7–13 nō Novema

Hosea 1–6 ; 10–14 ; Ioela

« Nā’u e aroha noa atu ia rātou »

’A tuatāpapa ai ’outou i te mau pāpa’ira’a mo’a ’e ’a fa’aineine ai nō te ha’api’i, ’a ’imi i te fa’aurura’a nō ’ō mai i te Vārua Maita’i. E aha tei fa’auruhia ia ’outou ’ia rōtahi i te roara’a o te piha ha’api’ira’a i teie hepetoma ?

Pāpa’i i te mau mana’o e tae mai

Tītau i te mana’o

’A fa’a’ite i te hō’ē hōho’a nō te Fa’aora, ’e e ani i te mau tamari’i ’ia fa’a’ite mai i te hō’ē mea tā rātou i ’ite ’aore rā i ha’api’i mai nō ni’a iāna i teie hepetoma. E vaiiho ia rātou ’ia tāpe’a te tahi i muri mai i te tahi te hōho’a ’a fa’a’ite mai ai rātou.

Ha’api’i i te ha’api’ira’a tumu : Te mau tamari’i ’āpī

Hosea 10:12

E nehenehe au e ’imi i te Fatu.

Tē fa’a’ohipa nei te Hosea 10:12 i te mau hōho’a nō te ueuera’a huero, te ’ō’otira’a, te taime, ’e te ua nō te ani manihini ia tātou ’ia ’imi i te Fatu. ’A tai’o ai ’outou i teie ’īrava, e aha te mau mana’o ano’ite e tae mai i te ferurira’a ’o tē nehenehe e fa’auru i te mau tamari’i ’ia ’imi iāna ?

Mau ’ohipa ri’i e nehenehe e rave

• Tai’o te Hosea 10:12 i te mau tamari’i, ’e e ani ia rātou ’ia rave i te mau ’ohipa ’ōhie nō te tauturu ia rātou ’ia māramarama i te ’īrava, mai te fa’ahua tanu i te mau huero, ’te ’ohira’a mai te mau pota i roto i te ’āua, ’aore rā, te ti’ara’a i raro a’e i te ua. ’Aore rā, e fa’a’ite i te hōho’a nō te mau huero, te mau rā’au tupu ’e te ua. E tauturu i te mau tamari’i ’ia fa’aau i te tanura’a i te hō’ē huero ’e tē ’ō’otira’a i te mā’a maita’i, i te orara’a ma te parauti’a ’e te fāri’ira’a i te mau ha’amaita’ira’a a te Fatu. ’A fa’a’ite pāpū i te mau ha’amaita’ira’a tā te Fatu i nīni’i mai i ni’a ia ’outou, ’a tāmata ai ’outou i te ’imi iāna.

• ’A pāpa’i hōho’a i ni’a i te tāpura ’ere’ere te hō’ē uāti, ’e e ani i te mau tamari’i ’ia fa’a’ite mai i te mau rāve’a e ti’a ai ia tātou ’ia ’imi i te Fatu i te mau taime ta’a ’ē o te mahana. E ani i te mau tamari’i ’ia fa’ahiti mai nā muri ia ’outou te ’īrava « mai teienei e ti’a ’ia ’imi ia Iehova » (Hosea 10:12). E tauturu ia rātou ’ia māramarama ē, tei te mau taime ato’a te ’imira’a i te Fatu. ’A fa’a’ite i te mea tā ’outou e rave nei nō te ha’amana’o iāna i te mau taime ato’a.

’O Iesu Mesia tō tātou Fa’aora ’e te Tāra’ehara.

Hosea 13:4, 14

’O Iesu Mesia tō’u Fa’aora.

’A ha’api’i ai ’outou nō ni’a i te Fa’aora ’e i tāna Tāra’ehara, ’a fa’a’ite pāpū i tōna here i te mau tamari’i tāta’itahi.

Mau ’ohipa ri’i e nehenehe e rave

• ’A fa’a’ite i te mau hōho’a o te mau ta’ata e rave rahi, tō Iesu ato’a, ’e e ani i te mau tamari’i ’ia ’imi, ’o vai i rotopū i teie mau ta’ata tō tātou Fa’aora. Tai’o te Hosea 13:4, ’e e ha’apāpū ē, ’aita atu e Fa’aora maori o Iesu Mesia ana’e. ’A fa’a’ite pāpū ē maoti te tāra’ehara a Iesu Mesia, e ti’a ai ia tātou ’ia ho’i fa’ahou e ora i pīha’i iho i te Metua i te ao ra.

• E vaiiho i te mau tamari’i ’ia tāpe’a i te hōho’a ’o Iesu i ni’a i te sātauro te tahi i muri mai i te tahi ’aore rā, i roto i te mēnema ’e hō’ē hōho’a nō Iesu i rāpae i te mēnema. E ani i te mau tamari’i ’ia parau mai nō ni’a i te mau mea tā te mau hōho’a e fa’a’ite nei. ’A tai’o te Hosea 13:14 te pereota « e fa’aora vau iāna i te ’āpo’o ra ; e ho’o fa’ahou atu vau ia rātou mai te pohe mai ». ’A fa’a’ite pāpū ē, ’ua fa’aora Iesu Mesia ia tātou i te pohe ’e e nehenehe tātou e ti’afa’ahou mai. ’A hīmene ’āmui i te hō’ē hīmene nō ni’a i te ti’afa’ahoura’a, mai te « Jésus est-il ressucité ? » (Chants pour les enfants 45). ’A tauturu i te mau tamari’i ’ia ’ite i te Vārua a hīmene ai rātou.

Ioela 2:28

E nehenehe te Vārua Maita’i e arata’i iā’u.

’A ha’api’i ai ’outou nō ni’a i te tohura’a a Ioela i roto i te Ioela 2:28, ’a feruri nāhea ’outou i te tauturu i te mau tamari’i ’ia fa’aineine nō te fāri’i i te hōro’a a te Vārua Maita’i i muri a’e i tō rātou bāpetizora’ahia.

Mau ’ohipa ri’i e nehenehe e rave

• ’A tai’o i te Ioela 2:28 i te mau tamari’i, ’e ’a fa’ata’a ē te mau ta’o « te ta’ata ato’a », ’oia ho’i, « te mau tamāroa » ’e « te mau tamāhine » mai ia rātou te huru. E ani i te mau tamari’i ’ia pāpa’i hōho’a i te mau ta’ata tei fa’ahitihia i roto i teie ’īrava (te mau tamāroa ’e te mau tamāhine, te mau tamāroa ’āpī ’e te mea pa’ari, te mau tamāhine ’āpī ’e te mea pa’ari), mai ia rātou ato’a. ’A fa’ata’a ē te hō’ē rāve’a e nīni’i mai ai te Metua i te ao ra i tōna Vārua, e mea nā roto ïa i te hōro’ara’a i te Vārua Maita’i ia tātou ’ia bāpetizo-ana’e-hia tātou.

• E ani i te mau tamari’i ’ia fa’a’ite mai e aha tā rātou i ’ite nō ni’a i te Vārua Maita’i. E tauturu ia rātou ’ia māramarama ē, e nehenehe te Vārua Maita’i e ha’api’i ia tātou nō ni’a i te Metua i te ao ra ’e ia Iesu Mesia, ’e e nehenehe ’e tauturu ia tātou ’ia ’ite i te parau mau (hi’o Ioane 14:26 ; Te Parau Ha’api’ira’a ’e te mau Parau Fafau 42:17). ’A fa’a’ite i te mau ’itera’a nō te tauturu i te mau tamari’i ’ia ta’a maita’i i te mau rāve’a e nehenehe ai i te Vārua e tauturu ia tātou.

Ha’api’i i te ha’api’ira’a tumu : Te mau tamari’i pa’ari

Hosea 2:19–20

E nehenehe au e ha’apa’o pāpū maita’i i tā’u mau fafaura’a.

I roto i te buka a Hosea, tē fa’aau nei te Fatu i tāna mau fafaura’a ’e te ’āti ’Īserā’ela i te hō’ē fa’aipoipora’a. Noa atu te ha’apa’o ’ore o te mau ’āti ’Īserā’ela, ’ua here noa ’oia ia rātou ’e ’ua hina’aro ’oia ’ia ho’i mai rātou. E nehenehe teie fa’aaura’a e tauturu ia ’outou ’ia ha’api’i i te mau tamari’i nō ni’a i te faufa’a rahi o te ha’apa’ora’a i tā tātou mau fafaura’a i mua i te Fatu.

Mau ’ohipa ri’i e nehenehe e rave

• ’A parau i te mau tamari’i ē, i roto i te buka a Hosea, e fa’aau te Fatu i tāna mau fafaura’a ’e ’Īserā’ela mai te hō’ē fa’aipoipora’a. E fa’a’ite i te mau tamari’i i te hō’ē hōho’a nō te vahine ’e te tāne fa’aipoipo. E aha tā te Metua i te ao ra e hina’aro ’ia rave te hō’ē tāne ’e te hō’ē vahine te tahi i te tahi ? Nāhea e nehenehe ai tātou e fa’a’ite i te Fatu ē ’ua here tātou iāna ’e te ha’apa’o pāpū maita’i nei iāna ?

• E tauturu i te mau tamari’i ’ia māramarama ē, te mau fafaura’a tā tātou i rave ’e te Fatu ’ua fa’ata’ahia ’ia vai noa e a muri noa atu. E ani i te hō’ē o te mau tamari’i ’ia tai’o te Hosea 2:19–20, ma te ’imi i te mau ta’o e fa’a’ite ra, i te mea tā te Fatu e putapū nei nō ni’a i tāna mau fafaura’a ’e o tātou. E aha tā tātou e fafau e rave ’ia bāpetizo-ana’e-hia tātou ? Nāhea tātou ’ia ha’apa’o i teie fafaura’a tā tātou i rave ’e te Fatu ?

Hosea 13:4, 14

’O Iesu Mesia tō’u Fa’aora ’e Tāra’ehara.

Nāhea e ti’a ai ia ’outou ’ia fa’a’ohipa i te mau parau a Hosea nō te ha’apūai i te ’itera’a pāpū o te mau tamari’i nō tō rātou Fa’aora ’e Tāra’ehara ? ’A ha’api’i ai ’outou, ’a tauturu i te mau tamari’i ’ia ’ite i te ’oa’oa ’e te here nō te Tāra’ehara a Iesu Mesia.

Mau ’ohipa ri’i e nehenehe e rave

• E ani i te mau tamari’i ’ia tai’o te Hosea 13:4–14, ma te ’imi i te mau ta’o ’aore rā te mau pereota ’o tē fa’ata’a nei ia Iesu Mesia. E aha tā teie mau parau e ha’api’i nei ia tātou nō ni’a iāna ? E ani i te mau tamari’i ’ia fa’a’ohipa i te Topical Guide ’aore rā, i te Guide to the Scriptures nō te ’imi ’e nō te fa’a’ite i te tahi atu mau pāpa’ira’a mo’a ’o tē ha’api’i nei nō ni’a ia Iesu Mesia ’ei Fa’aora ’e ’ei Tāra’ehara. ’A fa’a’ite atu i tō ’outou ’itera’a pāpū nō ni’a i te Fa’aora, ’e ’a hōro’a i te mau tamari’i i te rāve’a ’ia nā reira ato’a.

• Nō te tauturu i te mau tamari’i ’ia māramarama, e mea nāhea tō tē Fa’aora fa’aorara’a ia tātou mai te pohe mai, ’a fa’a’ite i te video « Handel’s Messiah: Debtor’s Prison » (ChurchofJesusChrist.org). E aha tā tātou e ’apo mai nā roto mai i teie video ’o te tauturu ia tātou ’ia māramarama i te mea tā te Fa’aora i rave nō tātou ?

Ioela 2:28-29

E nehenehe te Vārua Maita’i e arata’i iā’u.

E rave rahi mau tamari’i tā ’outou e ha’api’i nei, ’ua bāpetizohia paha ’e ’ua fāri’i i te hōro’a o te Vārua Maita’i. Nāhea e ti’a ai ia ’outou ’ia fa’a’ohipa i teie mau pāpa’ira’a mo’a nō te tauturu ia rātou ’ia māramarama i te mana ’e te mau ha’amaita’ira’a e tae mai nā roto i te fa’aro’ora’a i te reo o te Vārua ?

Mau ’ohipa ri’i e nehenehe e rave

• E ani i te mau tamari’i ’ia tai’o ’āmui ia Ioela 2:28–29, ma te tu’ura’a i tō rātou iho i’oa i te vāhi nō te mau parau ra « te mau tamāroa » ’e « te mau tamahine ». ’A pāpa’i i ni’a i te tāpura ’ere’ere te hō’ē pereota mai E nehenehe tā te Vārua maita’i e… ’e e ani i te mau tamari’i tāta’itahi ’ia fa’aoti i te reira pereota. ’A fa’aitoito ia rātou ’ia tu’u i te mau mea tā rātou i ’apo mai nō roto mai i te Ioane 14:16 ; Moroni 10:5 ; Te Parau Ha’api’ira’a ’e te mau Parau Fafau 42:17, ’e te tahi atu mau pāpa’ira’a mo’a.

• ’A tu’u i te hō’ē tao’a i roto i te hō’ē ’āu’a, ’e e vaiiho i te mau tamari’i tāta’itahi ’ia māni’i i te pape i ni’a iho. ’A fa’ata’a atu ē ’ua fa’ahōho’ahia, te tao’a ’o tātou ïa, ’e te pape ’o te Vārua Maita’i ïa. ’Ia bāpetizo-ana’e-hia tātou, e fāri’i tātou i te hōro’a o te Vārua Maita’i, ’o te hō’ē ïa rāve’a tā te Fatu i fa’atupu tāna fafaura’a ’ia « nīni’i mai i [tōna] Vārua ». E aha tā tātou e ti’a ’ia rave nō te fāri’i i te Vārua Maita’i ? E ani i te mau tamari’i ’ia fa’a’ite mai i te mau taime ’a fāri’i ai rātou i te fa’aurura’a a te Vārua.

Fa’aitoito i te ha’api’ira’a i te fare

E tauturu i te mau tamari’i ’ia ’ite mai i te mau mea tā rātou i ha’api’i mai nō ni’a i te Metua i te ao ra, ia Iesu Mesia, ’aore rā, te Vārua maita’i i teie mahana i roto i te piha. ’A fa’aitoito ia rātou ’ia fa’a’ite atu i teie mai mea i tō rātou ’utuāfare.

Ha’amaita’i i tā tātou ha’api’ira’a

’Imi i te heheura’a i te mau mahana ato’a. ’A fa’aineine ai ’outou nō te ha’api’i, ’a pure ’e ’a feruri māite i te mau pāpa’ira’a mo’a i te roara’a o te hepetoma. E nehenehe te mau mana’o ’e te mau fa’aurura’a e nāhea ’ia ha’api’i e tae mai i te mau taime ’e i te mau vāhi ato’a. (Hi’o Ha’api’ira’a mai tā te Fa’aora, 32.)