Pene 38
Te pharisea e te telona
E toopiti na taata i te haereraa i te hiero ra e pure. E pharisea te tahi. E te tahi ra e telona, e putu tute te toro‘a. Aita te taata e au i te feia putu tute. Ua mana‘o ratou e, e feia parau ti‘a ore te feia putu tute
Te ti‘a noa ra te pharisea i mua i te taata no te pure. Ua haamaitai oia i te Atua i te mea e, ua hau a‘e to’na maitai i to te tahi atu mau taata. Ua parau oia e tata‘ipiti a’na haapaeraa maa i te hepetoma hoê e te aufau nei i ta’na tuhaa ahuru. Area te telona ra te ti‘a noa ra ïa oia ana‘e, ma te taupe te upoo e ma te pure, « e te Atua e aroha mai oe ia‘u te taata hara nei ».
Ua mana‘o te pharisea e ua hope roa oia i te maitai e aita ho‘i i hinaaro i te tauturu a te Atua. Area te telona ra, ua ite ïa e aita oia i hope i te maitai e te hinaaro nei oia i te tauturu a te Atua. E haehaa to roto ia’na e ua ani oia i te Atua ia faaore mai i ta’na hapa.
Ua parau atu ra Iesu e, e ti‘a i te taata ia riro mai te telona ra te huru. Eiaha ratou e feruri e, ua hau a‘e ratou i te maitai i te mau taata atoa. Ia tatarahapa ratou i ta ratou mau hara e ti‘a ai, e ia ani i te Atua ia faaore mai i ta ratou hapa.