I muri a‘e i te Faufaa Apî
Ua hinaaro te feia iino e taui i te mau faaueraa. Ua faaroo te tahi mau feia mo‘a ia ratou. E rave rahi tei faaea i te ti‘aturi ia Iesu e aita e haapa‘o faahou i Ta’na mau faaueraa.
Ua taparahi-pohe-hia te mau aposetolo e te feia mo‘a e rave rahi. Aore e taata i faaorahia no te arata‘i i te Ekalesia. Ua iriti-ê-hia te mau taviri o te autahu‘araa i te fenua nei. Aita e peropheta to te mau taata no te arata‘i ia ratou. Aita e Ekalesia faahou na Iesu Mesia i ni‘a i te fenua nei. Ua parau te aposetolo Petero e o Paulo e, e tupu mau te reira.
Mataio 23:34; 24:8–10; Roma 8:36; 1 Korinetia 4:9–13; 1 Petero 4:12; Iesu te Mesia, 745–46
Ua ma‘iri e rave rahi hanere matahiti. Ua rau te ekalesia e vai ra. Aore hoê o ratou e aposetolo e aore râ, e autahu‘araa a te Atua i roto. Aore hoê ekalesia e Ekalesia na Iesu Mesia. Tera râ, ua parau mai te mau peropheta e, i muri a‘e i te mau matahiti e rave rahi, e ho‘i faahou mai te Ekalesia a Iesu Mesia i ni‘a i te fenua nei.
I te matahiti 1820 ua hinaaro te hoê tamaiti tei piihia o Iosepha Semita ia ite e, tei hea te Ekalesia a Iesu Mesia. Ua haere oia i roto i te uru raau fatata mai i to’na fare e ua pure. Ua ani oia i te Atua ia faaite mai ia’na tei hea te ekalesia mau.
Ua fâ mai te Metua i te Ao ra e o Iesu Mesia ia Iosepha Semita. Ua parau maira te Faaora ia Iosepha eiaha e amui atu i roto i te hoê noa a‘e o te mau ekalesia, no te mea e ere te hoê o ratou i Ta’na ra Ekalesia.
Ua faaoti te Atua ia faaho‘i mai i te Ekalesia a Iesu Mesia i ni‘a i te fenua nei na roto ia Iosepha Semita. Ua tono mai te Atua i te mau melahi no te horo‘a i te autahu‘araa ia Iosepha Semita. Ua tauturu Oia ia Iosepha ia iriti i te Buka a Moromona. I te 6 no eperera 1830, ua faati‘a-faahou-hia te Ekalesia a Iesu Mesia i ni‘a i te fenua nei.
Mai ia Iesu i ma‘iti Ahuru e Ma Piti Aposetolo i To’na tau i ni‘a i te fenua nei, ua tauturu te Atua ia Iosepha Semita ia ma‘iti Ahuru e Ma Piti Aposetolo no te tauturu ia’na ia arata‘i i te Ekalesia. Ua horo‘ahia i teie mau taata te mana no te haapii i te evanelia e no te faatupu i te semeio.
Ua hinaaro Iesu ia ite te mau taata atoa i te parau no Ta’na Ekalesia. Ua parau Oia ia Iosepha Semita ia tono i te mau misionare e haapii i te mau taata atoa i te parau no te Ekalesia a Iesu Mesia i te Feia Mo‘a i Te Mau Mahana Hopea nei.
Te Ekalesia a Iesu Mesia i te Feia Mo‘a i Te Mau Mahana Hopea nei o taua Ekalesia ra ta Iesu i faati‘a a ora ai Oia i ni‘a i te fenua nei.