Pene 55
Ua faatere te mau aposetolo i te Ekalesia
I muri a‘e i to’na ti‘a-faahou-raa, ua faaea Iesu i piha‘iho i Ta’na mau aposetolo e 40 mahana. Ua haapii Oia ia ratou e rave rahi mau mea no ni‘a i te evanelia e no ni‘a i Ta’na Ekalesia.
Ua parau Oia ia ratou ia haapii i te evanelia i te mau taata atoa. Ua parau atoa Oia e, e faaru‘e mai Oia ia ratou a‘uanei, tera râ, e haere mai te Varua Maitai e tauturu ia ratou.
Ua hi‘o noa a‘e ra te mau aposetolo ia Iesu i te revaraa’tu i roto i te ata. Ua parau maira na toopiti melahi i roto i te ahu uouo i te mau aposetolo e, e ho‘i mai â Iesu i te hoê mahana mai te ra‘i mai.
O te mau aposetolo te feia faatere i teie nei no te Ekalesia a Iesu Mesia i ni‘a i te fenua nei. O Petero te peresideni, e o Iakobo e o Ioane to’na na tauturu.
Mataio 16:18–19; Te Parau Haapiiraa e Te Mau Parau Fafau 81:1–2; Iesu te Mesia 219–20
Ahuru ma hoê ana‘e aposetolo—ua pohe o Iuda. Ua parau te Metua i te Ao ra i te mau aposetolo ia ma‘iti ia Matatia ia riro ei hoê melo no te Tino Ahuru e Ma Piti Aposetolo. E piiraa taa ê to te mau aposetolo atoa i roto i te autahu‘araa.
E faaroo i te Fatu to roto i te mau aposetolo e i te tahi atu mau pĭpĭ. Ua haapa‘o ratou i Ta’na mau faaueraa. Ua here ratou te tahi i te tahi.
Na roto i te autahu‘araa e te mana o te Varua Maitai, e nehenehe i te mau aposetolo e rave i te mau mea e rave rahi. Ua faaora ratou i tei ma‘ihia e e mau misionare ratou. Ua haapii ratou i te parau no Iesu Mesia e no Ta’na evanelia. E rave rahi taata tei ti‘aturi i te mau parau a te mau aposetolo e ua amui mai i te Ekalesia. Ua parauhia te mau melo o te Ekalesia e feia mo‘a.