Pene 9
Te Tamaiti o Iesu
Ua paari Iesu i roto i te oire no Nazareta. E rave rahi mau mea Ta’na i haapii mai e « itoito atu ra i te aau… e te vai ra te maitai a te Atua i ni‘a ia’na ».
Ia 12 a‘e ra te matahiti o Iesu, haere atu ra Oia na muri iho ia Iosepha e o Maria na roto i te hoê pŭpŭ taata i te hoê oro‘a i Ierusalema. E rave rahi mahana to ratou parahiraa i reira.
Ia ho‘i a‘e ra Iosepha e o Maria i to ratou ra oire, ua mana‘o raua e, te ho‘i atoa maira Iesu i Nazareta na muri iho i To’na mau hoa. Ua faaea râ Iesu i Ierusalema.
Ia imi a‘e ra Iosepha e o Maria ia Iesu, aita a‘e ra Oia i itehia ia raua. Aore hoê o to ratou pŭpŭ i ite Ia’na. No reira, ho‘i faahou atu ra Iosepha e o Maria i Ierusalema. E toru mahana to raua imiraa ia Iesu. Ua oto roa raua.
I te pae hopea, ua ite atu ra raua ia Iesu i roto i te hiero, te paraparau ra i te tahi mau orometua. Te pahono ra Oia i ta ratou mau uiraa. Ua maere te mau orometua haapii i te rahi o to Iesu ite.
Luka 2:46–47 (a hi‘o te nota 46c i raro i te api)
Ua parau atu ra Maria ia Iesu e, i imi noa ho‘i raua o Iosepha Ia’na ma te pe‘ape‘a. Pahono maira Iesu e, te haapa‘o ra Oia i te ohipa a To’na ra Metua —te ohipa a te Atua. Aita Iosepha e o Maria i taa i te parau Ta’na i parau maira.
Ua ho‘i Iesu i te fenua ai‘a no Nazareta na muri iho ia Iosepha e o Maria e ua haapa‘o i ta raua parau.
Ua haapii tamau maite Iesu i te ohipa a To’na Metua i te Ao ra.
Ua tupu Oia i te rahi e te paari.
Ua here te taata Ia’na. Ua rave Oia i ta te Atua i hinaaro ia rave Oia.
Ua here te Atua Ia’na.