« 14–20 nō Novema. Amosa ; Obadia : ‘E ’imi ’outou ia Iehova, e ora ïa ’outou’ », Mai, pe’e mai—nō te Paraimere : Faufa’a Tahito 2022 (2021)
« 14–20 nō Novema. Amosa ; Obadia », Mai, pe’e mai—nō te Paraimere : 2022
Bread of Life [Te pāne ora], nā Chris Young
14–20 nō Novema
Amosa ; Obadia
« E ’imi ’outou ia Iehova, e ora ïa ’outou »
’A fa’atumu ai ’outou i ni’a i te ha’api’ira’a tumu mau ma te mau rāve’a ’ōhie, te hōro’a ra ’outou i te mau rāve’a nō te Vārua maita’i nō te fa’a’ite pāpū i te mau tamari’i. ’A fa’a’ohipa i te mau ’ohipara’a i roto i teie arata’ira’a—’aore rā a hāmani i tā ’outou iho—nō te tauturu ia ’outou ia ha’api’i i te mau parau tumu o te ’evanelia nā roto i te mau rāve’a ’ōhie.
Pāpa’i i te mau mana’o e tae mai
Tītau i te mana’o
’A ani i te mau tamari’i ’ia fa’a’ite mai i te hō’ē mea tā rātou i ha’api’i i te fare ’aore rā, i te fare purera’a. ’Ei hi’ora’a, ’a ani mai te mea ’ua ’itehia ia rātou te mau pāpa’ira’a mo’a ’apī ’aore rā ’ua fa’aro’o mai anei rātou i te hō’ē parau poro’i tā rātou e ti’a ’ia fa’a’ite atu i te piha ha’api’ira’a.
Ha’api’i i te ha’api’ira’a tumu : Te mau tamari’i ’āpī
E ve’a te mau peropheta nā Iesu Mesia.
Hō’ē o te mau mea faufa’a roa tā te mau tamari’i e ti’a ’ia ’ite nō ni’a i te mau peropheta ’oia ho’i, e mau ve’a ia rātou nā Iesu Mesia. E nehenehe te mau mana’o i raro nei e tauturu ia ’outou ’ia ha’api’i ia rātou i teie parau mau faufa’a rahi.
Mau ’ohipa ri’i e nehenehe e rave
-
E muhumuhu i te hō’ē poro’i i te hō’ē o te mau tamari’i nō te toe’a o te piha ha’api’ira’a (mai te anira’a i te mau tamari’i ’ia ti’a i ni’a i te hō’ē ’āvae ’aore rā ia ta’ahi i roto i te hō’ē ha’amenemenera’a), ’e ’a ani iāna ’ia fa’a’ite mai i te parau poro’i i te tahi atu mau tamari’i. ’A tāpiti fa’ahou i teie ’ohipara’a, ’a vaiiho i te tahi mau tamari’i ’ia riro mai ’ei ve’a. E tauturu ia rātou ’ia ta’a maita’i ē, te ve’a i roto i teie ’ohipa, mai te peropheta rā ïa tōna huru, o te fa’a’ite mai nei i te parau poro’i a te Atua ia tātou. ’A fa’a’ite i te tahi mau hi’ora’a o te mau parau poro’i ’apī nō roto mai i te peropheta ora tei tauturu ia ’outou ’ia tupu i te rahi i pīha’i iho ia Iesu Mesia.
-
E ani i te hō’ē tamari’i ’ia ti’a i mua i te piha ’e ’ia fa’ahua ’ei peropheta Amosa. ’A fa’a’ite ai ’outou i te tahi mau ’ohipa nō ni’a ia Amosa i roto i te Amosa 7:14–15, ’a hōro’a atu i te tamari’i i te mau hōho’a ’aore rā te mau tauiha’a nō te tāpe’a i te reira i te mau ’ohipa ato’a, mai te hōho’a o te māmo’e, te hotu, ’e te Fatu. ’A fa’ata’a ē, e o Amosa o te hō’ē īa tīa’i māmoe, tā te Fatu i pi’i ’ia riro ’ei ve’a nāna. I muri iho ’a fa’a’ite i te mau hōho’a o te Fatu ’e te peropheta ora, ’e ’a fa’ata’a ē, te tāmau noa nei ā te Fatu i te pi’i i te mau ve’a i teie mahana. ’A tai’o i te Amosa 3:7 ma te puai, ’e ’a ani i te mau tamari’i ’ia fa’atoro i te hōho’a tano ’ia fa’aro’o ana’e rātou i te mau parau « te Fatu » ’e « te mau peropheta. » ’A fa’a’ite i tō ’outou ’itera’a pāpū ē, mai te tau mai ā o Amosa, te parauparau nei Iesu Mesia ia tātou nā roto i tāna mau peropheta.
-
’A fa’a’ite i te hō’ē ’ā’amu nō roto mai i te hō’ē ve’a ’apī a te ’Ēkālesia nō ni’a i te peropheta ora ’aore rā, nō ni’a i te mau ’ohipa tei tupu i rotōpu i te mau melo o te ’Ēkālesia i tō rātou pe’era’a atu i te a’o a te peropheta. (Hi’o ato’a te « Mau peropheta ’e te mau ’āpōsetolo o teie mahana » i ChurchofJesusChrist.org)
-
’A hīmene ’aore rā ’a ha’uti i te hō’ē haruharura’a hīmene nō ni’a i te mau peropheta, mai te « Suis les prophètes » (Chants pour les enfants, 58–59), ’a ’ohipa ai te mau tamari’i i roto i te ’api ’ohipara’a nō teie hepetoma. ’A fa’a’ite i te mau tamari’i i te mau pereota i roto i te hīmene o te ha’api’i nei ē nāhea te mau peropheta e fa’a’ite ai i te ’ē’a ia Iesu Mesia.
Mai te mea ē, e ’imi au i te maita’i, e vai noa mai ïa te Fatu i pīha’i iho iā’u.
Te ani manihini nei Amosa i tō ’Īserā’ela ’ia « ’imi i te maita’i, eiaha rā te ’ino » ’e ’ua parau mai ē, mai te mea ’ua nā reira rātou, « ’ei pīha’i ato’a iho te Atua sabaota ra o Iehova ia ’outou. » Nāhea ’outou ’ia tauturu i te mau tamari’i ’ia pāhono i teie anira’a ’e ’ia fāri’i i teie fafaura’a ?
Mau ’ohipa ri’i e nehenehe e rave
-
’A pia e rave rahi hōho’a o te mau tamari’i e rave rā i te mau mea maita’i, mai te tauturura’a ia vetahi ’ē ’aore rā, te ravera’a i te ’ōro’a mo’a. ’A vaiiho i te tamari’i tāta’itahi ’ia fa’a’ite i te mau hōho’a a feruri ai te tahi atu mau tamari’i, e aha te hōho’a tāna e fa’ata’a nei. ’A tai’o Amosa 5:14, ’e ’a tauturu i te mau tamari’i ’ia feruri i te mau rāve’a e ti’a ai ia rātou ’ia « ’imi i te maita’i » i te mau mahana ato’a.
-
E ani i te mau tamariʼi ʼia pāpaʼi i tō rātou iho hōhoʼa i te rāvera’a i te ’ohipa maita’i. ’A tai’o Amosa 5:14, ’e ’a ha’apāpū i te parau fafau a te Fatu, e pārahi mai ’Oia i pīha’i iho ia tātou ’ia ’imi ana’e tātou i te maita’i. ’A ani i te mau tamari’i ’ia tu’u ’e tā rātou hōho’a pāpa’i i te hō’ē hōho’a nō Iesu i te ti’ara’a i pīha’i iho ia rātou.
Ha’api’i i te ha’api’ira’a tumu : Te mau tamari’i pa’ari
Te heheu mai nei te Fatu i te mau parau mau i tāna mau peropheta.
E ve’a te mau peropheta nā Iesu Mesia.
Amosa 3:7 o te hō’ē īrava rahi no te pāpa’ira’a mo’a nō te tauturu i te mau tamari’i ’ia ’ite ē, ’ia fa’aro’o ana’e tātou i te peropheta, te fa’aro’o ra ïa tātou i te ve’a a Iesu Mesia.
Mau ’ohipa ri’i e nehenehe e rave
-
Tauturu i te mau tamari’i ’ia tāmau ’ā’au i te mau mea ato’a ’aore rā, i te tahi tuha’a nō Amosa 3:7. ’Ei hi’ora’a, ’a hōro’a ia rātou i te tahi ma’a minuti nō te tai’o i te ’īrava e rave rahi taime ’a pāpa’i ai ’outou i te tahi atu mau parau o te ’īrava i ni’a i te tāpura ’ere’ere. E ani i te mau tamari’i ’ia tāpiri i tā rātou mau pāpa’ira’a mo’a ’e ’ia parau i te ’īrava ma te puai, ma te fa’a’ohipa i te mau tāpa’o i ni’a i te tāpura ’ere’ere. I muri iho a tūmā i te tahi mau ta’o i te taime hō’ē ē tae roa i te taime e nehenehe te mau tamari’i e fa’ahiti fa’ahou i te ’īrava ta’ato’a ma te mau tāpa’o ’ore. E aha tā teie ’īrava e ha’api’i nei ia tātou nō ni’a i te mau peropheta ? E mea nāhea tā tātou peropheta ora i te tauturura’a ia tātou ’ia ’ite e aha tā te Fa’aora e hina’aro nei ia tātou ’ia rave ?
-
E pāpa’i i te mau uira’a e rave rahi nō ni’a i te mau peropheta i ni’a i te mau ’api parau mai teie i muri nei : Nō te aha e peropheta tā tātou ? E aha te ’ohipa ’a te mau peropheta ? Nō te aha ’outou e pe’e nei i te peropheta ? E aha tā te mau peropheta e ha’api’i mai nei ? ’A ani i te mau tamari’i ’ia ’āpipiti, ’e ’a ani i te hō’ē tamari’i i roto i te pupu tāta’itahi ’ia mā’iti i te hō’ē uira’a ’e ’ia ani i tōna hoa ’ia pāhono i te reira. Mai te mea e hina’aro te mau tamari’i i te tauturu nō te pāhonora’a i te hō’ē uira’a, e nehenehe tā rātou e hi’o atu i te « Peropheta » i roto i te buka arata’i nō te mau pāpa’ira’a mo’a (scriptures.ChurchofJesusChrist.org). Ia oti te hoa i te pāhono i te uira’a, e taui te mau tamari’i i te ti’ara’a ’e e mā’iti i te tahi atu uira’a.
-
’A fa’a’ite i te mau tamari’i e rave rahi mau ohipa nō ni’a i te hō’ē peropheta o te Faufa’a Tahito tā rātou i ha’api’i mai i teie matahiti (mai ia Noa, Mose, ’aore rā Isaia). ’A ani ia rātou ’ia ’imi o vai te peropheta tā ’outou e fa’aite nei. ’A na reira fa’ahou nō te tahi atu ā mau peropheta.
Mai te mea ē, e ’imi au i te maita’i, e vai noa mai ïa te Fatu i pīha’i iho iā’u.
E rave rahi rāve’a tā te mau tamari’i nō te mā’iti i te i rotopū i te mau mea ti’a ’e te ’ino. ’A feruri nāhea ’outou i te fa’auru ia rātou ’ia « ’imi i te maita’i, eiaha te ’ino » (’īrava 14).
Mau ’ohipa ri’i e nehenehe e rave
-
E ani i te mau tamari’i ’ia ’imi i te Amosa 5:4–15, ma te ’imi i te ta’o « ’imi ». E aha tā te Fatu e hina’aro ia tātou ’ia ’imi, ’e eaha te fafaura’a tāna nō rātou o te rave i te reira ? Nāfea tātou i te ’imi i te Fatu ?
-
Tauturu i te mau tamari’i ’ia tāmau ’ā’au i te pereota hōpe’a o te hīro’a fa’aro’o ahuru mā toru. Nāhea tātou i te « ’imi i teie mau mea » ?
Nā te fa’aho’i-fa’ahou-ra’a mai o te ’evanelia i tāpe’a i te o’e o te tāivara’a.
Te māramaramara’a i te ha’api’ira’a a Amosa nō ni’a i te tāivara’a, e nehenehe e tauturu i te mau tamari’i ’ia ’ite ma te māuruuru nō te fa’aho’i-fa’ahou-ra’a mai o te ’evanelia.
Mau ’ohipa ri’i e nehenehe e rave
-
E ani i te mau tamari’i ’ia tai’o i te Amosa 8:11–12, ’e ’ia parauparau nō ni’a i te mea e tupu ia ’ore ana’e te ta’ata e fāri’i i te parau a te Fatu. E tauturu i te mau tamari’i ’ia fa’ata’a mai i te mau ta’o nō te tāivara’a ’e te o’e, ma te fa’a’ohipa i te Buka arata’i i te mau pāpa’ira’a mo’a (scriptures. ChurchofJesusChrist.org) ’aore rā te hō’ē titionare. Nāhea te tāivara’a e au ai i te hō’ē o’e ?
-
Nō te tauturu i te mau tamari’i ’ia māramarama i te tāivara’a rahi, a hi’o fa’ahou nā muri iho ia rātou « I muri a’e i te Faufa’a ’Āpī » (i roto i te mau ’Ā’amu o te Faufa’a ’Āpī, 167–70). I muri iho ’a ’āparau i te mau uira’a mai teie te huru: Nō te aha te hō’ē tāivara’a ? E aha tei tupu i roto i te tāivara’a ? Nō te aha te Fatu i fa’aho’i-fa’ahou-mai ai i tāna ’evanelia ? (hi’o ato’a « Te Fa’aho’i-fa’ahou-ra’a o te ’īra’a o te ’Evanelia a Iesu Mesia : E poro’i nō te piti-hānere-ra’a matahiti i tō te ao nei », ChurchofJesusChrist.org). ’A fa’aitoito i te mau tamari’i ’ia pāpa’i i teie mau uira’a ’e tā rātou mau pāhonora’a ’e ’ia fa’a’ite atu i te reira i tō rātou ’utuāfare i te fare.
Fa’aitoito i te ha’api’ira’a i te fare
’A hōro’a i te mau tamari’i i te tahi taime nō te feruri i te hō’ē mea tā rātou i ’apo mai i teie mahana o tā rātou e hina’aro nei e fa’a’ite atu i te hō’ē melo o te ’utuāfare. ’A fa’aitoito ia rātou ’ia fa’aoti ē, o vai tā rātou e fa’a’ite atu i te reira, e nāhea rātou i te fa’a’ite i te reira.
Ha’amaita’i i tā tātou ha’api’ira’a
Fa’atae i te mau anira’a ’o te fa’atura i te ti’amāra’a. ’A ui i te mau uira’a o te tauturu i te mau tamari’i ’ia feruri i te mau rave’a nō te fa’a’ohipa i te mea tā rātou i ha’api’i mai. ’Ei hi’ora’a, e nehenehe tā ’outou e ui, « Eaha te hō’ē mea tā ’outou e mana’o ra ē, e ti’a ia ’outou ’ia fa’atumu i ni’a i te mau mea tā tātou i parauparau mai i teie mahana ? »
