Pene 33
Te fâraa mai ma te hanahana: Te faahuru‘eraa
Ua afa‘i Iesu ia Petero, Iakobo e Ioane i ni‘a i te hoê mou‘a teitei no te pure.
A pure ai Iesu, ua tae maira te hanahana o te Atua i ni‘a Ia’na. E anaana to To’na mata mai to te mahana te huru. E piti na peropheta o te Faufaa Tahito, o Mose e o Elia, tei fâ mai Ia’na ra. Ua paraparau ratou no ni‘a i To’na poheraa e To’na ti‘a-faahou-raa e fatata maira.
Mataio 17:2–3; Mareko 9:3–4;Luka 9:29–31 (a hi‘o i te nota 31a i raro i te api)
A pure ai Iesu, ua taoto ihora te mau aposetolo.
Ia ara mai ratou ra, ua ite a‘e ra ratou i te hanahana o Iesu Mesia, o Mose e o Elia. Ua faaroo a‘e ra ratou i te reo o te Metua i te Ao ra i te faaiteraa e, « ta‘u Tamaiti here teie, ua mauruuru roa vau Ia’na ; a faaroo Ia’na ».
Ua mata‘u te mau aposetolo e ua tipapa ihora i raro. Ua tape‘a maira Iesu ia ratou e ua parau maira eiaha e mata‘u. Ia hi‘o a‘e ra ratou i ni‘a, ua reva te mau ve‘a no te ra‘i. Ua parau Iesu i te mau aposetolo eiaha e parau i te taata i te mea ta ratou i ite ra e tae roa’tu i muri a‘e i To’na poheraa e To’na ti‘a-faahou-raa.