Hiero nō Laie (Vaihī)

5–11 nō Tītema

Hagai ; Zekaria 1–3 ; 7–14

« ’Ei maita’i i mua i te aro o Iehova »

Nā te tai’ora’a i te mau pāpa’ira’a mo’a e tītau i te heheura’a. ’Ia vai matara noa ’outou i te mau parau poro’i tā te Vārua Maita’i e heheu mai ia ’outou ’a tai’o ai ia Hagai ’e ia Zekaria.

Pāpa’i i te mau mana’o e tae mai

I muri a’e e rave rahi matahiti i roto i te fa’atītīra’a, ’ua fa’ati’ahia te hō’ē pupu ’āti ’Īserā’ela, penei a’e tei roto ato’a te peropheta Hagai ’e ’o Zekaria, ’ia ho’i i Ierusalema. ’Ua ha’amana’o te tahi pae i roto i teie pupu mai te aha te huru ’o Ierusalema nā mua a’e i te ha’amoura’ahia. ’A feruri na i tō rātou mau mana’o ’a ’ite ai rātou i te mau hu’ahu’a fare tei riro na i te mātāmua ra ’ei fare nō rātou, ’ei vāhi ha’amorira’a nō rātou, ’e ’ei hiero nō rātou. I te feiā tei uiui ē, e hōho’a fa’ahou ānei te hiero i « te fare o te Fatu ’e tōna ato’a ’una’una i mūta’a ihora » (Hagai 2:3), ’ua parau atu ra te peropheta Hagai i te mau parau fa’aitoito a te Fatu ra : « Fa’aitoito, e te mau ta’ata ato’a o te fenua nei, tē parau mai ra Iehova, e rave i te ’ohipa : tei ia ’outou ato’a na ho’i au […] eiaha e mata’u ». « E fa’a’ī ho’i au i teie nei fare i te hanahana […] ’e i teie nei vāhi au e hōro’a atu ai i te hau. » (Hagai 2:4–5, 7,9.)

E ’ere rā te hiero mo’a ana’e tei tītauhia ’ia patu fa’ahou. E rave rahi hi’ora’a, ’ua hu’ahu’a roa ato’a te nūna’a o te Atua i te pae varua. E rahi a’e tei tītauhia nō te patu-fa’ahou-ra’a i te hō’ē nūna’a mo’a, i te taraira’a i te mau ’ōfa’i ’e te fa’a’āfarora’a i te reira nō te patu i te hō’ē papa’i hiero. I teie mahana, ’ua pāpa’ihia i ni’a i te hiero « Ha’amohi’a i te Fatu », ’e e tano taua mau ta’o ra ’eiaha nō te hō’ē noa fare, nō te hō’ē ato’a rā huru orara’a. Te nana’ora’a i teie mau parau i ni’a i « te mau oe o te hipo » ’e « te mau pāni ato’a i Ierusalema » (Zekaria 14:20–21) e mea maita’i ïa mai te mea ē, e nene’i-ato’a-hia te reira i ni’a i te mau ’ā’au ato’a. E tītau te huru mo’a mau ’ia « tupu » te mau parau ’e te mau ture a te Fatu (Zekaria 1:6) i roto ia tātou, ma te vaiiho i tōna mana ’ia taui i tō tātou nātura ’ia riro tātou ’ei mea mo’a mai iāna te huru (’a hi’o Levitiko 19:2).

Nō te hō’ē hi’ora’a rere ā manu o te mau buka a Hagai ’e a Zekaria, ’a hi’o « Hagai » ’e « Zekaria » i roto i te arata’i nō te mau pāpa’ira’a mo’a.

Mau mana’o nō te tuatāpapara’a pāpa’ira’a mo’a a te ta’ata hō’ē

Hagai 1 ; 2:1–9

« E ha’amana’o māite na i tō ’outou na mau haere’a. »

’Ua rau te mau mea faufa’a rahi ’ia rave nō te patu fa’ahou ia Ierusalema. Terā rā, i muri a’e e 15 ’e e ti’ahapa matahiti i te ho’ira’a mai te ’āti ’Īserā’ela, ’ua ’ino’ino te Fatu i te mea ē, ’aita te patura’a o te hiero i riro ’ei ’ohipa mātāmua rahi roa a’e (’a hi’o i te Hagai 1:2–5 ; ’a hi’o ato’a Ezera 4:24). ’A tai’o ai ’oe i te Hagai 1 ; 2:1–9, ’a feruri i te mau uira’a mai teie te huru : E aha te mau hōpe’ara’a i fa’aruruhia e te ’āti ’Īserā’ela nō te ’orera’a rātou e fa’aoti i te hiero ? E aha te mau ha’amaita’ira’a tā te Fatu i fafau mai ia rātou mai te mea ē, e fa’aoti rātou i te patu i tōna fare ? E nehenehe ’oe e rave i teie rāve’a nō te « ha’amana’o māite na i tō [’oe] na mau haere’a »—nō te feruri i tā ’oe mau ’ohipa e rave mātāmua roa ’e nāhea e ti’a ai ia ’oe ’ia fa’aau i te reira i ni’a i tā te Fatu ’ohipa.

’A hi’o ato’a i Te Parau Ha’api’ira’a ’e te mau Parau Fafau 95 ; Terence M. Vinson, « E mau pipi mau nā te Fa’aora », Ensign ’e ’aore rā Liahona, Novema 2019, 9–11.

Zekaria 1–3 ; 7–8 ; 14

E nehenehe te Fatu e fa’ariro iā’u ’ei mea mo’a.

’Ua ha’api’i mai te tuahine Carol F. McConkie : « Te huru mo’a ’o te ravera’a ïa i te mau mā’itira’a e riro noa te Vārua Maita’i ’ei arata’i nō tātou. Te huru mo’a, ’o te ha’apaera’a i tō tātou huru nātura ’a riro ai ’ei ta’ata mo’a ‘nā roto i te tāra’ehara a te Mesia te Fatu’ [Mosia 3:19] […] Tō tātou tīa’ira’a i te huru mo’a, ’ua fa’atumuhia ïa i ni’a i te Mesia, tōna aroha ’e tōna maita’i. » (Te nehenehe o te huru mo’a », Ensign ’e ’aore rā Liahona, Mē 2017, 9–10). ’A tāpe’a noa i teie mau ha’api’ira’a i roto i te ferurira’a ’a tai’o ai i te mau parau a te Fatu, tei hōro’ahia nā roto i te peropheta Zekaria, i te fa’aitoitora’a ia ’Īserā’ela ’ia riro mai ’ei mea mo’a a’e : Zekaria 1:1–6 ; 3:1–7 ; 7:8–10 ; 8:16–17. ’A hi’o i te mau mea tā te Fatu i ani ia ’Īserā’ela ’ia rave, ’ia ti’a iāna ’ia fa’ariro ia rātou ’ei mea mo’a. Tē nāhea ra ’oia i te tauturu ia ’oe ’ia riro ’ei mea mo’a a’e ?

Tē fa’ata’a nei Zekaria 2:10–11 ; 8:1–8 ; 14:9–11, 20–21 i te huru o te orara’a i te mau mahana i muri nei i te taime e pārahi ai tātou pā’āto’a i pīha’i iho i te Fatu i roto i te huru mo’a. E aha te aura’a o teie mau fa’a’itera’a nō te feiā e patu fa’ahou nei ia Ierusalema i te ’anotau o Zekaria ? E aha te aura’a o te reira nō oe ?

« Inaha tē haere mai ra tō ari’i ia ’oe ra : e parau ti’a tāna, ’e ’o te ora ho’i ’oia ; ha’aha’a tōna i te pārahira’a i ni’a i te ’āsini » (Zekaria 9:9). Triumphal Entry [Te tomora’a hanahana], nā Harry Anderson

Zekaria 9:9–11 ; 11:12–13 ; 12:10 ; 13:6–7 ; 14:1–9

’O Iesu Mesia te Mesia i fafauhia i te ’āti Iuda.

E rave rahi te pāpa’ira’a a Zekaria e fa’a’ite nei i te tāvinira’a a Iesu Mesia i te fenua nei ’e tōna Tae-Piti-Ra’a mai. ’A fa’aau i te mau parau tohu i muri nei i roto i te Zekaria i te mau tuha’a parau nō roto mai i te tahi atu mau buka pāpa’ira’a moa :

• Zekaria 9:9–11 (’a hi’o Mataio 21:1–11 ; 1 Petero 3:18–19)

• Zekaria 11:12–13 (’a hi’o Mataio 26:14–16 ; 27:1–7)

• Zekaria 12:10 (’a hi’o Ioane 19:37 ; Apokalupo 1:7)

• Zekaria 13:6–7 ; 14:1–9 (’a hi’o Mataio 26:31 ; Te Parau Ha’api’ira’a ’e te mau Parau Fafau 45:47–53)

E aha tā ’oe i ha’api’i mai nō ni’a i te Fa’aora ’a tuatāpapa ai ’oe i teie mau ’īrava ? Nō te aha e mea faufa’a nō ’oe ’ia māramarama i teie mau ’īrava ?

’A hi’o ato’a i te arata’i nō te mau pāpa’ira’a mo’a, « Mesia » (scriptures.ChurchofJesusChrist.org).

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Hagai 1:2–7.E nehenehe teie mau ’īrava e fa’auru i tō ’outou ’utuāfare ’ia « ha’amana’o māite na i tō ’outou na mau haere’a ». Penei a’e e nehenehe te mau melo o te ’utuāfare e ha’uti ta’ata ora i te mau pereota i roto i te ’īrava 6. E aha tā teie mau ’īrava e ha’api’i mai nei nō ni’a i te ha’afaufa’ara’a i te mau mea o te ao nei i ni’a a’e i te mau mea a te Atua ? E nehenehe ’outou e paraparau ’āmui nō ni’a i tā ’outou mau tauto’ora’a mātāmua roa ’ei ’utuāfare. Te hīmenera’a i te hō’ē hīmene mai te hīmene « Jésus Christ est mon modèle » (Chants pour les enfants, 40–41) e nehenehe te reira e tauturu i tō ’outou ’utuāfare ’ia fāito e aha tā ’outou e rave nei ma te maita’i ’e te mau vāhi e nehenehe e ha’amaita’i.

Hagai 2:1–9.Nō te ha’amata i teie mau ’īrava, e nehenehe ’outou e fa’a’ite i te ’ā’amu o te hiero nō te pū o te ’oire nō Provo, tei patu-fa’ahou-hia nā ni’a i te sēkene herehia tei pa’apa’a (’a hi’o i te video « Provo City Center Temple completed », ChurchofJesusChrist.org). ’A tai’o ai tō ’outou ’utuāfare i te Hagai 2:1–9, e nehenehe ’outou e ani i te mau melo o te ’utuāfare ’ia feruri i te hō’ē mea i roto i tō tātou orara’a ’o tē nehenehe e hōho’a i te ’ohipa nō te patu-fa’ahou-ra’a i te hiero tei vāvāhihia. E nāhea te Fatu i te patu fa’ahou ia tātou i muri a’e i te pe’ape’a rahi ’aore rā, te ’āti ?

Zekaria 3:1–7.’A tai’o ai ’outou i teie mau ’īrava, e nehenehe ’outou e fa’a’ite i te tahi mau ’ahu repo i tō ’outou ’utuāfare. E aha ra te mana’o o Iosua ’a ti’a ai ’oia i mua i te melahi i roto i te ’ahu repo ? Mai te aha te huru te hara mai te ’ahu repo ? E aha tā Zekaria 3:1–7 e ha’api’i nei ia tātou nō ni’a i te fa’a’orera’a hara ? I muri iho, e nehenehe ’outou e tāmā ’āmui i te mau ’ahu ’e e paraparau nō ni’a i te mana tāmā o te tāra’ehara a te Fa’aora.

Zekaria 8:1–8.E aha tā tātou e fa’ahiahia nei nō ni’a i te ’ōrama a Zekaria nō ni’a i te ananahi o Ierusalema ? E aha tā tātou e ’ite nei i roto i te ’ōrama ’o tā tātou e hina’aro ’ia ’ite i roto i tō tātou oire ? E nāhea tātou ’ia ani i te Fa’aora « ’ia pārahi mai i rotopū ia [tātou] » ? (’a hi’o Gary E. Stevenson, « Mau fare mo’a, mau hiero mo’a », Ensign ’e ’aore rā Liahona, Mē 2009, 101–3).

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Jésus Christ est mon modèle », Chants pour les enfants, 40–41.

Ha’amaita’i i tā ’oe iho tuatāpapara’a pāpa’ira’a mo’a

’A hi’o i te mau rāve’a nō te hi’opo’ara’a iāna iho. ’A tuatāpapa ai ’outou i te mau pāpa’ira’a mo’a, pinepine ’outou i te fa’auruhia ’ia feruri hōhonu i tā ’outou iho fafaura’a i te Metua i te ao ra ’e ia Iesu Mesia. ’A rave mai te au i te mau mana’o tā ’outou e fāri’i.