Pene 50
Te tahi atu mau haapiiraa i te tamaaraa hopea
Ua parau atu ra Oia e, mai te mea e here te mau aposetolo Ia’na, e haapa‘o ïa ratou i Ta’na mau faaueraa. Ua fafau mai Oia ia ratou i te horo‘a o te Varua Maitai. Na te Varua Maitai e haapii ia ratou i te mau mea atoa ta ratou e hinaaro ia ite. E tauturu te Varua Maitai i te mau aposetolo ia haamana‘o i te mau mea ta Iesu i haapii mai ia ratou ra.
Ua parau Iesu e, e au Oia mai te vine. E au Ta’na mau pĭpĭ mai te mau amaa o te vine. Te amaa ana‘e tei ati papû i ni‘a i te vine ra e rahi ïa te hoturaa.
Ua fafau o Iesu i Ta’na mau aposetolo e, mai te mea e e haapa‘o ratou i te evanelia, e maitai ta ratou hotu (ta ratou mau ohipa). Mai te mea e eita ratou e pee Ia’na, e au ïa ratou mai te mau amaa e tapu-ê-hia i te tumu aore ho‘i e hotu.
Ua pure Iesu Mesia ia tahoê Ta’na mau aposetolo. Ua hinaaro Oia ia haapii ratou i te taata ia ti‘aturi Ia’na e ia ite e, ua here te Metua i te Ao ra ia ratou.
E ua himene a‘e ra o Iesu e te mau aposetolo i te hoê himene e ua haere atu ra i rapae i te piha.