’a pāpū nō ni’a ia Iesu Mesia i te roara’a o te matahiti.

Pāpa’i i te mau mana’o e tae mai

Tē vai ra i roto i te Faufa’a Tahito te mana’o tīa’i rū. E au ri’i ïa mai te pu’e tau Noela. Mai ia Adamu rāua ’o Eva, ’ua tīa’i te mau patereareha nō te Faufa’a Tahito, te mau peropheta, te mau rohipehe, ’e te mau ta’ata, i te mau mahana maita’i a’e, ma te ’ī i te ti’aturira’a nō te fa’a’āpīra’a ’e te fa’ati’amāra’a nā roto i te Mesia. ’E e mea pinepine tō te ’āti ’Īserā’ela tītaura’a i te reira ti’aturira’a—i roto ānei i te fa’atītīra’a i ’Aiphiti ’aore rā i Babulonia, ’e ’aore rā, i roto i te tītīra’a o tā rātou iho mau hara ’aore rā, te ’ōrurehau. Nā roto i taua mau mea ato’a ra, ’ua fa’aha’amana’o te mau peropheta ia rātou ē, e tae mai te hō’ē Mesia, te hō’ē Fa’ati’amā, « ’ei fa’a ’ite i te ora i te tītī » (Isaia 61:1).

’Ua ha’amata taua ti’aturira’a ra i te tupu ’a fānauhia ai Iesu Mesia i Betelehema. ’Ua fānauhia te Fa’ati’amā rahi o ’Īserā’ela i roto i te hō’ē fare vaira’a ’ānimara ’e ’ua tu’uhia i roto i te hō’ē phātene (’a hi’o i te Luka 2:7). Terā rā, e ’ere ’oia i te Fa’ati’amā nō te ’āti ’Īserā’ela noa i mūta’a iho ra. ’Ua haere mai ’oia nō te fa’ati’amā ia ’outou—nō te fa’a’oroma’i i tō ’outou pe’ape’a, nō te amo i tō ’outou mau ’oto, ’ia ha’apēpēhia nō tā ’outou mau ’ohipa ’ino, ’e nō tōna paruparu e ora ai ’outou (’a hi’o Isaia 53:4–5). Nō reira te Noela i ’ī ai i te tīa’ira’a ’oa’oa, tae roa mai i tō tātou nei ’anotau. ’Ua hau i te 2000 matahiti i teienei tō te Mesia haerera’a mai, ’e e tāmau noa ’oia i te haere mai i roto i tō tātou orara’a i te mau taime ato’a e ’imi tātou iāna.

Mau mana’o nō te tuatāpapara’a pāpa’ira’a mo’a a te ta’ata hō’ē

Tē ’oa’oa nei au i tō’u Faaora.

’Ua mātauhia te Noela ’ei pu’e tau ’oa’oa, nō te ’oa’oa tā Iesu Mesia e hōpoi nei i tō te ao nei. Tae noa atu i te mau ta’ata ’aita e ha’amori nei ia Iesu ’ei Tamaiti nā te Atua, e mea pinepine ato’a rātou i te putapū i te ’oa’oa o te Noela. ’A feruri na i tō ’oe ’oa’oa nō tō te Metua i te ao ra tonora’a mai i tāna tamaiti.

E rave rahi tenetere hou te fānaura’a o te Fa’aora, ’ua fāri’i ato’a te mau peropheta o te Faufa’a Tahito i te ’oa’oa ’a paraparau ai rātou nō ni’a i te taera’a mai o te Mesia. ’A tai’o i te tahi o te mau ’īrava i muri nei, ’e ’a feruri ē, nō te aha e mea faufa’a te reira nō te feiā i tīa’i maoro na ’ia tupu te misiōni a te Fa’aora : Salamo 35:9; Isaia 25:8–9; 44:21–24; 51:11; Zephania 3:14–20; Mose 5:5–11. Nō te aha e mea faufa’a teie mau ’īrava nō ’oe ?

’A hi’o ato’a Russell M. Nelson, « Te ’oa’oa ’e te oraora pae vārua », Ensign ’aore rā, Liahona, Novema 2016, 81–84.

E nehenehe te mau tāpa’o e tauturu iā’u ’ia ha’amana’o ia Iesu Mesia.

E rave rahi mau peu ’āpitihia i te Noela, e aura’a tāpa’o tō rātou ’o tē fa’atoro ia tātou i ni’a i te Mesia ra. Te mau fa’a’una’una tei hōho’a i te feti’a, tē fa’ahōho’a nei te reira i te feti’a ’ana’ana tei ’ana’ana i te ’āru’i o te fānaura’a o Iesu (’a hi’o i te Mataio 2:2). E nehenehe te feiā hīmene e fa’aha’amana’o ia tātou i te mau melahi tei fā mai i te mau tīa’i māmoe (’a hi’o Luka 2:13–14). ’A tuatāpapa ai ’oe i te Faufa’a Tahito i teie matahiti, ’ua ’ite paha ’oe e rave rahi tāpa’o nō te Fa’aora. ’Ua tāpurahia te tahi i raro nei. E nehenehe e tuatāpapa i te reira ’e e pāpa’i i te mau mea tā te reira e ha’api’i mai nei ia ’oe nō ni’a iāna.

• ’Ārenio (Genese 22:8 ; Exodo 12:5 ; 1 Petero 1:18–20).

• Māna (Exodo 16:4, 12–21,31 ; Deuteronomi 8:3 ; Ioane 6:30–40).

• Pape (Exodo 17:1–6 ; Ieremia 2:13 ; Ezekiela 47:1–12 ; Ioane 4:7–14).

• ’Ōphi veo (Numera 21:4–9 ; Ioane 3:14–15).

• ’Ōfa’i (1 Samuela 2:2 ; 2 Samuela 22:2–3 ; Salamo 118:22–23 ; Isaia 28:16 ; Ephesia 2:20).

• Āma’a (Isaia 11:1–2 ; Ieremia 23:5 ; 33:15).

• Māramarama (Salamo 27:1 ; Isaia 9:2 ; 60:19 ; Mika 7:8 ; Ioane 8:12).

E aha te tahi atu mau tāpa’o, te mau tuha’a, ’e te mau ’ā’amu tā ’oe i ’ite i roto i te mau pāpa’ira’a mo’a ’o tē fa’a’ite pāpū nei nō ni’a ia Iesu Mesia ?

’A hi’o ato’a 2 Nephi 11:4 ; Mosia 3:14–15 ; Mose 6:63 ; « Te mau huru ’aore rā, te mau tāpa’o o te Mesia », i roto i te arata’i nō te mau pāpa’ira’a mo’a, « Iesu Mesia », scriptures.ChurchofJesusChrist.org.

« E ma’irihia tōna i’oa ’o te Hau ’ē ».

E rave rahi i’oa ’e te huru ti’ara’a tō Iesu Mesia. E aha te mau ti’ara’a tā ’oe e ’ite nei i roto i te mau ’īrava i muri nei ? Salamo 23:1 ; 83:18 ; Isaia 7:14 ; 9:6 ; 12:2 ; 63:16 ; Amosa 4:13 ; Zekaria 14:16 ; Mose 7:53. E aha te tahi atu mau ti’ara’a tā ’oe e nehenehe e feruri? E au paha ’oe ’ia tāpura i te mau ti’ara’a o Iesu Mesia tā ’oe e ’ite i roto i te mau hīmene Noela. E aha tā te ti’ara’a tāta’itahi e fa’atupu nei i ni’a i tō ’oe huru ferurira’a iāna ?

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

E nehenehe te mau peu tumu nō te Noela e fa’a’ite i te parau nō Iesu Mesia.E mau peu tumu tā te mau ’utuāfare ’Īserā’ela, mai te Pāsa ’e te tahi atu mau ’ōro’a, tei fa’ata’ahia nō te fa’afāriu i tō rātou ’ā’au ’e tō rātou ferurira’a i ni’a i te Fatu (’a hi’o Exodo 12). E aha te mau peu tumu a tō ’outou ’utuāfare i te pu’e tau Noela ’o tē tauturu ia ’outou ’ia rōtahi i ni’a ia Iesu Mesia ? E aha te mau peu tumu tā ’outou i ’ite nō ni’a i tō ’outou ’ā’amu ’utuāfare ? E nehenehe ’outou e ’āparau ’e te ’utuāfare i te tahi mau peu tumu tā ’outou e hina’aro e ha’amata. Te tahi mau mana’o, ’oia ho’i, e tāvini i te hō’ē ta’ata i roto i te fifi (nō te mau mana’o, ’a hi’o ComeuntoChrist.org/Light-the-World), e ani i te hō’ē ta’ata ’ia māta’ita’i ’e ’o ’outou i te purera’a Noela a te Peresidenira’a Mātāmua (broadcast.ChurchofJesusChrist.org), e pāpa’i i tā ’outou iho hīmene Noela, ’e aore rā e ’imi i te hō’ē rāve’a ’aravihi nō te fa’a’ite i te parau poro’i o te fānaura’a o te Mesia.

« Te tamari’i Mesia : te hō’ē ’ā’amu fānaura’a ».Nāhea ’outou ’ia tauturu i te mau melo o te ’utuāfare ’ia putapū i te tura ’e te ’oa’oa o te fānaura’a o te Mesia ? E nehenehe ’outou e māta’ita’i i te video « The Christ Child: A Nativity Story [Te tamari’i Mesia : te hō’ē ’ā’amu fānaura’a] » (ChurchofJesusChrist.org) ’e ’aore rā ’a tai’o ’āmui i te Mataio 1:18–25 ; 2:1–12 ; Luka 1:26–38 ; 2:1–20. E nehenehe te melo tāta’itahi o te ’utuāfare e mā’iti i hō’ē ta’ata i roto i te video ’aore rā, i roto i te ’ā’amu pāpa’ira’a mo’a ’e ’ia fa’a’ite e aha te mana’o o te reira ta’ata nō ni’a i te Fa’aora. E nehenehe ato’a te mau melo o te ’utuāfare e fa’a’ite i tō rātou iho mau mana’o.

Te ’imira’a i te Fa’aora i roto i te Faufa’a Tahito.’A fa’aineine ai ’outou nō te tuatāpapa i te orara’a o Iesu Mesia i roto i te Faufa’a ’Āpī i te matahiti i muri nei, e nehenehe e hi’opo’a fa’ahou ’e tō ’outou ’utuāfare i te mea tā rātou i ha’api’i mai nō ni’a iāna i teie matahiti i roto i te Faufa’a Tahito. E nehenehe ’outou e hi’o fa’ahou i te mau arata’ira’a i roto i teie rāve’a ’e i te tahi atu mau fa’ata’ara’a tuatāpapara’a a te ta’ata hō’ē nō te tauturu ia ’outou ’ia ha’amana’o i te mea tā ’outou i ha’api’i mai. E fāna’o te mau tamari’i ’āpī a’e i te hi’ora’a i te mau ’Ā’amu o te Faufa’a Tahito ’e ’aore rā te mau hōho’a i roto i teie mātēria. E aha te mau parau tohu tā tātou i tāpe’a mai ? E aha tā tātou i ha’api’i mai nō ni’a i te Fa’aora ?

Nō te mau mana’o hau atu nō te ha’api’ira’a i te mau tamari’i, ’a hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « E Betelehema ē », Te mau hīmene, N°125.

Ha’amaita’i i tā tātou ha’api’ira’a

’A fa’aro’o i te mau melo o tō ’outou ’utuāfare. Te fa’aro’ora’a ’o te hō’ē ïa ’ohipa nō te here. E tītau te reira ’ia ha’apa’o maita’i a’e tātou i te mea e vai ra i roto i te ’ā’au o te tahi atu ta’ata ’eiaha rā te mea i roto i tā tātou tārena ’ohipa ’aore rā te arata’ira’a ha’api’ira’a […] ’Ia ha’apa’o maita’i ana’e ’outou i te mau parau poro’i a [te mau melo o te ’utuāfare], tei parau-vaha-hia mai ’aore rā, ’aita, e māramarama maita’i a’e ’outou i tō rātou mau hina’aro, tā rātou mau māna’ona’ora’a ’e tō rātou mau hia’ai. E tauturu mai te Vārua ia ’outou ’ia ’ite ē, nāhea ’outou ’ia ha’api’i ia rātou » (Ha’api’ira’a mai tā te Fa’aora, 34).

The Nativity [Te fānaura’a], nā N.C. Wyeth