Pene 53
Ua faasataurohia o Iesu
Ua ta‘iri te mau faehau ia Iesu i te taura hui. Ua faaahu a‘e ra ratou Ia’na i te ahu ura. Ua hamani ratou i te hoê hei raau taratara e ua tuu atu ra i ni‘a i te upoo o Iesu. Ua ata ratou Ia’na e ua tuha i ni‘a Ia’na. E ua pii Ia’na « te Arii o te Ati Iuda ».
E rave rahi taata tei apee i te mau faehau a hopoi atu ai ratou ia Iesu i te hoê mou‘a tapiri mai i Ierusalema. Ua faaamo ratou Ia’na i To’na iho satauro. Ua patiti ratou i To’na rima e te avae i te naero i ni‘a i te satauro e ua faati‘a i ni‘a. Ua faasatauro atoa ratou e toopiti taata ê atu, e na taata eia.
Ua pure o Iesu. Ua ani Oia i te Metua i te Ao ra ia faaore mai i te hapa a te mau faehau tei faasatauro Ia’na. Aita ratou i ite e, o Oia te Faaora.
Te ti‘a noa ra o Maria, te metua vahine o Iesu, i piha‘iho i te satauro. Tei reira atoa te aposetolo Ioane. Ua parau atu ra o Iesu ia Ioane ia aupuru i To’na metua vahine. Ua afa‘i atu ra o Ioane i te metua vahine o Iesu i to’na ra fare.
Ua tapo‘i a‘e ra te pouri i te fenua. Ua mauiui te Faaora i ni‘a i te satauro e rave rahi hora. I te hopea ra, ua faaru‘e maira To’na varua i To’na tino, e ua pohe a‘e ra Oia.
Ia pohe Oia ra, ua parari hu‘ahu‘a roa a‘e ra te ofa‘i i te aueueraa fenua. Ua mahae te paruai na ropu i roto i te hiero, tei parauhia te paruru. Ua mata‘u te mau faehau Roma.
Ua iriti ê a‘e ra hoê o te mau pĭpĭ a Iesu i te tino o te Faaora i te satauro. Ua puohu a‘e ra i roto i te hoê ahu e ua tuu atu ra i roto i te menema, te vahi i reira e hunahia ai te taata. Ua faaterehia maira te hoê ofa‘i rahi i mua i te menema.